1. Yehovha a lava swaku hi yendla yini? (Vona mufoto.)

 LOKO u lava ku kongomisiwa kumbe ku tiyisiwa u kombela mani swaku a ku pfuna? Ha tiyiseka swaku u khongela ka Yehovha u kombela swaku a ku pfuna naswona hi swona leswi Yena a swi lavaka, hikusa Bibele li li: “Khongelani minkama hinkwayu.” (1 Tes. 5:17) Phela hi chunsekile ku khongela ka Yehovha hi kombela swaku a hi kongomisa ka swiyenge hinkwaswu swa wutomi la hina. (Swi. 3:5, 6) Leswi Yehovha a rhandzaka ku nyika, a vula swaku hi nga khongela ka yena makhambi lawa hi ma lavaka.

2. Hi ta djondza hi yini ka nhlokomhaka leyi?

² Xikhongelo i nyiko ya lisima hintamu leyi taka hi ka Yehovha. Kambe leswi siku ni siku hi hlongolisanaka ni nkama swi nga ha hi karhatela ku tinyika nkama wa ku khongela. Minkama yin’wani hi nga ha titwa ingi swikhongelo swa hina swi lava ku yampsisiwa. Kambe xa ku tsakisa hileswaku Bibele li nga hi pfuna ka mhaka leyi. Hi mhaka leyo, ka djondzo leyi hi ta vona swaku xikombiso xa Yesu xi nga hi pfunisa ku yini swaku hi tinyika nkama wa ku khongela, hi tlhela hi vona 5 wa swilo swa lisima leswi hi nga khongelaka hi swona, leswi nga hi pfunaka ku yampsisa swikhongelo swa hina.

3. I mpsini leswi Yesu a a swi tiva hi swikhongelo?

³ Yesu a a swi tiva swaku swikhongelo i swa lisima hintamu ka Yehovha. Na a nge se ta lani misaveni, a mu vonile Papayi wa yena na a hlamula swikhongelo swa vavanuna ni vavasati va ku tshembeka va lani misaveni. Hi xikombiso, a a na Yehovha nkama Yena a nga hlamula swikhongelo swa Ana, swa Davhida, swa Eliya ni swa vanhu van’wani. (1 Sam. 1:10, 11, 20; 1 Tiho. 19:4-6; Pis. 32:5) Se swa twala kuve Yesu a djondzise vadjondzisiwa va yena leswaku va khongela minkama hinkwayu  na va tiyiseka swaku Yehovha a ta swi hlamula swikhongelo swa vona! — Mat. 7:7-11.

4. Hi xini xikombiso lexi Yesu a nga hi siyela xona?

⁴ Yesu a hi siyele xikombiso xaxinene ka swikhongelo leswi a nga swi yendla. Nkama na a li lani misaveni a a khongela nkama ni nkama. Leswi vanhu a va tshamela ku mu talela a tlhela a ni swilo swa swinyingi swa ku swi yendla, a swi lava a yendla hi ku tivekela nkama lowu a a ta khongela hi wona. (Marku 6:31, 45, 46) A a pfuka ni mpundzu a ya tshama ka ndhawu ya yena yexe swaku a khongela. (Marku 1:35) Khambi lin’wani a khongele wusiku hinkwalu na a nge se yendla xiboho xa lisima. (Luk. 6:12, 13) Hi wusiku lin’wani na a ku mundzuku ka kona a ta dlayiwa, Yesu a khongele hi ku phindhaphindha hikusa a a swi tiva swaku a ta kumana ni xikarhatu xaxikulu hintamu ka ntirho wa yena wa lani misaveni. — Mat. 26:39, 42, 44.

5. Xikombiso xa Yesu xi hi djondzisa yini hi xikhongelo?

⁵ A xikombiso xa Yesu xi hi djondzisa swaku hi fanele hi tivekela nkama wa leswaku hi khongela hambiloko hi ni swilo swa swinyingi swa ku swi yendla. Loko hi swi vona hi nga ha hantla hi pfuka kumbe hi hlwelanyana ku yetlela leswaku hi khongela. Loko hi yendla leswo, hi ta va hi kombisa swaku hi yi nyika lisima nyiko leyi ya ku khongela. Hi xikombiso, makwerhu Lynne a vula swaku a tsake hintamu nkama a nga djondza mayelana ni xikhongelo. Yena a li: “A nkama ni nga tiva swaku ni nga khuluma na Yehovha nkama wun’wani ni wun’wani lowu ni wu lavaka, ni sungule ku vona Yehovha tanihi munghanu wa mina naswona leswo swi yendle leswaku ni yampsisa swikhongelo swa mina.” Ha tiyiseka swaku vanyingi va hina va titwa hi ndlela leyi fanaka! Se swoswi hi ta vona 5 wa swilo leswi hi nga swi patsaka ka swikhongelo swa hina.

