1. I yini leswi nga yentxaka vanhu va Yehovha va titwa na va li voxe?

VANYINGI va hina minkama yin’wana hi nga ha titwa na hi li hoxe. Ka van’wana matitwelo lawa ma hundza hi ku kahlula, kambe ka van’wana ma hlwela ku hundza. Hambiloko hi hanyisana ni vanhu va vanyingi minkama yin’wana hi nga ha titwa na hi li hoxe. Vamakwerhu van’wana swa va karhatela ku yentxa vanghanu loko va fika ka bandla la nyuwani. Phela, van’wana va ta hi ka mindjangu leyi yi va rhandzaka hintamu, se loko va txintxa va ya tshama ka ndhawu yin’wana swi nga yentxeka va titwa na va li voxe. Kasi van’wana swi nga yentxeka va titwa na va li voxe hi mhaka leswi va nga feliwa hi munhu lweyi a va mu rhandza hintamu. Kasi vamakwerhu van’wana, va titwa na va li voxe ngopfungopfu hi mhaka leswi va nyenyiwaka hi maxaka kumbe hi vanghanu va vona va khale.

2. Hi swini swivutiso leswi nga ta hlamuliwa?

² Yehovha a hi tiva kahle naswona wa swi vona swilo hinkwaswu leswi hi yentxekelaka. Wa swi vona loko hi titwa na hi li hoxe, funtshi a swi lava hintamu ku hi pfuna. Kambe Yehovha a hi pfunisa ku yini? Se hi nga yentxa yini swaku hi nga titwi na hi li hoxe? Naswona hi nga va pfunisa ku yini vamakwerhu abandleni leswaku va vona swaku a va voxe? A hi voneni tinhlamulu ta swivutiso leswi.

3. Yehovha a swi kombise ku yini swaku a ni mhaka na Eliya?

³ Yehovha a lava swaku vanhu va yena va tsaka. A le kusuhi ni mun’wana ni mun’wana wa hina, naswona wa swi vona loko hi titwa na hi li hoxe funtshi wa swi vona loko hi karhatekile. (Pis. 145: 18, 19) Hi xikombiso, vona ndlela leyi Yehovha a nga mu pfuna hi yona muprofeta Eliya ku kombisa swaku a a ni mhaka na yena. Phela muprofeta Eliya a hanye Israyele hi nkama wa ku karhata hintamu. Hi nkama wolowo, vanhu va Yehovha a va hluphiwa hintamu naswona valala va Yehovha a va swi lava hintamu ku dlaya Eliya. (1 Tiho. 19:1, 2) Handle ka leswo, Eliya a a pimisa swaku a ko va yena ntsena muprofeta wa Yehovha hi nkama wolowo naswona mapimiselo lawa ma mu yentxe a titwa na a li yexe. (1 Tiho. 19:10) Hi ku hantlisa Yehovha a mu pfunile Eliya. A rhumele ntsumi swaku yi mu tiyisekisa swaku a a nga li yexe, kambe a ka ha ni Vayisrayele va vanyingi lava a va tama va tirhela Yehovha hi ku tshembeka! — 1 Tiho. 19:5, 18.

4. Hi ku ya hi Marku 10:29, 30 Yehovha a swi kombisisa ku yini swaku a ni mhaka ni lava nga tshikiwa hi vanghanu va vona ni maxaka ya vona?

⁴ Yehovha wa swi tiva swaku van’wana ka hina swi lave hi tshika swilo swin’wana leswi a hi swi rhandza leswaku hi kota ku mu tirhela. Swi nga yentxeka maxaka kumbe vanghanu va hina lava kalaka va nga mu tirheli Yehovha va tshike ku hi seketela. Swi nga yentxeka hi mhaka ya ku chava, mupostolo Pedru a vutise Yesu a ku: “Waswivo! Hi tshike minchumu hinkwayu hi ku landzela, kasi hi ta kuma yini?” (Mat. 19:27) Yesu a tiyisekise vadjondzisiwa va yena swaku bandla a li ta va ndjangu wa vona. (Lerha Marku 10:29, 30.) Phela Yehovha Papayi wa hina, a tshembisa swaku a ta pfuna vanhu hinkwavu lava lavaka ku mu tirhela. (Pis. 9:10) Vona leswi u nga swi yentxaka loko u lava ku pfuniwa hi Yehovha kuva u hlula ku titwa na u li wexe.

