1-2. Impsini swi nga yentxaka swaku Matsalwa man’wana ma va ya lisima hintamu ka wutomi la hina?

 LOKO vanhu vambirhi va chada, va vekeliwa dixkursu la Bibele leli vulavulaka hi muchadu. Minawu ya Bibele leyi va yi twaka ka dixkursu leli, se va yi tiva kambe hi siku lelo i ya lisima hintamu ka vona, hikusa ku sukela kolanu, va fanele va yi tirhisa ka ndjangu wa vona.

² Leswo swa yentxeka ka nuna na nsati loko se va li ni vana. Swi nga yentxeka se va twe madixkursu ya manyingi lawa ma vulavulaka hi ku kulisa vana, kambe loko se va li ni vana, madixkursu wolawo ma sungula ku va ya lisima hintamu ka vona. Phela swoswi va ta va ni vana naswona va ta va ni ntirho wa lisima hintamu wa ku va wundla. Phela loko swiyimu swi txintxa ka wutomi la hina hi kona minawu yin’wana ya Bibele yi vaka ya lisima hintamu ka hina. Leswi hi swona swi yentxaka swaku vanhu va Yehovha va djondza Bibele va tlhela va yentxa leswi tihosi ta Israyele a ti swi yentxa, ku nga ku pimisa hi lona “masiku hinkwawu” ya wutomi la vona. — Det. 17:19.

3. I yini leswi hi nga ta swi vona ka nhlokomhaka leyi?

³ N’wina vapsali lava nga Vakreste, mu ni ntirho wa lisima hintamu ku nga ku djondzisa vana va n’wina hi Yehovha. Kambe a mo lava ku va djondzisa ntsena, mu lava ku va pfuna swaku va rhandza Xikwembu. Se, mu nga yentxa yini swaku mu pfuna vana va n’wina kuva va rhandza Yehovha hi mbilu hinkwayu? Ka nhlokomhaka leyi, hi ta vona 4 wa minchumu leyi nga mi pfunaka. (2 Tim. 3:16) Hi ta tlhela hi vona leswi vapsali va vanyingi lava nga Vakreste va nga pfunekisa xiswona hi ku tirhisa minawu ya Bibele nkama na va djondzisa vana va vona.

4. Hi wini nchumu wa ku sungula lowu nga pfunaka vapsali swaku va pfuna vana va vona ku rhandza Yehovha? (Yakobo 1:5)

⁴ Xa ku sungula: Pfumela ku pfuniwa hi Yehovha. Kombela Yehovha swaku a ku nyika wutlharhi leli lavekaka swaku u pfuna vana va wena kuva va mu rhandza. (Lerha Yakobo 1:5.) A ku na munhu mun’wana lweyi a nga ku pfunaka ku tlula Yehovha. Hi swi tivisa ku yini leswo? Xa ku sungula, khumbuka swaku i khale Yehovha na a li mupsali. (Pis. 36:9) Xa wumbirhi, minawu leyi a hi nyikaka yona yi pfuna hina. — Esa. 48:17.

5. a) Nhlengeletanu ya Yehovha yi va pfunisa ku yini vapsali? b) U djondza yini ka vhidiyo leli kombisaka leswi makwerhu Abilio na makwerhu Ula va nga va kulisisa xiswona vana?

⁵ Yehovha a tirhisa Bibele ni nhlengeletanu ya yena swaku a nyika vapsali mabuku ni mavhidiyo, lawa ma nga va pfunaka swaku va djondzisa vana va vona kuva va mu rhandza. (Mat. 24:45) Hi xikombiso, ku ni minchumu ya yinyingi leyi nga ku pfunaka ka nhlokomhaka leyi nge: “Leswi Nga Pfunaka Ndyangu,” leyi kumekaka ka jw.org ni ka Khindlimuka! (hi Xitsonga). Funtshi ka site leli, u nga kuma mavhidiyo lawa ma nga ni maentrevhixta ni madrama lawa ma nga pfunaka vapsali swaku va tirhisa minawu ya Bibele nkama va wundlaka vana. b — Swi. 2:4-6.

