1-2. Hi mhaka muni swi fanele swi hi tsakisa swiprofeto leswi kumekaka ka Nhlawutelo?

 INDJE u tshama u kombeliwa ku vona mafoto? Swi nga yentxeka ka mafoto wolawo, ku li ni vanhu va vanyingi u kalaka u nga va tivi. Kambe ku ni wun’we lowu ku tsakisaka hintamu, hikusa u kona ka mufoto wolowo. Nkama lowu u wu txuvukaka, u zama ku khumbuka swaku u wu suse siku muni ni swaku u wu suse na u li kwini ni swin’wanyana. Phela mufoto wolowo i wa lisima hintamu ka wena.

² Buku la Nhlawutelo li fana ni mufoto wolowo. Hi mhaka muni? Xa ku sungula, buku leli li tsaleliwe hina, marito ya ku sungula ma li: “Marito lawa ma tlhamusela minchumu leyi Yesu Kreste a yi paluxaka, leyi Xikwembu xi nga mu komba yona swaku a komba vatirhi va xona, minchumu leyi ku ngo yo sala kutsongo swaku yi yentxeka.” (Nhla. 1:1) Leswi swi nga tsaliwa ka buku la Nhlawutelo, a swi tsaleliwanga vanhu hinkwavu, kambe swi tsaleliwe hina. Leswi hi nga vanhu va Yehovha, a swi hi hlamalisi ku tiva swaku swiprofeto leswi nga ka Nhlawutelo swa hetiseka ni ka hina. Hi marito man’wana hi nga vula swaku na hina hi kona ka “mufoto wolowo.”

3-4. Swiprofeto leswi nga ka buku la Nhlawutelo swi sungule ku hetiseka nkama muni, naswona impsini leswi hi faneleke hi swi yentxa?

³ Xa wumbirhi, xi patsa nkama lowu swiprofeto swoleswo a swi ta hetiseka hi wona. Loko mupostolo Yohani a vulavula hi nkama wolowo a te: “Moya wa ku kwetsima wu ni yentxe ni vona minchumu leyi nga ta yentxeka hi siku la Hosi.” (Nhla. 1:10) Nkama Yohani a nga tsala marito lawa, kolomuyani ka lembe la 96 E.C., “siku la Hosi” a la ha li kule ni ku fika. (Mat.  25:14, 19; Luk. 19:12) Kambe hi ku ya hi Bibele, siku lolelo li sungule hi 1914 nkama lowu Yesu a nga sungula ku fuma tilweni. Ku sukela hi 1914, swiprofeto swi nga ka buku la Nhlawutelo leswi vulavulaka hi vanhu va Xikwembu swi sungule ku hetiseka. Phela swoswi hi hanya ka “siku la Hosi”.

⁴ Leswi hi hanyaka ka minkama leyi ya ku hlamalisa, hi fanele hi pimisa hi marito lama kumekaka ka Nhlawutelo 1:3 lama nge: “Wa tsaka lweyi a lerhaka wuprofeta leli hi rito la ku tlakuka, ni lava li twaka va gama va hanya hi swilo leswi nga tsaliwa ka lona hikusa nkama lowu nga vekiwa wu kusuhi.” Se, hi fanele hi ‘lerha hi rito la ku tlakuka’ leswaku hi ‘twa marito ya wuprofeta’ hi tlhela hi “hanya” hi wona. Kasi hi wani marito lawa hi faneleke hi hanya hi wona?

5. Makarta lawa Yesu a nga ma tsalela mabandla ya khale, ma li kombisisa ku yini lisima la ku tirhela Yehovha hi ndlela leyi yamukelekaka?

