1-2. Hi swini swikarhatu leswi Timboni ta tinyingi ti kumanaka na swona?

MUPOSTOLO Pawulo a byele Timotiyu ni Vakreste van’wana swaku va tama va chumayela mahungu ya ku tsakisa. (2 Tim. 4:5) Na hina hi fanele hi landzela leswi Pawulo a nga swi vula, kambe minkama yin’wana swi nga karhata hikusa hi kumana ni swikarhatu. Vamakwerhu van’wana va chava ku chumayela. (2 Tim. 4:2) Hi xikombiso, pimisa hi vamakwerhu lava tshamaka ka matiko lawa ntirho wa hina wa ku chumayela wu tsimbisiwaka. Vamakwerhu volavo a va tshiki ku chumayela hambileswi va swi tivaka swaku va nga petiwa djele.

² Vanhu va Yehovha va kumana ni swikarhatu swa swinyingi leswi nga va hetaka ntamu. Hi xikombiso, vamakwerhu van’wana va fanele va tirha mawora ya manyingi swaku va hlayisa mindjangu ya vona. Phela vamakwerhu volavo va swi lava ku yengesela ntirho wa vona wa ku chumayela, kambe ku hela vhiki na va karhalile hintamu, kasi van’wana swa va karhatela ku yengesela ntirho wa vona wa ku chumayela hi mhaka ya mavabyi, ku guga kumbe hi leswi va kalaka va nga humi kaya. Funtshi ku ni vamakwerhu van’wana lava titwaka na va nga pfuni nchumu. Hi xikombiso, makwerhu Maria * a li: “Swi lava ni tikarhata swaku ni lwisana ni mimpimiso ya mina ya ku biha ya ku titwa na ni nga pfuni nchumu, leyi ni hetaka ntamu. Ni gama ni hela ntamu lowu a ni ta wu tirhisela ku chumayela.”

3. Hi ta djondza hi yini ka nhlokomhaka leyi?

³ Hambi ho kumana ni swikarhatu swa ku gama kwini, Yehovha a ta hi nyika ntamu lowu hi wu lavaka swaku hi tama hi mu tirhela. Na hi nge se vona swaku Yehovha a hi pfunisa ku yini, a hi rhangeni hi ku vona leswi a nga mu pfunisa xiswona mupostolo Pawulo na Tomotiyu, swaku va tama va mu tirhela hambi va kumana ni swikarhatu.

4. Hi swini swikarhatu leswi Pawulo a nga kumana na swona?

⁴ Pawulo a kumane ni swikarhatu swa swinyingi. A a swi lava hintamu ku pfuniwa hi Yehovha loko lava a va mu nyenya va mu ba, va mu peta djele va tlhela va zama ku mu dlaya. (2 Kor. 11:23-25) Pawulo a nga chavanga ku vula swaku minkama yin’wana a a hela ntamu. (Rom. 7:18, 19, 24) A vule swaku a a tiyisela “xitlhavani ka miri,” lexi a a swi lava hintamu swaku Yehovha a xi susa. — 2 Kor. 12:7, 8.

5. I mpsini leswi Pawulo a nga swi yentxa hambiloko a kumana ni swikarhatu?

⁵ Yehovha a nyike Pawulo ntamu wa ku tama a mu tirhela hambi a kumana ni swikarhatu. Vona leswi Pawulo a nga kota ku swi yentxa. Hi xikombiso, nkama na a khomiwile aRoma a chumayelile mahlweni ka vavanuna va lisima va Vayuda ni vatirhi va mfumu. (Mint. 28:17; Filp. 4:21, 22) A tlhele a chumayela masonchwa ya hosi ni vanhu hinkwavu lava a va ya va ya mu pfuxela. (Mint. 28:30, 31; Filp. 1:13) Hi nkama wolowo, Xikwembu xi mu tirhisile swaku a tsala makarta lawa ma hi pfunaka ni namuntlha. Handle ka leswo, leswi Pawulo a nga swi yentxa swi tiyise vamakwerhu va bandla la Roma swi tlhela swi yentxa swaku “va chumayela rito la Xikwembu na va nga chavi nchumu.” (Filp. 1:14) Hambileswi Pawulo a a nga koti ku yentxa minchumu ya yinyingi hi leswi a nga khomiwa, a zame ku yentxa hinkwaswu leswi a nga swi kota ka swiyimu leswi a a li ka swona “swaku mahungu ya ku tsakisa ma tama ma ya phambheni”. — Filp. 1:12.

6. Hi ku ya hi 2 Vakorinto 12:9, 10, i yini lexi nga pfuna Pawulo swaku a kota ku hetisisa ntirho wa yena wa ku chumayela?

