U ti lerhe kahle tinhlokomhaka ta Murindzi wa lembe leli? Loko ku li swaku u ti lerhile, zama ku hlamula swivutiso leswi:

Swi vula yini ku ‘txintxa mimpimiso ya hina’? (Rom. 12:2)

Phela a swi yenelanga kuva hi va ni mahanyelo yamanene kumbe hi yendla swilo swaswinene kambe hi fanele hi tikambela ku va hi vona swaku hi tshamise ku yini hi le ndzeni, hi tlhela hi txintxa leswi swi lavekaka swaku hi tsakisa Yehovha. — Murindzi 01/23, mapaj. 8-9.

Hi nga swi kombisa ku yini swaku hi tlharihile nkama hi vonaka minchumu yi yendleka amisaveni?

Hina ha swi rhandza ku tiva leswi swi yendlekaka hikusa hi lava ku tiva swaku wuprofeta la Bibele li hetisekisa ku yini. Kambe hi fanele hi tivonela swaku hi nga tshameli ku vhumbata swaku ‘leswi ku nga yendleka leswi ku ta gama ku yendleka leswi’, hikusa leswo swi ta yendla swaku bandla li yavana. Kambe nyimela Yehovha ni nhlengeletanu ya yena va hi byela hi nkama wa kona swaku leswi swi yendlekaka swi hlaya swa ku yini. (1 Kor. 1:10) — Murindzi 02/23, paj. 16.

Hi kwini ku hambana ka ntsakamiso wa Yesu ni wa vadjondzisiwa va yena?

Yesu a swi lavanga a tinyiketela ka Xikwembu hikusa a psaliwe ka tiko leli se a li tinyiketelile ka Xikwembu. Funtshi a swi lavanga a tisola hikusa yena a a nga na xidjoho. — Murindzi 03/23, paj. 5.

Hi nga va pfunisa ku yini van’wani swaku va hlamula amintlhanganwini?

Hi nga va pfuna hi ku va hi nyikela tinhlamulu ta ku goma hintamu. Loko hi yendla leswo, hi ta nyika nkama van’wani swaku na vona va hlamula. Funtshi loko va hi nyiketa swaku hi hlamula, a hi fanelanga hi vulavula hi tipontu hinkwatu ti nga ka paragrafu lolelo, hikusa loko ho yendla leswo, swi nga ha yendla swaku van’wani va nga ha saleliwi hi nchumu swaku komentara. — Murindzi 04/23, paj. 23.

I yini “Ndlela ya Ku Kwetsima” leyi ku vulavuliwaka hi yona ka Esaya 35:8?

Aminkameni ya khale ndlela leyi a yi fanekisela lipfhumba la Vayuda lava va nga suka aBabilona va tlhelela Yerusalema. Ka masiku ya hina, ndlela yoleyo yi sungule ku va kona na lembe la 1919 li nge se fika. Naswona a ntirho wa ku hundzuluxela, wa ku imprimira mabuku ni mintirho yin’wani yi yendliwaka ka nhlengeletanu ya Yehovha, hi swona swi nga yendla swaku a ndlela yoleyo yi tama yi va kona. Namuntlha vanhu va Xikwembu va tama va famba ka “Ndlela ya Ku Kwetsima” leyi nga ni ku rhula ni ku twanana, naswona ka nkama lowu taka va ta kuma minkateko leyi nga ta tisiwa hi Mfumu wa Xikwembu. — Murindzi 05/23, mapaj. 15-19.

I vamani vavasati vambirhi lava ku vulavuliwaka hi vona ka Swivuriso ndzima 9?

Ka buku leyi ya Swivuriso, ku vulavuliwa hi “wansati wa xiphunta”, lweyi a yendlaka vanhu xirhambu lexi magamu ka xona ku nga “Sirheni”. Kasi wansati lweyi mun’wani ku vulavuliwaka hi yena, a fanekisela “wutlharhi la ntiyiso,” hikusa a rhamba vanhu leswaku va ya ka “ndlela ya ku twisisa” leyi nyikaka wutomi. (Swiv. 9:1, 6, 13, 18) — Murindzi 06/23, mapaj. 22-24.

