1. Hi xini xikarhatu lexi Davhida a a li na xona?

DAVHIDA a a li ku balekeni leswaku a ponisa wutomi la yena hikusa Sawulo hosi leyi a yi li ni matimba aIsrayele a yi lava ku mu dlaya. Nkama lowu Davhida a a baleka valala va yena, a fike a nyima ka doropa la Nobo, lani a nga fika a kombela 5 wa mapawu swaku a dla. (1 Sam. 21:1, 3) Davhida ni vavanuna va yena va game va ya tumbela. (1 Sam. 22:1) Kambe hi mhaka muni Davhida a humeleliwe hi swilo leswi?

2. Hi swini swilo swa ku biha leswi Sawulo a nga swi yentxa? (1 Samuwele 23:16, 17)

² Sawulo a a kweleta Davhida hikusa Davhida a a tiviwa hintamu naswona vanhu a va mu rhandza. Sawulo a a swi tiva swaku Yehovha a a nga ha swi lavi swaku a va hosi hi leswi a kalaka a nga mu yingisanga, naswona a a swi tiva swaku Davhida a a ta va hosi ya Israyele leyi a yi ta mu pfaleta. (Lerha 1 Samuwele 23:16, 17.) Hambileswo Sawulo a a nge se tshika ku fuma Israyele, naswona a a ni masonchwa ya manyingi funtshi vanhu va vanyingi a va nyima na yena. Hi mhaka leyo, Davhida a a fanele a baleka leswaku Sawulo a nga mu dlayi. Ku nga va swaku Sawulo a a ta swi kota ku sivela Yehovha a tlhela a yentxa swaku Davhida a nga vi hosi ya Israyele? (Esa. 55:11) Bibele a li xi hlamuli xivutiso lexo, kambe hi nga tiyiseka hi leswi: Sawulo a o tilavela lifu. Hikusa a nga kona lweyi a nga sivelaka Yehovha ku yentxa leswi a swi lavaka.

3. Davhida a a titwisa ku yini hi swikarhatu hinkwaswu leswi a swi mu humelela?

³ Davhida a a tiveka hansi. Phela Davhida a nga yo tiveka hi yexe leswaku a va hosi ya Israyele kambe hi Yehovha lweyi a nga mu langa. (1 Sam. 16:1, 12, 13) Hambileswo, Sawulo a a mu nyenya hintamu Davhida. Kambe Davhida a a nga soli Yehovha hi swikarhatu leswi a a kumana na swona hileswi Sawulo a a lava ku mu dlaya, naswona a a nga tshameli ku khala a vula swaku a nga na swakudla  swa ku yenela ni swaku a hanya hi ku baleka. Swi nga yentxeka ku ve hi nkama wolowo Davhida na a hanya hi ku baleka Sawulo, a nga vula marito ya ndzimana ya hina ya lembe lama nge: “Lava lavetelaka Yehovha a va nga ta pfumala nchumu.” — Pis. 34:10.

4. Hi swini swivutiso leswi hi nga ta bula hi swona ka nhlokomhaka leyi, naswona hi mhaka muni swi li swa lisima?

⁴ Namuntlha vanhu va vanyingi lava tirhelaka Yehovha a va na swakudla swa ku yenela leswaku va tihlayisa hi swona funtshi a va na swilo hinkwaswu leswi va swi lavaka. * Naswona ka nkama lowu wa mavabyi ya coronavírus, vamakwerhu va vanyingi a va swi kumi swakudla swaku va kota ku tihanyisa, funtshi leswi “nhlomulu wa wukulu” wu nga kusuhi, swilo swi ya swi karhata hintamu. (Mat. 24:21) Hi mhaka leyo, ka nhlokomhaka leyi hi ta bula hi swivutiso leswi: Swi kotekise ku yini kuva Davhida ‘a nga pfumali nchumu’ hambileswi a a kumana ni swikarhatu? Hi mhaka muni hi fanele hi tsaka hi leswi hi nga na swona? Hi mhaka muni hi fanele hi tshemba swaku Yehovha a ta hi hlayisa? Naswona hi nga tilunghiselelisa ku yini swoswi swaku hi lwisana ni swikarhatu swa nkama lowu taka?

5-6. Hi ku ya hi Tipisalema 23:1-6, Davhida a a lava ku vula yini loko a ku vanhu va Xikwembu a va nge ‘pfumali nchumu’?