⁵ Marito ya ku sungula lama kumekaka ka buku la Nhlawutelo, ma kombisa swaku Yesu wa swi vona hinkwaswu leswi yentxekaka mabandleni. (Nhla. 1:12-16, 20; 2:1) Yesu a swi kombisile leswo ka makarta lawa a nga ma tsalela 7 wa mabandla lawa a ma kumeka Ásia Menor. Ka makarta wolawo, Yesu a vulavule hi leswi a swi ta pfuna Vakreste va mabandla wolawo swaku va kota ku tirhela Yehovha hi ndlela leyi yamukelekaka. Leswo swa tirha ni ka hina namuntlha. Se, hi djondza yini ka swona? Yesu Hosi ya hina wa swi vona leswi wunghanu la hina na Yehovha li nga tshamisa xiswona, wa hi vhikela, a vona hinkwaswu funtshi wa swi tiva leswi hi faneleke hi swi yentxa swaku hi tama hi tsakisa Yehovha. Se i yini leswi Yesu a nga swi tsalela mabandla ya khale, leswi na hina hi faneleke hi swi yingisa?

6. a) Marito ya Yesu lawa ma nga ka Nhlawutelo 2:3, 4, ma kombisa swaku Vakreste va bandla la Efeza a va fanele va yentxa yini? b) Hi djondza yini ka leswi Vakreste va le Efeza a va fanele va swi yentxa?

⁶ Lerha Nhlawutelo 2:3, 4. U nga tshiki lirhandzu leli a wu li na lona ku sunguleni. Leswi Yesu a nga swi byela Vakreste va Efeza, swi kombisa swaku va tame va tiyisela naswona a va tshikanga ku tirhela Yehovha hambileswi a va kumana ni swikarhatu swa swinyingi. Hambileswo, lirhandzu leli a va li na lona khale se a li sungule ku hola. Hi mhaka leyo, a va fanele va pfuxeta lirhandzu leli a va li na lona swaku Yehovha a ta yamukela ntirho lowu a va mu yentxela wona. Na hina namuntlha, hi fanele hi tiyisela na hi khumbuka swaku Yehovha a nga tsakisiwi hi leswi hi swi yentxaka ntsena kambe ni leswaku hi mhaka muni hi swi yentxa. Phela leswo i swa lisima hintamu ka yena hikusa a lava hi mu tirhela hileswi hi mu rhandzaka. — Swi. 16:2; Marku 12:29, 30.

7. a) Hilani swi nga kombisiwa hi kona ka Nhlawutelo 3:1-3, hi xini xikarhatu lexi Yesu a nga xi vona ka Vakreste va bandla la le Sarda? b) Hi fanele hi yentxa yini?

⁷ Lerha Nhlawutelo 3:1-3. Hi fanele hi tshama na hi pfule matihlo. Vakreste va bandla la Sarda a va ni xikarhatu xa ku hambana. Hambileswi va nga tirhela Yehovha hi ku hiseka ka nkama lowu nga hundza, se a va nga ha hiseki. Hi mhaka leyo, Yesu a va byele swaku a va fanele “va pfuka”. Se, hina hi djondza yini ka mhaka leyi? Yehovha a nge wu khohlwi ntirho wa hina. (Heb. 6:10) Naswona a hi fanelanga hi yetlela hi tihlo, hi tshemba leswi hi nga swi yentxela Yehovha ka nkama lowu nga hundza. Hambiloko hi nga ha swi koti ku yentxa swa swinyingi swoswi, hi fanele hi tama hi va ni swa ku swi yentxa “ka  ntirho wa Hosi”, hi tlhela hi tshama na hi pfule matihlo anze wugamu. —  1 Kor. 15:58; Mat. 24:13; Marku 13:33.

8. Hi djondza yini ka marito ma nga ka Nhlawutelo 3:15-17 lawa Yesu a nga ma byela Vakreste va bandla la Lawudikiya?

⁸ Lerha Nhlawutelo 3:15-17. Hi fanele hi tirhela Yehovha hi mbilu hinkwayu ni hi ku hiseka. Leswi Yesu a nga swi byela Vakreste va bandla la Lawudikiya, swi kombisa swaku a va ni xikarhatu xa ku hambana. Wugandzeli la vona a lo “kufumela”. Leswi a va nga na mhaka ni leswi a va mu gandzelisa xiswona Yehovha, Yesu a vule swaku ‘a va li vambuyangwana va tlhela va twelisa wusiwana’, a va fanele va tirhela Yehovha hi ku hiseka. (Nhla. 3:19) Hi djondza yini ka mhaka leyi? Loko ku ni leswi swi hi yentxaka hi nga ha hiseki swoswi, hi fanele hi khensa swilo swa swinene leswi Yehovha ni nhlengeletanu ya yena va hi yentxelaka swona. (Nhla. 3:18) Hi nga pfumeleli ku lava ku va ni male ya yinyingi swi hi yentxa hi nga ha hiseki ka ntirho wa Yehovha.

