1. Hi fanele hi yendla yini swaku hi pona ka siku la Yehovha?

 LOKO Bibele li tirhisa marito lama nge: “siku la Yehovha”, li vulavula hi nkama lowu Yehovha a yavanyisaka valala va yena a tlhela a ponisa vanhu va yena. Leswo se swi yendlekile ka nkama lowu nga hundza. (Esa. 13:1, 6; Ezek. 13:5; Sof. 1:8) Ka nkama wa hina, “siku la Yehovha” li ta sungula loko vafumi va misava va hlasela Babilona Wamukulu, naswona li ta hela ka nyimpi ya Armajedoni. Leswaku hi pona ka “siku” leli swi lava hi tilunghiselela ka ha li swoswi. Yesu a djondzise swaku hi fanele hi tshama na hi lunghekele “nhlomulu wa wukulu”. Leswo swi lava ku vula swaku masiku hinkwawu hi fanele hi ‘tshama na hi lunghile’. — Mat. 24:21; Luk. 12:40.

2. Hi mhaka muni marito lawa Pawulo a nga ma tsalela Vatesalonika ma li ya lisima ka hina namuntlha?

² Ka karta la ku sungula leli a nga li tsalela vamakwerhu va le Tesalonika, mupostolo Pawulo a tirhise swikombiso swinyingi swaku a pfuna vamakwerhu kuva va tshama va lunghekele siku la ku yavanyisa la Yehovha. Pawulo a a swi tiva swaku siku la Yehovha a li nga ta fika hi nkama lowuyani. (2 Tes. 2:1-3) Hambileswo, a kutxe vamakwerhu leswaku va tshama va li lunghekelile siku leliyani ingi hi loko se a lo va kusuhi hintamu. Marito lawa Pawulo a nga ma tsalela vamakwerhu va le Tesalonika ma tirha ni ka hina namuntlha. Hi mhaka leyo swoswi a hi voneni leswi Pawulo a nga swi tlhamusela hi: 1) Leswi siku la Yehovha li nga ta tisa xiswona, 2) lava va kalaka va nga ta pona ka siku la Yehovha ni 3) leswi hi nga swi yendlaka leswaku hi tilunghiselela kuva hi ta pona.

3. Hi mhaka muni ku vuliwa swaku siku la Yehovha li ta fika ku fana ni muyivi awusikwini? (Vona mufoto.)

³ “Ku fana ni muyivi lweyi a taka niwusiku.” (1 Tes. 5:2) Lexi i xikombiso xa ku sungula lexi Pawulo a nga xi tirhisa ka 3 wa swona leswi a nga vulavula hi swona leswaku a tlhamusela leswi siku la Yehovha a li ta tisa xiswona. Hi ntolovelo a vayivi va talisa ku tlhanya miminti  ya vanhu a phakati ka wusiku, naswona loko va nghena a va hlweli. Vona va yendla leswo hi nkama lowu vinyi va munti va kalaka va nga swi nyimelanga. Hi ku fana, siku la Yehovha na lona li ta fika na vanhu va nga swi nyimelanga. Swilo swi ta yendleka hi ku hantlisa naswona swi nga ha yendleka hambi hi Vakreste va ntiyiso va hlamala. Kambe ku hambana ni vanhu va ku biha, hina a hi nge te helisiwa.

4. Hi mhaka muni ku vuliwa swaku siku la Yehovha li ta fika ku fana ni ku lun’wa loku wansati a ku twaka loko a lava ku psala?

⁴ “Ku fana ni ku lun’wa ka wansati lweyi a nga ni nyimba loku taka kola na kola.” (1 Tes. 5:3) Loko wansati a ni nyimba, a nga li tivi siku leli a nga ta psala hi lona, kambe wa swi tiva swaku siku lelo li ta fika. Se loko li fika, kola na kola a sungula ku lun’wa a tlhela a twa ku vava hintamu. Swi ta yendlekisa xiswoleswo ni ka siku la Yehovha. A hi swi tivi swaku li ta fika hi siku muni naswona hi nkama muni, kambe ha swi tiva swaku li ta fika. Funtshi loko li ta fika li ta hundza hi ku kahlula, naswona lava yendlaka swa ku biha va ta helisiwa hinkwavu va ku jii.

