1. Ku fana na Davhida, i mpsini leswi van’wana va hina va nga tivutisaka swona?

HINKWERHU hi lava ku va ni ku rhula ka wutomi la hina. A nga kona a swi rhandzaka ku karhateka. Kambe minkama yin’wana hi nga ha karhateka hintamu. Hi mhaka leyo, van’wana va vanhu va Yehovha va titwa ku fana na Hosi Davhida, lweyi a nga vutisa Yehovha a ku: “Ni ta tshamela ku karhateka anze siku muni? Ni ta twa ku vava mbilwini ya mina anze siku muni ke?” — Pis. 13:2.

2. Hi ta bula hi yini ka djondzo leyi?

² Hambileswi minkama yin’wana hi nga ha karhatekaka, ku ni minchumu yin’wana leyi hi nga yi yentxaka swaku hi nga karhateki hintamu. Ka djondzo leyi hi ta sungula hi ku vona swaku i mpsini swi nga hi yentxaka hi karhateka. Hi ta gama hi bula hi 6 wa minchumu leyi hi nga yi yentxaka loko hi kumana ni swikarhatu.

3. Hi swini swilo leswi nga hi yentxaka hi karhateka, naswona hi nga swi kota ku swi sivela?

³ I yinyingi minchumu leyi nga hi yentxaka hi vilela. Kambe swin’wana swa kona a hi nge swi koti ku swi baleka. Hi xikombiso, leswi lembe ni lembe minchumu ya ku fana ni swakudla, mpahla, ku lugara yindlo kumbe ku yaka swi yaka swi dura, a hi nge swi koti ku swi sivela leswo. Naswona swi nga hi karhatela ku yentxa swaku vakolega va hina va ntirhweni kumbe va xikola va nga hi xengi ku yentxa minchumu ya ku biha ya ku fana ni ku yiva kumbe ku tlanga hi ku famba masangu. Nakambe a hi nge swi koti ku helisa mabandidu lomu hi tshamaka kona. Hi kumana ni swikarhatu leswi, hi  mhaka hi hanyaka ka misava leyi vanhu va kona va kalaka va nga landzi leswi Bibele li swi vulaka. Sathana, mufumi wa misava leyi, wa swi tiva swaku “ku vilela ka wutomi la masiku lawa” ku nga yentxa vanhu van’wana va tshika ku tirhela Yehovha. (Mat. 13:22; 1 Yoh. 5:19) A swi hlamalisi leswi misava yi nga tala hi swilo swa ku biha, leswi yentxaka vanhu va karhateka hintamu!

4. I mpsini swi nga hi yentxaka hi karhateka hintamu?

⁴ Swikarhatu swi nga hi yentxa hi tshamela ku vilela. Hi xikombiso, hi nga ha karhateka hi swaku a hi nga ta va ni male ya ku yenela ya ku xava swilo leswi hi swi lavaka, kumbe ku pimisa swaku hi nga ha vabya, hi nga ha swi koti ku tirha, kumbe ku luzekeliwa hi ntirho wa hina. Hi nga ha karhateka hi ku pimisa swaku loko hi tshuka hi ringiwa ku yentxa minchumu ya ku biha hi ta djohela Xikwembu. Ku nga li khale, Sathana a ta yentxa swaku vanhu va yena va dumela vanhu va Xikwembu. Leswo swi nga ha hi yentxa hi karhateka hi swaku swi ta ku yini hi hina hi nkama wolowo. Kambe hi nga ha tivutisa leswi: ‘Indje swi bihile ku va ni karhateka hi minchumu ya ku fana ni leyi?’

5. Yesu a a lava ku vula yini loko a ku “tshikani ku vilela”?

⁵ Yesu a byele vadjondzisiwa va yena a ku: “Tshikani ku vilela”. (Mat. 6:25) Ingava swaku Yesu a a lava ku vula swaku a hi fanelanga hi tshuka hi vilela hi nchumu? A hi swona. Khumbuka swaku van’wana lava khale a va tirhela Yehovha hi ku tshembeka na vona va karhatekile. Kambe Yehovha a tame a va rhandza. * (1 Tiho. 19:4; Pis. 6:3) Hi marito lawa, Yesu a o hi tiyisa. A a nga lavi swaku hi karhateka ngopfu hi swilo swa wutomi lakakuva swi za swi hi sivela ku tirhela Yehovha. Se i mpsini leswi hi nga swi yentxaka loko hi vona swaku ha karhateka? — Vona kwadru leli nge: “ U Nga Swi Yentxisa Ku Yini?”

