1-2. I mpsini leswi van’wani va swi pimisaka hi swikhongelo swa vona?

 U TSHAMA u kanakana swaku Yehovha wa swi hlamula swikhongelo swa wena? Loko swi ku u tshama u titwisa xileswo a wu wexe. Vamakwerhu vanyingi na vona loko va kumana ni swikarhatu, va tshama va pimisa swaku ingaku Yehovha a nga swi hlamuli swikhongelo swa vona. Ka swiyimu swa ku fana ni leswo, swi nga hi karhatela ku vona ndlela leyi Yehovha a swi hlamulaka hi yona swikhongelo swa hina.

² Se ka djondzo leyi hi ta vona swaku i mpsini leswi nga hi tiyisekisaka swaku hikakunene Yehovha wa swi hlamula swikhongelo swa hina. (1 Yoh. 5:15) Hi ta tlhela hi hlamula swivutiso leswi: Hi mhaka muni minkama yin’wani swi tikomba ingi Yehovha a nga swi hlamuli swikhongelo swa hina? Naswona Yehovha a swi hlamulisa ku yini swikhongelo swa hina namuntlha?

3. Hi mhaka muni Yehovha a lava swaku hi khongela ka yena?

³ Bibele li hi tiyisekisa swaku Yehovha a hi rhandza swinene ni swaku hi va lisima ka yena. (Hag. 2:7; 1 Yoh. 4:10) Hi mhaka leyo, a hi rhamba swaku hi tshinela ka yena hi xikhongelo. (1 Ped. 5:6, 7) Yehovha a swi lava swinene ku hi pfuna swaku hi tama hi va vanghanu va yena hi tlhela hi lwisana ni swikarhatu.

4. Hi swi tivisa ku yini swaku Yehovha wa swi hlamula swikhongelo? (Vona mufoto.)

⁴ Ka Bibele hi kuma swikombiso swa swinyingi swa swikhongelo leswi Yehovha a nga swi hlamula. Xi kona lexi u xi khumbukaka? Xikombiso xin’wani i xa Hosi Davhida. Ka wutomi la yena a kumane ni swikarhatu swa swinyingi naswona makhambi ya manyingi a khongele ka Yehovha a kombela swaku a mu pfuna. Khambi lin’wani a vule leswi ka xikhongelo: “Yehovha  Xikwembu xanga, yingisa xikhongelo xa mina. Yingisa loko ni kombela ku pfuniwa. Ni hlamuli hikusa u tshembekile naswona u lulamile.” (Pis. 143:1) Yehovha a hlamulile swikhongelo swa Davhida naswona a mu ponisile ka swiyimu swa ku karhata. (1 Sam. 19:10, 18-20; 2 Sam. 5:17-25) Leswo swi yendle leswaku Davhida a vula leswi: “Yehovha a kusuhi ni hinkwavu lava va mu vitanaka.” Na hina hi nga va ni ku tiyiseka loku fanaka. — Pis. 145:18.

5. Ku nga va swaku loko Yehovha a hlamula swikhongelo swa hina minkama hinkwayu a hi nyika leswi hi nga swi kombela? Nyikela xikombiso. (Vona mufoto.)

⁵ Minkama yin’wani loko Yehovha a hlamula swikhongelo swa hina, a nga hi nyiki hi ku kongoma leswi hina hi nga mu kombela swona. Hi leswi nga mu yendlekela mupostolo Pawulo. Yena a khongele kanharhu ka Yehovha a mu byela hi “xitlhavani” lexi yena a a li na xona ka muzimbha wa yena. Yehovha a xi hlamulile xikhongelo xa Pawulo, kambe a nga mu nyikanga leswi yena a nga swi kombela. A nga xi susanga xikarhatu lexi Pawulo a a kumana na xona, kambe a mu nyike matimba lawa a a ma lava swaku a tama a mu tirhela hi ku tshembeka. — 2 Kor. 12:7-10.

6. Hi mhaka muni minkama yin’wani swi nga ha tikombaka ingi Yehovha a nga swi hlamuli swikhongelo swa hina?

⁶ Minkama yin’wani Yehovha a nga ha hlamula swikhongelo hi ndlela leyi hina hi kalaka hi nga yi nyimelanga. Kambe hi nga tiyiseka swaku Yehovha wa swi tiva leswi nga swinene ka hina. Yena a nga “kota ku yentxa swa ku tala swinene ku tlula leswi hi swi kombelaka kumbe leswi hi swi pimisaka.” (Efe. 3:20) Se Yehovha a nga ha hlamula swikhongelo swa hina hi nkama ni hi ndlela leyi hina hi kalaka hi nga yi nyimelanga.

