1. A dixkursu leli nga vekiwa ka kongresu la 1935 li li pfunise ku yini djaha liwn’wana?

DJAHA lin’wana li tsakamisiwe hi 1926 na li ni 18 wa malembe. A vapsali va djaha leli a va li Vadjondzi va Bibele, ku nga vito leli Timboni ta Yehovha a ti tiviwa hi lona hi nkama wolowo. Vapsali lava, a va ni 3 wa vana va madjaha ni 2 wa vana va tintombi, va nga va djondzisa ku tirhela Yehovha ni ku tekelela Yesu Kreste. Phela Vadjondzi va Bibele, ku patsa ni djaha leliyani, a va dla pawu ni ku nwa vhinyu hi siku la Xitsundzuxu. Kambe mavonelo ya vona ma vhele ma txintxa nkama va nga twa dixkursu leli nge “Xitshungu Xa Xinyingi.” Dixkursu lolelo li vekiwe hi 1935 hi makwerhu Joseph Rutherford ka kongresu leli nga ve Washington aEstados Unidos. I yini leswi Vadjondzi va Bibele va nga swi twisisa ka kongresu leli?

2. Hi wini ntiyiso wa lisima lowu makwerhu Rutherford a nga wu tlhamusela ka dixkursu la yena?

² Ka kongresu leli, makwerhu Rutherford a tlhamusele swaku hi vamani lava lumbaka “xitshungu xa xinyingi” kumbe va “tinyempfu tin’wana’’ leti ku vulavuliwaka hi tona ka Nhlawutelo 7:9. Ku fikela kolanu Vadjondzi va Bibele a va pimisa swaku xitshungu xa xinyingi i ntlawa wa vanhu lowu a wu ta ya matilweni kambe wu kalaka wu nga tshembekanga hintamu ku fana ni vatotiwa. Makwerhu Rutherford a tirhise Bibele kuva a tlhamusela swaku xitshungu xa xinyingi a xi nga langiwanga swaku xi ya hanya matilweni kambe xitshungu lexi, i tinyempfu letin’wana *, leti nga ta pona ka “nhlomulu wa wukulu”  ti kuma wutomi la ku kala li nga heli lani misaveni. (Nhla. 7:14) Yesu a tshembise leswi: “Ni ni tinyempfu tin’wana, leti kalaka ti nga li ta ntlhambi lowu; na tona ni fanele ni ti tisa swaku ti ta yingisa rito la mina, ti va ntlhambi wun’we ni murisi a va mun’we.” (Yoh. 10:16) Tinyempfu tin’wana i Timboni ta Yehovha ta ku tshembeka leti nyimelaka ku kuma wutomi la ku kala li nga heli lani misaveni. (Mat. 25:31-33, 46) A matwisiselo lawa ya nyuwani ma txintxe wutomi la vanhu va vanyingi lava a va tirhela Yehovha ku patsa ni djaha leliyani la 18 wa malembe. — Pis. 97:11; Swi. 4:18.

3-4. Ka kongresu la 1935 i yini leswi vanhu va vanyingi va nga swi twisisa hi ntshembo wa vona naswona hi mhaka muni?

³ Kongresu leli li tsakise hintamu loko makwerhu Rutherford a vutisa lava a va li kona a ku: “Va kona lava va nga ni ntshembo wa ku kuma wutomi la ku kala li nga heli lani misaveni? Hi kombela va sekeleka.” Makwerhu mun’wani lweyi a a li kona ka kongresu leli a vule swaku leswi a ku ni kolomuya ka 20.000 wa vanhu, va ku tlula 10.000 va sekelekile. Hi wugamu makwerhu Rutherford a vule leswi: “Vonani xitshungu xa xinyingi!” Loko a vule leswo, vanhu hinkwavu lava a va li kona va sungule ku ba mavoko na va tsakile. Ku sukela kolanu va vhele va swi tiva swaku a va nga langiwanga ku ya hanya matilweni. A va swi tiva swaku a hi vatotiwa. Hi siku li nga landzela la kongresu ku tsakamisiwe 840 wa vanhu lava ku tala ka vona a va li va tinyempfu tin’wana.