⁵ Davhida a vule swaku lava va tshembaka Yehovha “a va nga ta pfumala nchumu.” Davhida a a lava ku vula yini hi marito lawa? Phela Davhida a tshame a vula marito ya ku fana ni lawa nkama a nga tsala buku la Tipisalema ndzima 23. Hi mhaka leyo, Tipisalema ndzima 23 yi nga hi pfuna ku twisisa leswi Davhida a a lava ku vula swona loko a te: “Lava tshembekaka ka Yehovha a va nge pfumali nchumu.” (Lerha Tipisalema 23:1-6.) Ka marito ya ku sungula ya Tipisalema ndzima 23, Davhida a vule leswi: “Yehovha i Murisi wa mina, a ni nge pfumali nchumu.” Loko Davhida se a vule marito lawo, a game a vulavula hi minkateko ya lisima hintamu, leyi Yehovha a nga mu nyika yona hileswi a nga mu pfumelela swaku a va Murisi wa yena. Hi xikombiso, minkama hinkwayu Yehovha a a li na Davhida naswona a a  mu yentxa a famba “hi tindlela ta ku lulama.” Ka Davhida, ku tirhela Yehovha a swo fana ni loko a “humula ka ndhawu leyi yi nga ni byanyi la ku nona.” Hambileswo, Davhida a a swi tiva swaku a a ta kumana ni swikarhatu funtshi vanhu van’wana a va ta mu nyenya. Phela minkama yin’wana Davhida a a hela ntamu ingaku o famba ka “nkova lowu wu nga mphuma hintamu,” kambe a a swi tiva swaku leswi Yehovha a a li Murisi wa yena a a nga ta “chava nchumu.”

⁶ Se swi kotekise ku yini swaku Davhida a nga ‘pfumali nchumu’? Nhlamulu ya xivutiso lexo hi leyi: Davhida a a nga pfumali nchumu hikusa a a ni hinkwaswu leswi a a swi lava swaku a tama a va munghanu wa Yehovha. Davhida a a nga tshameli ku vilela, kambe a a tsaka hi swilo leswi Yehovha a a mu nyika swona. Ka Davhida, nchumu wa lisima lowu a a li na wona a ku li ku katekisiwa hi Yehovha a tlhela a mu vhikela.

7. Hi ku ya hi buku la Luka 21:20-24, hi xini xikarhatu lexi Vakreste lava a va tshama Yudiya va nga kumana na xona?

⁷ Marito lawa Davhida a nga ma vula, ma kombisa swaku a hi fanelanga hi tikarhatela ku va ni swilo swa swinyingi. Phela a swi bihanga ku va ni swilo leswi hi swi lavaka, kambe xa ku biha i ku pfumelela swaku swilo swoleswo swi va swa lisima hintamu ka wutomi la hina. Vakreste van’wana va Yudiya a va yi tiva kahle mhaka leyi. (Lerha Luka 21:20-24.) Yesu a byele Vakreste va Yudiya swaku doropa la Jerusalema a li ta “rhendzeliwa hi masonchwa.” A tlhele a va byela swaku loko leswo swi yentxeka a va fanele va ‘baleka va ya ka tinhava’. Phela loko va baleka a va ta ponisa wutomi la vona, kambe a va fanele va tinyimisela ku siya swilo swa ku tala leswi a va li na swona. Ka malembenyana lawa ma nga hundza, a revhixta la Murindzi li vule leswi hi Vakreste lava a va tshama Yudiya: “Va siye tiyindlo, va siya masimu va tlhela va siya swilo leswi a va li na swona amakaya ya vona. A va tshemba swaku Yehovha a a ta va vhikela a tlhela a va hlayisa. Ka vona, ku tirhela Yehovha a ku li nchumu wa lisima ku tlula swilo hinkwaswu.”

