Papayi a a li mufundhisi wa Igreja Unida leyi a yi li kona aCanadá, se ma Domingo hinkwawu mina ni makwerhu wa mina a hi ya kerekeni ka ntlawa lowu ku djondzisiwaka swivanani ka wona. Kambe a hi gama hi famba na yena aIgreja hi ya khongela hi ma 11:00. Se nimadlambu a hi tolovela ku famba na mamani ka Yindlo ya Wugandzeli. Hi mhaka leyo, a swi hi vevukela ku vona ku hambana loku a ku li kona ka leswi a hi swi djondza Igreja ni ka Yindlo ya Wugandzeli.

Mamani a sungule ku byela vanghanu va yena Bob na Marion Hutcheson swilo leswi a a swi djondza ka Bibele, naswona hi ku famba ka nkama na vona va game va yamukela ntiyiso. Hi 1958 ndjangu wa va ka Hutcheson ni vana va vona vanharhu, va ni tekile va famba na mina ka Asembleya leli nga yendliwa Nova Iorque leli nga teka 8 wa masiku, leli a li ni nhlokomhaka leyi nge: Vontade Divina. Loko ni pimisa hi minzamu va nga yi yendla swaku va famba na mina, na swi vona swaku a swi va vevukelanga. Kambe Asembleya leliyani li ni khumbe hintamu funtshi a ni nge li khohlwi.

Ni kule ka ndhawu leyi a ku fuyiwa tihuku, makamela ni swiharhi swin’wani. Leswo swi yendle swaku ni swi tsakela ku hlayisa swiharhi. Hi mhaka leyo, a ni lava ku hamba kursu la ku yelana ni ku hlayisa swiharhi. Nkama mamani a nga swi tiva, a swi bulele doda lin’wani la bandleni. Kambe li game li ni khumbukisa swaku hi hanya “ka masiku ya wugamu,” li tlhela li ni byela swaku a ku va ni heta malembe ya manyingi na ni li univhersidadi swi nga ha veka nghozini wunghanu la mina na Yehovha. (2 Tim. 3:1) Leswo swi  yendle swaku ni teka xiboho xa ku kala ni nga yi univhersidadi.

A na ha tivutisa swaku ni ta yendla yini loko se ni hete xikola. Hambileswi a ni ya nsin’wini vhiki ni vhiki a ni nga wu rhandzi ntirho wa ku chumayela naswona a ni nga pimisi hi ku va mupfuli wa ndlela. Papayi ni tiyu wa mina lava a va nga li Timboni a va ni kutxa swaku ni ya tirha ka komponi ya maseguru aToronto. Leswi tiyu wa mina a a li xixefani kohala ni pfumelile ntirho lowu a nga ni nyika wona.

A Toronto a ni tirha hintamu naswona a ni heta nkama wa wunyingi ni vanhu lava a va nga li Timboni ta Yehovha. Se leswo swi yendle swaku ni nga ha yi hintamu mintlhanganwini naswona ni nga ha chumayeli hintamu. Ku sunguleni a ni tshama ni vhovho wa mina lweyi a a nga li Mboni ya Yehovha, kambe nkama a nga fa swi lave ni suka ni ya lava ndhawu yin’wani swaku ni tshama ka yona.

Bob na Marion Hutcheson lava ni nga tshama ni famba na vona kongresu hi 1958, a va fana ni vapapayi ka mina. Vona va ni rhambile swaku ni ya tshama na vona kaya ka vona, va tlhela va ni pfuna swaku ni kulisa wunghanu la mina na Yehovha. Hi 1960 mina ni n’wana wa vona John hi tsakamisiwile xikan’we. John a sungule ku va mupfuli wa ndlela, se leswo swi yendle swaku na mina ni ya ni wu rhandza ntirho lowu a ni wu yendlela Yehovha. Vamakwerhu bandleni va swi vonile swaku a ni ya ni wu hisekela ntirho wa Yehovha, naswona va ni vekile swaku ni va mulanguteli wa Escola Teocrática. a

Hi 1966 ni chade ni ntombhi ya mina Randi Berge, mupfuli wa ndlela wa ku hiseka lweyi a a swi lava hintamu ku ya pfunisa lomu a ku ni vachumayeli vavatsongo. Mudjikelezi a swi vonile swaku a hi lava ku yengesela ntirho wa hina ka Yehovha. Se a hi kutxile swaku hi ya pfunisa ka bandla la Orillia, aOntário. Se hina hi yo vhela hi longela leswi nga swa hina hi famba.