7. Hi mhaka muni minkama yin’wani swi nga ha lavaka hi txintxa leswi hi swi kombelaka ka xikhongelo? Nyikela xikombiso.

⁷ Minkama yin’wani swi nga ha lava hi txintxa leswi hi swi kombelaka ka swikhongelo swa hina loko hi vona swaku a swi twanani ni ku rhandza ka Yehovha. Leswo hi leswi nga yendlekela makwerhu Martin Poetzinger. Ndzhaku ka loko a chadile, makwerhu Martin a petiwe djele. A ku sunguleni loko a khongela ka Yehovha a a kombela swaku a susiwa adjele leswaku a ta kota ku hlayisa nsati wa yena ni leswaku a tama a chumayela. Kambe ndzhaku ka mavhiki mambirhi a swi vonile swaku leswo a ku nga li ku rhandza ka Yehovha. Se a game a txintxa leswi a a swi kombela ka xikhongelo xa yena. A game a vula leswi: “Yehovha, ni kombela u ni komba ku rhandza ka wena.” A game a sungula ku pimisa hi vamakwerhu van’wani lava na vona a va pfaleliwile  na yena. Vanyingi va vona a va karhateka hi vasati ni vana va vona. Se loko a khongela a a hamba a ku: “Na khensa Yehovha hi ntirho wa nyuwani lowu u nga ni nyika wona. Ni pfuni leswaku ni tiyisa vamakwerhu.” A tame a yendla ntirho lowo ka 9 wa malembe lawa a a pfaleliwe djele.

8. Hi fanele hi khumbuka yini loko hi khongela?

⁸ Hi fanele hi khumbuka swaku leswi Yehovha a nga swi tshembisa, swa ku fana ni ku helisa swikarhatu hinkwaswu leswi hi kumanaka na swona namuntlha, tindlala, mavabyi, swidzedze, tinyimpi, a ta swi yendla hi nkama wa kona hi ku tirhisa Mfumu wa yena. (Dan. 2:44; Nhla. 21:3, 4) Kambe na ha ha nyimela nkama wolowo, Yehovha wa ha tama a pfumelela Sathana swaku a fuma misava. b (Yoh. 12:31; Nhla. 12:9) Phela loko Yehovha a wo helisa swikarhatu swa vanhu swoswi, a swi ta tikomba ingi mfumu wa Sathana wu famba kahle. Se swi lava ku hlaya swaku Yehovha a ta hi tshika hi hlupheka anze ku fika siku leli yena a nga li veka swaku a lunghisa swilo? Ihim, a swi lavi ku hlaya leswo. Yehovha wa hi pfuna hambi hi namuntlha. A hi voneni swaku a hi pfunisa ku yini.

9. Yehovha a nga hi pfunisa ku yini loko hi lava ku teka xiboho? Nyikela xikombiso.

⁹ Yehovha a hi nyika wutlharhi. Yehovha a tshembisa swaku a ta hi nyika wutlharhi leli nga ta hi pfuna swaku hi hamba swiboho ka wutomi la hina, i funtshi ha li lava wutlharhi la yena ngopfungopfu loko hi lava ku hamba swiboho swaswikulu ka wutomi la hina, swa ku fana ni ku chada kumbe hi tshama na hi nga chadanga. (Yak. 1:5) Vona xikombiso xa makwerhu Mariya. c Yena a a li mupfuli wa ndlela wa nkama hinkwawu, se hi ku famba ka nkama, a tive djaha. Yena a vula leswi: “Hi sungule hi ku va vanghanu kambe hi ku famba ka nkama se hi sungula ku rhandzana. Se a swi lava swaku ni yendla xiboho. Ni hambe swikhongelo swa swinyingi ka Yehovha ni mu kombela swaku a ni pfuna. A ni lava swaku yena a ni kongomisa, a ni pfuna ku yendla xiboho xa kahle.” Mariya a tlhamusela swaku Yehovha a swi hlamulile swikhongelo swa yena. A swi hlamulise ku yini? A swi hlamulile hi ku tirhisa mabuku ya nhlengeletanu ni vanhu van’wani. Mariya a kombisa swaku yena a lerhe mabuku ya nhlengeletanu lawa ma vulavulaka hi ku chada leswaku a susa ku kanakana loku a a li na kona. Funtshi a kombele mamani wa yena leswaku a mu pfuna. Hinkwaswu leswi, swi pfune Mariya kuva a pimisa kahle hi leswi a a titwisa xiswona, funtshi hi wugamu a yendle xiboho xa kahle.

10. Hi ku ya hi Vafilipiya 4:13, i mpsini leswi Yehovha a nga swi yendlaka leswaku a hi pfuna? Nyikela xikombiso. (Vona mufoto.)