8. Hi nga djondza yini ka leswi nga humelela Vakreste lava a va tshama Yudiya?

⁸ Hi nga djondza yini ka leswi nga humelela Vakreste lava a va tshama Yudiya? A revhixta la Murindzi leli hi nga bula hi lona, li tlhele li vula leswi: “Ka nkama lowu taka hi nga ha kumana ni swikarhatu leswi nga ta lava hi kombisa swaku ka hina xa lisima i wunghanu leli hi nga na lona na Yehovha kumbe swilo leswi hi nga na swona. Ku nga va swaku swilo leswi hi nga na swona i swa lisima ku tlula ku va hi ponisiwa ni vanhu lava tirhelaka Yehovha? Ku vula ntiyiso, leswaku hi pona swi nga ha lava hi hlula swikarhatu hi tlhela hi titsona swilo swa swinyingi. Hi mhaka leyo, ku fana ni Vakreste lava a va tshama Yudiya, na hina hi fanele hi yentxa hinkwaswu leswi hi nga swi kotaka swaku ku tirhela Yehovha swi li swona swa lisima ka wutomi la hina.” *

9. Marito lawa Pawulo a nga ma vula ka buku la Vaheberu 13:5, 6 ma hi tiyisekisa hi yini?

⁹ Phela swi va karhatele hintamu Vakreste lava a va tshama Yudiya ku siya swilo swa vona ndzhaku leswaku va ya sungula wutomi la nyuwani. A va fanele va tshemba swaku Yehovha a a ta va hlayisa. Naswona nchumu wun’wana lowu a wu ta pfuna Vakreste lava a va tshama Yudiya, a ku li marito lawa Pawulo a nga ma tsalela Vaheberu na ka ha sale 5 wa malembe leswaku Jerusalema a rhendzeliwa hi masonchwa ya Varoma, lawa ma nge: “Mi nga rhandzeni male, kambe tsakani hi leswi mi nga na swona. Hikusa Xikwembu xi te: ‘A ni nga ta tshuka ni ku tshika naswona a ni nga ta tshuka ni tshika ku ku pfuna.’ Leswaku hi nga chavi ku vula hi ku: ‘Yehovha i mupfuni wa mina; a ni nge chavi nchumu. A nga ni yentxa yini munhu?’” (Heb. 13:5, 6) Phela Vakreste lava a va tshama Yudiya lava va nga yingisa marito lawa ya Pawulo, swi va vevukelile ku siya swilo swa vona  ndzhaku va ya sungulisa wutomi la nyuwani. A va tiyiseka swaku Yehovha a ta va nyika hinkwaswu leswi va swi lavaka. Phela na hina marito ya Pawulo ma hi tiyisekisa swaku Yehovha minkama hinkwayu a ta hi nyika leswi hi swi lavaka.

10. Pawulo a te hi fanele hi yentxa yini swaku hi tshama na hi tsakile?

¹⁰ Mupostolo Pawulo a byele Timotiyu marito lawa na hina namuntlha ma nga hi pfunaka hintamu loko a te: “Loko hi ni swakudla ni swa ku yambala hi ta tsaka hi minchumu leyi.” (1 Tim. 6:8) Ku nga va swaku leswo swi lava ku vula leswaku swi bihile ku xava swakudla swa swinene, ku va ni yindlo ya yinene leswaku hi tshama ka yona kumbe hi xava timpahla ta nyuwani? Phela a hi swona leswi Pawulo a a lava ku vula swona! Pawulo a a lava ku vula swaku hi fanele hi tsaka ku nga na mhaka swaku hi ni swilo swa swinyingi kumbe swa switsongo. (Filp. 4:12) Ku yentxa leswo swi mu pfune hintamu Pawulo swaku a tshama na a tsakile. Xa lisima hintamu ka wutomi la hina i wunghanu la linene leli hi nga lona na Yehovha, ku nga li swilo leswi hi nga na swona. — Hab. 3:17, 18.