9. Hi ku ya hi leswi Yesu a nga swi byela Vakreste va le Pergamu ni Tiyatira, impsini leswi hi faneleke hi fambela kule na swona?

⁹ Hi fanele hi fambela kule ni vanhu lava nga djikela Xikwembu kumbe ku duka. Yesu a sole van’wana abandleni la Pergamu hileswi a va yentxa swaku ku nga vi ni ku twanana bandleni. (Nhla. 2:14-16) Kambe a khense Vakreste va le Tiyatira hileswi va kalaka va nga tipetanga ka “swilo swa ku yenta swa Sathana”, a tlhela a va byela swaku va ‘khoma swi tiya’ ka ntiyiso. (Nhla. 2:24-26) Vakreste va ku kala va nga tiyanga, lava nga pfumela ku xengiwa hi tidjondzo leti ta mavunhwa, a va fanele va tisola. Na hina namuntlha, hi fanele hi fambela kule ni vanhu lava djondzisaka tidjondzo ta ku kala ti nga fambisani ni ku rhandza ka Xikwembu. Vanhu lava nga djikela Xikwembu, va nga ha “vula swaku va tirhela Xikwembu” kambe “a swi tikombi hi mahanyelo ya vona”. (2 Tim. 3:5) Swi nge hi karhateli ku vona tidjondzo ta mavunhwa hi tlhela hi fambela kule na tona loko hi djondza Rito la Xikwembu siku ni siku. — 2 Tim. 3:14-17; Yuda 3, 4.

10. Impsini swin’wana hi nga swi djondzaka ka leswi Yesu a nga swi byela Vakreste va bandla la Pergamu ni la Tiyatira?

¹⁰ Hi fanele hi fambela kule ni nsila ya swa masangu. A ku ni xikarhatu xin’wana lexi Vakreste va Pergamu na Tiyatira a va kumana na xona. Yesu a sole Vakreste van’wana  ka mabandla lawa hileswi a va yentxa nsila ya swa masangu. (Nhla. 2:14, 20) Hi djondza yini ka mhaka leyi? A hi fanelanga hi pimisa swaku loko hi li ni malembe ya manyingi na hi tirhela Yehovha, kumbe na hi li ni mintirho ya yinyingi bandleni, Yehovha a ta swi ba hi makatla swidjoho swa hina loko hi nghenela nsila ya swa masangu. (1 Sam. 15:22; 1 Ped. 2:16) Yehovha a lava swaku hi tama hi yingisa minawu ya yena loko swi ta ka ku fambela kule ni nsila ya swa masangu, ku nga na mhaka leswi vanhu van’wana va swi vulaka. — Efe. 6:11-13.

11. Hi djondze yini ku ta fikela swoswi? (Vona kwadru leli nge: “ Leswi Hi Swi Djondzaka.”)

¹¹ Impsini leswi se hi nga swi djondza ku ta fikela swoswi? Hi djondze swaku hi fanele hi tiyiseka swaku wugandzeli la hina la yamukeleka ka Xikwembu kumbe ihim. Loko ku ni nchumu hi xi yentxaka, lexi nga yentxaka swaku wugandzeli la hina li nga yamukeleki ka Yehovha, hi fanele hi xi lunghisa hi xihantla. (Nhla. 2:5, 16; 3:3, 16) Hambileswo, impsini swin’wana leswi Yesu a nga swi byela mabandla lawa?