5. Hi mhaka muni swi li swinene ku pimisa hi leswi Yehovha a ku pfunisaka xiswona?

⁵ Pimisa hi leswi Yehovha a ku pfunisaka xiswona. (Pis. 55:22) Ku pimisa hi leswi Yehovha a nga ku pfunisa xiswona swi nga ku pfuna ku kala u nga titwi na u li wexe. Makwerhu Carol, * lweyi maxaka ya yena ma kalaka ma nga li ka ntiyiso a vula leswi: “Ku pimisa hi leswi Yehovha a nga ni pfunisa xiswona loko ni kumane ni miringo, swi ni yentxa ni vona swaku hikakunene a ni noxe. Swi tlhela swi ni tiyisekisa swaku Yehovha a ta va na mina minkama hinkwayu.”

6. Buku la 1 Pedru 5:9, 10 yi va pfunisa ku yini vamakwerhu lava titwaka na va li voxe?

 ⁶ Pimisa hi leswi Yehovha a va pfunisaka xiswona vamakwerhu lava va titwaka va li voxe. (Lerha 1 Pedru 5:9, 10.) Makwerhu Hiroshi lweyi ku nga khale na a li Mboni ya Yehovha yena yexe ka ndjangu wa yena, a vula leswi: “Abandleni swa vevuka ku vona swaku vamakwerhu hinkwavu va yentxa swihoxo, kambe ku tiva swaku hinkwerhu hi lwela ku mu tirhela kahle Yehovha swi pfuna lava ku fana na mina, maxaka ya vona ma kalaka ma nga li vamakwerhu naswona va titwaka na va li voxe.”

7. Xikhongelo xi nga ku pfunisa ku yini?

⁷ Minkama hinkwayu, khongela, u lerha Bibele u tlhela u ya mintlhanganwini. Leswo swi patsa ku byela Yehovha leswi u titwisaka xiswona. (1 Ped. 5:7) Vona leswi nga vuliwa hi makwerhu Massiel. Leswi a ku li yena ntsena na a li Mboni ya Yehovha ka ndjangu wa yena, a a titwa na a li yexe. Yena a li: “Lexi nga ni pfuna hintamu kuva ni hlula ku titwa na ni li noxe, i ku khongela ka Yehovha ni mu byela leswi a ni titwisa xiswona. Ni swi vonile swaku Yehovha i Papayi wa mina lweyi a ni rhandzaka. Hi mhaka leyo, ni khongele ka yena minkama hinkwayu ni mu byela leswi a ni titwisa xiswona.”

8. Ku lerha Rito la Xikwembu ni ku pimisa hi lona swi ku pfunisa ku yini?

⁸ Lerha Bibele nkama ni nkama, u tlhela u pimisa hi swilo leswi nga yentxekela vanhu va Yehovha va khale, leswi kombisaka swaku Yehovha wa ku rhandza. Makwerhu Bianca, lweyi a lwisanaka ni swilo swa ku biha leswi vuliwaka hi maxaka ya yena, a li: “Ku lerha ni ku pimisa hi leswi nga yentxekela vanhu va Yehovha va khale, lava nga tiyisela swikarhatu swa ku fana ni swa mina swi ni pfuna ku tiyisela ku fana na vona.” Vamakwerhu van’wana va vekisa tindzimana ta Bibele ka nhloko leswaku ti va tiyisa ta ku fana ni Tipisalema 27:10 ni Esaya 41:10. Vamakwerhu van’wana va vone swaku ku yingisela ma áudio lawa ma nga gravhariwa loko va lunghiselela mintlhanganu kumbe loko va yentxa djondzo ya vona ya Bibele swi va pfuna ku kala va nga titwi na va li voxe.