11. Hi nga djondza yini hi ku tsaka hi leswi hi nga swona ka marito lawa Moxe a nga ma vula ka buku la Deteronoma 2:7?

¹¹ Minkama yin’wana ku nga va ni minchumu leyi hi yi lavaka hintamu kambe Yehovha a vona swaku a swi bohi leswaku hi va na yona. Pimisa hi leswi Moxe a nga swi byela Vayisrayele loko se va hete 40 wa malembe na va li mananga. Yena a te: “Hikusa Yehovha Xikwembu xa n’wina a mi katekisile ka swilo hinkwaswu leswi mi nga swi yentxa. Yena a swi tiva kahle leswi nga mu humelela ka nkama lowu a mu li mananga. Yehovha  Xikwembu xa n’wina a ve na n’wina ka malembe lawa ya 40. A mi pfumalanga nchumu.” (Det. 2:7) Ka malembe hinkwawu lawa ya 40, Yehovha a hlayise Vayisrayele hi ku va nyika mana leswaku va dla, naswona a mpahla leyi va nga suka na yona Gibita, hi yona leyi va nga yi tirhisa ku ringana 40 wa malembe lawa na va li mananga. (Det. 8:3, 4) Swi nga yentxeka Vayisrayele van’wana va pimise swaku leswi Yehovha a a va yentxela swona a swi li switsongo, kambe Moxe a byele Vayisrayele swaku Yehovha a a va nyika hinkwaswu leswi a va swi lava. Na hina hi nga mu tekelela Moxe hi ku tsaka hi leswi hi nga na swona. Yehovha a tsaka hintamu loko hi swi nyika lisima hambi swilo swa switsongo leswi a hi yentxelaka swona, naswona wa tsaka loko hi vona swilo leswo ku li ku katekisiwa hi yena.

12. I yini leswi kombisaka swaku Davhida a a nga titshembi kambe a a tshemba Yehovha?

¹² Davhida a a swi tiva swaku Yehovha wa tshembeka, naswona wa va hlayisa lava va mu rhandzaka. Nkama Davhida a nga tsala buku ya Tipisalema ndzima 34 a a kumana ni swikarhatu swa swikulu. Hambileswo Davhida a a tshemba swaku “ntsumi ya Yehovha a yi li kusuhi na yena” (Pis. 34:7) Swi nga yentxeka Davhida a fanise ntsumi ya Yehovha ni sonchwa leli minkama hinkwayu li nga lunghekela ku lwa ni valala. Hambileswi Davhida a a li sonchwa la matimba naswona Yehovha a a mu tshembise ku va hosi ya Israyele, a nga titshembanga, a tibyela swaku leswi a nga sonchwa leli nga ni matimba a nga swi kota ku tivhikela ka valala va yena. (1 Sam. 16:13; 24:12) Kambe Davhida a a mu tshemba hi ku helela Yehovha naswona a a swi tiva swaku minkama hinkwayu ntsumi ya Yehovha yi vhikela lava va chavaka Xikwembu. I ntiyiso swaku a hi nyimelanga swaku Yehovha a hi vhikela hi ndlela ya singita loko hi kumana ni swikarhatu, kambe ha tiyiseka swaku lava tshembaka Yehovha, hambiloko vo fa hi mhaka ya swikarhatu leswi va kumanaka na swona, va ta kuma wutomi la ku kala li nga heli ka nkama lowu taka.

13. Loko Gogo wa Magogo a hi dumela hi mhaka muni swi ta tikomba ingi a nga kona lweyi a nga ta hi vhikela, naswona hi mhaka muni hi nga fanelanga hi chava? (Vona mufoto wa pajina la ku sungula.)

¹³ Ku nga li khale hi ta kumana ni miringo ya yikulu, naswona swi ta lava hi kombisa swaku ha mu tshemba Yehovha kumbe a hi mu tshembi. Loko Gogo wa Magogo, ku nga ntlawa wa matiko a ta hi dumela, swi nga tikomba ku nga na munhu lweyi a nga ta hi vhikela. Hi mhaka leyo, swi ta lava hi tshemba swaku Yehovha a ta hi vhikela. Matiko ya misava leyi, ma ta hi vona hi fana ni tinyempfu leti kalaka ti nga na munhu wa ku ti vhikela. (Ezek. 38:10-12) Naswona leswi hi kalaka hi nga djondzi ku lwa tinyimpi hi tlhela hi nga swi tirhisi swibamu, matiko ma ta vona ingi swa vevuka ku hi hlula, kambe leswi va kalaka va nga na lipfumelo, a va nga ta swi vona swaku Yehovha ni tintsumi ta yena va ta hi vhikela. Hambileswo, hina a hi nga ta chava hikusa ha swi tiva swaku Yehovha a ta va vhikela vanhu va yena. Phela matiko ya misava leyi ma ta hlamala hintamu loko ma vona swaku Yehovha ni tintsumi ta yena va na hina. — Nhla. 19:11, 14, 15.

