1-2. a) Hi lini siku leli hi tolovelaka ku khumbuka murhandziwa wa hina lweyi se a nga fa? b) Hi wini nchumu wa lisima lowu Yesu a nga byela valandzeli va yena leswaku va wu yentxa?

HAMBILOKO se ku hundze nkama wa wunyingi na hi feliwile hi munhu lweyi hi mu rhandzaka, ha ha tama hi mu khumbuka ngopfungopfu loko ku fika siku leli a nga fa hi lona.

² Lembe ni lembe hi tipatsa ni vanhu amisaveni hinkwayu leswaku hi khumbuka lifu la munhu lweyi hi mu rhandzaka hintamu, ku nga Yesu Kreste. (1 Ped. 1:8) Ha tlhangana leswaku hi khumbuka lifu la munhu lweyi a nga nyikela wutomi la yena leswaku a hi ponisa ka xidjoho ni lifu. (Mat. 20:28) Impela Yesu a swi lava hintamu leswaku valandzeli va yena va khumbuka lifu la yena. Ka wusiku la wugamu Yesu na a nga se fa, a byele valandzeli va yena swaku va yentxa nchumu wa lisima hintamu, loko a te: “Tshamelani ku yentxa leswi leswaku mi ni khumbuka.” — Luk. 22:19.

3. Hi ta djondza hi yini ka nhlokomhaka leyi?

³ I vatsongo lava yaka ka Xitsundzuxu lava nga ni ntshembo wa ku ya hanya tilweni. Kambe ku tala ka lava yaka ka Xitsundzuxu va ni ntshembo wa ku hanya lani misaveni. Ka nhlokomhaka leyi, hi ta djondza hi leswi yentxaka Vakreste hinkwavu va ya ka Xitsundzuxu, ku nga na mhaka swaku i vatotiwa kumbe i va tinyempfu tin’wana. Hi ta tlhela hi vona swaku ku va kona ka Xitsundzuxu swi hi pfunisa ku yini. Kambe swoswi a hi rhangeni hi ku vona swaku hi mhaka muni vatotiwa va ya ka Xitsundzuxu.

4. Hi mhaka muni vatotiwa va nwa vhinyu va tlhela va dla pawu hi siku la Xitsundzuxu?

⁴ Malembe hinkwawu, Vakreste lava nga totiwa va dla pawu ni ku nwa vhinyu loko va li ka Xitsundzuxu. Hi mhaka muni va yentxa leswo? Pimisa hi leswi nga yentxeka ka wusiku la wugamu  leli Yesu a nga fa hi lona. Loko se ku hundze Paxkwa, Yesu a byele valandzeli va yena swaku malembe hinkwawu va fanele va yentxa Xilalelo xa Hosi. Yesu a tlhele a nyika 11 wa vapostolo va yena va ku tshembeka pawu ni vhinyu, a va byela swaku va dla va tlhela va nwa. A game a vulavula na vona hi xipfumelelwanu xa nyuwani ni xipfumelelwanu xa Mfumu. * (Luk. 22:19, 20, 28-30) Swipfumelelwanu swoleswo a swi ta pfulela ndlela vapostolo ni vatotiwa van’wana swaku va va vaprista ni tihosi atilweni. (Nhla. 5:10; 14:1) Leswo swi kombisa swaku ko va vatotiwa lava lumbaka swipfumelelwanu swoleswo ntsena, lava nga ni mfanelo ya ku dla pawu va tlhela va nwa vhinyu hi siku la Xitsundzuxu.

