1. Hi swini swikarhatu leswi vanyingi va kumanaka na swona?

 SWI nga yendleka se u li na swona swilo leswi u lavaka ku swi yendla ka ntirho wa Yehovha, kambe ku nga va swaku swa ku karhatela ku swi fikelela swilo swoleswo? b Loko leswo swi ku yendlekela, a wu wexe. Hi xikombiso, Philip a a lava ku yampsisa swikhongelo swa yena ni ku tlhela a khongela makhambi ya manyingi, kambe a swi mu karhatela ku tinyika nkama wa ku yendla swoleswo. Erika a a lava ku hantla a fika ka ntlhanganu wa ntirho wa nsimu, kambe a a tshamela ku xwela. Kasi Tomáš a zame makhambi ya ku hambanahambana ku lerha Bibele hinkwalu, kambe yena a li: “A ni nga swi rhandzi ku lerha Bibele. Ni zame kanharhu, kambe makhambi hinkwawu a ni fika ka Levhitika ni gama ni nyima.”

2. Hi mhaka muni hi nga fanelanga hi godola loko hi nge se swi kota ku fikelela leswi hi swi lavaka?

² Loko ku li swaku u yendla minzamu ya ku fikelela nchumu wa ku karhi lowu u nga tivekisela swaku u wu yendla kambe u nga swi koti, u nga pimisi swaku a wu wa nchumu. Phela swi lava nkama ni minzamu leswaku u fikelela nchumu lexi u nga tivekisela xona hambiloko swi tikomba ingi a xi karhati. Naswona kuva u yendla minzamu ya leswaku u fikelela leswi u swi lavaka swi kombisa leswaku u li nyika lisima wunghanu leli u nga na lona na Yehovha, naswona u lava ku yendla hinkwaswu leswi u nga swi kotaka leswaku u mu tsakisa. Se tiva leswaku Yehovha na yena a yi nyika lisima minzamu leyi u yi yendlaka, naswona a nga nyimeli leswaku u yendla swilo leswi a swi tivaka swaku a wu nge swi koti. (Pis. 103:14; Miki. 6:8) Se nkama lowu u tivekiselaka nchumu wa ku karhi lowu u lavaka ku wu fikelela, u nga langi nchumu lexi u swi tivaka swaku a wu nga ta swi kota ku xi fikelela.  Kambe loko se u langile nchumu wa kona, u nga yendla yini swaku u wu fikelela? A hi swi voneni.

3. Hi mhaka muni swi li swa lisima kuva hi ni ku navela?

³ I swa lisima kuva hi swi navela hintamu ku fikelela leswi hi swi lavaka. Loko u ni ku navela kakukulu ka ku fikelela leswi u swi lavaka, u ta tirha yi nga chayi swaku u za u swi fikelela. Ku navela loku hi nga na kona ka ku fikelela leswi hi swi lavaka ku nga fanisiwa ni moya lowu baka maseyila ya boti, wu yendla swaku boti li famba li za li ya fika lomu li yaka kona. Loko moya wu tama wu ba, wu ta yendla leswaku boti li fika lomu li yaka kona. Naswona loko moya wolowo wu tama wu ba hi matimba, a boti lolelo li nga hantla li fika. Se swa fana, loko na hina hi ni ku navela kakukulu, swi ta hi vevukela ku fikelela leswi hi swi lavaka. Makwerhu David wa El Salvador a li: “Loko u ni ku navela, u yendla hinkwaswu leswi u nga swi kotaka swaku u za u fikelela leswi u swi lavaka. A wu pfumeleli nchumu swaku xi ku tshikisa ku yendla leswi u nga tivekisela swona.” Se u nga yendla yini swaku u va ni ku navela koloko ka ku fikelela leswi u swi lavaka?