6. Hi ku ya hi Vafilipiya 4:6, 7, i yini xi nga ta hi pfuna ku tshama na hi rhulile?

⁶ 1) Ku khongela nkama ni nkama. Loko ku ni leswi ku karhataka u nga ha khongela ka Yehovha u kombela swaku a ku pfuna. (1 Ped. 5:7) Yehovha a ta hlamula swikhongelo swa wena hi ku ku nyika ‘ku rhula ka Yena loku tlulaka mimpimiso hinkwayu’. (Lerha Vafilipiya 4:6, 7.) Yehovha a nga ku nyika ku rhula koloko hi ku tirhisa moya wa yena wa ku kwetsima. — Gal. 5:22.

7. I mpsini leswi hi fanelaka hi swi khumbuka loko hi khongela ka Yehovha?

⁷ Loko u khongela ka Yehovha mu byeli hinkwaswu swi ku karhataka. U nga djikadjiki, mu byeli swaku u karhatiwa hi yini ni leswi u titwisaka xiswona. Loko u vona swaku ku ni leswi u nga swi yentxaka leswaku u hlula leswi ku karhataka, kombela Yehovha a ku pfuna u vona swaku u nga swi yentxisa ku yini. Loko ku li leswaku a wu xi tivi lexi u nga xi yentxaka, kombela Yehovha swaku a ku pfuna kuva u nga vileli hintamu hi mhaka ya kona. Loko u nga djikadjiki ka swikhongelo swa wena, swi ta ku pfuna ku vona swaku Yehovha a swi hlamulisa ku yini. Hambiloko u vona swaku swikhongelo swa wena a swi hlamuliwi hi nkama wolowo u nga godoli hikusa Yehovha a nga lavi ntsena hi mu byela leswi hi karhataka kambe a lava hi khongela ka yena nkama ni nkama. — Luk. 11:8-10.

8. I mpsini swin’wana hi nga swi vulaka loko hi khongela?

 ⁸ Loko u byela Yehovha leswi ku karhataka u nga khohlwi ku mu khensa. Hambiloko hi ni swikarhatu swa swinyingi i swinene ku pfa hi pimisa hi minchumu ya yinene leyi hi nga na yona. Se u nga yentxa yini loko u titwa u nga na marito ya ku ma hlaya? Khumbuka swaku Yehovha wa swi twa hambiloko u khongela u mu byela ntsena u ku: ‘Yehovha ni pfuni!’ — 2 Tikro. 18:31; Rom. 8:26.

9. Hi nga yentxa yini loko hi chava?

⁹ 2) U nga titshembi kambe tshemba wutlharhi la Yehovha. Hi nkama wa muprofeta Esaya vanhu va Yuda a va chava ku dumeliwa hi va Asiriya. Leswi vanhu va Yuda a va nga swi lavi ku hluliwa hi va Asiriya, va kombele ku pfuniwa hi tiko la Gibita. (Esa. 30:1, 2) Yehovha a va be ndleve hi ku va byela swaku leswi va nga tshemba Vagibita a swi ta va tisela khombo. (Esa. 30:7, 12, 13) Hi ku tirhisa muprofeta Esaya, Yehovha a va byele leswi a swi ta va pfuna. A te: “Loko mi rhula mi tlhela mi ni tshemba mi ta va ni matimba.” — Esa. 30:15b.

10. Hi swini swiyimu leswi hi nga kombisaka swaku ha mu tshemba Yehovha?

¹⁰ Hi nga swi kombisa ku yini swaku ha mu tshemba Yehovha? Vona swikombiso leswi: Pimisa hi loko va ku nyika ntirho lowu holelaka male ya yinyingi, kambe swi ta lava u tirha hintamu u tlhela u nga ha vi ni nkama wa ku tirhela Yehovha ku fana ni leswi u mu tirhelisaka xiswona swoswi. Kumbe pimisa hi munhu lweyi u tirhaka na yena wa ku a hi Mboni a zamaka ku ku gangisa. Kumbe u nga ku yini loko xaka la wena leli u li rhandzaka li ku byela swaku a li nga ha ta va ni mhaka na wena loko u tama u gandzela Yehovha? Ka swiyimu hinkwaswu leswi swi nga ha ku karhatela ku yentxa swiboho swa kahle kambe Yehovha wa ku byela leswi u faneleke u swi yentxa. (Mat. 6:33; 10:37; 1 Kor. 7:39) Se a xivutiso hi lexi: Kungava swaku u ta tshemba Yehovha ni ku tama u yentxa leswi a hi byelaka swona?