Na ha ha li ku fika Orillia, na mina ni sungule ku va mupfuli wa ndlela. Ku hiseka ka nsati wa mina hi kona ku nga yendla swaku na mina ni wu nghenela ntirho lowu. A nkama ni nga yendla minzamu ya ku va mupfuli wa ndlela wamunene, ni sungule ku tsaka hi ku tirhisa Bibele ni ku vona vanhu na va twisisa leswi a ni swi chumayela. Naswona ni kume nkateko wa ku pfuna kazal lin’wani aOrillia leswaku li txintxa wutomi la lona ivi li va Timboni ta Yehovha.

Nkama lowu na hi li Toronto, hi tive makwerhu Arnold MacNamara, ku nga mun’we wa vamakwerhu lava a va rhangela Betele. Yena a hi vutisile swaku a hi nga swi naveli ku va vapfuli va ndlela va ku hlawuleka ke. Mina ni vhele ni hlamula leswi: “Ha swi lava! Va nga hi rhumela kun’wani ni kun’wani kambe a hi swi lavi ku ya Quebec.” A ni pimisisa xileswo hi mhaka ya leswi vanhu lava a va vulavula Xinghiza aCanadá a va va nyenya hintamu vanhu lava a va vulavula Xifrancês ka doropa la Quebec. Hi nkama wolowo a ku ni vanhu lava a va hamba switereka va tlhela va pfuxa xipfunyi na va lwela swaku a doropa la Quebec li nga ha lumbi Canadá.

Makwerhu Arnold a game a ku: “Phela Betele swoswi lo rhumela vapfuli va ndlela va ku hlawuleka aQuebec ntsena.” A nkama a nga hlaya leswo ni yo vhela ni pfumela hikusa a ni swi tiva swaku a nsati wa mina Randi a a ta swi tsakela ku ya tirhela Quebec. Naswona ndzhaku ka nkamanyana ni game ni vona swaku a xiboho lexo ku ve xin’we xa swiboho swaswinene ni nga tshama ni swi yendla ka wutomi la mina!

Loko se hi hete 5 wa mavhiki na hi djondzela Xifrancês, mina na Randi ni vamakwerhu vambirhi lava a va li nsati na nuna, hi ye aRimouski, ku nga kolomuyani ka 540 wa makilometru loko u sukela Montreal. A hi nga se xi tiva kahle Xifrancês, funtshi leswo swi tikombile nkama lowu na ni lerha switiviso ka ntlhanganu. Nkama lowu na ni tivisa kongresu leli nga ta landzela, handle ka ku vula swaku ku vuya “vadelegadu va Áustria” ni te ku vuya “vadelegadu va avestruzes.”

A Rimouski hi game hi pfuniwa hi 4 wa vamakwerhu va xisati va ku hiseka ni ndjangu wa ka Huberdeaus lowu a wu ni 2 wa vana va xisati. Ndjangu lowu wu lugare yindlo yayikulu leyi a yi ni 7 wa makwartu. Yindlo leyi a yi pendiwe hi kori ya ku basa, hi mhaka leyo a hi yi vitana Yindlo ya Ku Basa. A hi tshama hi li 12 kumbe 14 wa vanhu. Naswona leswi mina na Randi a hi li vapfuli va ndlela va ku hlawuleka a hi heta siku hinkwalu hi li nsin’wini. Se, a swi hi tsakisa ku va ni vanhu lava a va ta hi pfuna nsin’wini hambi wusikwini hi nkama wa xirhami.