6. Joe ni nsati wa yena va titwisa ku yini hileswi Yehovha ni nhlengeletanu ya yena va nga va pfunisa xiswona?

⁶ Vapsali va vanyingi va yi khensa hintamu ndlela leyi Yehovha a va pfunaka hi yona swaku va kulisa vana. Joe lweyi a nga papayi a li: “Ku kulisa 3 wa vana na va rhandza Yehovha, a hi matlangwana. Minkama hinkwayu mina ni nsati wa mina hi khongela ka Yehovha swaku a hi pfuna, naswona ha swi vona swaku minkama hinkwayu hi kuma tinhlokomhaka kumbe mavhidiyo lawa ma hi pfunaka ka xiyimu lexi hi nga ka xona. Phela minkama hinkwayu, hi pfumelela Yehovha swaku a hi kongomisa.” Joe ni nsati wa yena va swi vonile leswi mavhidiyo ma nga va pfunisa xiswona swaku va kulisa vana va vona.

7. Hi mhaka muni swi li swa lisima kuva vapsali va va vekela xikombiso xa xinene vana va vona? (Varoma 2:21)

⁷ Xa wumbirhi: Va vekeli xikombiso vana va wena. Vana va tolovela ku vona leswi vapsali  va vona va swi yentxaka, va gama va va tekelela. I ntiyiso swaku vapsali hinkwavu va phazama. (Rom. 3:23) Hambileswo, vapsali lava nga tlhariha, va yentxa hinkwaswu leswi va nga swi kotaka swaku va va vekela xikombiso xa xinene vana va vona. (Lerha Varoma 2:21.) Mupsali mun’wana a vule leswi hi vana: “Vana va fana ni xiponchi” a tlhele a ku: “Va swi vona loko hi va djondzisa swilo leswi hi kalaka hi nga swi yentxi”. Se, loko hi lava swaku vana va hina va rhandza Yehovha, hi fanele hi va va ku sungula hi mu rhandza.

8-9. U djondze yini ka leswi nga vuliwa hi André na Ema?

⁸ Ku ni swilo swa swinyingi leswi vapsali va nga swi yentxaka swaku va djondzisa vana va vona ku rhandza Yehovha. André lweyi a nga ni 17 wa malembe a li: “Minkama hinkwayu vapsali va mina va ni kombe lisima la ku khongela. Siku ni siku na ni nge se yetlela, papayi wa mina a khongela na mina hambiloko se ni khongelile na ni li noxe. Vapsali va hina va tolovela ku hi byela leswi: ‘Bulani na Yehovha minkama hinkwayu.’ Ku vona swaku xikhongelo a xi li xa lisima hintamu ka vapsali va mina, swi ni pfunile hintamu. Swoswi swa ni vevukela ku khongela naswona na swi vona swaku Yehovha wa ni rhandza.” Vapsali, minkama hinkwayu khumbukani swaku ndlela leyi mi mu rhandzaka hi yona Yehovha yi nga pfuna vana va n’wina swaku na vona va mu rhandza.

⁹ Swoswi a hi voneni xikombiso xa Ema. Nkama papayi wa yena a nga tsukula ndjangu, a va siye na va ni swikweneti swa swinyingi. Ema a li: “Mamana minkama ya yinyingi a a tshama na a txonile kambe minkama hinkwayu a a vulavula hileswi Yehovha a va pfunisaka xiswona vanhu va yena, funtshi leswi a a swi yentxa a swi kombisa swaku a a kholwa swaku Yehovha a ta hi hlayisa. Phela mamana a a hanya hi leswi a a hi djondzisa swona.” Loko u li mupsali, u djondza yini ka mhaka leyi? U nga swi kota ku va vekela xikombiso xa xinene vana va wena hambiloko u kumana ni swikarhatu. — Gal. 6:9.

10. Hi wini nkama wa wunene lowu Vayisrayele a va ta bula ni vana va vona hi Yehovha? (Deteronoma 6:6, 7)

¹⁰ Xa wunharhu: Bula ni vana va wena nkama ni nkama. Yehovha a byele Vayisrayele swaku va djondzisa vana va vona nkama ni nkama. (Lerha Deteronoma 6:6, 7.) Siku ni siku vapsali lava, a va ni nkama wa wunyingi wa ku djondzisa vana va vona hi Yehovha. Hi xikombiso, n’wana wa mufana a a heta nkama wa wunyingi ni papayi wa yena masin’wini, se n’wana wa ntombhi a a heta nkama wa wunyingi na a yentxa mintirho ya le kaya ni mamana wa yena. Hi mhaka leyo, vapsali ni vana a va ni nkama wa ku bula hi minchumu ya yinyingi ya lisima. Hi xikombiso, nkama lowu va tirhaka a va ta bula hi wumunhu la linene la Yehovha ni leswi a wu pfunisaka xiswona ndjangu wa vona.