9. Ku ya mintlhanganwini swi hi pfunisa ku yini?

⁹ Yentxa hinkwaswu swaku u va kona mintlhanganwini nkama ni nkama. Mintlhanganu yi ta ku tiyisa naswona yi ta ku pfuna swaku u va tiva kahle vamakwerhu. (Heb. 10:24, 25) Makwerhu Massiel, lweyi se hi nga bula hi yena, a li: “Hambileswi ni nga ni tingana, ni yentxe xiboho xa ku ya ka mintlhanganu hinkwayu ni tlhela ni hlamula. Leswi swi ni yentxe ni titwa na ni lumba bandla.”

10. Hi mhaka muni swi li swa lisima ku yentxa wunghanu ni vamakwerhu?

¹⁰ Yentxa wunghanu ni vamakwerhu. U nga djondza swa swinyingi loko u yentxa wunghanu ni vamakwerhu abandleni, swi nga na mhaka swaku i vakulu kumbe i vatsongo kumbe va ta hi  ka tindhawu tin’wana. Bibele li hi byela swaku hi nga kuma wutlharhi ka “vanhu vavakulu.” (Yobo 12:12) Kambe hambi vanhu vavakulu va nga djondza swa swinyingi ka majovhem ya bandleni. Davhida a ve munghanu wa mukulu wa Yonatani hambileswi a a li mutsongo hintamu ka yena. (1 Sam. 18:1) Hi wumbirhi ka vona va pfunanile swaku va tama va tirhela Yehovha hambi va kumana ni swikarhatu. (1 Sam. 23:16-18) Makwerhu Irina, lweyi a nga yexe ka ntiyiso ka ndjangu wa yena, a li: “Phela vamakwerhu va hina va fana ni ndjangu wa hina, naswona Yehovha a tirhisa vona swaku va va ndjangu lowu hi wu lavaka.”

11. Hi nga yentxa yini leswaku hi va ni wunghanu la likulu ni vamakwerhu?

¹¹ Ku yentxa wunghanu ni vamakwerhu swi nga ha karhata, ngopfungopfu loko u li ni tingana. Makwerhu Ratna, lweyi a nga ni tingana naswona a nga djondza ntiyiso hambi loko swi mu karhatela, a li: “Ni swi vonile swaku a ni lava ku pfuniwa hi vamakwerhu abandleni.” Minkama yin’wana swi nga hi karhatela ku byela van’wana leswi hi titwisa xiswona, kambe leswaku hi yentxa wunghanu ni munhu mun’wana hi fanele hi bula na yena. Se leswaku vamakwerhu va hi pfuna hi fanele hi va byela leswi hi titwisaka xiswona leswaku va hi tiyisa ni ku tiva leswi va nga hi pfunisaka xiswona.

12. Ntirho wa ku chumayela wu hi pfunisa ku yini ku yentxa wunghanu ni vamakwerhu?

¹² Xin’wana lexi nga hi pfunaka ku yentxa wunghanu ni vamakwerhu i ku chumayela na vona. Carol, lweyi se hi nga bula hi yena, a vula leswi: “Ku heta nkama wa wunyingi ni vamakwerhu ka ntirho wa ku chumayela ni mintirho yin’wana ya nhlengeletanu swi ni pfunile ku yentxa wunghanu la linene ni vamakwerhu. Hi ku famba ka nkama Yehovha a tirhise vanghanu volavo swaku a ni pfuna.” Minkama hinkwayu i swinene ku yentxa wunghanu ni vamakwerhu va ku tshembeka, hikusa Yehovha a tirhisa vona swaku va hi tiyisa loko hi titwa na hi li hoxe.  — Swi. 17:17.