4. I mpsini leswi hi nga swi kombelaka ka swikhongelo swa hina? (Vafilipiya 2:13) (Vona mufoto.)

⁴ Khongela ka Yehovha u kombela swaku a ku yendla u navela ku fikelela leswi u swi lavaka. Yehovha a ta xi hlamula xikhongelo xa wena hi ku ku nyika moya wa yena wa ku kwetsima. (Lerha Vafilipiya 2:13.) Minkama yin’wani swi nga ha yendleka hi ni swilo leswi hi lavaka ku swi fikelela hileswi hi swi tivaka swaku i swinene, kambe hi godolanyana ku swi fikelela. Hi swona leswi nga yendlekela makwerhu wa xisati wa Uganda lweyi a vitaniwaka Norina. Yena a a tivekisele ku va ni xidjondzo xa Bibele, kambe a a nga yendli nchumu swaku a fikelela leswi a a tivekisele swona hileswi a a pimisa swaku a nga djondzisi kahle. I mpsini leswi nga mu pfuna? Yena a li: “Ni sungule ku khongela ka Yehovha siku ni siku ni kombela swaku a ni yendla ni navela ku fambisa swidjondzo swa Bibele. Ni yendle leswi ni nga swi kota hi ku yampsisa madjondziselo ya mina. Loko se ku hundze tiwhetinyana ni sungule ku vona swaku se a ni swi navela ku fambisa swidjondzo swa Bibele, naswona ka lembe loleliyani ni sungule ku fambisa swidjondzo swimbirhi swa Bibele.”

5. Leswaku hi navela ku fikelela leswi hi swi lavaka hi fanele hi pimisa hi yini?

⁵ Pimisa hi leswi Yehovha se a nga ku yendlela swona. (Pis. 143:5) Mupostolo Pawulo a a pimisa hi timpsalu tatikulu leti Yehovha a a mu komba tona, funtshi leswo a swi mu yendla a mu tirhela hilani a nga kotaka hi kona. (1 Kor. 15:9, 10; 1 Tim. 1:12-14) Swa fana na wena. Loko u pimisa hileswi Yehovha se a nga ku yendlela swona, u ta lwa hi matimba swaku u fikelela leswi u swi lavaka. (Pis. 116:12) Vona leswi nga pfuna makwerhu wa xisati lweyi a tshamaka Honduras swaku a fikelela ku va mupfuli wa ndlela wa nkama hinkwawu. Yena a li: “A ni pimisa hi leswi Yehovha a ni rhandzisaka xiswona. A ni pfunile swaku ni va xikarhi ka ndjangu wa yena. Wa ni hlayisa a tlhela a ni vhikela. Ku pimisa hi swilo hinkwaswu leswi, swi yendle swaku ni mu rhandza swinene swi tlhela swi ni pfuna kuva  ni swi navela hintamu ku fikelela leswi a ni swi lava.”

6. Hi wini nchumu wun’wani lowu nga ta hi pfuna ku navela ku fikelela leswi hi swi lavaka?

⁶ Pimisa hi leswi u nga ta pfuneka hi swona loko u fikelela leswi u swi lavaka. Pimisa hi leswi nga yendlekela Erika lweyi se hi nga bula hi yena leswaku a fikelela leswi a a swi lava, ku nga ku hantla a fika ka mintlhanganu ya nsimu. Yena a li: “Ni tsumbule swaku loko ni xwela ka mintlhanganu ya nsimu a ni luza minchumu ya yinyingi, kambe loko ni fika hi nkama, a ni xoweta vamakwerhu ni heta nkama na vona, naswona a ku hantla ni fika ka ntlhanganu wa ntirho wa nsimu a swi ni pfuna ku twa tipontu leti a ti ta ni pfuna loko ni li nsin’wini.” Erika a pimise hi leswi a a ta pfuneka hi swona loko a nga xweli. Leswo swi mu pfunile swaku a fikelela leswi a a swi lava. Se wena ke, u pimisile hi leswi u nga pfunekaka hi swona loko wo fikelela leswi u swi lavaka? Hi xikombiso, loko ku li swaku u lava ku yampsisa nchumu ka ku lerha ka wena ka Bibele kumbe ka swikhongelo swa wena, pimisa hi swaku ku yendla leswo swi ta ku pfunisa ku yini leswaku u tiyisa wunghanu la wena na Yehovha. (Pis. 145:18, 19) Loko ku li swaku u lava ku yampsisa nchumu ka wumunhu la wena, pimisa hi swaku nchumu wolowo wu ta ku pfunisa ku yini kuva u hanyisana kahle ni vanhu van’wani. (Kol. 3:14) Swi ngo yini u hamba lixta la minchumu yayinene leyi nga ta yendleka loko wo tshuka u swi fikelela leswi u swi lavaka? Kutani loko nkama wu ya wu famba, tshamela ku txuvuka lixta la wena. Tomáš lweyi se hi nga vulavula hi yena hala ndzhaku na yena a li: “Loko ni pimisa hi hinkwaswu leswi faneleke swi ni yendla ni lava ku fikelela nchumu, ni ya ni swi lava hintamu funtshi a ku na nchumu lexi ni tshikisaka.”