11. Hi wini nkama wa wunene lowu vapsali lava nga Vakreste va nga bulaka hi wona ni vana va vona?

¹¹ Swoswi minchumu yi txintxile. Ka matiko ya manyingi swa kala swaku vapsali ni vana va heta nkama wa wunyingi na va li xikan’we. Leswi vapsali va hetaka nkama wa wunyingi na va li ntirhweni, kuve vana na vona va heta nkama wa wunyingi na va li xikola, swi lava swaku vapsali va yentxa minzamu ya ku tinyika nkama wa ku bula ni vana va vona. (Efe. 5:15, 16; Filp. 1:10) Lexi tsakisaka hi leswaku wugandzeli la ndjangu li yentxa swaku swoleswo swi koteka. Alexandri lweyi a nga jovhem a li: “Minkama hinkwayu papayi a yentxa minzamu swaku hi va ni wugandzeli la ndjangu funtshi a nga pfumeleli nchumu xi hi sivela ku va ni wugandzeli la ndjangu. Loko hi heta ku djondza ko buliwa ntse.

12. I yini leswi mulumuzana a nga swi yentxaka nkama lowu a djondzaka ni vana va yena?

 ¹² Loko u li mulumuzana, u nga yentxa yini swaku wugandzeli la ndjangu li tsakisa ka vana va wena? Swi ngo yini loko ho tirhisa buku leli nge: Tikhorisi Hi Wutomi La Ku Kala Li Nga Heli swaku u djondza ni vana va wena? Loko u djondza ni vana va wena hi ku tirhisa buku leli, swi ta ku vevukela ku bula na vona. Loko u lava swaku vana va wena va ku byela leswi va titwisaka xiswona, u nga tshameli ku va sola nkama lowu mi djondzaka, funtshi u nga va kwateli loko va vula minchumu ya ku huma ndleleni leyi lwisanaka ni Bibele. Kambe va khensi hileswi va kalaka va nga ku fihlelanga leswi va swi pimisaka, tlhela u va yentxa va chunseka ku ku byela leswi va titwisaka xiswona. Leswaku u pfuna vana va wena, u fanele u rhanga hi ku tiva leswi va swi pimisaka.

13. I yini swin’wana leswi vapsali va nga swi yentxaka swaku va pfuna vana va vona kuva va va vanghanu va Yehovha?

¹³ Vapsali, zamani ku xava nkama siku ni siku swaku mu pfuna vana va n’wina kuva va djondza hi Yehovha. Swaku u kulisa wunghanu la vana va wena na Yehovha, u nga nyimeli siku leli u nga li veka swaku mu djondza hi lona. Makwerhu Lisa lweyi a nga mamana a li: “Hi pfune vana va hina ku djondza hi Yehovha hi ku vona leswi a nga swi yentxa. Hi xikombiso, nkama lowu swinbyanyana swi tlulatlulaka swi hlekisela vana, hi djondzisa vana va hina swaku Yehovha i Xikwembu xa ku tsaka funtshi wa li rhandza wutomi naswona a lava swaku hi tsaka”.

14. Hi mhaka muni vapsali va fanele va pfuna vana va vona swaku va kuma vanghanu va vanene? (Swivuriso 13:20)

¹⁴ Xa wu 4: Pfuna vana va wena swaku va va ni vanghanu va vanene. Bibele li vula swaku vanghanu va nga hi xengetela ku yentxa swa swinene kumbe swa ku biha. (Lerha Swivuriso 13:20.) Mupsali, indje wa va tiva vanghanu va vana va wena? U tshama u hungata na vona? U nga yentxa yini swaku u pfuna vana va wena swaku va va ni vanghanu lava rhandzaka Yehovha? (1 Kor. 15:33) U nga va pfuna hi ku rhamba vanhu lava nga ni wunghanu la linene na Yehovha swaku va va na n’wina  ka mintirho leyi mi yi yentxaka hi ndjangu. — Pis. 119:63.