13. I yini leswi mun’wana ni mun’wana wa hina a faneleke a lwela ku swi yentxa bandleni?

¹³ Hinkwerhu abandleni hi fanele hi lwela swaku ku va ni lirhandzu ni ku rhula ni ku tlhela hi pfuna van’wana swaku va nga titwi va li voxe. (Yoh. 13:35) Leswi hi swi vulaka ni leswi hi swi yentxaka swi nga tiyisa van’wana! Vona leswi makwerhu mun’wana wawansati a nga swi vula. Yena a li: “Loko ni djondze ntiyiso, vamakwerhu bandleni va ve vona ndjangu wa mina wa le kusuhi. Loko a va nga ni pfunanga, a ni nga ta swi kota ku va Mboni ya Yehovha.” Hi nga va pfunisa ku yini vamakwerhu lava ndjangu wa vona wu kalaka wu nga li ka ntiyiso kuva va vona swaku va lumba bandla?

14. U nga yentxa yini leswaku u yentxa wunghanu ni lava va ha ku nghenaka abandleni?

¹⁴ Lwela ku yentxa wunghanu ni lava va ha ku nghenaka abandleni. Hi fanele hi va yamukela hi lirhandzu lava sungulaka ku hlangamela na hina. (Rom. 15:7) Hi fanele hi yentxa swin’wana handle ka ku va losa ntsena. Hi fanele hi yentxa wunghanu la likulu na vona. Hi mhaka leyo, hi fanele hi va komba lirhandzu hi tlhela hi va komba swaku hi ni mhaka na vona. Hi fanele hi zama ku twisisa swikarhatu leswi va kumanaka na swona, kambe na hi nga va sindzisi swaku va hi byela swihundla swa vona. Khumbuka swaku van’wana swa va karhatela ku vula leswi va titwisaka xiswona. Se hi fanele hi tivonela swaku hi nga va sindzisi kuva va hi byela timhaka ta vona. Handle ka leswo, hi lirhandzu va yentxi swivutiso u tlhela u va yingisela kahle loko va hlamula. Hi xikombiso, u nga ha va vutisa swaku va wu djondzise ku yini ntiyiso.

15. Vamakwerhu lava nga ni lipfumelo la ku tiya va nga va pfunisa ku yini vamakwerhu van’wana bandleni?

¹⁵ Loko vamakwerhu lava mu rhandzaka hintamu Yehovha, ngopfungopfu madoda va ni mhaka ni vamakwerhu van’wana, bandla hinkwalu li  ta pfuneka. Makwerhu Melissa, lweyi a nga kulisiwa hi mamana wa yena ka ntiyiso, a li: “Ni va khensa hintamu vamakwerhu lava a va fana ni papayi ka mina, hikusa a va heta nkama na mina va tlhela va ni komba swaku a va ni mhaka na mina. Minkama hinkwayu loko ni lava ku vulavula, a ku ni makwerhu lweyi a a tinyika nkama swaku a ni yingisela.” Makwerhu Maurício, lweyi a a titwa na a li yexe hileswi lweyi a nga mu djondzela Bibele a nga tshika ntiyiso, a li: “Madoda ma ni kombe swaku ma ni mhaka na mina naswona ma ni pfune hintamu. Minkama hinkwayu a ma bula na mina, ma famba na mina nsin’wini, ma ni bulela leswi ma nga swi rhandza ka djondzo ya wona ya Bibele ma tlhela ma tinyika nkama wa ku hungata na mina.” Swoswi, Melissa na Maurício va tama va tirhela Yehovha aBetele.

16-17. I yini leswi hi nga swi yentxelaka van’wana swaku hi va pfuna?

¹⁶ Yentxa swilo leswi nga ta pfuna van’wana. (Gal. 6:10) Makwerhu Leo, lweyi i nga misiyonariyu ka ndhawu leyi yi nga kule ni ndjangu wa yena, a li: “Minkama yin’wana lexi hi xi lavaka i ku kombisiwa lirhandzu hi nkama wa wunene. Ni khumbuka nkama lowu ni nga kumana ni nghozi ya movha. Ni fike kaya na ni karhatekile hintamu, kambe vamakwerhu va ni rhambile swaku ni ya kaya ka vona. Hambileswi ni kalaka ni nga ha khumbuki leswi hi nga dla swona, ni khumbuka swaku va ni yingisele hi lirhandzu loko ni va byela leswi swi nga ni yentxekela. Leswo swi ni rhulise mbilu swi tlhela swi ni yentxa ni titwa kahle!”

