VAVASATI vambirhi lava a va paseyara ka doropa la Baguio aFilipinas, va vone xikarinyani xa mabuku kambe a va tshinelanga. Helen, makwerhu lweyi a a tirha ka xikarinyani xolexo a va hlekelile. Kambe vavasati volavo va tame va tipaseyarela kambe va hlamalisiwile hi leswi Helen a nga va txuvukisa xiswona na a va hlekela.

Se a nkama na va li ka movha na va muka kaya, vavasati lava va vone Yindlo ya Wugandzeli lani a ku tsaliwile swaku jw.org hi maletra ya makulu. A nkama va nga vona swaku jw.org, va yo vhela va swi khumbuka swaku a swi fana ni leswi va nga swi vona ka xikarinyani xa mabuku. Hi wumbirhi ka vona va xikile ka movha va ya vona masiku ni nkama wa mintlhanganu wa mabandla ya ku hambanahambana lawa a ma tsaliwile a nyanghweni ka Yindlo ya Wugandzeli.

Hi vambirhi va yile ka mintlhanganu leyi nga landzela. A nkama va nga fika mintlhanganwini va tekele ku vona makwerhu Helen. Leswi nga va yentxa va mu khumbuka hi leswi a nga va hlekela a siku na a tirha ka xikarinyani. Makwerhu Helen a li: “A nkama va nga ni tela ni chavile hintamu, hikusa a ni pimisa swaku kumbe ni yo va wonhela xa n’wanchumu!” Kambe va ni tlhamuselile leswaku i yini xi nga va yentxa va ta mintlhanganwini.

Vavasati lava swi va tsakisile ku va mintlhanganwini ni leswi vamakwerhu va nga va yamukelisa xiswona, naswona swi va yentxe va titwa na va li kaya. A nkama ku nga hela mintlhanganu, loko va vona vamakwerhu na va yentxa limpeza va vutise swaku na vona va nga pfunisa ke. Mun’we ka vona a game a rhurha a ya ka tiku lin’wana kambe lweyi mun’wana a sungule ku ya mintlhanganwini a tlhela a sungula ku djondza Bibele. Hinkwaswu leswi swi yentxeka hi mhaka ku mbonyozela!