 ¹⁰ Yehovha a hi nyika matimba lawa hi ma lavaka leswaku hi tiyisela. Yehovha a ta hi nyika matimba lawa hi ma lavaka swaku hi tiyisela swikarhatu, ku fana ni leswi a nga swi yendla ka mupostolo Pawulo. (Lerha Vafilipiya 4:13.) Vona ndlela leyi Yehovha a nga pfuna makwerhu Benjamim hi yona leswaku a hlula swikarhatu leswi a a li ka swona. Benjamim a kulele África, ka ndhawu leyi ku tshamaka vanhu lava nga baleka ka matiko ya vona, na a li ni ndjangu wa yena. Yena a li: “A ni tshamela ku khongela ka Yehovha ni kombela swaku a ni nyika matimba leswaku a ni pfuna ku yendla swaswinene. Yehovha a swi hlamulile swikhongelo swa mina hi ku ni pfuna swaku ni rhula, a tlhela a ni pfuna swaku ni nga chavi ku chumayela. A tlhele a ni nyika mabuku ya nhlengeletanu lawa a ni ma lava leswaku ni tama ni tiyisa wunghanu la mina na Yena. Handle ka leswo, ku lerha swiperiyensiya swa vamakwerhu van’wani ni ku tiva swaku Yehovha a va pfunile swaku va tiyisela, swi ni pfunile swaku ni tama ni tshembeka ka yena.”

11-12. Yehovha a nga va tirhisisa ku yini vamakwerhu leswaku a hlamula swikhongelo swa hina? (Vona mufoto.)

¹¹ Yehovha wa hi pfuna hi ku tirhisa vamakwerhu. Na Yesu a li kusuhi ni ku fa, a khongelile ka Yehovha swi suka mbilwini. Yena a a nga swi lavi swaku lifu la yena li yendla vanhu va pimisa swaku a chakise vito la Yehovha. Hi mhaka leyo a khongelile ka Yehovha a mu kombela swaku a sivela swaku leswo swi nga yendleki. Kambe handle ka ku Yehovha a yendla leswi Yesu a nga mu kombela swona, o yo rhumela ntsumi swaku yi ta mu tiyisa. (Luk. 22:42, 43) Ni namuntlha, Yehovha a nga hi pfuna hi ku tirhisa vamakwerhu. Va nga ha hi fonela kumbe va hi pfuxela kaya leswaku va hi tiyisa. Se, na hina hi nga lavetela tindlela ta ku tiyisa vamakwerhu. — Swi. 12:25.

¹² Vona xikombiso xa makwerhu Miriam. Loko se ku hundze mavhikinyana na nuna wa yena a file, a a li yexe kaya na a karhatekile hintamu a tlhela a godola. A a tshamela ku rila minkama hinkwayu funtshi a a lava munhu lweyi a a ta bula na yena. Makwerhu Miriam a vula leswi: “A ni nga koti ku ligarela munhu. Se ni khongelile ka Yehovha ni kombela swaku a ni pfuna. Nkama na ni khongela na ni rila, ni  ligareliwile ka telefoni. A ku li doda leli nga munghanu wa mina leli a li ni ligarela.” Phela makwerhu Miriam a tiyisiwile swinene hi doda leliyani ni nsati wa lona. A a tiyiseka swaku a ku li Yehovha lweyi a nga yendla swaku doda leliyani li mu ligarela.

13. Hi xini xikombiso lexi kombaka swaku Yehovha a nga tirhisa vanhu lava va kalaka va nga mu gandzeli swaku a hlamula swikhongelo swa hina?

¹³ Yehovha a nga tirhisa vanhu lava kalaka va nga mu gandzeli leswaku va hi pfuna. (Swi. 21:1) Minkama yin’wani Yehovha a nga hlamula swikhongelo swa hina hi ku yendla swaku vanhu lava va kalaka va nga mu gandzeli va hi pfuna. Hi xikombiso, Yehovha a yendle swaku Hosi Artaxexe a pfumelela Nehemiya swaku a tlhela a ya Yerusalema a ya pfuxeta mimuru ya doropa. (Neh. 2:3-6) Ni namuntlha Yehovha a nga yendla swaku vanhu lava va kalaka va nga mu gandzeli va pfuna malandza va yena.

14. Xi ku tiyisisa ku yini xikombiso xa Soo Hing? (Vona mufoto.)

¹⁴ Makwerhu Soo Hing a swi vonile swaku Yehovha a mu pfunile hi ku tirhisa dotori wa yena. A n’wana wa yena a a ni mavabyi ya manyingi lawa a ma khumba nhloko. Nkama n’wana wa yena a nga kumana ni nghozi yayikulu, yena ni nuna wa yena va tshike mintirho ya vona swaku va kota ku mu hlayisa. Leswo swi yendle swaku va nga ha na male ndzhaku ka nkama wa ku karhi. Soo Hing a vule swaku se a a nga ha gwenti. Hi mhaka leyo a khongele ka Yehovha a kombela swaku a mu pfuna. A dotori wa n’wana wa vona a va pfunile. Se hi ku famba ka nkama, va swi kotile ku pfuniwa hi mfumu va tlhela va kuma yindlo ya ku tshama ka yona. Ndzhaku ka leswo, yena a te: “Hi swi vonile swaku i Yehovha lweyi a a hi pfuna. Hikakunene Yehovha i ‘Mutwi wa swikhongelo.’” — Pis. 65:2.