Yehovha a swi kombise ku yini swaku a a tiveka hansi a tlhela a mu twisisa Lota?

Yehovha a byele Lota swaku a a fanele a baleka, a ya ka ndhawu leyi a yi ni tintshava kambe Lota a kombele ku baleka a ya ka ndhawu yin’wani, ku nga Sowari. Se Yehovha a mu yingisile. — Murindzi 07/23, paj. 21.

I yini leswi wansati lweyi a nga ni nuna lweyi a sixtiraka pornografiya a nga swi yendlaka?

Wansati yelweyo a fanele a khumbuka swaku yena a nga na nandzu kambe nkama lowo leswo swi yendlekaka, a fanele a tama a tiyisa wunghanu la yena na Yehovha a tlhela a pimisa hi swikombiso swa vavasati lava ku vulavuliwaka hi vona ka Bibele, lava na vona va nga karhateka hintamu, kambe Yehovha a nga va tiyisa. Funtshi xin’wani lexi a nga xi yendlaka, i ku va a pfuna nuna wa yena swaku a fambela kule ni swilo leswi swi nga mu yendlaka a tlhela a navela ku sixtira pornografiya. — Murindzi 08/23, mapaj. 14-17.

Loko munhu a hi vutisa swaku hi mhaka muni Timboni ta Yehovha ti nga yendli swilo leswi kumbe hi mhaka muni ti yendla swilo leswiyani, ku mu twisisa swi nga hi pfunisa ku yini kuva hi mu hlamula kahle?

A hi fanelanga hi pimisa swaku munhu yelweyo a ni problema na hina kambe hi fanele hi zama ku twisisa swaku kasi hi mhaka muni a hi hamba xivutiso lexo. Loko hi yendla leswo, hi ta swi kota ku mu hlamula hi ndlela ya lirhandzu, funtshi na hi nga mu kwatelanga. — Murindzi 09/23, paj. 17.

Leswi Mariya a nga swi yendla swi hi djondzisa yini hi ku va hi kombela ku pfuniwa?

Nkama lowu Mariya a nga tiva swaku a a ta va mamani wa Mesiya, a kombele vanhu van’wani swaku va mu pfuna. Leswo swi ve kahle hikusa nkama lowu ntsumi Gabriyele ni nkama lowu Elizabeti va nga pfuna Mariya va tirhise Matsalwa. Se, swi hi ku fana na hina. A vamakwerhu va nga hi pfuna minkama hinkwayu, loko hi va kombela. — Murindzi 10/23, paj. 15.

Yehovha a nga ha swi hlamulisa ku yini swikhongelo swa hina?

Minkama hinkwayu Yehovha a hi tshembisa swaku wa swi twa swikhongelo swa hina, funtshi a gama a swi kambela ku va a vona swaku swa fambisana ni ku rhandza ka yena ke. (Yer. 29:12) Funtshi yena a nga ha hlamula swikhongelo swoleswi swa swin’we hi tindlela ta ku hambana. Kambe hi nga tiyiseka swaku minkama hinkwayu a ta hi pfuna. — Murindzi 11/23, mapaj. 21-22.

Leswi ka Varoma 5:2 ku vulavuliwaka hi “ntshembo,” hi mhaka muni ka ndzimana 4 ku tlhela ku vulavuliwa hi ntshembo?

Loko munhu a chumayeliwa mahungu ya ku tsakisa a tlhela a kholwa ka wona, yena a va ni ntshembo wa ku hanya aparadesi kola misaveni hi nkama wa ku kala wu nga heli. Kambe nkama lowu a kumanaka ni swikarhatu a swi kota ku swi tiyiselela, a tlhela a vona swaku Yehovha a tama a mu rhandza hambiloko a kumana ni swikarhatu swoleswo, a ntshembo wa yena wu ya wu tiya hintamu, funtshi a ya a wu vona na wu li nchumu wa ku tsakisa hintamu. — Murindzi 12/23, mapaj. 12-13.