6. Hi ku ya hi Nhlawutelo 4:10, 11, i mpsini leswi Yehovha swi mu fanelaka?

⁶ Dzunisa Yehovha. Yohani a kombiwe xivono xa ku hlamalisa swinene lani a nga vona 24 wa madoda atilweni na ma gandzela Yehovha. Wona a ma dzunisa Xikwembu na ma vula swaku swa xi fanela “ku dzunisiwa, ku hloniphiwa ni ku va ni matimba.” (Lerha Nhlawutelo 4:10, 11.) A tintsumi na tona ti ni swivangelo swinyingi swa ku dzunisa ni ku hlonipha Yehovha. Tona ti le tilweni naswona ti mu tiva kahle Yehovha. Ta swi kota ku vona swaku yena i munhu wa ndjhani hi leswi a  nga swi yendla, naswona loko ti swi vona leswi a swi yendlaka, ti susumeteleka ku mu dzunisa. — Yobo 38:4-7.

7. I mpsini swi hi yendlaka hi dzunisa Yehovha?

⁷ Na hina nkama hi khongelaka hi lava ku dzunisa Yehovha hi tlhela hi mu byela swaku hi mhaka muni hi mu hlonipha ni swaku hi mhaka muni a hi hlamalisa. Nkama u lerhaka Bibele, zama ku vona leswi swi ku tsakisaka hi Yehovha. (Yobo 37:23; Rom. 11:33) Loko se u yendle leswo, gama u khongela u mu byela swaku hi mhaka muni swilo swoleswo swi ku tsakisa hi yena. Swin’wani leswi hi nga swi yendlaka swaku hi dzunisa Yehovha, i ku mu khensa hi hinkwaswu leswi a hi yendlelaka swona ni leswi a yendlelaka vamakwerhu. Phela minkama hinkwayu Yehovha wa hi hlayisa a tlhela a hi vhikela. — 1 Sam. 1:27; 2:1, 2.

8. Hi swini swivangelo leswi hi nga na swona swa ku khensa Yehovha? (1 Vatesalonika 5:18)

⁸ Khensa Yehovha. Hi ni swivangelo swinyingi swa ku khensa Yehovha ka swikhongelo swa hina. (Lerha 1 Vatesalonika 5:18.) Hi nga khensa Yehovha hi swilo hinkwaswu leswi hi nga na swona hikusa swilo hinkwaswu swaswinene leswi hi nga na swona swi ta hi ka yena. (Yak. 1:17) Hi xikombiso, hi nga ha khensa hi swilo hinkwaswu swa ku saseka leswi Yehovha a nga hi yendlela swona. Hi nga ha mu byela swaku hi khensa wutomi, hi khensa ndjangu, vanghanu ni tshembo lowu a nga hi nyika wona wa nkama lowu taka. Na hi nga khohlwi ku khensa lunghelo leli a nga hi nyika lona la ku va vanghanu va yena.

9. Hi mhaka muni hi nga fanelanga hi khohlwa ku khensa Yehovha nkama hi khongelaka?

⁹ Swi nga yendleka swi lava minzamu yayikulu swaku hi kota ku pimisa hi swilo leswi hi yendlaka hi khensa Yehovha, hikusa vanhu va ku tala namuntlha a va ha swi koti ku khensa. Va heta nkama wa wunyingi na va zametela ku kuma swilo leswi va swi lavaka, kambe a va tinyiki nkama wa ku nyima va khensa hi leswi se va nga na swona. Se loko na hina ho sungula ku ngheniwa hi moya wolowo, hi nga ha tikuma se swikhongelo swa hina swi yo tala hi lixta la swikombelo ntsena. Hi mhaka leyo, i swa lisima kuva hi nyima hi pimisa hi swilo hinkwaswu leswi Yehovha a nga hi yendlela swona hi tlhela hi mu khensa nkama hi khongelaka. — Luk. 6:45.

