Bandla Li Va Kombe Lirhandzu
YOMARA ni vamakwavu, Marcelo na Hiver va tshama ka xidoropana aGuatemala. Yomara a sungule ku djondza Bibele ni Timboni ta Yehovha naswona ndzhakunyana vamakwavu va yena na vona va sungule ku djondza. Kambe a ku ni xikarhatu. Hinkwavu ka vona a va fe matihlo naswona a va nga swi koti ku lerha braille. Hi mhaka leyo, lweyi a a va djondzisa Bibele a swi lava a yendla hi ku lerha djondzo a tlhela a lerha ni tindzimana ta Bibele.
Ku ya mintlhanganwini na kona a ku li xikarhatu xin’wani. Phela vona voxe a va nga ta swi kota ku famba 40 minutu swaku va fika ka Yindlo ya Wugandzeli leyi a yi li kusuhi ni lani a va tshama kona. Se vamakwerhu a va va pfuna swaku va kota ku ya mintlhanganwini funtshi nkama va nga sungula ku va ni swiyenge ka mintlhanganu ya xikarhi ka vhiki, vamakwerhu a va va pfuna swaku va swi vekisa ka nhloko leswi a va ta swi vula ka swiyenge swa vona.
Hi Maio wa 2019 ku sungule ku khomiwa mintlhanganu ka muganga wa vona. Hi nkama wolowo a ku li ni nuna na nsati lava a va li vapfuli va ndlela va nkama hinkwawu lava a va rhurhile va ya ka ndhawu liyani. Va game va tinyimisela ku pfuna Yomara ni vamakwavu va yena swaku va lerha va tlhela va tsala Braille, hambileswi a va nga swi tivi swaku a va ta swi yendlisa ku yini. Hi mhaka leyo, va djondze mabuku ya braille lawa ma nga va pfuna ku vona swaku va nga va djondzisisa ku yini van’wani.
Marcelo na a hlamula mintlhanganwini
Na swi nge se ya kwini, Yomara ni vamakwavu va yena se a va swi kota ku lerha braille naswona leswo swi va pfune ku kulisa wunghanu la vona na Yehovha. Swoswi Yomara, Marcelo, na Hiver i vapfuli va ndlela va nkama hinkwawu. Marcelo i mupfunisi wa bandla. Vhiki hinkwalu va tshama na va khomekile hi ku tirhela Yehovha, funtshi ku hiseka ka vona ku yendla leswaku van’wani na vona va hisekela ntirho wa Yehovha.
Yomara, Marcelo, na Hiver va yi khensa hintamu ndlela leyi bandla li va pfunaka hi yona. Yomara a li: “Ku sukela loko hi tive Timboni ta Yehovha, ti hi kombe lirhandzu la ntiyiso.” Marcelo a li: “Hi ni vanghanu vavanene ka bandla la hina naswona hi titwa hi li xikarhi ka vamakwerhu lava rhandzanaka amisaveni hinkwayu. Yomara ni vamakwavu va yena a va wu voni nkama lowu misava hinkwayu yi nga ta va paradesi. — Pis. 37:10, 11; Esa. 35:5.