Hina ni vamakwerhu lavayani se a hi li vanghanu vavakulu. Phela se a hi li ndjangu. Minkama yin’wani a hi tolovela ku tshama xikan’we hi worha ndzilu kumbe hi sweka xikan’we. Mun’we wa vamakwerhu lavayani a a rhandza ku chaya. Se hi ma Sábado niwusiku a hi tolovela ku txina hi tlhela hi yimbelela xikan’we.

A Rimouski vanhu va vanyingi a va swi tsakela ku djondza Bibele. Phela ndzeni ka 5 wa malembe swi hi tsakisile ku vona vanhu va vanyingi lava a hi djondza na vona Bibele va tsakamisiwa ni ku vona bandla li kula anze li ya fika 35 wa vachumayeli.

A Quebec hi djondze ku va vachumayeli lava djondzisaka kahle. Hi swi vonile loko Yehovha a hi pfuna swaku hi wu yendla kahle ntirho wa ku chumayela a tlhela a hi hlayisa, naswona hi djondze ku rhandza vanhu va ndhawu liyani, lirimi la vona la Xifrancês ni leswi va nga tshamisa xiswona. Funtshi leswo swi hi pfunile kuva hi rhandza ni vanhu va tindhawu tin’wani ni leswi va nga tshamisa xiswona.  — 2 Kor. 6:13.

Na hi nga swi nyimelanga, Betele li hi kombele swaku hi suka lani a hi tshama kona hi ya ka doropa la Tracadie. Se leswo a ku li xikarhatunyana hikusa a ha ha li ku lugara yindlo naswona a ni kume bixkatunyana la ku va prisori ka xikola xin’wani. Handle ka leswo, van’wani va lava a hi djondza na vona Bibele a va ha ku sungula ku va vachumayeli, funtshi Yindlo ya Wugandzeli a ya ha li ku yakiweni.

Hi khongele final de semana hinkwalu mayelana ni ku rhurha. Naswona hi ye hi ya pfuxela doropa leli, leli a li hambane swinene ni Rimouski, ku nga lomu a hi hanya kona. Kambe hi game hi tibyela swaku leswi Yehovha a a lava swaku hi famba, a hi fanele hi famba. Hi vhele hi yendla swoleswo. Naswona hi mu vonile Yehovha a hi pfuna ka swikarhatu leswi hi nga kumana na swona leswi a swi ta hi pfalela kuva hi nga suki ka ndhawu liyani. (Mal. 3:10) Naswona leswi Randi a nga ni wunghanu la ku tiya na Yehovha, a a tinyiketela naswona a a tshama na a tsakile,  swi yendle leswaku swi hi vevukela ku suka ka doropa la Rimouski hi ya Tracadie.

Ka bandla la nyuwani leli a hi li ka lona a ko va ni doda lin’we, ku nga Robert Ross. Yena ni nsati wa yena Linda, va ve vapfuli va ndlela ka bandla leliyani naswona va yendle xiboho xa ku tama va va ka bandla lolelo nkama va nga va ni n’wana wa vona wa ku sungula. Hambileswi a va ni xin’wanani, xikombiso xa vona xi hi pfunile hintamu swinene. Leswi a va va khomisa xiswona van’wani ni ku hiseka ka vona ka ntirho wa ku chumayela swi hi pfunile swaku hi tama hi tirhela Yehovha hi mbilu hinkwayu.

Loko se hi hete malembe mambirhi na hi li vapfuli va ndlela aTracadie, hi tlhele hi yamukela xirhambu xa ku hlamalisa xa ku va vadjikelezi. Hi tirhe ka masirkwitu ya manyingi lawa ma vulavulaka Xinghiza ku ringana 7 wa malembe. Kambe hi game hi yaveliwa ku ya tirha ka sirkwitu leli vulavulaka Xifrancês aQuebec. Mulanguteli wa hina wa dixtritu wa Quebec, Léonce Crépeault a a talisa ku ni khensa hi madixkursu ya mina, kambe a a gama a ni vutisa swaku: “U nga ma yampsisisa ku yini madixkursu ya wena leswaku vamakwerhu va tekela ku swi vona swaku swi tirhisa ku yini ka wutomi la vona leswi u vulavulaka hi swona?” b Leswo a swi ni pfuna swaku ni yampsisa madjondzisela ya mina, ni djondzisa hi ndlela ya ku vevuka ni ya ku twisiseka.