5. Hi wini ntshembo lowu vatotiwa va nga na wona, naswona va fanele va yentxa yini leswaku ntshembo wa vona wu hetiseka?

⁵ Nchumu wun’wana lowu yentxaka vatotiwa va ya ka Xitsundzuxu, hileswi xi va pfunaka ku tiyisa ntshembo wa vona. Phela Yehovha a va nyike ntshembo wa ku tsakisa hintamu wa ku hanya tilweni na va ni miri wa ku kala wu nga boli. Hinkwavu lava 144.000 va ta tirha na Yesu na va li kusuhi ni Xikwembu. (1 Kor. 15:51-53; 1 Yoh. 3:2) Vatotiwa va swi tiva swaku ntshembo wa vona wa ku hanya matilweni wu to hetiseka ntsena loko va tshembeka ka Yehovha anze va ya fa. (2 Tim. 4:7, 8) Phela vatotiwa va tsaka hintamu loko va pimisa hi ntshembo lowu va nga na wona. (Tito 2:13) Kambe hi nga ku yini hi “tinyempfu tin’wana”? (Yoh. 10:16) A hi voneni swaku hi mhaka muni lava tinyempfu tin’wana va ya ka Xitsundzuxu xa lifu la Yesu.

6. Hi mhaka muni lava va tinyempfu tin’wana va ya ka Xitsundzuxu lembe ni lembe?

⁶ Lava tinyempfu tin’wana va tsaka hi ku va kona ka Xitsundzuxu hambileswi va kalaka va nga dli pawu ni ku nwa vhinyu. Khambi la ku sungula lani lava va tinyempfu tin’wana va nga rhambiwa swaku va va kona ka Xitsundzuxu, ku ve hi 1938. Murindzi wa 1 ka Março wa 1938 a vule leswi: “I swa lisima hintamu kuva lava va tinyempfu tin’wana va va kona ka Xitsundzuxu va tlhela va vona leswi yentxekaka. . . . Phela ku ya ka Xitsundzuxu i nchumu wa ku tsakisa hintamu ni ka vona.” Ku fana ni leswi vanhu va tsakaka hintamu loko va rhambiwa ka muchadu, lava va tinyempfu tin’wana na vona va tsaka hintamu loko va va kona ka Xitsundzuxu, hambileswi va kalaka va nga dli pawu ni ku nwa vhinyu.

7. Hi mhaka muni lava va tinyempfu tin’wana va swi lava hintamu ku ya ka Xitsundzuxu?

⁷ Lava va tinyempfu tin’wana va wu tsakela hintamu ntshembo wa vona. Va swi nyimela hintamu ku twa dixkursu la Xitsundzuxu hikusa li vulavula hi leswi Kreste ni lava va 144.000 va nga ta swi yentxela vanhu va ku tshembeka ka Mfumu wa 1.000 wa Malembe wa Kreste. Hi ku kongomisiwa hi Yesu Kreste lava va 144.000 va ta txintxa misava hinkwayu yi va paradesi va tlhela va pfuna vanhu swaku va nga ha vi ni xidjoho. Phela lava va yaka ka Xitsundzuxu, va tsaka hintamu loko va pimisa hi nkama lowu ku nga ta hetiseka wuprofeta la Bibele leli nga ka buku la Esaya 35:5, 6; 65:21-23 ni Nhlawutelo 21:3, 4. Phela a Xitsundzuxu xi va pfuna swaku va pimisa hi nkama lowu va nga ta hanya aparadesi ni vanghanu ni maxaka ya vona. Xi tlhela xi va pfuna ku tiyisa ntshembo wa vona wa nkama lowu taka ni ku  kala va nga tshiki ku tirhela Yehovha. — Mat. 24:13; Gal. 6:9.

8. Hi wini nchumu wun’wana lowu yentxaka lava va tinyempfu tin’wana va swi lava hintamu ku ya ka Xitsundzuxu?

⁸ Nchumu wun’wana lowu yentxaka lava va tinyempfu tin’wana va ya ka Xitsundzuxu, hi leswaku va lava ku kombisa swaku va va rhandza hintamu vatotiwa naswona va va seketela. Bibele se a li vulile swaku lava va tinyempfu tin’wana, a va ta tirhisana xikan’we ni vatotiwa. Se a hi voneni swaku va swi yentxisa ku yini leswo.