⁴ Ku sukela kolano djaha leli hi nga bula hi lona ku sunguleni ni van’wana va nyime ku dla pawu ni ku nwa vhinyu hi siku la Xitsundzuxu. Vanyingi va titwe ku fana ni makwerhu lweyi hi ku tiveka hansi a nga vula leswi: “Hi 1935 ku ve lembe la wugamu ni nga dla pawu ni ku nwa vhinyu hi siku la Xitsundzuxu hikusa Yehovha a a nga ni langanga swaku ni ya hanya matilweni kambe ntshembo wa mina i wa ku hanya amisaveni ni ku pfunisa ka ntirho wa ku yentxa misava yi va paradeyisi.” (Rom. 8:16, 17; 2 Kor. 1:21, 22) Hi nkama wolowo xitshungu xa xinyingi xi ye xi yengeseleka hintamu naswona xi tame xi tirhisana ni vatotiwa lava va nga sala lani misaveni. *

5. Yehovha a va vonisa ku yini lava va nyimaka ku dla pawu ni ku nwa vhinyu hi siku la Xitsundzuxu?

⁵ Yehovha a va vonise ku yini lava va nga nyima ku dla pawu ni ku nwa vhinyu hi siku la Xitsundzuxu ku sukela hi 1935? Naswona Yehovha a va vonisa ku yini vanhu lava namuntlha va dlaka pawu ni ku nwa vhinyu hi siku la Xitsundzuxu, kambe va gama va ya tsumbula swaku a va zanga va totiwa? (1 Kor. 11:28) Van’wanyani a va dla pawu ni ku nwa vhinyu hikusa a va nga wu twisisi kahle ntshembo wa vona. Kambe loko va pfumela swaku va yentxe xihoxo, va nyima ku dla pawu ni ku nwa vhinyu va tlhela va tama va tirhela Yehovha hi ku tshembeka, Yehovha a ta va rivalela a tlhela a va konta swaku va lumba tinyempfu tin’wana. Hambileswi va nga ta nyima ku dla pawu ni ku nwa vhinyu, a va tshiki ku ya ka Xitsundzuxu hikusa va swi tlangela leswi Yehovha na Yesu va nga va yentxela swona.

6. I yini leswi Yesu a nga byela tintsumi swaku ti swi yentxa?

⁶ Leswi nhlomulu lowukulu wu nga kola kusuhi swi nga hi pfuna ku kambela leswi  Nhlawutelo ndzima 7 yi swi vulaka hi Vakreste lava va nga totiwa ni va xitshungu xa xinyingi. Yesu a byele tintsumi kuva ti tama ti khoma 4 wa mimoya ya misava ya ku lovisa. Tintsumi leti a ti nga ta yi tshiketela anze ku fungiwa Vakreste hinkwavu lava nga totiwa, leswi vulaka swaku Yehovha wa va yamukela. (Nhla. 7:1-4) Loko Vakreste lava nga totiwa va tshembeka ku ya fika magamu, va ta kuma a hakelo ya kuva tihosi ni vaprista amatilweni. (Nhla. 20:6) Yehovha, Yesu ni tintsumi va ta tsaka hintamu loko va vona lava va 144.000 va kuma hakelo ya vona atilweni.

7. Hi ku ya hi Nhlawutelo 7:9, 10 i vamani lava Yohani a nga va vona naswona a va yentxa yini? (Vona mufoto wu nga ka pajina la ku sungula.)

⁷ Loko Yohani a vone lava 144.000 na va li tihosi ni vaprista a game a vona nchumu xa ku hlamalisa, ku nga “xitshungu xa xinyingi” xi nga pona ka Armajedoni. Naswona xitshungu lexi i xinyingi hintamu ku tlula lava 144.000, kambe Yohani a a nga swi tivi swaku xi ni vanhu vangani. (Lerha Nhlawutelo 7:9, 10.) Xitshungu lexi a “xi yambale mpahla ya ku leha ya ku basa”, leswi vulaka swaku a xi zanga xi tinchimisa hi misava leyi ya Sathana naswona xi tame xi tshembeka ka Yehovha na Yesu. (Yak. 1:27) Naswona xi tame xi huwelela swaku xi ponisiwile hi mhaka ya leswi Yehovha na Yesu va nga xi yentxela swona. Nakambe xi khome “matluka ya minsinya ya mintxindzu” leswi vulaka swaku xa pfumela hi ku tsaka swaku Yesu i Hosi leyi nga vekiwa hi Yehovha. — Komparara na Yohani 12:12, 13.