14. Hi nga yentxa yini swoswi swaku hi tilunghiselela swikarhatu swa nkama lowu taka?

¹⁴ Hi nga yentxa yini swoswi swaku hi tilunghiselela swikarhatu swa nkama lowu taka? Xa ku sungula: A hi fanelanga hi swi nyika lisima hintamu swilo leswi hi nga na swona, hikusa ka nkama lowu taka swi ta lava hi swi tshika. Naswona hi fanele hi tsaka hi swilo leswi hi nga na swona swoswi, hi tlhela hi rhangisa leswi swi nga swa lisima ka wutomi la hina, ku nga wunghanu la hina na Yehovha. Loko hi ya hi mu tiva ku yampsa Yehovha a hi nga ta chava loko Gogo wa Magogo a hi dumela.

15. I yini leswi nga humelela Davhida nkama na a ha li jovhem leswi nga mu yentxa a tshemba swaku Yehovha a a ta mu pfuna?

 ¹⁵ A hi voneni swin’wana leswi nga pfuna Davhida swaku a lwisana ni swikarhatu leswi a a kumana na swona ni swaku hi nga djondza yini ka leswi a nga swi yentxa. Davhida a vule leswi: “Ringani mi vona swaku Yehovha i munene, wa tsaka munhu lweyi a tumbelaka ka yena.” (Pis. 34:8) Marito lawa ma kombisa swaku Davhida a a tshemba swaku Yehovha a ta mu pfuna. Minkama hinkwayu Davhida a a mu tshemba Yehovha, hi mhaka leyo, Yehovha a nga zanga a mu tshika Davhida. Nkama lowu Davhida a nga lwa na Goliyadi na a ha li jovhem, a vule leswi: “Namuntlha Yehovha a ta ku nyiketa ka mavoko ya mina.” (1 Sam. 17:46) Ndzhaku ka leswo, hosi Sawulo a zame hi tindlela hinkwatu swaku a dlaya Davhida, kambe “Yehovha a a li na yena.” (1 Sam. 18:12) Davhida a a swi tiva swaku minkama hinkwayu Yehovha a a ta va na yena funtshi a a ta mu pfuna ku hlula swikarhatu.

16. I ka swiyimu swihi lani hi nga vonaka swaku Yehovha i munene naswona wa hi hlayisa?

¹⁶ Loko hi mu tshemba hintamu Yehovha swoswi, swi ta hi vevukela ku tshemba swaku a ta hi pfuna loko hi kumana ni swikarhatu ka nkama lowu taka. Hi xikombiso, loko swi lava hi bula ni mutholi wa hina leswaku hi mu kombela ku lovha siku lin’we a ntirhweni swaku hi ta kota ku ya asembleya kumbe a kongresu, swi lava hi tshemba swaku Yehovha a ta hi pfuna. Naswona swi lava lipfumelo swaku hi kota ku vulavula ni mutholi wa hina loko hi mu kombela ku txintxa nkama kumbe masiku lawa hi tirhaka hi wona leswaku hi ya mintlhanganwini kumbe ka ntirho wa ku chumayela. Se hi ta yentxa yini loko mutholi wa hina a nga pfumeli a tlhela a hi hlongola ntirhweni? Ku nga va swaku hi ta tshemba swaku Yehovha a ta va na hina a tlhela a hi nyika hinkwaswu leswi hi swi lavaka? (Heb. 13:5) Vamakwerhu va vanyingi lava va nga ka ntirho wa nkama hinkwawu va vula swaku Yehovha a va hlayisile a tlhela a va nyika hinkwaswu leswi va swi lavaka. Phela Yehovha wa tshembeka.

17. Hi yini ndzimana ya lembe la 2022, naswona hi mhaka muni ku langiwe yona?

¹⁷ Loko Yehovha a li na hina a hi nge swi chavi leswi nga ta yentxeka ka nkama lowu taka, naswona loko hi rhangisa Yehovha ka wutomi la hina a nga ta hi tshika. Leswaku Ntlawa lowu Rhangelaka wu hi pfuna ku tilunghiselela swikarhatu leswi hi nga ta kumana na swona ka nkama lowu taka hi tlhela hi tshemba Yehovha, wu lange buku la Tipisalema 34:10 leswaku yi va ndzimana ya lembe la 2022, leyi nge: “Lava lavetelaka Yehovha a va nga ta pfumala nchumu.”