15. Vapsali va nga va pfunisa ku yini vana va vona swaku va va ni vanghanu va vanene?

¹⁵ Pimisa hi xikombiso xa makwerhu Toni lweyi a nga papayi. A tlhamusela leswi yena ni nsati wa yena va swi yentxaka swaku va pfuna vana va vona kuva va va ni vanghanu va vanene, a li: “Mina ni nsati wa mina hi tolovela ku rhamba vamakwerhu va tintanga ta ku hambana swaku va ta hi ta dla na vona, hi hungata na vona hi tlhela hi va na vona ka wugandzeli la ndjangu. Leswo swi hi pfune ku va tiva ku yampsa vamakwerhu lava, lava tirhelaka Yehovha hi ku swi rhandza na va tsakile. I ve nkateko wa wukulu hintamu kuva hi rhambe vadjikelezi, vamisiyonariyu ni van’wana swaku va va na hina kaya. Phela ku twa swiperiyensiya swa vona, ku hiseka ka vona ni swilo leswi va nga titsona swona swaku va tirhela Yehovha, swi va khumbe hintamu vana va hina swi tlhela swi va pfuna ku kulisa wunghanu la vona na Yehovha.” Vapsali, tinyimiseleni ku pfuna vana va n’wina swaku va va ni vanghanu va vanene.

16. I yini leswi mupsali a nga swi yentxaka loko n’wana wa yena a nga swi lavi ku tirhela Yehovha?

¹⁶ Mupsali, u ta yentxa yini loko u tikarhatela ku djondzisa vana va wena kambe mun’we wa vona a nga swi lavi ku tirhela Yehovha? U nga pimisi swaku a wu mupsali wa munene, hikusa Yehovha a nyike vanhu hinkwavu ku patsa ni vana va wena nchunseko wa ku tilangela swaku va lava ku tirhela Yehovha kumbe a va swi lavi. Loko n’wana wa wena a tshike ku tirhela Yehovha, u nga godoli u pimisa swaku a nge tlheleli. Pimisa hi xikombiso xa n’wana wa ku lahleka. (Luk. 15:11-19, 22-24) N’wana yelweyo a suke kaya, a ya yentxa minchumu ya yinyingi ya ku biha, kambe a game a tlhelela. Van’wana va nga hlaya swaku lexo o va xitoriya ntsena, a swi nge tshuki swi yentxeka, kambe leswo a hi ntiyiso. Munhu lweyi a nga tshika ku tirhela Yehovha, swi nga koteka swaku a tlhela a mu tirhela. Leswo hi swona swi nga yentxeka hi jovhem leli vitaniwaka Eli.

17. U djondza yini ka leswi nga yentxekela makwerhu Eli?

¹⁷ Loko a vulavula hi vapsali va yena, Eli a li: “Va yentxe hinkwaswu leswi va nga swi kota  swaku va ni djondzisa Bibele swaku ni rhandza Yehovha, kambe nkama lowu na ni li ni kolomuyani ka 15 wa malembe, ni sungule ku kala ni nga ha va yingisi vapsali va mina.” Eli a a hanya hi minawu ya Bibele loko a ni vapsali va yena kambe loko a li kule na vona, a a yentxa leswi a a swi lava. Vapsali va yena va zame ku mu pfuna kambe a va swi kotanga. A game a suka kaya a tlhela a sungula ku va ni mahanyelo ya ku biha, kambe minkama yin’wana a a vulavula hi Bibele ni vanghanu va yena. Eli a li: “Nkama a ni vulavula ni vanghanu va mina hi Yehovha, a ni ya ni pimisa hintamu hi yena. Hi kutsongokutsongo mbewu ya ntiyiso leyi vapsali va mina va nga yi byala na na ha li mutsongo yi tlhele yi sungula ku kula.” Hi ku famba ka nkama, Eli a tlhelele ka Yehovha. c Pimisa hi leswi vapsali va Eli va nga tsakisa xiswona nkama va nga vona swaku n’wana wa vona se a tirhisa leswi va nga mu djondzisa swona ku sukela a ha li mutsongo! — 2 Tim. 3:14, 15.

18. U titwisa ku yini hi vapsali lava tikarhataka swaku va djondzisa vana va vona hi Yehovha?

¹⁸ Vapsali, mi nyikiwe ntirho wa lisima hintamu wa ku djondzisa vana va n’wina hi Yehovha. (Pis. 78:4-6) Phela ntirho lowu, a hi wa matlangwana. Ha mi khensa hileswi mi tikarhataka swaku mi kulisa vana va n’wina. Loko mi tama mi tikarhata swaku mi pfuna vana va n’wina kuva va rhandza Yehovha mi tlhela mi va wundla ni ku va djondzisa minawu ya yena, Yehovha Papayi wa hina wa le tilweni a ta tsaka hintamu. — Efe. 6:4.