8. Nhlawutelo 7:11, 12 yi hi byela yini hi Yehovha, Yesu, tintsumi ni vatotiwa?

⁸ Lerha Nhlawutelo 7:11, 12. Lava va nga matilweni va titwise ku yini loko va vona a xitshungu xa xinyingi? Yohani a vone swaku hinkwavu lava nga matilweni va tsakile va tlhela va khensa Yehovha loko va vona xitshungu xa xinyingi. Yehovha, Yesu, tintsumi ni vatotiwa va ta tsaka hintamu loko va vona xitshungu xa xinyingi xi pona ka nhlomulu lowukulu.

9. Hi ku ya hi Nhlawutelo 7:13-15 i yini leswi xitshungu xa xinyingi xi swi yentxeka namuntlha?

⁹ Lerha Nhlawutelo 7:13-15. Yohani a vula swaku lava va xitshungu xa xinyingi va “hlampse timpahla ta vona ta ku leha va tibasisa hi ngati ya Xinyempfana.” Leswi swi vula swaku Yehovha wa va yamukela. (Esa. 1:18) Xitshungu lexi i vanhu lava va nga tinyiketela, va tsakamisiwa naswona va ni lipfumelo la likulu ka lifu la Yesu, lweyi a nga ni wunghanu la likulu ni Papayi wa yena Yehovha. (Yoh. 3:36; 1 Ped. 3:21) Hi mhaka leyo Xikwembu xa va tsakela naswona “wusiku ni nhlikanhi va xi yentxela ntirho wa ku kwetsima” lani misaveni. Kambe swoswi va chumayela mahungu ya ku tsakisa yi nga chayi ni ku yentxa vadjondzisiwa hikusa leswo i swa lisima hi ntamu ka vona. — Mat. 6:33; 24:14; 28:19, 20.

10. I yini leswi lava va xitshungu xa xinyingi va swi tivaka naswona hi xini xitshembisu lexi va nyimeleka ku xi vona xi hetiseka?

¹⁰ Lava nga ta pona ka nhlomulu lowukulu va swi tiva swaku Xikwembu xi nga ta tshika ku va hlayisa hikusa “Lweyi a nga tshama ka xitshamu xa wuhosi a ta gwimba tende la yena ahenhla ka vona.” Phela xitshembiso lexi se ku nga khale na va xi nyimelile xi ta hetiseka, lexi nge: “[Xikwembu] xi ta limpa mihloti hinkwayu ka matihlo ya vona, lifu a li nga ha ta va kona, hambi ku keta, ku rila ni ku twa ku vava a swi nge he vi kona.” — Nhla. 21:3, 4.

11-12. a) Hi ku ya hi Nhlawutelo 7:16, 17 hi yini minkateko leyi lava va xitshungu xa xinyingi va nga ta yi kuma? b) Lava tinyempfu tin’wana va fanele va yentxa yini hi siku la Xitsundzuxu naswona hi mhaka muni?

¹¹ Lerha Nhlawutelo 7:16, 17. Phela namuntlha,  van’wani ka vamakwerhu va hina va hluphiwa hi ndlala hikusa a va na male ya ku xava swakudla kumbe hi mhaka ya swikarhatu leswi vangiwaka hi tinyimpi. Van’wana va le madjele hi mhaka ya lipfumelo la vona. Hambileswo, lava va xitshungu xa xinyingi va tsakile hi ku tiva swaku loko va pona ka nhlomulu lowukulu va ta va ni swakudla swa swinyingi naswona va ta tama va djondza hi Yehovha. Loko Yehovha a helisa misava ya ku biha ya Sathana, a ta sirhelela xitshungu xa xinyingi swaku xi nga kumiwi hi ku kwata ka yena loku fanisiwaka ni “dlambu” leli li hisaka “ku tlhula mpimu”. Loko nhlomulu lowukulu wu ta va se wu helile, Yesu a ta yisa lava va nga ta pona ka swihlovo swa mati ya wutomi. Impela i ntshembo wa ku tsakisa hintamu ku tiva swaku vanhu a va nga ha ta fa! — Yoh. 11:26.