⁶ Pawulo a a swi tiva swaku hinkwaswu leswi a nga swi yentxa, hi Yehovha lweyi a nga mu pfuna. A a swi tiva swaku matimba ya Xikwembu ma mu tiyisile ‘nkama lowu a a hele ntamu.’ (Lerha 2 Vakorinto 12:9, 10.) Hi ku tirhisa moya wa ku kwetsima, Yehovha a nyike Pawulo ntamu swaku a kota ku hetisisa ntirho wa yena wa ku chumayela hambiloko a hluphiwa, a petiwa djele kumbe a kumana ni swikarhatu swin’wana.

7. Hi swini swikarhatu leswi Timotiyu a nga swi tiyiselela swaku a hetisisa ntirho wa yena wa ku chumayela?

⁷ Timotiyu lweyi a a chumayela na Pawulo, na yena a swi lava a tshemba matimba ya Yehovha swaku a hetisisa ntirho wa yena wa ku chumayela. Phela Timotiyu a helekete Pawulo ka mayendzo ya ku tala ya ku pfuxela mabandla.  Handle ka leswo, Pawulo a rhume Timotiyu swaku a pfuxela mabandla man’wana a tlhela a ma tiyisa. (1 Kor. 4:17) Swi nga yentxeka Timotiyu a a titwa na a nga faneleki ku yentxa ntirho lowu va nga mu rhuma wona. Kumbexana hi yona mhaka leyo Pawulo a nga mu byela leswi: “U nga tshiki munhu a ku delela hileswi u nga jovhem.” (1 Tim. 4:12) Hi nkama wolowo Timotiyu na yena a a li ni xikarhatu lexi a a xi mu yentxa a “tshamela ku vabya.” (1 Tim. 5:23) Kambe Timotiyu a a swi tiva swaku Yehovha a a ta mu nyika moya wa yena wa ku kwetsima swaku a mu tiyisa swaku a kota ku chumayela a tlhela a pfuna vamakwerhu. — 2 Tim. 1:7.

8. Yehovha a hi tiyisisa ku yini?

⁸ Namuntlha Yehovha a hi nyika “matimba ya makulu lama tlulaka hinkwaswu” leswaku hi tama hi mu tirhela hi ku tshembeka. (2 Kor. 4:7) Swoswi a hi voneni 4 wa swilo leswi Yehovha a nga hi nyika swona swaku a hi tiyisa a tlhela a hi pfuna swaku hi tama hi tshembeka ka yena. Swilo swa kona i xikhongelo, Bibele, ku va ni vamakwerhu ni ntirho wa ku chumayela.

9. Xikhongelo xi nga hi pfunisa ku yini?

⁹ Xikhongelo xa hi tiyisa. Hi ku ya hi Vaefeza 6:18, Pawulo a hi byele swaku hi fanele hi khongela ‘minkama hinkwayu’ hikusa loko hi yentxa leswo, Yehovha a ta hi nyika ntamu. Makwerhu Jannie, lweyi a tshamaka a Bolívia a swi vonile loko Yehovha a mu pfuna loko a kumana ni swikarhatu swa swikulu. Nsati wa yena ni vapsali va yena va vabye hintamu hi nkama wun’we naswona makwerhu Jannie a tikarhate hintamu swaku a va hlayisa kambe mamana wa yena a game a fa naswona nsati wa yena ni papayi wa yena va hlwele hintamu ku hanya ka mavabyi ya vona. Loko a vulavula hi leswi nga mu humelela, Jannie a li: “Leswi nga ni humelela swi ni yentxe ni chava hintamu, kambe leswi nga ni pfuna i ku khongela ni byela Yehovha leswi a ni titwisa xiswona.” Yehovha a mu nyike ntamu Jannie swaku a tiyisela swikarhatu swa yena. Ronaldo, doda leli tshamaka Bolívia a tsumbule swaku mamana wa yena a ni cancro naswona hi ku famba ka nkama a file. Se i ntxini lexi nga mu pfuna ku tiyisela xikarhatu? Yena a li: “Loko ni khongela ka Yehovha, ni mu byela hinkwaswu leswi ni titwisaka xiswona, na swi tiva swaku Yehovha wa ni twisisa ku tlula munhu mun’wana ni mun’wana funtshi wa ni tiva ku tlula leswi mina ni ti tivisaka xiswona.” Minkama yin’wana hi nga ha va ni swikarhatu swa swikulu hi gama hi nga ha swi tivi swa ku swi vula ka xikhongelo, hambileswo, Yehovha a vula swaku hinkwerhu hi fanele hi khongela ka yena hambiloko swi hi karhatela ku vula leswi hi swi pimisaka kumbe leswi hi titwisaka xiswona. — Rom. 8:26, 27.