15. I mpsini swi nga pfuna makwerhu mun’wani kuva a swi vona swaku Yehovha a hlamula swikhongelo swa yena?

¹⁵ Yehovha a nga toloveli ku hlamula swikhongelo swa hina hi ndlela ya ku hlamalisa, kambe a hlamula swikhongelo swa hina hi ndlela leyi nga ta hi pfuna ku tama hi tshembeka ka yena. Hi mhaka leyo hi fanele hi pfula matihlo, hi vona ndlela leyi Yehovha a swi hlamulaka hi yona swikhongelo. Makwerhu mun’wani lweyi a vitaniwaka Yoko a a pimisa swaku Yehovha a a nga swi hlamuli swikhongelo swa yena. Se a game a sungula ku yendla lixta la swilo hinkwaswu leswi a nga tshama a mu  kombela swona Yehovha. Hi ku famba ka nkama, loko se a khoma lixta leliyani a nga li yendla, a tsumbule swaku ku tala ka swikombelo leswi a nga mu yendla swona Yehovha, se a a swi hlamulile, funtshi swin’wani hambi yena Yoko se a a patse ni ku swi khohlwa. Hi mhaka leyo, swi kahle kuva nkama ni nkama hi nyima hi pimisa hi ndlela leyi Yehovha a swi hlamulaka hi yona swikhongelo swa hina. — Pis. 66:19, 20.

16. Hi yini ndlela yin’wani ya ku kombisa lipfumelo? (Vaheberu 11:6)

¹⁶ A hi kombisi lipfumelo hi ku khongela ka Yehovha ntsena, kambe ni ku yamukela nhlamulu ya swikhongelo swa hina ku nga na mhaka swaku hi swona leswi a hi swi nyimelile kumbe a hi swona. (Lerha Vaheberu 11:6.) Leswo swi yendlekele Mike ni nsati wa yena Chrissy. Vona a va lava ku ya tirha aBetele. Vona va li: “Hi prenxere petição makhambi ya manyingi swaku hi ya tirhela Betele, hi tlhela hi khongela makhambi ya manyingi ka Yehovha hi mhaka yoleyo, kambe a hi nga vitiwi swaku hi ya tirhela Betele.” Mike na Chrissy a va tiyiseka swaku Yehovha wa swi tiva swaku hi kwini lomu a va ta tirhisiwa kahle kona, kambe hambileswo, a va tama va yendla leswi a va swi kota hi ku tama va va vapfuli va ndlela va nkama hinkwawu lomu a ku ni xilaveko ni ku tlhela va seketela maprojetu ya ku yaka. Namuntlha vona i vadjikelezi. Mike a li: “A hi minkama hinkwayu leyi Yehovha a nga hlamula swikhongelo swa hina hi ndlela leyi a hi yi nyimelile kambe minkama hinkwayu a hlamule swikhongelo hi ndlela ya ku yampsa ku tlula leyi hina a hi yi nyimelile.”

17-18. Hi ku ya hi Tipisalema 86:6, 7, i mpsini leswi hi nga tiyisekaka hi swona?

¹⁷ Lerha Tipisalema 86:6, 7. Davhida a a tiyiseka swaku Yehovha a a swi twa swikhongelo swa yena ni leswaku a a swi hlamula. Na wena u nga va ni ku tiyiseka loku fanaka. Swiperiyensiya leswi hi nga djondza hi swona ka nhlokomhaka leyi, swi hi tiyisekisa swaku Yehovha a nga hi nyika wutlharhi ni ntamu lowu lavekaka swaku hi kota ku tiyisela. A nga tirhisa vamakwerhu, hambi hi vanhu lava kalaka va nga mu gandzeli leswaku va hi pfuna.

¹⁸ I ntiyiso swaku a hi minkama hinkwayu leyi Yehovha a nga ta hlamula swikhongelo swa hina hi ndlela leyi hina hi yi lavaka, kambe hi nga tiyiseka hi nchumu xin’we: Yena minkama hinkwayu wa swi hlamula swikhongelo swa hina. A hi nyika leswi hi swi lavaka hi nkama wa kona. Hi mhaka leyo, u nga tshiki ku khongela na u tiyiseka swaku Yehovha a ta ku hlayisa swoswi naswona ka misava ya nyuwani a ta ku nyika xin’wani ni xin’wani lexi u nga ta xi lava. — Pis. 145:16.