¹² Lava tinyempfu tin’wana va ni ntshembo wa ku tsakisa hintamu lowu wu va yentxaka va khensa Yehovha na Yesu. Hambileswi Yehovha a kalaka a nga va langanga swaku va ya hanya matilweni, a va rhandza hintamu ku fana ni leswi a va rhandzisaka xiswona vatotiwa. Tinyempfu letin’wana ni vatotiwa va mu tlangela hintamu Yehovha na Yesu. Ndlela yin’wana leyi va kombisaka swaku hakunene va mu tlangela Yehovha na Yesu i kuva va nga lovhi hi siku la Xitsundzuxu.

13-14. Hi mhaka muni lava nga totiwa ni va tinyempfu tin’wana va fanele va ya ka Xitsundzuxu xa lifu la Yesu?

¹³ Swoswi lava dlaka pawu ni ku nwa vhinyu amisaveni hinkwayu i vatsongo hintamu. Leswo swi kombisa swaku ku tala ka lava va yaka ka Xitsundzuxu va ni ntshembo wa ku hanya lani misaveni. Se hi mhaka muni va ya ka Xitsundzuxu xa lifu la Yesu kasi a va dli pawu ni ku nwa vhinyu. Phela leswi hi nga swi fanisa ni lava va yaka ka muchadu wa munghanu wa vona. Va ya muchadwini hikusa va mu rhandza ni ku mu seketela munghanu wa vona. Hi ku fanana, lava tinyempfu tin’wana loko va ya ka Xitsundzuxu va kombisa swaku va mu rhandza Kreste ni vatotiwa naswona va va seketela. Funtshi loko va ya ka Xitsundzuxu va kombisa swaku va li khensa a lifu la Yesu Kreste hikusa li yentxa swi koteka swaku va hanya va nga ha fi lani misaveni.

 ¹⁴ Xin’wana xa lisima lexi yentxaka lava va tinyempfu tin’wana va ya ka Xitsundzuxu i ku lava ku yingisa leswi Yesu a nga swi byela vapostolo va yena va ku tshembeka a ku: “Tshamelani ku yentxa leswi leswaku mi ni khumbuka.” (1 Kor. 11:23-26) Hi mhaka leyo lava tinyempfu tin’wana va tama va ya ka Xitsundzuxu ni vatotiwa lava va ha hanyaka lani misaveni naswona va rhamba vanhu va ku tala leswaku va va na vona ka Xitsundzuxu.

15. Hi nga swi kombisisa ku yini swaku ha mu tlangela Yehovha na Yesu loko hi li ka Xitsundzuxu?

¹⁵ Loko hi li ka Xitsundzuxu hi nga kombisa swaku ha mu khensa Yehovha na Yesu loko hi yimbelela ni ku khongela xikan’we. Nhlokomhaka ya dixkursu la Xitsundzuxu xa lembe leli, yi li: “Khensa Leswi Yehovha Na Yesu Vangaku Yendlela Swona!” Dixkursu leli li ta ku yentxa u mu khensa hintamu Yehovha na Yesu. Hi siku la Xitsundzuxu loko ku khalutisiwa a pawu ni vhinyu zama ku pimisa hi swaku swilo leswi swi vula yini naswona zama ku khumbuka a lirhandzu leli Yehovha a nga ku komba lona hi ku rhumela N’wana wa yena Yesu swaku a ta hi fela. (Mat. 20:28) Hinkwavu lava va mu rhandzaka Yehovha Papayi wa hina wa matilweni ni N’wana wa yena va ta swi tsakela ku va kona ka Xitsundzuxu.