9. Wuprofeta leli nga ka Zakariya 8:23 li swi kombisisa ku yini leswi lava tinyempfu tin’wana va titwisaka xiswona hi vatotiwa?

⁹ Lerha Zakariya 8:23. Wuprofeta li nga ka ndzimana leyi, li kombisa leswi lava va tinyempfu tin’wana va titwisaka xiswona hi ku tirhisana ni vatotiwa. A rito leli nge: “Muyuda” ni rito leli nge “n’wina” ma vulavula hi vatotiwa lava nga sala lani misaveni. (Rom. 2:28, 29) Kasi a marito lama nge: “10 wa vavanuna va tirimi hinkwatu ta matiku,” ma vulavula hi lava nga ni ntshembo wa ku hanya lani misaveni. Ndzimana leyi yi tlhela yi vula swaku lava va tinyempfu tin’wana “va khoma” swi tiya ka ntirho lowu vona ni vatotiwa va wu yentxelaka Yehovha. Va tlhela va tama va tirhela Yehovha xikan’we. Hi mhaka leyo, loko lava va tinyempfu tin’wana va va kona hi siku la Xitsundzuxu, va kombisa swaku va va rhandza hintamu vatotiwa.

10. I yini leswi Yehovha a swi yentxaka swaku a hetisisa wuprofeta leli nga ka Ezekiyele 37:15-19, 24, 25?

¹⁰ Lerha Ezekiyele 37:15-19, 24, 25. Leswaku wuprofeta leli li hetiseka, Yehovha a yentxa swaku lava va tinyempfu tin’wana ni vatotiwa va tirhisana xikan’we hi ku twanana. A wuprofeta leli, li vulavula hi tinhonga timbirhi. Lava va nga ni ntshembo wa ku hanya matilweni va fanisiwa ni nhonga ya “Yuda.” (Yuda i lixaka leli Yehovha a nga langa tihosi ka lona, leti a ti ta fuma aIsrayele.) Kasi lava va nga ni ntshembo wa ku hanya lani misaveni, va fanisiwa ni nhonga ya “Efrayimi.” * Yehovha a a ta patsa mintlawa leyi ya yimbirhi leswaku yi va “nhonga yin’we,” leswi vulaka swaku hinkwavu a va ta tirhisana xikan’we na va rhangeliwa hi Hosi ya vona Yesu Kreste. Hi mhaka leyo, lembe ni lembe lava tinyempfu tin’wana ni vatotiwa, va tlangela Xitsundzuxu na va li “ntlhambi wun’we” lowu nga ni ‘murisi mun’we.’ — Yoh. 10:16.

11. Tinyempfu tin’wana leti ku vulavuliwaka hi tona ka Matewu 25:31-36, 40, ti yentxa yini swaku ti seketela vatotiwa?

¹¹ Lerha Matewu 25:31-36, 40. Ka tindzimana leti, loko Yesu a vulavula hi “tinyempfu,” a vulavula hi vanhu va vanene lava va hanyaka ka masiku ya wugamu, lava nga ni ntshembo wa ku hanya misaveni. Vanhu volavo ku nga tinyempfu tin’wana, va seketela vatotiwa lava va nga sala lani misaveni, hi ku va pfuna ku yentxa ntirho wa lisima hintamu wa ku chumayela mahungu ya ku tsakisa amisaveni hinkwayu ni ku yentxa vadjondzisiwa. — Mat. 24:14; 28:19, 20.

12-13. I yini swin’wana leswi lava va tinyempfu tin’wana va swi yentxaka swaku va seketela vatotiwa?