10. Ku khensa swi mu pfunise ku yini makwerhu Kyung-sook nkama a nga kumana ni xiyimu xa ku karhata? (Vona mufoto.)

¹⁰ Ku khensa swi nga hi pfuna ku hlula swikarhatu. Vona xikombiso xa makwerhu Kyung-sook ka Murindzi wa 15 ka Janeiro wa 2015 (hi Xitsonga). Vadotori va mu byele leswaku a a ni cancro la maphaphu naswona a li li ka xiyimu xa ku karhata. Yena a li: “Ku tiva swaku ni ni mavabyi lawa swi ni vavise swinene, swi ni chavisa swi tlhela swi ni karhata.” I mpsini leswi nga pfuna makwerhu ka xiyimu lexi? Yena a vule swaku wusiku lin’wani ni lin’wani na a nge se yetlela, a a ya ka vharanda la le henhla a ya khongela hi rito la ku tlakuka a khensa Yehovha hi 5 wa swilo leswi nga mu yendlekela ka  siku lolelo. Ndzhaku ka xikhongelo a a titwa a rhulile a tlhela a lava ku byela Yehovha ndlela leyi a a mu rhandza hi yona. Kyung-sook a twisise swaku Yehovha wa va pfuna lava va mu tirhelaka, ngopfungopfu loko va kumana ni swikarhatu; ni leswaku minkateko leyi Yehovha a hi nyikaka yona yi tlula swikarhatu leswi hi kumanaka na swona. Ku fana na yena, na hina hi ni swilo swa swinyingi swa ku khensa Yehovha hambiloko hi kumana ni xikarhatu ka nkama wolowo. Ku khongela ka Yehovha hi mu byela ndlela leyi hi mu khensaka hi yona swi nga hi pfuna ku tiyisela ni ku kala hi nga heleliwi hi ntsaku.

11. Hi mhaka muni swi lave vadjondzisiwa va Yesu va nga chavi nkama Yesu a nga tlhela a ya tilweni?

¹¹ Kombela Yehovha a ku pfuna swaku u nga chavi ku chumayela. Na ka ha sale katsongo swaku Yesu a tlhela a ya tilweni, a khumbukise vadjondzisiwa va yena swaku a va fanele va chumayela hi yena “aJerusalema ni le tikweni hinkwalu la Yudiya ni Samariya, ku ya fika ni le ka magamu ya misava.” (Mint. 1:8; Luk. 24:46-48) Hi ku famba ka nkama varhangeli va wukhongeli la Xiyuda va pfalele mupostolo Pedru na Yohani va tlhela va va yisa Tribunali. Loko va fikile Tribunali va fike va va tsimbisa ku chumayela va tlhela va va chavisela. (Mint. 4:18, 21) Se mupostolo Pedru na Yohani va yendle yini ka xiyimu lexi?

12. Hi ku ya hi Mintirho 4:29, 31, vadjondzisiwa va Yesu va yendle yini?

¹² Nkama varhangeli va wukhongeli va nga chavisela Pedru na Yohani, vona va te: “Loko mi pimisa swaku Xikwembu xi swi vona swi lulamile swaku hi yingisa n’wina ku tlula ku yingisa xona, swi li n’wina leswo. Kambe hina a hi nge tshiki ku vulavula hi leswi hi nga swi vona ni leswi hi nga swi twa.” (Mint. 4:19, 20) Nkama Pedru na Yohani va nga chunsiwa, vadjondzisiwa va Yesu va khongelile ka Yehovha va kombela swaku a va pfuna ku tama va yendla ku rhandza ka yena. Vona va te: “Tiyisa vatirhi va wena swaku va tama va vulavula hi rito la wena na va nga chavi nchumu.” Naswona Yehovha a xi hlamulile xikhongelo xolexo. — Lerha Mintirho 4:29, 31.