5. Hi mhaka muni nhlomulu wawukulu wu fanisiwa ni ku huma ka dlambu?

⁵ Ku fana ni ku huma ka dlambu. Ka xikombiso xa wunharhu, Pawulo a tlhela a vulavula hi vayivi lava va tlhanyaka niwusiku. Kambe ka khambi leli a nga ha fanisi siku la Yehovha ni muyivi, a li fanisa ni loko siku li xa. (1 Tes. 5:4) Loko vayivi va nghena ka munti a nhloko ya vona yi ka leswi va lavaka ku swi teketela, lakakuva nkama wu nga hundza, naswona na va nga swi xiyanga dlambu li sungula ku huma se va voniwa hi vanhu van’wani. Ku ta yendleka leswi fanaka ka nhlomulu wawukulu, wona wu ta paluxa vanhu lava fanaka ni vayivi, lava tamaka va va ka munyama hi ku yendla swilo swa ku biha leswi kalaka swi nga mu tsakisi Yehovha. Ku hambana ni vanhu lava, hina hi fanele hi fambela kule ni swilo leswi kalaka swi nga mu tsakisi Yehovha, kambe hi yendla swilo swaswinene, leswi swi mu tsakisaka. (Efe. 5:8-12) Swoswi a hi voneni swikombiso swimbirhi, leswi Pawulo a nga  swi tirhisa leswaku a tlhamusela lava va kalaka va nge te pona ka siku la Yehovha.

6. Hi mhaka muni hi nga vulaka swaku vanhu va le ku yetleleni? (1 Vatesalonika 5:6, 7)

⁶ “Lava yetlelaka.” (Lerha 1 Vatesalonika 5:6, 7.) Mupostolo Pawulo a fananisa vanhu lava va kalaka va nga ta pona ka siku la Yehovha ni vanhu lava va yetlelaka. Phela loko munhu a yetlelile ni nkama a nga wu voni loko wu hundza, naswona a nga swi tivi leswi swi yendlekaka. Loko ku li leswaku ku ni nchumu wa lisima lowu wu yendlekaka, a nga wu twisisi naswona a nge yendli nchumu. Vanhu vanyingi namuntlha va nga fanisiwa ni munhu lweyi a nga ku yetleleni. (Rom. 11:8) Hi mhaka muni hi vula leswo? Hi mhaka vanyingi a va kholwi swaku hi hanya ka masiku ya wugamu ni leswaku nhlomulu wawukulu wu ta fika ku nga li khale. Loko ku yendleka minchumu misaveni ya ku fana ni tinyimpi kumbe corona, va tikomba ingaku va pfuka hi ku kombisa ku tsakela rungula la Mfumu, kambe na swi nga se fika kwini va tlhela va khomiwa hi wurhongo hi ndlela ya ku fanekisela hi ku kala va nga li nyiki lisima rungula la Mfumu. Hambi lava va kholwaka swaku hikakunene siku la Yehovha li ta fika, va pimisa leswaku la ha ta hlwela hintamu. (2 Ped. 3:3, 4) Kambe ku hambana ni vanhu lava, hina ha swi tiva leswaku siku la Yehovha li kusuhi hintamu swinene ni leswaku hi fanele hi tshama na hi lunghile.

7. Vanhu lava va kalaka va nga ta pona ka siku la Yehovha va fana ndjhani ni swidakwa?

⁷ “Lava dakwaka.” Pawulo a fanise vanhu lava va nga ta lovisiwa hi Yehovha ni swidakwa. Phela a xindzendzele hambi wo xi basopisa ka nchumu, xa hlwela ku twisisa leswi xi byeliwaka swona, naswona swilo leswi xi swi yendlaka a swi twali. Swa fana ni vanhu va misava leyi, hambi vo byeliwa swaku swilo leswi va swi yendlaka swi bihile a va na mhaka na swona, va tama va famba ka ndlela leyi yi yisaka ku lovisiweni. Kambe Vakreste va fanele va tshama na va rindzile va tlhela va teka swiboho swaswinene. (1 Tes. 5:6) Ntivi yin’wani ya Bibele loko yi vulavula hi vanhu lava va tshamaka na va rindzile, yi vula swaku “loko nchumu xa ku karhi xi yendleka, a va dzuki, va rhula, funtshi a va tekeli ku yendla swilo kola na kola, kambe va rhanga hi ku pimisa leswaku va teka swiboho swaswinene.” Kambe hi mhaka muni swoleswo swi li swa lisima? I swa lisima hikusa swi nga hi pfuna ku kala hi nga tipeti ka politika kumbe ka mpfilumpfilu ya misava leyi. Naswona leswi siku la Yehovha li yaka li tshinela hi ta sindzisiwa ku seketela swilo swa misava leyi. Kambe a hi fanelanga hi karhateka hi leswo, Yehovha a ta hi pfuna hi ku tirhisa moya wa yena wa ku kwetsima leswaku hi tshama na hi rhulile hi tlhela hi teka swiboho swaswinene. —  Luk. 12:11, 12.