11. Hi swini swikombiso swi nga ka Bibele leswi nga hi pfunaka ku tama hi rhula hambi loko va hi xanisa?

¹¹ 3) Djondza ka swikombiso swa swinene ni swa ku biha. Bibele li ni swikombiso swa swinyingi leswi hi pfunaka kuva hi rhula hi tlhela hi tshemba Yehovha. Nkama u djondzaka hi swikombiso leswi, zama ku vona swaku i mpsini leswi nga pfuna malandza ya Yehovha kuva ma tshama na ma rhulile hambi loko ma kumana ni swikarhatu swa swikulu. Hi xikombiso, a nkama tribunali la Vayuda li nga byela vapostolo swaku va fanele va tshika ku chumayela, vona a va chavanga, kambe va vule na va nga chavi va ku: “Hi fanele hi yingisa Xikwembu lexi nga Hosi ku tlula vanhu”. (Mint. 5:29) Hambiloko va biwa a va nga chavi. Hi mhaka a va swi tiva swaku Yehovha wa va pfuna naswona a a tsaka hi leswi a va swi yentxa. Hi mhaka leyo va tame va chumayela mahungu ya ku tsakisa. (Mint. 5:40-42) Hi ku fanana, a nkama a va lava ku mu dlaya, Stefano a tame a va ni ku rhula naswona a kara la yena a li fana ni “la ntsumi”. (Mint. 6:12-15) Hikusa a a swi tiva swaku Yehovha wa tsaka hi yena.

12. Hi ku ya hi 1 Pedru 3:14; 4:14, hi mhaka muni hi fanele hi tsaka hambiloko va hi hlupha?

¹² Leswi vapostolo a va ni matimba ya ku yentxa masingita, a va swi vona swaku Yehovha a na vona. (Mint. 5:12-16; 6:8) Hambileswi Yehovha a kalaka a nga hi nyiki matimba wolawo kambe hi ku tirhisa Rito la yena a hi byela swaku hambiloko hi hluphiwa hi ku yentxa swilo swa swinene wa hi tsakela naswona wa hi pfuna hi ku tirhisa moya wa yena wa  ku kwetsima. (Lerha 1 Pedru 3:14; 4:14.) Hi mhaka leyo, a hi fanelanga hi karhateka hi swaku hi ta yentxa yini loko hi hluphiwa ka nkama lowu taka. A xa lisima lexi hi faneleke hi xi yentxa i ku tiyiseka swaku Yehovha a nga hi pfuna a tlhela a hi ponisa. Ku fana ni vadjondzisiwa va Yesu va ku sungula hi fanele hi kholwa ka leswi Yesu a nga swi tshembisa loko a ku: “Ni ta mi nyika wutlharhi naswona ni ta mi byela leswi mi faneleke mi swi vula; valala va n’wina a va nge swi koti ku mi kaneta kumbe ku mi hlamula”. Yesu a tlhele a hi tshembisa leswi: “Loko mi tiyisela, mi ta ponisiwa.” (Luk. 21:12-19) Naswona u nga khohlwi swaku Yehovha a ma khumbuka kahle malandza ya yena lama nga fa na ma tshembekile naswona a ta ma pfuxa.

13. Hi nga djondza yini ka lava nga tsandzeka ku tshemba Yehovha?

¹³ Hi nga djondza ka lava va nga tsandzeka ku tama va tshemba Yehovha. Ku djondza hi vona swi ta hi pfuna kuva na hina hi nga yentxi swihoxo swa ku fana ni leswi vona va nga swi yentxa. Hi xikombiso, loko Hosi Asa a sungula ku fuma a tshembe Yehovha nkama a nga dumeliwa hi masonchwa ya manyingi naswona Yehovha a mu pfunile swaku a hlula. (2 Tikro. 14:9-12) Kambe hi ku famba ka nkama, loko Hosi Asa a dumeliwa hi Baxa, Hosi ya Israyele, leyi a yi ni masonchwa ya matsongo a nga kombelanga ku pfuniwa hi Yehovha kambe a kombele ku pfuniwa hi hosi ya Siriya. (2 Tikro. 16:1-3) Hambi nkama a nga vabya hintamu, na a li kusuhi ni ku fa a nga kombelanga ku pfuniwa hi Yehovha. — 2 Tikro. 16:12.