¹² Lembe ni lembe, na ka ha sale mavhikinyana leswaku ku fika Xitsundzuxu, lava va tinyempfu tin’wana va pfuna vatotiwa hi ku yentxa kampanya amisaveni hinkwayu, leswaku va rhamba vanhu lava swi tsakelaka leswaku va va kona ka Xitsundzuxu. (Vona kwadru leli nge: “ Leswi U Nga Swi Yentxaka Swaku U Tilunghiselela Hi Nkama Wa Xitsundzuxu.”)  Lava va tinyempfu tin’wana va tlhela va yentxa hinkwaswu va nga swi kotaka leswaku va lunghiselela Xitsundzuxu ka mabandla ya vona, hambiloko ka mabandla ya vona ku nga na makwerhu lweyi a nga totiwa. Phela va tsaka hintamu loko va yentxa leswo leswaku va pfuna vatotiwa, naswona va swi tiva swaku loko va pfuna vatotiwa, swi fana ni loko va pfuna Yesu hi ku kongoma, funtshi Yesu wa swi vona leswi va swi yentxaka. — Mat. 25:37-40.

¹³ Swoswi a hi voneni swilo swin’wana leswi yentxaka hinkwerhu hi swi lava hintamu ku va kona ka Xitsundzuxu, ku nga na mhaka swaku hi ni ntshembo wa ku hanya misaveni kumbe amatilweni.

14. Yehovha na Yesu va swi kombisise ku yini swaku va hi rhandza hintamu?

¹⁴Hi kombisa swaku hi mu khensa hintamu Yehovha na Yesu hi lirhandzu leli va hi kombaka lona. Ku ni swilo swa swinyingi leswi Yehovha a swi yentxaka leswi kombisaka swaku wa hi rhandza. Kambe nchumu wa wukulu lowu Yehovha a nga wu yentxa swaku a kombisa swaku a hi rhandza hintamu, i ku va a rhume N’wana wa yena lweyi a mu rhandzaka hintamu leswaku a ta hi fela. (Yoh. 3:16) Naswona ha swi tiva leswaku Yesu a hi rhandza hintamu hikusa a nyikele wutomi la yena leswaku a hi ponisa. (Yoh. 15:13) Phela a hi nge swi koti ku hakela Yehovha na Yesu hi lirhandzu leli va nga hi komba lona, kambe hi nga kombisa swaku ha va khensa hi ndlela leyi hi hanyaka hi yona siku ni siku. (Kol. 3:15) Ku ya ka Xitsundzuxu swi hi yentxa hi khensa lirhandzu leli Yehovha na Yesu va nga hi komba lona, hi tlhela hi kombisa swaku ha va rhandza.

15. Hi mhaka muni vatotiwa ni lava tinyempfu tin’wana va li khensa hintamu lifu la Yesu?

¹⁵Hi li khensa hintamu lifu la Yesu. (Mat. 20:28) Vamakwerhu lava nga totiwa va li khensa hintamu lifu la Yesu, hikusa hi mhaka ya lona swa koteka swaku va va ni ntshembo wa ku hanya matilweni. Funtshi leswi va nga ni lipfumelo ka lifu la Yesu, Yehovha a li va lulamile a tlhela a ku i vana va yena. (Rom. 5:1; 8:15-17, 23) Lava tinyempfu tin’wana na vona va li khensa hintamu lifu la Yesu, funtshi leswi va nga ni lipfumelo ka lifu la Yesu swa koteka swaku va va ni wunghanu la linene na Yehovha, va mu tirhela va tlhela va va ni ntshembo wa ku pona ka “nhlomulu wa wukulu.” (Nhla. 7:13-15) Phela loko lava tinyempfu tin’wana ni vatotiwa va ya ka Xitsundzuxu lembe ni lembe, va kombisa swaku va li khensa hintamu lifu la Yesu.

16. Hi wini nchumu wun’wana lowu hi yentxaka hi ya ka Xitsundzuxu?

¹⁶ Nchumu wun’wana lowu hi yentxaka hi ya ka Xitsundzuxu, hi leswaku hi lava ku yingisa Yesu Kreste ku nga na mhaka swaku hi ni ntshembo wa ku ya hanya matilweni kumbe lani misaveni. Hinkwerhu hi tikarhatela ku yingisa nawu wa Yesu lowu nge: “Tshamelani ku yentxa leswi leswaku mi ni khumbuka.” — 1 Kor. 11:23, 24.