7. I mpsini leswi nga pfuna Julio ni nsati wa yena ku fikelela leswi a va swi lava?

⁷ Tlanga ni vanhu lava nga ta ku nyika ntamu swaku u fikelela leswi u swi lavaka. (Swi. 13:20) Vona leswi nga pfuna Julio ni nsati wa yena leswaku va fikelela leswi a va swi lava, ku nga ku yengetela ntirho wa vona wa nsimu. Julio a li: “Hi ve ni vanghanu lava a hi bula na vona hi leswi a hi lava ku swi fikelela naswona a va hi seketela. Vanyingi va vona se a va swi fikelelile swilo leswi hina a hi swi lava naswona va hi pfunile ku tiva swaku i mpsini leswi hi nga swi yendlaka swaku hi kota ku fikelela leswi a hi swi lava. Handle ka leswo, minkama yin’wani a va pfana va hi vutisa swaku swi li yini, ha swi kota ku fikelela leswi hi nga tivekisela swona ke, va tlhela va hi tiyisa swaku hi nga godoli.”

8. I mpsini swi nga ha yendlekaka loko hi nyimela ku va ni ntamu leswaku hi fikelela leswi hi swi lavaka? (Vona mufoto.)

⁸ A masiku a ma fani. Masiku man’wani hi pfuka na hi ni ntamu wa ku yendla leswi hi nga swi kotaka swaku hi fikelela leswi hi swi lavaka, kambe masiku man’wani ha godolanyana. Se leswo swi lava ku hlaya swaku ka masiku lawa hi godolakanyana, a hi nga ta swi kota ku swi fikelela leswi hi swi lavaka? Ihim. A hi tlheli hi bula hi xikombiso lexiyani xa boti leli fambisiwaka hi moya. Masiku man’wani moya wa ba, kambe ku ni masiku lawa moya wu kalaka wu nga bi hintamu kumbe ni ku ba wu nga bi. Kambe swi lava ku hlaya swaku hi siku lelo boti na lona li ta nyima a li nga ta famba? Ihim, li  ta famba. Maboti man’wani ma ni motori kumbe minchumu leyi tirhisiwaka swaku boti li fambisiwa li za li ya fika lomu li yaka kona. Se ku fana ni boti, leli hambiloko ku nga na moya li swi kotaka ku famba li za li ya fika lomu li yaka kona, na hina hambiloko masiku man’wani hi godola ku yendla leswi hi nga swi kotaka swaku hi fikelela leswi hi swi lavaka, hi nga swi kota ku swi fikelela. Leswi lavekaka kuva hi swi yendla i ku tama hi zama, hi yendla leswi hi nga swi kotaka hambileswi swi kalaka swi nga vevuki. Swoswi a hi voneni swaku swa siza kumbe a swi sizi ku tama hi tikarhata swaku hi fikelela leswi hi swi lavaka.