12. Hi nga djondza yini ka marito ya Yesu lawa a nga ma byela Vakreste va le Smirna ni le Filadelfiya? (Nhlawutelo 2:10)

¹² Swoswi a hi buleni hi leswi Yesu a nga swi byela mabandla ya Smirna na Filadelfiya. A byele Vakreste va mabandla lawa swaku va nga chavi loko va hluphiwa, hikusa Yehovha a a ta va hakela loko va tiyisela. (Lerha Nhlawutelo 2:10; 3:10) Swi hi djondzisa yini leswo hina namuntlha? Hi fanele hi tshama na hi swi tiva swaku hi ta hluphiwa hi tlhela hi tilulamisela ku tiyisela. (Mat. 24:9, 13; 2 Kor. 12:10) Hi mhaka muni swi li swa lisima ku yentxa leswo?

13-14. Marito ma nga ka Nhlawutelo ndzima 12 ma va khumbisa ku yini vanhu va Xikwembu?

¹³ Buku la Nhlawutelo li vula swaku vanhu va Xikwembu va ta hluphiwa “hi siku la Hosi” ku nga masiku lawa hi hanyaka ka wona swoswi. Ka ndzima 12, li vula swaku nkama Yesu a nga sungula ku fuma, ku ve ni nyimpi ya yikulu tilweni, Mikayele ku nga vito lin’wani la Yesu ni tintsumi ta yena va lwe na Sathana ni madimoni. (Nhla. 12:7, 8) Leswi valala va Xikwembu va nga hluliwa ka nyimpi yoleyo va tlhela va txukumetiwa lani misaveni, va yentxa swaku vanhu lava tshamaka lani misaveni va hlupheka. (Nhla. 12:9, 12) Se, leswi swi va khumbisa ku yini vanhu va Xikwembu?

¹⁴ Buku la Nhlawutelo li tlhela li hi byela leswi Sathana a nga yangulisa xiswona. Leswi a a nga ha pfumeleliwi ku nghena tilweni, a sungule ku hlupha vatotiwa lava nga sala lani misaveni, lava “va nga ni ntirho wa ku fakaza hi ta Yesu.” (Nhla. 12:17; 2 Kor. 5:20;  Efe. 6:19, 20) Wuprofeta leli li hetisekisa ku yini?

15. I vamani lava nyimelaka “timboni . . . timbirhi” lava ku vulavuliwaka hi vona ka Nhlawutelo 11, naswona ku yentxeke yini hi vona?

¹⁵ Sathana a yentxe swaku valala va Xikwembu va hlupha vamakwerhu lava nga totiwa lava a va rhangela ntirho wa ku chumayela. Hi ku ya hi buku la Nhlawutelo, vamakwerhu lava i “timboni . . . timbirhi” leti nga dlayiwa. b (Nhla. 11:3, 7-11) Hi 1918, 8 wa vamakwerhu lava a va rhangela ntirho wa ku chumayela, va khomiwile na va nga na nandzu, va pfaleliwa djele swaku va tshama nkama wa wunyingi. Hi vonelo la wumunhu a swi fana ni loko ntirho wa vamakwerhu lava va ku totiwa a wu yo ‘dlayiwa’.

16. Impsini swa ku hlamalisa swi nga yentxeka hi 1919, naswona impsini leswi Sathana a tamaka a swi yentxa ku sukela hi nkama wolowo?

¹⁶ Wuprofeta li nga ka Nhlawutelo ndzima 11, li kombise swaku ndzhaku ka nkamanyana “timboni timbirhi” leti a ti dlayiwile a ti ta pfuxiwa. Leswo swi yentxekile, hikusa hi lembe leli nga landzela ku humelele nchumu wa ku hlamalisa. Hi Março wa 1919, vamakwerhu lava nga totiwa va humesiwile adjele va tlhela va sula minandzu ya vona. Vamakwerhu lava, va vhele va tlhelela ka ntirho wa vona wa ku chumayela. Hambileswo, Sathana a nga tshikanga ku dumela vanhu va Xikwembu. Ku sukela hi nkama wolowo, Sathana a nga tshiki ku hlupha vanhu va Xikwembu. (Nhla. 12:15) ‘Hi yona mhaka leyi . . . hi faneleke hi tiyisela ni ku va ni lipfumelo.’ — Nhla. 13:10.