14. Hi nga djondza yini ka swihoxo leswi Hosi Asa a nga swi yentxa?

¹⁴ A ku sunguleni Asa a kombele ku pfuniwa hi Yehovha loko a kumana ni swikarhatu kambe hi ku famba ka nkama a nga ha swi yentxanga leswo. A zame ku lulamisa swikarhatu hi yexe. A swi tikomba ingi loko va kombela ku pfuniwa hi va Asiriya a va ta va ni ku rhula kambe leswo a swi nga ta va yisa ndhawu. Hi ku tirhisa muprofeta wa yena, Yehovha a byele Asa a ku: “Leswi u nga tshemba hosi ya Siriya, u nga tshembi Yehovha Xikwembu xa wena, masonchwa ya hosi ya Siriya ma ku balekile.” (2 Tikro. 16:7) Na hina hi fanele hi tivonela leswaku hi nga zami ku lunghisa timhaka hi hoxe, hi tshika ku kombela ku pfuniwa hi Yehovha ni Rito la yena. Hambiloko hi kumana ni minchumu leyi lavaka hi yentxa swiboho hi ku hantlisa, ha rhula hi tshemba Yehovha, naswona wa hi pfuna.

15. I mpsini leswi hi nga swi yentxaka loko hi lerha Bibele?

¹⁵ 4) Vekisa tindzimana ta Bibele ka nhloko. Loko u kuma tindzimana leti kombisaka lisima la ku rhula ni ku tshemba Yehovha ti vekisi ka nhloko. Leswaku leswo swi koteka swi nga ha lava u ti lerha swi twala kumbe u yentxa hi ku ti tsala u tlhela u tshamela ku ti lerha. Yehovha a byele Yoxuwa swaku a lerha buku la Nawu siku ni siku leswaku a kota ku yentxa swilo hi wutlharhi. Leswi a a swi lerha ka buku la Nawu a swi ta mu pfuna kuva a rhangela vanhu va Xikwembu na a nga chavi. (Yoxu. 1:8, 9) Ka Bibele ku ni tindzimana ta tinyingi leti nga ku pfunaka swaku u va ni ku rhula hambiloko u kumana ni swilo leswi nga ku yentxaka u vilela kumbe u chava. — Pis. 27:1-3; Swi. 3:25, 26.

16. Yehovha a nga va tirhisisa ku yini vamakwerhu swaku va hi pfuna?

¹⁶ 5) Tinyiki nkama wa ku va ni vamakwerhu. Yehovha a tirhisa vamakwerhu leswaku va hi pfuna kuva hi rhula hi tlhela hi mu  tshemba. A mintlhanganwini ha pfuneka hi madixkursu, hi tinhlamulu ta vamakwerhu ni mabulu ya ku tsakisa. (Heb. 10:24, 25) Loko hi byela vanghanu va hina bandleni leswi hi karhataka va nga hi pfuna hintamu. “Rito lelinene” leli taka hi ka munghanu wa hina li nga pepisa moya wa hina li tlhela li hi pfuna kuva hi pumba ku vilela. — Swi. 12:25.

17. Hi ku ya hi Vaheberu 6:19, ntshembo wa hina wu nga hi pfunisa ku yini ku tama hi rhula hambi hi va ni swikarhatu?

¹⁷ 6) Tiyisa ntshembo wa wena. A ntshembo wu nga fana ni nsoma kumbe ankora lowu hi pfunaka ku nyima hi tiyile hambiloko hi kumana ni swikarhatu kumbe hi vilela. (Lerha Vaheberu 6:19.) Loko hi pimisa hi switshembiso swa Yehovha a hi nga ha ta vilela. (Esa. 65:17) Tivoni na u li ka misava ya nyuwani ya ku rhula lani swikarhatu hinkwaswu swi nga ta va swi nga ha li kona. (Miki. 4:4) Funtshi u nga tiyisa ntshembo wa wena nkama u byelaka van’wana hi misava ya nyuwani. Yentxa hinkwaswu leswi u nga swi kotaka ka ntirho wa ku chumayela ni ku yentxa vadjondzisiwa. Hi ku yentxa leswo ‘ntshembo wa wena wu ta tiya anze ku fika magamu’. — Heb. 6:11.

18. I mpsini swi nga ha humelelaka ka nkama lowu taka naswona hi nga yentxa yini?

¹⁸ Leswi xiyimu lexi xa ku biha xi nga kusuhi ni ku gama hi nga ha kumana ni swikarhatu swa swinyingi leswi nga hi yentxaka hi vilela. Ndzimana ya hina ya lembe ya 2021 yi nga hi pfuna ku hlula swikarhatu ni ku tama hi rhula, ku nga li hi ntamu wa hina kambe hi ku tshemba Yehovha. Ka lembe leli hinkwalu zama ku swi kombisa hi mintirho swaku wa swi tshemba leswi Yehovha a nga hi byela loko a ku: “Loko mi rhula mi tlhela mi ni tshemba mi ta va ni matimba.” — Esa. 30:15.