8. Hi ku ya hi 1 Vatesalonika 5:8, hi nga yendla yini swaku hi lunghekela siku la Yehovha? (Vona mufoto.)

⁸ “A hi yambaleni mpahla ya ku vhikela xifuva . . . ni . . . kapaseti.” Pawulo a fananise Vakreste ni masonchwa lawa ma tshamaka na ma pfule matihlo naswona ma tshamaka ma lunghile swaku ma lwa. (Lerha 1 Vatesalonika 5:8.) Loko sonchwa li li nyimpini li fanele li tshama li lungile swaku li lwa nkama wun’wani ni wun’wani. Swa fana na hina. Leswaku hi tshama na hi lunghekele siku la Yehovha, hi fanele hi yambala mpahla leyi vhikelaka xifuva, leyi fanekiselaka lipfumelo ni lirhandzu hi tlhela hi yambala kapaseti, leli fanekiselaka ntshembo lowu hi nga na wona. Swilo leswimbirhi, swi ta hi pfuna hintamu swinene.

9. Lipfumelo li nga hi vhikelisa ku yini?

⁹ Mpahla leyi vhikelaka xifuva a yi vhikela mbilu ya musonchwa. Lipfumelo ni lirhandzu na swona swi vhikela mbilu ya hina ya ku fanekisela. Swilo leswimbirhi swi ta hi pfuna swaku hi tama hi tirhela Yehovha ni ku landzela Yesu Kreste. Lipfumelo li hi yendla hi tiyiseka swaku Yehovha a ta hakela hinkwavu lava mu tirhelaka hi mbilu hinkwayu. (Heb. 11:6) Li tlhela li hi nyika matimba ya ku tama  hi tshembeka ka Murhangeli wa hina Yesu Kreste hambiloko hi kumana ni swikarhatu. Se leswaku hi tiyisa lipfumelo la hina ni ku tama hi tiyisela, hi fanele hi djondza hi vamakwerhu lava tamaka va tshembeka hambiloko va hluphiwa kumbe va li wusiwanini, naswona hi nga tekelela xikombiso xa vamakwerhu lava va nga vevukisa wutomi la vona hi ku kala hi nga rhandzi male ni swilo swa misava leyi, kambe hi rhangisa Mfumu wa Xikwembu ka wutomi la hina. b

10. Ku rhandza Yehovha ni van’wani swi nga hi pfunisa ku yini ku tiyisela?

¹⁰ A lirhandzu i la lisima swinene swaku hi tshama na hi rindzile hi tlhela hi pfula ni matihlo. (Mat. 22:37-39) Ku rhandza Yehovha swi nga hi pfuna ku tiyisela loko hi chumayela hambiloko swoleswo swi yendla swaku hi kumana ni swikarhatu. (2 Tim. 1:7, 8) Hi nga tlhela hi kombisa swaku ha va rhandza lava kalaka va nga mu tirheli Yehovha hi ku tama hi va chumayela makaya ka vona, hi ku tirhisa telefoni kumbe makarta. Ha tshemba swaku siku lin’wani va nga ha txintxa va tlhela va yendla swa swinene. — Ezek. 18:27, 28.