Yin’we ya mintirho leyi ni kalaka ni nga yi khohlwi ka wutomi la mina, ku ve lowu ni nga nyikiwa wona nkama ku nga va ni kongresu lalikulu hintamu aMontreal hi 1978, naswona kongresu lolelo a li vulavula hi lipfumelo. A ni tirha ka ku lunghiselela swakudla. A hi nyimela ku yamukela 80.000 wa vanhu naswona a swi lava hi va lunghiselela swakudla vanhu lava hinkwavu, kambe a ndlela leyi a hi fanele hi lunghiselela hi yona swakudla a yi hambanile ni leswi a hi swi lunghiselelisa xiswona ka malembe lawa a ma hundzile. Hinkwaswu a swi li swa nyuwani: Swilo leswi a hi ta swi tirhisa, matirhelo ya kona, swakudla swa kona ni maswekelo ya kona. A hi ni 20 wa makonjeladori yamakulu lawa minkama yin’wani a ma nga tirhi kahle. Funtshi leswi a ku ni majogu ka xitadiyu lexi a hi ta yendlela ka xona kongresu, a hi swi kotanga ku ya lunghiselela swilo na siku la kongresu li nga se fika. Phela swi lave hi sungula ku lunghiselela swakudla hi siku lolelo nimpundzu. Hi mpundzu wolowo swi lave hi tlhavika tifugawu swaku hi lunghiselela matabixo. A hi karhalile hintamu kambe ni djondze hintamu ka vamakwerhu lava a va tinyiketela lava a va pfunisa swaku va yendla ntirho lowuyani. Leswi a va tirha na va tsakile va tlhela va va ni wunghanu lalinene na Yehovha swi ni pfunile. Leswi a hi tirhisana, swi yendle swaku hi va vanghanu vavakulu anze namuntlha. Phela swi ni tsakisile ku va kona ka kongresu leliyani li nga va kona aQuebec, ku nga ndhawu leyi vamakwerhu va vanyingi va nga hluphiwa hi ma 1940 ku ya ka 1960.

Ni djondze swa swinyingi ka vamakwerhu van’wani lava a va rhangela ka makongresu yamakulu aMontreal.  Lembe lin’wani, makwerhu Splane lweyi swoswi a nga mun’we wa vamakwerhu va Ntlawa Lowu Rhangelaka, hi yena lweyi a a vonelela kongresu. Hi ku famba ka nkama, ka kongresu lin’wani loko ni kombeliwile swaku ni va muvoneleli wa kongresu, makwerhu Splane a ni pfunile hintamu.

Hi 2011 loko mina na Randi se hi hete 36 wa malembe na hi li vadjikelezi, ni rhambiwe swaku ni va mudjondzisi wa Xikola xa Madoda. Phela hi hete 2 wa malembe na hi yetlela ka 75 wa mibedu ya ku hambanahambana. Hambileswi a swi karhata, swi hi tsakisile. Phela loko xikola xin’wani ni xin’wani xi hela a madoda a ma kombisa ku khensa, hikusa a ma swi vona swaku Ntlawa Lowu Rhangelaka a wu lava swaku ma tiyisa wunghanu la wona na Yehovha.

