Ihim a swi vuli swona. Hambileswo, leswi a nga swi vula i ntiyiso.

Pimisa hi leswi Davhida a nga swi tsala ka ndzimana leyi ni ka tindzimana tin’wani. A te: “Ni ta yimbelela ni dzunisa vito la wena hi masiku ni masiku.” “Na ku dzunisa, wena Yehovha Xikwembu xa mina, hi mbilu ya mina hinkwayu, ni ta vangamisa vito la wena hi masiku ni masiku.” “Ni ta dzunisa vito la wena hi masiku.” — Pis. 61:8; 86:12; 145:1, 2.

Nkama Davhida a nga tsala marito lawa, a a nga ko tibyela swaku yena a a nga ta fa. A a swi tiva swaku hinkwerhu hi ni xidjoho naswona hi wugamu hi ta fa, funtshi a a swi tiva swaku hambi yena a na xona xidjoho. (Gen. 3:3, 17-19; Pis. 51:4, 5) Phela a a swi tiva swaku hambi hi vanhu lava a va rhandziwa hi Xikwembu va ku fana na Abrahamu, Izaki na Yakobo va file funtshi a a nga kanakani swaku na yena siku lin’wani a a ta fa. (Pis. 37:25; 39:4) Kambe ka marito lawa ma nga ka Tipisalema 61:8, Davhida a a kombisa ku navela ni ku tinyimisela ka yena ku dzunisa Yehovha hi nkama wa ku kala wu nga heli, leswi vulaka swaku a a lava ku mu dzunisa wutomi la yena hinkwalu. — 2 Sam. 7:12.

Minkama yin’wani Davhida a a tsala leswi nga mu yendlekela ka wutomi la yena. Leswo swa tikomba ka marito lawa ma kumekaka henhla ka Tipisalema ndzima 18, ndzima 51, ni ndzima 52. Ka Tipisalema 23, Davhida a vule swaku Yehovha a fana ni murisi lweyi a kongomisaka, a pepisa a tlhela a vhikela vanhu va yena. Davhida na yena a a tekelela Yehovha, naswona a a lava ku tirhela Yehovha wutomi la yena hinkwalu. — Pis. 23:6.

A hi khumbukeni swaku hinkwaswu leswi Davhida a nga swi tsala a a kongomisiwa hi Yehovha. A tlhele a tsala ni wuprofeta leli vulavulaka hi leswi nga ta yendleka ka nkama lowu taka. Hi xikombiso, ka Tipisalema 110 Davhida a te a ku ta fika nkama lowu a ku ta va ni Hosi leyi a yi ta “tshama ka voko la xinene la Xikwembu amatilweni” naswona a yi ta yamukela matimba. Kasi a yi ta yendla yini hi matimba wolawo? A yi ta ma tirhisa swaku yi helisa valala va Xikwembu yi tlhela yi “yavanyisa matiko”. Davhida a a li vhovho wa Hosi yoleyo, ku nga Mesiya lweyi a nga ta fuma na a li matilweni a tlhela a va “muprista hi masiku ni masiku.” (Pis. 110:1-6) Yesu a vule swaku wuprofeta leli nga ka Tipisalema 110 a li vulavula hi yena naswona a li ta hetiseka ka nkama lowu taka. — Mat. 22:41-45.

Yehovha a kongomise Davhida swaku a tsala hi leswi a swi yendleka ka nkama wa yena, ni leswi a swi ta yendleka ka nkama lowu taka loko se a pfuxiwile, lani a a ta dzunisa Yehovha hi nkama wa ku kala wu nga heli. Se leswo swi hi pfuna ku twisisa swaku Tipisalema 37:10, 11, 29 yi hetisekile ka nkama wa Vayisrayele naswona ya ha ta hetiseka ni ka nkama lowu taka loko misava hinkwayu yi ta va paradesi. — Vona paragrafu 8 ya nhlokomhaka leyi nge: “U Ta Va Na Mina Paradesini” ka Murindzi yelweyi.

Tipisalema 61:8 ni tindzimana tin’wani, ti kombisa leswi Davhida a a swi navelisa xiswona ku dzunisa Yehovha anze a fa. Ti tlhela ti kombisa leswi Davhida a nga ta mu dzunisisa xiswona Yehovha ka nkama lowu taka loko a ta va se a pfuxiwile.