11. Loko hi rhandza vamakwerhu, i mpsini hi nga ta swi yendla? (1 Vatesalonika 5:11)

¹¹ Vanhu van’wani lava hi faneleke hi va rhandza i vamakwerhu va hina, naswona hi nga yendla leswo “hi ku va tiyisa ni ku va yaka”. (Lerha 1 Vatesalonika 5:11.) Ku fana ni masonchwa lawa ma lwaka xikan’we anyimpini, na hina swi lava hi tiyisana. I ntiyiso swaku minkama yin’wani sonchwa li nga ha vavisa sonchwa lin’wani na va li ku lweni, kambe a li nge te tshuka li yendla leswo hi maxivomu. Hi ndlela leyi fanaka, na hina a hi swi lavi ku vavisa vamakwerhu va hina hi maxivomu kumbe ku tlhelisa wubihi hi wubihi. (1 Tes. 5:13, 15) Hi nga tlhela hi kombisa lirhandzu hi ku hlonipha vamakwerhu lava rhangelaka bandleni. (1 Tes. 5:12) A nkama Pawulo a nga tsala karta, a tsalela bandla la Tesalonika, ni lembe a li nge se hundza na bandla leli li pfuliwile. Naswona swi nga yendleka vavanuna lava a va rhangela bandleni a va nga na xiperiyensiya funtshi a va phazama. Kambe hambileswo, a va fanele va hloniphiwa. Na hina, leswi nhlomulu wawukulu ku nga li khale wu nga ta sungula, swi lava hi tshemba madoda ya le bandleni ni minkongomiso leyi va hi nyikaka yona. Swi nga yendleka nkama wolowo swi nga koteki swaku vamakwerhu  va sede mundial kumbe va Betele va vulavulisana na hina, se i swa lisima ka ha li swoswi hi djondza ku rhandza ni ku hlonipha madoda ya le bandleni. Ku nga na mhaka swaku ku yendleka yini, a hi tameni hi tshama na hi rindzile, hi nga tshameli ku vona swihoxo swa vamakwerhu va hina. Lexi hi faneleke hi xi khumbuka hileswaku Yehovha na Yesu va tirhisa vavanuna lava swaku va hi kongomisa.

12. A ntshembo wu yi vhikelisa ku yini a mbilu ya hina?

¹² Ku fana ni leswi kapaseti li vhikelaka nhloko ya musonchwa, a ntshembo wa hina wu vhikela mimpimiso ya hina. Ntshembo lowu hi nga na wona wu hi yendla hi swi vona swaku a misava leyi a yi na nchumu lowu yi nga hi nyikaka wona. (Filp. 3:8) Wu tlhela wu hi pfuna swaku hi tama hi rhula hi tlhela hi tiya hambiloko hi kumana ni swikarhatu. Hi leswi swi nga yendlekela Wallace na Laurinda, lava tirhaka a África. Ndzeni ka mavhiki manharhu Wallace a luzekeliwe hi mamani kasi Laurinda a luzekeliwe hi papayi wa yena. Leswi swilo leswi swi nga yendleka hi nkama wa corona, vona a va swi kotanga ku tlhela a kaya ka vona va ya singathana ni ndjangu wa vona. Wallace a vula leswi: “Ku pimisa hi ntshembo wa ku pfuxiwa ka vafi, swi ni yendla ni pimisa hi vapsali va hina lava nga luza. Kambe leswi ni swi pimisaka ka nhloko ya mina a hi leswi vona a va li xiswona na va nge se fa, kambe hi leswi vona va nga ta va xiswona loko va ta pfuxiwa ka misava ya nyuwani. Ntshembo lowu wu ni yendla ni rhula loko ni xukuvala hi mhaka ya leswi swi nga yendleka.”

13. Hi nga yendla yini swaku hi yamukela moya wa ku kwetsima?

¹³ “Mi nga pfaleli moya wa ku kwetsima wa Xikwembu swaku wu tirha ka n’wina.” (1 Tes. 5:19) Pawulo a fanise moya wa ku kwetsima ni ndzilu. Loko hi ni moya wa ku kwetsima swa hi tsakisa ku yendla ku rhandza ka Yehovha ni ku yendla leswi nga swinene naswona swi hi yendla hi va ni matimba ya ku tirhela Yehovha. (Rom. 12:11) Kambe hi nga yendla yini swaku hi va ni moya wa ku kwetsima? Hi nga khongela ka Yehovha hi kombela swaku a hi nyika moya wa ku kwetsima, hi djondza Rito la yena ku nga Bibele ni ku va ka nhlengeletanu ya yena. Ku yendla leswo swi ta hi pfuna ku va ni wumunhu la Wukreste. — Gal. 5:22, 23.