¹⁷ Swi tsakisa hintamu ku va ni vamakwerhu ka mintlhanganu ya yikulu ya ku fana ni ma asembleya ni makongresu. Ka mintlhanganu yoleyo hi kuma nkama wa ku bula ni vamakwerhu hi leswi hi nga swi djondza ka madixkursu. Kambe vona leswi nga vuliwa hi makwerhu Carol, lweyi se hi nga bula hi yena. Yena a li: “A ni titwa na ni li noxe loko ni li ka ma asembleya ni makongresu, hikusa hambileswi a ku ni vamakwerhu va vanyingi, ku tala ka vona a va titshamela ni mindjangu ya vona. Hi mhaka leyo, mina a ni titwa na ni li noxe.” Van’wana swa va karhatela ku ya ka ma asembleya ni makongresu loko va ha ku feliwa hi lweyi va nga chada na yena. Ku nga va leswaku u tiva munhu lweyi a kumanaka ni xikarhatu lexi fanaka? Swi ngo yini u mu rhamba swaku mu va xikan’we ka kongresu kumbe ka asembleya leli landzelaka?

18. Buku la 2 Vakorinto 6:11-13 li nga hi pfunisa ku yini swaku hi komba van’wana swaku ha va rhandza?

 ¹⁸ Tinyiki nkama wa ku va ni van’wana. Zama ku heta nkama na u ni vamakwerhu va ku hambanahambana, ngopfungopfu lava va titwaka na va li voxe. Hi lava ku komba van’wana swaku ha va “rhandza swinene,” ngopfungopfu lava titwaka na va li voxe. (Lerha 2 Vakorinto 6:11-13.) Melissa, lweyi se hi nga bula hi yena, a li: “A ni swi rhandza hintamu loko vamakwerhu va hi rhamba swaku hi ya kaya ka vona ni ku tlhela hi yendza xikan’we.” Ku nga va leswaku ku ni munhu abandleni la wena lweyi a wu ta tsakela ku mu rhamba swaku mu heta nkama xikan’we?

19. Hi ka swiyimu swini lani swi nga swa lisima hintamu ku heta nkama ni vamakwerhu?

¹⁹ Minkama yin’wana vamakwerhu va tsaka hintamu loko hi heta nkama na vona. Van’wana swa va karhatela ku tshama ni mindjangu ya vona ya ku a hi Timboni loko ku fika masiku ya maferiyadu. Kasi van’wana swi va karhatela hintamu loko ku fika siku leli lweyi va mu rhandzaka a nga fa hi lona. Loko hi tinyika nkama wa ku va ni vamakwerhu hi masiku ya ku fana ni lawa, hi va hi kombisa swaku ha va rhandza “hi mbilu hinkwayu.” — Filp. 2:20.

20. Marito lama nga ka Matewu 12:48-50 ma nga hi pfunisa ku yini loko hi titwa na hi li hoxe?

²⁰ Hi lani hi nga swi vona hi kona, ku ni minchumu ya yinyingi leyi nga yentxaka Vakreste va titwa na va li voxe. Hambileswo, a hi fanelanga hi khohlwa swaku Yehovha wa swi twisisa leswi hi titwisaka xiswona, naswona minkama ya yinyingi a tirhisa vamakwerhu leswaku a hi pfuna. (Lerha Matewu 12:48-50.) Hi mhaka leyo, hi ta komba Yehovha swaku ha mu khensa hi leswi a nga hi nyika vamakwerhu abandleni loko hi zama ku va pfuna loko va kumana ni swikarhatu. Swi nga na mhaka swaku hi titwisa ku yini, hi fanele hi tiyiseka swaku a hi hoxe, hikusa minkama hinkwayu Yehovha a na hina!