10. Hi ku ya hi Vaheberu 4:12, hi mhaka muni ku lerha Bibele ni ku pimisa hi leswi hi swi lerhaka swi li swa lisima?

¹⁰ Ku lerha Bibele swa hi tiyisa. Mupostolo Pawulo a a lerha Matsalwa leswaku ma mu tiyisa, na hina hi nga yentxa leswi fanaka. (Rom. 15:4) Loko hi lerha Rito la Xikwembu hi tlhela hi pimisa hi leswi hi swi lerhaka, Yehovha a ta hi nyika moya wa ku kwetsima swaku hi twisisa ni ku tirhisa leswi hi swi lerhaka. (Lerha Vaheberu 4:12.) Ronaldo, lweyi hi nga bula hi yena a li: “Na tsaka hi leswi ni nga titoloveta ku lerha Bibele siku ni siku na ni nge se yetlela. Ku pimisa hi leswi ni swi lerhaka swi ni yentxa ni vona leswi Yehovha a nga tshamisa xiswona ni lirhandzu leli a nga na lona hi vanhu va yena. Leswo swi ni nyika ntamu.”

11. Bibele li mu pfunise ku yini makwerhu lweyi a a karhatekile?

¹¹ Loko hi pimisa hi leswi hi swi djondzaka ka Bibele swi ta hi pfuna ku tiyisela loko hi kumana  ni swikarhatu. Vona leswi Bibele li nga mu pfunisa xiswona wansati lweyi a nga feliwa hi nuna. Doda li mu pfunile hi ku mu byela swaku a lerha buku la Yobo. Nkama a nga sungula ku lerha hi leswi nga yentxekela Yobo, a vone swaku Yobo a a nga fanelanga a va ni mapimiselo lawa a a li na wona. Nkama lowu na a lerha, a a tshamela ku vula leswi: “Yobo, u nga pimisisi xileswo!” Kambe makwerhu lweyi a a nga swi twisisi swaku mimpimiso leyi Yobo a a li na yona a yi fana ni ya yena. Ku lerha buku la Yobo swi mu pfunile ku txintxa mapimiselo ya yena a tlhela a tiyisela ka xikarhatu lexi a a li na xona xa ku feliwa hi nuna.

12. Yehovha a hi tiyisisa ku yini hi ku tirhisa vamakwerhu?

¹² Ku va ni vamakwerhu swa hi tiyisa. Yehovha a tirhisa vamakwerhu swaku a hi tiyisa. Pawulo a vule swaku a a navela ku tlhangana ni vamakwerhu “leswaku va ta tiyisana.” (Rom. 1:11, 12) Maria lweyi hi nga bula hi yena a swi teka swi li swa lisima ku va ni vamakwerhu. A vula leswi: “Yehovha a tirhise vamakwerhu lava a va nga xi tivi xikarhatu lexi a ni kumana na xona. Va ni byele marito lawa ma tiyisaka va tlhela va ni tsalela karta, ku nga leswi a ni swi lava. Ni tlhele ni pfuniwa hi vamakwerhu lava va nga humeleliwa hi swikarhatu swa ku fana ni leswi a ni kumana na swona, madoda na wona ma ni pfuna hi ku ni yentxa ni titwa ni li wa lisima bandleni.”

13. Hi nga yentxa yini swaku hi tiyisana ni vamakwerhu amintlhanganwini?

¹³ Hi nga tiyisana ni vamakwerhu loko hi li mintlhanganwini ya bandla. Swi ngo yini loko wo zama ku byela vamakwerhu marito lawa ma tiyisaka ni ku va khensa loko u li mintlhanganwini? Hi xikombiso, makwerhu Pedro lweyi a nga doda a vule leswi ka makwerhu wawansati lweyi nuna wa yena a kalaka a nga li Mboni: “Swi hi tiyisa hintamu ku va na wena lani mintlhanganwini. Minkama hinkwayu wa swi kota ku ta mintlhanganwini ni vana va wena va 6 na mi lunghekile mi tlhela mi lunghiselela mintlhanganu.” Makwerhu lweyi a xiririke mihloti hi ku tsaka, a vula leswi: “A ni swi lava hintamu ku twa marito ya ku fana ni lawa namuntlha.”

14. Ntirho wa ku chumayela wu hi pfunisa ku yini?

¹⁴ Ku chumayela swa hi tiyisa. Loko hi byela van’wana ntiyiso lowu nga ka Bibele swa hi tiyisa, ku nga na mhaka swaku va swi tsakela kumbe a va swi tsakeli. (Swi. 11:25) Makwerhu Stacy a swi vonile swaku ku chumayela swa tiyisana. Nkama mun’we wa ndjangu wa yena a nga susiwa bandleni a hele ntamu naswona a a nga tshiki ku tivutisa swaku a nga yentxa yini swaku a mu pfuna. Minkama hinkwayu Stacy a a tshamela ku pimisa hi leswi nga yentxeka. Kambe i yini lexi nga mu pfuna swaku a kota ku tiyisela? I ntirho wa ku chumayela. Loko a li ku chumayeleni, a a pimisa hintamu hi vanhu va teritoriyu la yena lava a va lava ku pfuniwa. Yena a li: “Hi nkama wolowo Yehovha a ni nyike xidjondzo lexi a xi tekela ku tirhisa leswi a xi swi djondza, leswo swi ni tiyise hintamu. Phela ntirho wa ku chumayela wu ni pfune hintamu.”