17. Vanhu va Xikwembu va pfunisiwe ku yini?

¹⁷ Nhlawutelo ndzima 12, yi kombisa swaku vanhu va Xikwembu a va ta pfuniwa na va nga swi nyimelanga. Leswo swi yentxekile loko tihosi ta “misava” ti pfune vanhu va Xikwembu. (Nhla. 12:16) Minkama yin’wana tihosi ta misava ti yentxa swilo leswi pfunaka vanhu va Xikwembu. Minkama ya yinyingi, vanhu va Yehovha va hlula matribunali naswona va pfumeleliwa ku mu tirhela na va chunsekile. Se va wu tirhisisa ku yini nchunseko lowu va nga nyikiwa wona? Va tirhisa nkama wolowo swaku va yentxa mintirho leyi Yehovha a nga va nyika yona. (1 Kor. 16:9) Hi wini ntirho lowu va nga nyikiwa wona?

18. Hi wini ntirho wa lisima lowu hi wu yentxaka ka masiku lawa ya wugamu?

 ¹⁸ Yesu a profete swaku vanhu va Xikwembu a va ta chumayela ‘mahungu ya ku tsakisa ya Mfumu [wa Xikwembu]’ amisaveni hinkwayu magamu ma nga se fika. (Mat. 24:14) Va yentxa ntirho lowu hi ku pfuniwa hi tintsumi, leti Bibele li vulaka swaku ti ni “mahungu ya ku tsakisa ya ku kala ma nga heli leswaku yi ma byela lava tshamaka misaveni, ku nga matiko hinkwawu, tinxaka hinkwatu, tirimi hinkwatu ni vanhu hinkwavu.” — Nhla. 14:6.

19. Hi lini rungula lin’wani leli vanhu va Yehovha va faneleke va li chumayela?

¹⁹ Vanhu va Xikwembu a vo chumayela mahungu ya ku tsakisa ntsena, va tlhela va pfunisa ka ntirho lowu tintsumi ti wu yentxaka, lowu nga ka Nhlawutelo tindzima 8-10. Tintsumi leto ti chumayela rungula la wuyavanyisi ka hinkwavu lava va kalaka va nga xi yingisi Xikwembu. Hi mhaka leyo, Timboni ta Yehovha ti chumayela rungula la wuyavanyisi leli fanaka ni “marhalana ni ndzilu,” leswi kombisaka leswi Yehovha a nga ta swi yentxa ka hinkwavu lava yentxaka swilo swa ku biha. (Nhla. 8:7, 13) Vanhu va fanele va swi tiva swaku magamu ma kusuhi leswaku va txintxa mahanyelo ya vona kuva va pona ka siku la ku kwata ka Xikwembu. (Sof. 2:2, 3) Mahungu lawa a ma tsakisi. Hi mhaka leyo, swi ta lava hi nga chavi swaku hi kota ku ma chumayela. Ka nhlomulu wa wukulu, rungula la wuyavanyisi leli hi nga ta li chumayela li ta ya li bava swinene. — Nhla. 16:21.

20. Hi ta bula hi yini ka tidjondzo timbirhi leti landzelaka?

²⁰ Hi fanele hi hanya hi ku ya hi ‘marito ya wuprofeta leli’, hikusa na hina hi kona ka ku hetiseka ka wona. (Nhla. 1:3) Kambe, hi nga swi kotisa ku yini ku tiyisela loko hi hluphiwa hi tlhela hi tama hi chumayela na hi nga chavi? Ka tidjondzo timbirhi leti landzelaka, hi ta djondza hi minchumu yimbirhi leyi nga hi pfunaka. Nchumu wa ku sungula, i ku tiva leswi buku la Nhlawutelo li swi vulaka hi vanhu lava kalaka va nga xi rhandzi Xikwembu. Nchumu wa wumbirhi, i minkateko leyi hi nga ta yi kuma loko hi tama hi tshembeka.