17. Xitsundzuxu xi hi pfunisa ku yini ku va ni wunghanu la linene na Yehovha?

¹⁷Wunghanu la hina na Yehovha li ya li tiya. (Yak. 4:8) Hilani hi nga swi vona hi kona, Xitsundzuxu xi hi pfuna ku pimisa hi ntshembo lowu Yehovha a hi nyikaka wona ni lirhandzu la likulu leli Yehovha a nga hi komba lona. (Yer. 29:11; 1 Yoh. 4:8-10) Ku pimisa hi ntshembo lowu hi nga na wona wa nkama  lowu taka, ni lirhandzu la likulu leli Yehovha a hi kombaka lona, swi hi pfuna ku tama hi rhandza Yehovha hi tlhela hi tiyisa wunghanu leli hi nga na lona na yena. — Rom. 8:38, 39.

18. Ku lerha ni ku pimisa hi leswi Yesu a nga hi yentxela swona swi hi pfunisa ku yini?

¹⁸Xitsundzuxu xi hi pfuna ku tekelela xikombiso xa Yesu. (1 Ped. 2:21) Loko siku la Xitsundzuxu li li kusuhi ni ku fika, hi lunghiselela mbilu ya hina, hi ku lerha hi tlhela hi pimisa hintamu hi tindzimana ta Bibele leti vulavulaka hi vhiki la wugamu leli Yesu a nga va lani misaveni, lifu la yena ni nkama lowu a nga pfuxiwa hi wona. Se hi siku la Xitsundzuxu, dixkursu leli vekiwaka li hi khumbukisa lirhandzu leli Yesu a nga hi komba lona. (Efe. 5:2; 1 Yoh. 3:16) Phela ku lerha ni ku pimisa hi swilo hinkwaswu leswi a nga hi yentxela swona, swi hi yentxa hi tinyimisela ku tekelela xikombiso xa yena, leswaku hi “fambisa xileswi Yesu a nga fambisa xiswona.” — 1 Yoh. 2:6.

19. Hi nga yentxa yini swaku hi tama hi rhandziwa hi Yehovha?

¹⁹Xitsundzuxu xi hi pfuna ku tama hi va vanghanu va Yehovha. (Yuda 20, 21) Leswaku hi tama hi va vanghanu va Yehovha, hi fanele hi mu yingisa, hi basisa vito la yena hi tlhela hi mu tsakisa. (Swi. 27:11; Mat. 6:9; 1 Yoh. 5:3) Ku va kona ka Xitsundzuxu, swi hi pfuna ku tama hi hanya hi leswi Yehovha a swi lavaka siku ni siku, leswaku a tama a hi rhandza.

20. Hi swini swivangelo leswi hi yentxaka hi ya ka Xitsundzuxu?

²⁰ Hinkwerhu, hi ni swivangelo swa swinene leswi hi yentxaka hi ya ka Xitsundzuxu, ku nga na mhaka swaku hi ni ntshembo wa ku hanya matilweni kumbe lani misaveni. Lembe ni lembe loko hi ya ka Xitsundzuxu, hi khumbuka lifu la munhu lweyi hi mu rhandzaka hintamu, ku nga Yesu Kreste. Naswona hinkwerhu hi khumbuka lirhandzu leli Yehovha a nga hi komba lona hi ku nyikela N’wana wa yena Yesu Kreste leswaku a hi fela. Lembe leli, Xitsundzuxu xi ta va hi diya 15 ka Abril wa 2022, hi Sexta-feira nimadlambu. Leswi hi mu rhandzaka hintamu Yehovha na Yesu, a hi fanelanga hi pfumelela nchumu xi hi sivela ku ya ka Xitsundzuxu hi siku leli.