15. Hi djondza yini ka leswi makwerhu Maria a nga swi vula?

¹⁵ Van’wana va pimisa swaku a va nge swi koti ku yentxa swa swinyingi ka ntirho wa ku chumayela hi mhaka swiyimu swa vona. Loko u titwisa xileswo, khumbuka swaku Yehovha a tsaka hintamu loko u mu yentxela leswi u swi kotaka. Tlhela u pimisa hi xikombiso xa Maria lweyi se hi nga bula hi yena. Nkama a nga rhurha a ya tshama lomu a ku vulavuliwa lirimi lin’wana a a pimisa swaku a nge pfuni hi nchumu. Yena a li: “ Ni hete nkama wa wunyingi na no vula marito ya matsongo kumbe ku lerha ndzimana ni ku nyikela swiphephana loko ni li nsin’wini.” Leswo a swi yentxa Maria a tivona na a nga li wanchumu loko a tifananisa ni vamakwerhu lava a  va li vulavula kahle lirimi la ndhawu liyani. Hambileswo, Maria a game a txintxa mapimiselo ya yena, a vone swaku Yehovha a nga tama a mu tirhisa hambileswi a kalaka a nga swi koti ku vulavula kahle lirimi la ndhawu liyani. A tlhele a ku: “Marito lawa ma nga ka Bibele ma vevukile, naswona hi wona lawa ma ponisaka wutomi la vanhu.”

16. I yini lexi nga pfunaka vamakwerhu lava va swi lavaka ku chumayela kambe va kalaka va nga swi koti ku huma makaya?

¹⁶ Yehovha wa swi tiva swaku van’wana ka hina va swi lava ku chumayela, kambe a swi koteki swaku va huma makaya. Hambileswo, a nga hi pfuna swaku hi kota ku chumayela lava va taka va ta hi pfuxela kumbe vadotori. Loko hi tshamela ku fananisa leswi a hi kota ku swi yentxa khale ni leswi hi swi yentxaka swoswi, swi nga hi heta ntamu. Kambe loko hi vona leswi Yehovha a hi pfunisaka xiswona swoswi, swi ta hi nyika matimba ya ku kota ku tiyiselela swikarhatu hi tlhela hi tsaka.

17. Hi ku ya hi Eklesiasta 11:6, hi mhaka muni hi fanele hi tama hi chumayela hambiloko lava hi va chumayelaka va nga tekeli ku swi yamukela?

¹⁷ Ka timbewu leti hi ti byalaka a hi swi tivi swaku hi yini leyi nga ta humesa timintsu yi tlhela yi kula. (Lerha Eklesiasta 11:6.) Hi xikombiso, makwerhu Bárbara lweyi a nga ni kolomuyani ka 80 wa malembe a chumayela hi telefoni ni hi ku tirhisa makarta. Ka lin’we la makarta ya yena a pete Murindzi wa 1 ka Março wa 2014 lweyi a nga ni nhlokomhaka leyi nge: “Leswi Yehovha A Nga Ku Yentxela Swona.” Na a nga swi tivi a karta la yena a li posele nuna na nsati lava a va tshike ku va Timboni ta Yehovha, naswona va game va lerha revhixta hinkwalu. Nuna wa kona a swi vone swi fana ni loko Yehovha a vulavula na yena hi ku kongoma. Va sungule ku ya mintlhanganwini, naswona loko se ku hundze 27 wa malembe va tlhele va va Timboni ta Yehovha. Pimisa hi leswi makwerhu Bárbara a nga tsakisa xiswona a tlhela a tiyisiwa loko a vona leswi karta leliyani li nga swi yentxa.

18. Hi nga yentxa yini swaku hi tiyisiwa hi matimba ya Xikwembu?

¹⁸ Yehovha a hi nyika swilo swa swinyingi leswaku a hi tiyisa swa ku fana ni xikhongelo, Bibele, vamakwerhu ni ntirho wa ku chumayela. Loko hi swi tirhisa kahle swilo leswi hi ta va hi mu komba swaku ha mu tshemba naswona ha swi lava ku pfuniwa hi yena. A hi tiyisekeni swaku Yehovha “a kombisa ntamu wa yena ka lava mu rhandzaka hi mbilu hinkwayu.” — 2 Tikro. 16:9.