Hi ku famba ka nkama, ni vekiwile swaku ni djondzisa ka Xikola xa Vachumayeli va Mfumu. Vamakwerhu lava a va djondza ka xikola lexo, a va tshama na va karhalile va tlhela va karhateka hi mhaka ya mintirho ya yinyingi leyi a va yi yendla. A va heta 7 wa mawora na va tshamile hi siku, na va djondza. Nimadlambu a va heta 3 wa mawora na va lunghiselela leswi a va ta swi djondza hi mundzuku ka kona va tlhela va nyikiwa kolomuyani ka 4 kumbe 5 wa mintirho hi vhiki leyi a va fanele va yi yendla axikolweni. Mina ni makwerhu lweyi a hi djondzisa xikan’we, hi va byele swaku a va to swi kota ntsena ku yendla swilo leswo hinkwaswu loko va pfuniwa hi Yehovha. Minkama hinkwayu ni tshamela ku khumbuka swaku a vamakwerhu lavayani va xikola lexi a ni djondzisa ka xona a va hlamalisiwa hi ku tiva swaku vo swi kota ntsena ku yendla mintirho hinkwayu liyani ya ku karhata leyi a swi tikomba na swi nga koteki ku yi yendla hileswi a va tshemba Yehovha.

Leswi mamani a a ni mhaka ni vanhu van’wani, swi yendle swaku lava a a djondza na vona Bibele va kulisa wunghanu la vona na Yehovha. Funtshi swi tlhele swi yendla swaku papayi a txintxa leswi a a wu vonisa xiswona ntiyiso. Loko ku hundze masiku manharhu na mamani a file, hi hlamalile loko papayi a ye ka Yindlo ya Wugandzeli. Naswona a tame a ya mintlhanganwini ku ringana 26 wa malembe lawa ma nga landzela. Hambileswi papayi a kalaka a nga tsakamisiwanga, madoda ma ni byele swaku minkama hinkwayu yena a a li wa ku sungula ku fika mintlhanganwini vhiki ni vhiki.

Mamani a tlhele a hi siyela xikombiso xaxinene hina vana va yena. Vamakwerhu va mina vanharhu va xisati ni vanuna va vona va tama va tirhela Yehovha hi ku tshembeka. Vambirhi ka vona va tirha Betele, mun’we a tirha ka Betele la Portugal kasi lweyi mun’wani a tirhela Betele la Haiti.

Swoswi mina na Randi hi vapfuli va ndlela va ku hlawuleka aHamilton, aOntário. Nkama a hi li vadjikelezi a swi hi tsakisa ku famba ni vamakwerhu loko va ya hamba marevhizita ya vona ni loko va fambisa swidjondzo swa vona swa Bibele. Kambe swoswi hi tsaka hintamu swinene hi ku va ni swidjondzo swa Bibele ni ku tlhela hi swi pfuna ku va swi kulisa wunghanu la swona na Yehovha. Funtshi nkama lowu hi yaka hi va vanghanu hintamu ni vamakwerhu va bandla la hina la nyuwani, lipfumelo la hina li ya li tiya swinene loko hi vona leswi Yehovha a va pfunisaka xiswona ka minkama yayinene ni ka minkama ya ku karhata.

Loko hi khumbuka hinkwaswu leswi nga yendleka ka wutomi la hina, ha swi vona swaku leswi van’wani va nga hi komba swaku va hi rhandza, swi hi pfunile hintamu. Naswona leswi hi zamaka ku tiyisa van’wani swi yendla leswaku na vona va navela ku yengesela ntirho wa vona ka Yehovha. (2 Kor. 7:6, 7) Hi xikombiso, ka ndjangu wun’wani mamani ni vana vambirhi a va li vapfuli va ndlela. Se ni vutise papayi wa munti swaku a a tshame a pimisa hi ku va mupfuli wa ndlela ke. Yena a vule swaku se a a seketela vanhu vanharhu swaku va va vapfuli va ndlela. Se mina ni mu vutise leswi: “Ka wena na Yehovha i mani lweyi a seketelaka hintamu?” Ni mu kutxe swaku na yena a va mupfuli wa ndlela swaku a tsaka ku fana na vona. Loko se ku hundze 6 wa tiwheti, a sungule ku va mupfuli wa ndlela.

Mina na Randi hi ta tama hi byela vanhu van’wani hi swilo swa ku hlamalisa leswi Yehovha a swi yendlaka, naswona hi navela swaku na vona va swi rhandza ku tama va tirhela Yehovha ku fana na hina.  — Pis. 71:17, 18.