13. I mpsini hi nga swi djondzaka ka xikombiso xa makwerhu Jin-hyuk?

¹³ Hi nga tekelela xikombiso xa vapostolo hi ku tama hi chumayela hambiloko mimfumu yi hi tsimbisa. Hi swona leswi makwerhu Jin-hyuk a nga swi yendla. Yena a pfaleliwe djele hileswi a a nga lavi ku tipeta ka politika. Nkama na a li seniyani djele va mu nyike ntirho wa ku pfuna vanhu lava a va petiwe ka djele leli ku pfaleliwaka munhu mun’we ntsena. A a nga fanelanga a bula na vona hi minchumu yin’wani loko va nga mu kombelanga nchumu. A a tsimbisiwe hambi hi ku vulavula na vona hi Bibele. Se a game a khongela ka Yehovha a mu kombela swaku a mu nyika wutlharhi a tlhela a mu pfuna swaku a nga chavi ku chumayela hilani a nga kotaka hi kona. (Mint. 5:29) Makwerhu Jin-hyuk a vula leswi: “Yehovha a swi hlamulile swikhongelo swa mina, a ni nyike wutlharhi a tlhela a ni pfuna swaku ni nga chavi. Ni sungule ku fambisa swidjondzo hi 5 minutu anyanghweni wa djele lin’wani ni lin’wani. Se ni wusiku a ni tsala makarta lawa a ni ta gama ni ya ma nyika lava nga djele hi siku leli landzelaka.” Ku fana na makwerhu Jin-hyuk na hina hi nga khongela ka Yehovha hi kombela swaku a hi nyika wutlharhi a tlhela a hi pfuna swaku hi nga chavi ku chumayela. Phela loko hi yendla leswo, hi nga tiyiseka swaku Yehovha a ta hi pfuna minkama hinkwayu.

14. I ntxini xi nga ta hi pfuna ku tiyisela loko hi kumana ni swikarhatu? (Tipisalema 37:3, 5)

¹⁴ Kombela swaku Yehovha a ku pfuna ku tiyisela hambiloko u kumana ni swikarhatu. Vanyingi va hina hi kumana ni swikarhatu leswi swi  hi hetelaka ntsaku, swa ku fana ni mavabyi, ku feliwa hi lweyi hi mu rhandzaka, swikarhatu andjangwini, ku hluphiwa kumbe swin’wanyani. Naswona mavabyi lawa ma hantlaka ma hangalaka ni tinyimpi swi tlhela swi yendla swaku xiyimu xi ya xi tika. Se, ku fana ni leswi a hi ta byela hinkwaswu munghanu wa hina hi nga mu fihleli nchumu, hi fanele hi yendla leswi fanaka hi Yehovha. Hi fanele hi mu byela hi xikhongelo leswi hi titwisaka xiswona na hi nga mu fihleli nchumu, na hi tiyiseka swaku a ta yendla xa ku karhi leswaku a hi pfuna. — Lerha Tipisalema 37:3, 5.

15. Swikhongelo swi nga hi pfunisa ku yini ku tiyisela swikarhatu? Nyikela xikombiso.

¹⁵ Lexi nga ta hi pfuna ku ‘tiyisela [na hi nga godoli] loko hi kumana ni swikarhatu,’ i ku khongela. (Rom. 12:12) Yehovha wa swi tiva swikarhatu leswi vanhu va yena va kumanaka na swona funtshi yena wa ku twa ku konya ka vona na va kombela ku pfuniwa. (Pis. 145:18, 19) Makwerhu Kristie lweyi a nga mupfuli wa ndlela lweyi a nga ni 29 wa malembe a swi vonile leswo ka wutomi la yena. A sungule ku va ni mavabyi ya ku karhata, funtshi leswo swi yendle swaku a sungula ku hela matimba a tlhela a godola. Swin’wani swa kona hileswaku hi ku famba ka nkama a tsumbule swaku mamani wa yena a a ni mavabyi lawa a ma dlaya funtshi a ma karhata ku ma daha. Makwerhu Kristie a vula leswi: “A ni khongela yi nga chayi ka Yehovha ni kombela swaku a ni nyika ntamu wa ku tiyiselela xiyimu lexi. Ni tame ni ya ka mintlhanganu hinkwayu ni tlhela ni va ni djondzo ya mina ya Bibele. Ku ve swikhongelo leswi swi nga ni pfuna ku tiyisela nkama lowuyani wa ku karhata. A ni swi tiva swaku Yehovha a na mina minkama hinkwayu. Loko ni nyima ni pimisa hi leswo, a ni titwa ni rhulile swinene. Mavabyi ya mina a ma nge se hundza, kambe ku tiva swaku Yehovha a a swi hlamula swikhongelo swa mina a swi ni rhulisa.” Minkama hinkwayu hi fanele hi khumbuka swaku Yehovha a nga swi kota “ku va ponisa ka ndzingo vanhu lava mu tirhelaka hi mbilu hinkwayu.” — 2 Ped. 2:9.

