VAYISRAELE va hete malembe ya manyingi na va nyikela minyikelo hi male leswaku va pfunisa ka wugandzeli la ntiyiso. Kambe ka Vayuda lava nga hanya nkama lowu Yesu a a li lani misaveni, a swi va karhatela hintamu hikusa a va fanele va rhesa hi swilo swa swinyingi.

Leswaku ku seketeliwa mintirho leyi a yi yentxiwa ka tabernakela ni leyi a yi yentxiwa ka tempele, Muyuda mun’wana ni mun’wana wawanuna lweyi se a nga kula a a fanele a humesa rhesa, ku nga male ya 2 wa madrakma. Ka masiku ya Yesu, male yoleyo a yi tirhiseliwa ku lunghisa tempele leyi nga yakiwa hi Heroda, naswona a yi tirhiseliwa switlhavelo leswi a swi yentxiwa tempeleni. Vayuda van’wana va vutise Pedru swaku Yesu a a li hakela rhesa lolelo ke? Yesu a va byele swaku a swi nga bihanga ku hakela rhesa leliyani, naswona Yesu a byele Pedru swaku a a ta yi kuma kwini male ya ku hakela rhesa leliyani. — Mat. 17:24-27.

Ku ni rhesa lin’wana leli Vayuda a va fanele va li hakela, ku nga swa wukhume. Leswo swi vula swaku ka hinkwaswu leswi a va ta swi kuma masin’wini kumbe ka muholo wa vona, a va fanele va nyikela hi 10% ka swona. (Lev. 27:30-32; Tinhl. 18:26-28) Varhangeli va wukhongeli va nkama lowuyani a va sindzisa vanhu swaku va nyikela swa wukhume ka nchumu xin’wana ni xin’wana lexi humaka masin’wini, swa ku fana ni ‘minti, swa aneta ni swa kumini’ ku nga swilo leswi a swi tirhiseliwa ku temperara swakudla. Yesu a nga vulanga swaku a swi bihile kuva vanhu va nyikela swa wukhume, kambe a vule swaku Vafarisi ni vatsali a va li vakanganyisi, hikusa a va tirhisa nawu lowu a wu fambelana ni swa wukhume hi ndlela ya ku biha. — Mat. 23:23.

Leswi ka nkama lowuyani Vayuda a va fumiwa hi Varoma, Vayuda a va fanele va rhesa hi swilo swa swinyingi ka Varoma. Hi xikombiso, lava a va ni masimu a va fanele va hakelela masimu ya vona hi male kumbe hi leswi va nga swi tshovela. Ku vuliwa swaku loko va tshovela swilo swa ku ringana 100 wa makilu ka masimu ya vona, a va fanele va pambula swilo swa ku ringana 20 kumbe 25 wa makilu leswaku va hakela hi swona. Handle ka leswo, Muyuda mun’wana ni mun’wana a a fanele a hakela rhesa, ku nga rhesa leli Vafarisi va nga vutisa Yesu leswaku a swi pfumeleliwa ku li hakela ke? Leswi Yesu a nga va hlamulisa xiswona swi kombisa leswi hina hi faneleke hi li vonisa xiswona rhesa, loko a te: “Tlhelisani swa Khezari ka Khezari, kambe swa Xikwembu ka Xikwembu.” — Mat. 22:15-22.

Ku ni rhesa lin’wana leli a li hakeliwa hi lava a va xava swilo swa ku ta hi ka ndhawu yin’wana ni ya lava a va xavisa swilo swi ya ka ndhawu yin’wana. Rhesa lolelo a li hakeliwa lomu a ku khweliwa maboti, ka mabuluha, switaratwini ni ka minyanghwa ya madoropa kumbe ya mabazara.

Vayuda a swi va karhatela ku hakela rhesa leli mfumu wa Varoma a wu li vekile, hikusa a wu lava swilo swa swinyingi hintamu. Tácitos wanuna lweyi a a vulavula hi minchumu leyi nga yentxeka khale aRoma, a vule swaku ka mfumu wa Tibério lweyi a nga fuma na Yesu a nge se ta lani misaveni, “vanhu va Síria ni Yudiya a va karhalile hi ku hakela rhesa. Hi mhaka leyo, va kombele swaku ku pumbiwa male kumbe swilo leswi a va hakela hi swona.”

Ndlela leyi rhesa a li londziwa hi yona, a yi karhatisa wutomi la vanhu. Leswaku munhu a kuma ntirho wa ku londza rhesa ka vanhu, a a fanele a va yena wa ku sungula a hakela rhesa a tlhela a hakela hi swilo swa swinyingi. Se loko a swi kotile ku xavelela ntirho lowu, na yena a a ta thola vanhu van’wana swaku va famba va londza rhesa. Loko vanhu lava va yentxa ntirho lowu, a va yengesela ka male ya rhesa swaku va ta kuma lukru. Swi tikomba ingaku Zakewu na yena a a tholile vanhu swaku va famba va londza rhesa. (Luk. 19:1, 2) Leswi swi hi pfuna ku twisisa leswi a swi yentxa vanhu va kwata hi rhesa leli a li hakeliwa hi nkama lowuyani, va tlhela va nyenya ni vanhu lava a va londza rhesa lolelo.