Bibele a li hi byeli. Kambe swi kona swin’wani leswi li hi byelaka swona swi nga hi pfunaka ku twisisa swaku hi mhaka muni va kalaka va nga tlhelanga va ya Nazareta hi khambi lolelo.

Nkama ntsumi yi nga byela Mariya swaku yena a a ta kuma nyimba leswaku a va ni N’wana wa Xikwembu, Mariya na Yosefa a va hanya aNazareta, ku nga xidoropana xa Galileya, lomu Yosefa a a huma kona. (Luk. 1:26-31; 2:4) Hi ku famba ka nkama loko va suke Gibita, va tlhelele Nazareta, lani Yesu a nga kulela kona. Hi leswo swi nga yendla a gama a vitaniwa ‘Yesu wa le Nazareta’. (Mat. 2:19-23) Hi swona leswi swi yendlaka swaku loko ku vulavuliwa hi Nazareta, hi khumbuka Yesu, Yosefa na Mariya.

Mariya a a ni xaka aYuda, ku nga Elizabeti. Elizabeti a a li nsati wa muprista Zakariya, naswona a ve mamani wa Yohani Mutsakamisi. (Luk. 1:5, 9, 13, 36) Mariya a pfuxele Elizabeti naswona a tshame na yena tiwheti tinharhu aYuda. Ndzhaku ka leswo, a tlhelele Nazareta. (Luk. 1:39, 40, 56) Se hi mhaka leyo, Mariya a a ku tiva Yuda.

Hi ku famba ka nkama, Yosefa a suke Nazareta a ya Betlehema hikusa mfumu wa Roma a wu lava swaku hinkwavu va ya titsalisa ka doropa la vona. Funtshi Betlehema i ndhawu leyi wuprofeta la Bibele se a li vulile swaku Mesiya a a ta psaliwa kona. (Luk. 2:3, 4; 1 Sam. 17:15; 20:6; Miki. 5:2) Se loko Yesu a ta va a psaliwe seniyani, Yosefa a a nga swi lavi leswaku Mariya a teka lipfhumba la ku leha ni xibebetana lexi leswaku va tlhelela aNazareta. Hi mhaka leyo, va tshame aBetlehema, ku nga ndhawu leyi a yi li kule ni Yerusalema hi kolomu ka 9 wa makilometru. A ku va a tshame seniyani a swi ta mu vevukela Yosefa kuva a nyikela gandzelo atempeleni ku nga leswi Nawu a wu lava leswaku a swi yendla. — Lev. 12:2, 6-8; Luk. 2:22-24.

Ntsumi se a yi mu byelile Mariya swaku n’wana wa yena a a ta tshama ka ‘xitshamu xa wuhosi xa Davhida’ naswona ‘a a ta va hosi’. Se swi nga yendleka Yosefa na Mariya, va pimise swaku a swi li swa lisima kuva Yesu a psaliwa ka doropa la Davhida. (Luk. 1:32, 33; 2:11, 17) Naswona swi nga yendleka va pimisile swaku a swi ta va kahle swaku va nga suki seniyani, va nyimela Yehovha a va byela leswi a va fanele va swi yendla.

A hi swi tivi swaku vona se a va ni nkama muni na va tshama Betlehema nkama va nga pfuxeliwa hi tintivi ta swa tinyeleti. Kambe, loko vona va va pfuxelile, se a va tshama ka yindlo naswona Yesu a a nga ha li xibebetana, se a a li xifanyetana. (Mat. 2:11) Se swa tikomba swaku vona a va tlhelelanga Nazareta, kambe va yendle Betlehema kaya ka vona.

Heroda a veke nawu wa leswaku ‘swifanyani hinkwaswu swa zeru ku ya ka 2 wa malembe, leswi tshamaka Betlehema . . . swi dlayiwa.’ (Mat. 2:16) Ntsumi yi basopise Yosefa na Mariya ka nghozi yoleyo, hi ku va byela swaku va baleka va ya Gibita va ya tshama kona anze Heroda a fa. Hi ku famba ka nkama, Yosefa a teke ndjangu wa yena va ya Nazareta. Se, hi mhaka muni va nga gamanga va tlhela va ya Betlehema? Hi mhaka aYuda hi nkama wolowo a ku fuma Arkelawu, ku nga n’wana wa Heroda, naswona wanuna lweyi a a ni mona swinene. Funtshi, a ntsumi yi tlhele yi mu basopisa Yosefa yi mu byela leswi a a fanele a swi yendla. ANazareta, Yosefa a a ta swi kota ku djondzisa Yesu swaku a gandzela Xikwembu. — Mat. 2:19-22; 13:55; Luk. 2:39, 52.

Swi tikomba na Yosefa a file na Yesu a nge se fa, naswona swi nge se koteka swaku vanhu va langiwa swaku va hanya atilweni. Hi mhaka leyo, Yosefa a ta pfuxiwa swaku a hanya lani misaveni. Kutani swi ta koteka swaku vanyingi va mu tiva va tlhela va mu vutisa kahle swaku hi mhaka muni a tame a tshama Betlehema loko Yesu se a psaliwile.