16. Hi mhaka muni hi lava ku pfuniwa hi Yehovha swaku hi hlula mindzingo?

 ¹⁶ Kombela swaku Yehovha a ku pfuna ku hlula mindzingo. Leswi hi kalaka hi nga hetisekanga, swi lava hi yendla minzamu swaku hi nga yendli swa ku biha. Kambe Sathana hi hala tlhelo a zama ku hi xengetela ku yendla swilo swoleswo. Xin’wani lexi a xi yendlaka i ku hi xenga hi ku tirhisa leswi hi hungataka hi swona. A nga yendla leswaku hi hungata hi swilo swa ku biha. Swilo swoleswo swi nga ha yendla swaku mimpimiso ya hina yi tala hi swilo swa chaka. Se mimpimiso yoleyo yi nga ha yendla leswaku hi yendla xidjoho xaxikulu lexi nga ta yendla leswaku hi nga ha yamukeliwi hi Yehovha. — Marku 7:21-23; Yak. 1:14, 15.

17. Loko se hi khongelile ka Yehovha hi kombela swaku a hi pfuna hi fanele hi yendla yini? (Vona mufoto.)

¹⁷ Leswaku hi hlula mindzingo ya ku yendla minchumu ya ku biha hi lava ku pfuniwa hi Yehovha. Ka xikhongelo xa Hosi, Yesu a vule swaku swin’wani swa leswi hi nga swi vulaka hi leswi: “Hi pfuni leswaku hi nga hluliwi hi ndzingo. U hi vhikela ka Davulosi.” (Mat. 6:13) Yehovha wa swi lava ku hi pfuna. Kambe leswaku a hi pfuna swi lava hina hi kombela ku pfuniwa. A hi fanelanga hi khongela ntsena, kambe hi fanele hi tlhela hi hanya hi leswi hi nga swi kombela ka xikhongelo. Hi fanele hi yendla hinkwaswu leswi hi nga swi kotaka swaku hi nga tati mimpimiso ya hina hi swilo swa ku biha leswi nga tala ka misava leyi ya Sathana. (Pis. 97:10) Loko hi djondza Bibele hi va hi tata mimpimiso ya hina hi swilo swa ku basa ni leswi nga swinene. Se loko hi ya mintlhanganwini hi tlhela hi chumayela, swi ta hi pfuna ku vhikela mimpimiso ya hina. Hi ndlela yoleyo Yehovha a ta hetisisa leswi a nga hi tshembisa swona, ku nga ku hi pfuna swaku hi nga ringiwi hi ndzingo lowu hi nga kalaka hi nga swi koti ku wu tiyiselela. — 1 Kor. 10:12, 13.

18. I mpsini leswi hi faneleke hi tama hi swi yendla?

¹⁸ Minkama hinkwayu hi fanele hi khongela ka Yehovha hi kombela swaku a hi pfuna hi tama hi tshembeka ka yena, ngopfungopfu ka masiku lawa ya wugamu lawa ma karhataka swinene. Siku ni siku tinyiki nkama wa ku yendla swikhongelo leswi humaka mbilwini. Phela Yehovha a lava swaku ‘u mu byela leswi nga mbilwini ya wena’ hi xikhongelo. (Pis. 62:8) Tlhela u khensa Yehovha ni ku mu dzunisa hi swilo hinkwaswu leswi a swi yendlaka. U mu kombela leswaku a ku pfuna u nga chavi loko u chumayela. U tlhela u khongela minkama hinkwayu u mu kombela swaku a ku pfuna ku lwisana ni swikarhatu kumbe mindzingo leyi u nga ha kumanaka na yona. U tlhela u nga pfumeleli nchumu kumbe munhu leswaku a ku sivela ku khongela ka Yehovha minkama hinkwayu. Kambe Yehovha a swi hlamulisa ku yini swikhongelo swa hina? A nhlamulu ya xivutiso lexi xa lisima hi ta yi vona ka djondzo leyi landzelaka.