9. Indjhe swa siza ku yendla minzamu ya ku fikelela nchumu lowu hi nga tivekisela wona hambiloko hi godola? Tlhamusela.

⁹ Yehovha a nga lavi swaku hi yendla nchumu hi ku sindzisiwa, kambe a lava swaku hi yendla hinkwaswu na hi tsakile. (Pis. 100:2; 2 Kor. 9:7) Indjhe swa siza ku yendla minzamu ya ku fikelela nchumu lowu hi nga tivekisela wona hambiloko hi godola? Pimisa hi xikombiso xa mupostolo Pawulo. Yena a vule leswi: “Ni ba miri wa mina ni wu yentxa xikarawa.” (1 Kor. 9:25-27) Pawulo a a tisindzisa ku yendla swilo leswi nga swinene hambiloko leswi Yehovha a a lava swaku a swi yendla a ku nga li swona leswi yena a a swi lava. Se Yehovha a a wu vonisa ku yini ntirho lowu Pawulo a a wu yendla? A a wu tsakela, naswona a mu katekisile swinene. — 2 Tim. 4:7, 8.

10. Hi mhaka muni hi fanele hi yendla minzamu ya ku fikelela leswi hi swi lavaka hambiloko hi godolanyana ku swi fikelela?

¹⁰ Yehovha wa tsaka loko a hi vona na hi yendla minzamu ya ku fikelela leswi hi nga tivekisela swona ka ntirho wa yena, hambiloko hi godola. Yena wa tsaka hikusa wa swi vona swaku minzamu leyi hi yi yendlaka, hi yi yendla hileswi hi mu rhandzaka, ku nga li hileswi hi rhandzaka ntirho lowu hi wu yendlaka. Se ku fana ni leswi a nga katekisa Pawulo, Yehovha a ta yi katekisa minzamu ya hina. (Pis. 126:5) Se loko hi vona swaku Yehovha wa yi katekisa minzamu ya hina, leswo swi ta yendla leswaku hi ya hi navela ku wu yendla ntirho wolowo. Makwerhu mun’wani wa xisati wa le Polônia lweyi a vitaniwaka Lucyna a li: “Minkama yin’wani a ni swi lavi ku ya nsin’wini ngopfungopfu loko ni karhalile, kambe na swi vona swaku Yehovha wa ni katekisa hikusa ni vuya na ni tsakile hi nsin’wini.” Swoswi a hi voneni swaku hi nga yendla yini loko hi nga swi naveli ku yendla leswi hi nga tivekisela swona.

11. Yehovha a nga hi pfunisa ku yini swaku hi fikelela leswi hi nga tivekisela swona?

¹¹ Khongela u kombela Yehovha a ku nyika moya wa ku kwetsima. Moya wa ku kwetsima wu nga hi pfuna swaku hi va ni wumunhu leli nga ta hi pfuna kuva hi tirha leswaku hi fikelela leswi hi nga tivekisela swona, ngopfungopfu loko ku li nchumu xa ku karhata kumbe loko hi godola ku xi yendla. Hi mhaka leyo, khongela ka Yehovha u mu kombela swaku a ku nyika moya wa ku kwetsima. (Luk. 11:13; Gal. 5:22, 23) David lweyi se hi nga vulavula hi yena a a nga swi koti ku va ni djondzo ya yena yexe minkama hinkwayu. Kambe a vula leswaku ku khongela swi mu pfunile. Yena a li: “A ni khongela ka Yehovha ni kombela leswaku a ni pfuna kuva ni tikhoma. Hi mhaka leyo, ni swi kotile ku tiyendlela programa la masiku lawa a ni ta djondza hi wona ni tlhela ni li landzelela.”