16. Vakreste lava va nga totiwa va fanisa ku yini ni tinyempfu tin’wana?

¹⁶ A ku na ku hambana ka lirhandzu leli Yehovha a nga na lona hi vatotiwa ni va tinyempfu tin’wana, hinkwavu i va lisima ka Yehovha, hinkwavu va xaviwe hi presu ya ku fana ku nga lifu la Yesu Kreste, N’wana wa Yehovha lweyi a mu rhandzaka. Ku hambana ka mintlawa leyi hi swaku va ni mintshembo ya ku a yi fani. Kambe Hinkwavu va fanele va tama va tshembeka ka Yehovha ni ka Kreste. (Pis. 31:23) Khumbuka swaku Yehovha a nyika moya wa yena wa ku kwetsima ka hinkwavu hi ku ya hi xilaveko xa vona.

17. I yini leswi vatotiwa lava nga lani misaveni va swi nyimelaka?

¹⁷ Vatotiwa a va psaliwanga na va ni ntshembo wa ku ya hanya matilweni. Kambe i Yehovha a nga va nyika ntshembo lowu ka timbilu ta vona. Va pimisa hintamu hi ntshembo wa vona, va khongela hi wona naswona va swi nyimelile ku ya kuma hakelo ya vona amatilweni. Phela a va swi koti ku tiva swaku mirhi wa vona wu ta tshamisa ku yini loko va ya tilweni. (Filp. 3:20, 21; 1 Yoh. 3:2) Hambileswo va swi nyimelile ku ya tlhangana na Yehovha, Yesu, tintsumi ni vatotiwa van’wana lava va fumaka matilweni swoswi.

18. I yini leswi va swi nyimelaka lava va tinyempfu tin’wana?

 ¹⁸ Tinyempfu tin’wana ti nyimele ku hanya lani misaveni ti nga ha fi, ku nga nchumu lowu hinkwerhu hi psaliwaka na hi wu lava. (Ekl. 3:11) Va wu nyimele hintamu nkama lowu va nga ta tirha swaku va yentxa misava hinkwayu yi va paradesi. A va wu voni nkama lowu va nga ta yaka tiyindlo ta vona, va hamba majardim ni ku wundla vana va vona na va ni mirhi wa ku hetiseka. (Esa. 65:21-23) Phela va swi navela hintamu ku yendzela tindhawu ta ku saseka lani misaveni, va vona tinhava, makhwati ya ku xonga, mapraya ya ku xonga ni ku djondza hinkwaswu leswi Yehovha a nga swi yentxa. Kambe lexi xi va tsakisaka hintamu i ku tiva swaku a wunghanu la vona na Yehovha li ta ya mahlweni li kula ni ku tiya nkama ni nkama.

19. Xitsundzuxu i nkama wa ku mun’wana ni mun’wa wa hina a yentxa yini naswona lembe leli xi ta yentxiwa siku muni?

¹⁹ Yehovha a va nyika ntshembo wa ku tsakisa vanhu va yena va ku tshembeka. (Yer. 29:11) Xitsundzuxu xa lifu la Yesu Kreste i nkama wa lisima lowu hinkwerhu hi kombisaka swaku ha mu khensa Yehovha na Yesu hi leswi va nga va yentxela swona swaku va kota ku kuma a wutomi la ku kala li nga heli. Xitsundzuxu i ntlhanganu wa lisima lowu Vakreste hinkwavu va ntiyiso va kumanaka xikan’we lembe ni lembe. Lembe leli la 2021, Xitsundzuxu xi ta va hi Sábado dia 27 ka Março. Vanyingi va ta tlangela Xitsundzuxu na va chunsekile kasi van’wana swi ta va karhatela ku xi tlangela hi mhaka ya leswi va hluphiwaka ni ku petiwa madjele hi mhaka ya lipfumelo la vona. Kambe hambiswilitanu a va nga ta tshika ku xi yentxa. Yehovha, Yesu, tintsumi ni vatotiwa lava se va nga pfuxiwa va swi navela hintamu ku vona mabandla ya manyingi, magrupu ni mun’wana ni mun’wana wa hina a va ni Xitsundzuxu xa ku tsakisa.