14. Hi nga yendla yini loko hi lava ku tama hi yamukela moya wa ku kwetsima? (Vona mufoto.)

¹⁴ Loko Yehovha a hi nyika moya wa yena wa ku kwetsima, hi fanele hi yendla hinkwaswu leswi hi  nga swi kotaka swaku a nga tlheli a wu susa. Phela Yehovha a nyika moya wa yena wa ku kwetsima ka vanhu lava va yendlaka minchumu yayinene ni lava yendlaka hinkwaswu swaku va pimisa swilo swaswinene. A nge va nyiki moya wa ku kwetsima vanhu lava va tshamelaka ku pimisa swilo swa ku biha ni lava yendlaka swilo leswi a kalaka a nga swi lavi. (1 Tes. 4:7, 8) Xin’wani lexi hi faneleke hi xi yendla leswaku hi tama hi yamukela moya wa ku kwetsima i ku kala “hi nga yeyisi wuprofeta”. (1 Tes. 5:20) Rito leli nge “wuprofeta” li patsa yini? Li patsa swilo hinkwaswu leswi Yehovha a hi byelaka swona hi ku tirhisa moya wa yena wa ku kwetsima, leswi vulavulaka hi siku la yena ni leswi hi faneleke hi swi yendla hileswi siku leli li yaka li tshinela. Phela hina a hi pimisi swaku Armajedoni ya ha ta teka malembe ya manyingi swaku yi fika. Ku hambana ni leswo, hi li nyimelile siku leli funtshi ha swi tiva swaku li ta fika ku nga li khale. Naswona hi yendla hinkwaswu leswi hi nga swi kotaka leswaku hi va ni mahanyelo lama tsakisaka Yehovha hi tlhela “hi yendla minchumu leyi kombisaka swaku ha tshembeka ka Xikwembu siku ni siku”. — 2 Ped. 3:11, 12.

15. Hi nga yendla yini swaku hi nga xengiwi hi mavunhwa ya madimoni? (1 Vatesalonika 5:21)

¹⁵ Ka nkama lowu taka, valala va Xikwembu hi ndlela ya ku karhi va ta ku: “Ku ni ku rhula naswona a ku na xa ku chavisa”. (1 Tes. 5:3) Madimoni ma ta hangalasa mavunhwa misaveni hinkwayu leswaku ma xenga vanhu va vanyingi. (Nhla. 16:13, 14) Se hina ke? Na hina hi ta xengiwa ku fana ni vanhu van’wanyani? Ihim, hina a hi nge te xengiwa loko ‘hi kambisisa swilo hinkwaswu’. (Lerha 1 Vatesalonika 5:21.) Rito leli li nga hundzuluxeliwa lani li va “kambisisa” a li tirhisiwa ka ku kambela swilo swa ku fana ni woru kumbe prata swaku va tiyiseka swaku swi original kumbe nada. Se na hinawu, hi fanele hi kambisisa swilo leswi hi swi twaka kumbe leswi hi swi lerhaka swaku hi tiyiseka swaku i ntiyiso kumbe nada. Leswo swi va pfunile Vatesalonika naswona swi nga hi pfuna na hinawu ngopfungopfu leswi nhlomulu wawukulu wu yaka wu tshinela. Hina a hi fanelanga hi kholwa xin’wani ni xin’wani lexi vanhu va xi vulaka, kambe hi fanele hi kambela leswi hi swi lerhaka ni leswi hi swi twaka ni leswi Bibele ni nhlengeletanu ya Yehovha va swi vulaka. A hi nge te kanganyisiwa hi mavunhwa lawa madimoni ma ma hangalasaka. — Swi. 14:15; 1 Tim. 4:1.

16. I mpsini leswi Yehovha a nga ta hi nyika swona loko hi tshembeka naswona hi fanele hi yendla yini?

¹⁶ A hi swi tivi swaku ku ta yendleka yini hi mun’wani ni mun’wani wa hina ka nkama lowu taka, kambe lexi hi xi tivaka i xa leswaku loko nhlomulu wawukulu wu ku swee, vanhu va Yehovha va ta ponisiwa. (Yak. 4:14) Se ku nga na mhaka swaku nhlomulu wawukulu wu ta fika na hi hanya kumbe se na hi file, loko hi tama hi tshembeka ka Yehovha, a ta hi katekisa hi ku hi nyika wutomi la ku kala li nga heli. Lava nga totiwa va ta hanya na Kreste amatilweni kasi lava tinyempfu tin’wani va ta hanya ka paradesi lani misaveni. Se a hi tameni hi veka mimpimiso ya hina ni matihlo ya hina ka ntshembo lowu hi nga na wona naswona hi tshama na hi lunghekele siku la Yehovha.