12. A buku la Eklesiasta 11:4 li yelana kwini ni ku tivekela swilo leswi hi lavaka ku swi fikelela?

¹² U nga nyimeli swaku swilo swi va kahle. Ka misava leyi hi hanyaka ka yona a hi wutlharhi kuva hi nyimela swaku swilo hinkwaswu swi va kahle leswaku hi fikelela leswi hi swi lavaka, hikusa loko hi yendla leswo swi nga yendleka ni siku ni lin’we hi nga swi fikeleli leswi hi swi lavaka. (Lerha Eklesiasta 11:4.) Makwerhu mun’wani lweyi a vitaniwaka Dayniel a li: “A xi kona xiyimu lexi hi nga vulaka swaku lexi hi xona xi nga kahle, kambe hina loko hi nga nyimi, hi yendla xan’wanchumu hi hina hi hoxe hi yendlaka swaku xiyimu xi va kahle.” Makwerhu mun’wani lweyi a vitaniwaka Paulo wa Uganda, a tlhamusela swaku hi mhaka muni hi nga fanelanga hi tshamela ku diyara minchumu. A li: “Loko hi  sungula ku yendla nchumu hambiloko hi kumana ni swikarhatu, hi va hi pfulela ndlela Yehovha ya leswaku a hi katekisa.” — Mal. 3:10.

13. Hi mhaka muni swi li kahle ku fikelela leswi hi nga tivekisela swona hi kutsongokutsongo?

¹³ Sungula hi kutsongokutsongo. Swi nga yendleka u titwa u hele matimba swaku u fikelela leswi u nga tivekisela swona hikusa swi tikomba ingi i swikulu hintamu. Loko swi tshamise xileswo, u swi vonisa ku yini ku swi yava u swi yendla hi switsongoswitsongo? Kumbe loko u lava ku yampsisa wumunhu la ku karhi, u swi vonisa ku yini ku zama ku li kombisa siku ni siku ka minchumu yayitsongo? Kumbe loko u lava ku lerha Bibele hinkwalu, swi ngo yini u heta maminutunyana na u li lerha siku ni siku? Tomáš lweyi se hi nga vulavula hi yena ku sunguleni ka nhlokomhaka leyi, a a nga swi koti ku lerha Bibele hinkwalu hi lembe. Yena a li: “Ni tsumbule swaku a ni zama ku lerha minchumu ya yinyingi hi nkama wun’we. Ni tlhele ni zama, kambe ka khambi leli a ni lerha tindzimana tatitsongo hi siku ni tlhela ni pimisa hi leswi a ni swi lerha. Se leswo swi yendle leswaku ni swi tsakela ku lerha Bibele.” Tomáš a swi tsakelile ku lerha Bibele. Leswo swi mu pfunile leswaku a ya a yengetela nkama lowu a a wu heta na a li lerha. Hi ku famba ka nkama, a swi kotile ku heta Bibele hinkwalu. c

14. Hi swini swikarhatu leswi hi nga ha kumanaka na swona?

¹⁴ Hambiloko hi ni matimba kumbe hi swi yendla kahle swilo, swi nga yendleka hi kumana ni swikarhatu leswi nga hi sivelaka ku fikelela leswi hi swi lavaka. Hi xikombiso, ku nga ha tshuka ku humelela minchumu leyi hi kalaka hi nga yi nyimelanga leyi nga ha hi dlelaka nkama lowu lavekaka swaku hi fikelela leswi hi swi lavaka. (Ekl. 9:11) Kumbexana ku nga ha tshuka ku humelela xikarhatu lexi nga ha hi yendlaka hi godola kumbe xi hi heta matimba. (Swi. 24:10) Funtshi leswi hi kalaka hi nga hetisekanga, hi nga ha yendla swihoxo leswi nga yendlaka swaku swi karhata kuva hi fikelela leswi hi swi lavaka. (Rom. 7:23) Kumbe hi nga ha va hi karhalile. (Mat. 26:43) Se i yini lexi nga hi pfunaka ku  fikelela leswi hi swi lavaka loko hi kumana ni swikarhatu kumbe li nga hi xelanga kahle?

15. Hi mhaka muni hi nga fanelanga hi godola loko hi tsandzeka ku fikelela leswi a hi swi lava? (Tipisalema 145:14)

¹⁵ U nga pfumeleli swikarhatu swi ku heta ntamu swaku u nga fikeleli leswi u nga tivekisela swona. Bibele li hi byela swaku hambi hi kumana ni swikarhatu makhambi ya manyingi, hi nga swi kota ku tama hi zama naswona Yehovha Xikwembu a ta hi pfuna. (Lerha Tipisalema 145:14.) Philip lweyi se hi nga vulavula hi yena a li: “Leswaku ni tiva swaku swilo swi ni fambela kahle, a ni pimisi hi makhambi lawa ni kalaka ni nga swi kotanga ku fikelela leswi a ni tivekisele swona, kambe ni pimisa hi makhambi lawa ni nga zama ku fikelela leswi a ni tivekisele swona. Se David lweyi na yena se hi nga vulavula hi yena a li: “A ni voni swikarhatu tanihi swilo leswi nga ni sivelaka ku fikelela leswi ni nga tivekisela swona, kambe ni swi vona na ku li ndlela ya ku komba Yehovha swaku ni mu rhandza hintamu.” Loko hi tama hi yendla minzamu hambiloko hi kumana ni swikarhatu, hi komba Yehovha swaku ha swi lava ku mu tsakisa, naswona Yehovha a tsaka swinene loko a hi vona hi yendla minzamu ya ku fikelela leswi hi nga tivekisela swona.

16. A swikarhatu leswi hi kumanaka na swona swi nga ha kombisa yini?

¹⁶ Djondza ka swikarhatu leswi u kumanaka na swona. Pimisa hi swaku i ntxini lexi nga yendla swaku u za u kumana ni xikarhatu xolexo. Ku nga va swaku swi kona u nga swi yendlaka swaku u nga ha kumani na xona xikarhatu xolexo? (Swi. 27:12) Minkama yin’wani xikarhatu xi nga ha kombisa swaku leswi u lavaka ku swi fikelela a swi ka matimba ya wena. Loko ku li swona leswi ku yendlekelaka, nyimanyana u pimisa hi leswi u lavaka ku swi fikelela, u gama u tivutisa swaku indjhe hikakunene mina ni ta swi kota ku swi fikelela leswi? d Loko u nga swi koti ku fikelela leswi u swi lavaka, hileswi swi kalaka swi nga li ka matimba ya wena, u nga karhateki! Wa ha li wa lisima ka Yehovha. — 2 Kor. 8:12.

17. Hi mhaka muni swi li swinene ku pimisa hi swilo leswi se u nga swi kota ku swi fikelela?

¹⁷ Pimisa hi swilo leswi se u nga swi fikelela. Bibele li li: “Xikwembu xi lulamile naswona a xi nge wu khohlwi ntirho wa n’wina.” (Heb. 6:10) Yendla leswi fanaka hi ku kala u nga khohlwi swilo leswi se u nga swi kota ku swi yendla, swa ku fana ni ku va munghanu wa Yehovha, ku vulavula hi yena ka van’wani kumbe ku tsakamisiwa. Ku fana ni leswi u nga swi kota ku fikelela leswo, u ta swi kota ku fikelela swin’wani leswi u nga tivekisela swona. — Filp. 3:16.

18. U nga yendla yini nkama u zamaka ku fikelela leswi u swi lavaka? (Vona mufoto.)

¹⁸ Hi ku pfuniwa hi Yehovha, u nga swi kota ku fikelela leswi u swi lavaka, ku fana ni munhu lweyi a yendzaka hi boti lweyi a tsakaka loko a fika lomu a yaka kona. Kambe nkama lowu u lwelaka ku fikelela leswi u swi lavaka, tikhorisi hi liyendzo la wena, hi marito man’wani, tsaka nkama lowu u vonaka ndlela leyi Yehovha a ku pfunaka hi yona ni ndlela leyi a yi katekisaka hi yona minzamu ya wena. (2 Kor. 4:7) Loko u nga godoli, u ta kuma minkateko ya yinyingi hintamu. — Gal. 6:9.