1. Hi swini swikarhatu leswi hi nga kumanaka na swona?

KU NGA va swaku u kumana ni swikarhatu? Swi nga yentxeka ku ni munhu lweyi a nga ku kwatisa abandleni. (Yak. 3:2) Kumbe lava u tirhaka na vona kumbe u djondzaka na vona xikola va ku poyila hileswi u nga Mboni. (1 Ped. 4:3, 4) Nakambe swi nga yentxeka maxaka ya wena ma zama ku ku tshikisa ku ya mintlhanganwini kumbe ku chumayela. (Mat. 10:35, 36) Loko u kumana ni swikarhatu swa swikulu swi nga ha yentxeka u pimisa ku tshika ku tirhela Yehovha. Kambe tiyiseka swaku Yehovha a ta ku nyika wutlhari ni ntamu swaku u tiyisela xikarhatu xa wena, ku nga na mhaka swaku i xikulu ku fikela kwini.

2. Hi ku ya hi Varoma 15:4, swi nga hi pfunisa ku yini ku lerha Bibele?

² Bibele li tale hi swikombiso swa vanhu va khale lava nga tiyisela swikarhatu. Se loko hi li lerha hi ta djondza ka swikombiso leswi. Yehovha a byele Pawulo a tsala swaku hinkwaswu leswi nga tsaliwa khale swi tsaleliwe ku djondzisa hina. (Lerha Varoma 15:4.) Loko hi lerha leswi nga tsaliwa ka Bibele swi ta hi tiyisa swi tlhela swi hi nyika ntshembo. Kambe leswaku swi hi pfuna, ku ni swin’wana leswi hi faneleke hi swi yentxa, ku nga li ku lerha ntsena. Hi fanele hi pfumelela Bibele li txintxa mapimiselo ya hina li tlhela li khumba timbilu ta hina. Hi xikombiso, hi nga yentxa yini loko hi lava swaku Bibele li hi pfuna loko hi kumana ni xikarhatu? Hi fanele: 1) Hi khongela, 2) Hi tivona na swi yentxekela hina leswi hi swi djondzaka, 3) Hi pimisa hi leswi hi swi djondzaka, hi tlhela 4) Hi tirhisa leswi hi swi djondzaka. A hi voneni swaku hi nga swi yentxisa ku yini leswi loko hi djondza. * Hi ta  gama hi swi tirhisa swaku hi vona leswaku hi nga djondza yini ka leswi nga humelela Hosi Davhida na mupostolo Pawulo.

3. I yini lexi u faneleke u xi yentxa na u nge se lerha Bibele naswona hi mhaka muni?

³ 1) Khongela. Na u nge se sungula ku lerha Bibele, kombela Yehovha swaku a ku pfuna ku tiva leswi u nga swi tirhisisaka xiswona leswi u swi djondzaka. Hi xikombiso, loko ku ni xikarhatu lexi u lavaka ku pfuniwa ka xona, kombela Yehovha hi xikhongelo swaku a ku pfuna ku kuma tindzimana leti nga ta ku kongomisa. — Filp. 4:6, 7; Yak. 1:5.

4. Loko u lerha Bibele i yini lexi nga ku pfunaka ku twisisa leswi u swi lerhaka?

⁴ 2) Tivoni na swi yentxekela wena leswi u swi djondzaka. Yehovha a hi yentxe na hi kota ku pimisa swilo hi tlhela hi tivona na hi li ka swona. Loko u lerha hi munhu ka Bibele zama ku vona na swi yentxekela wena, u tlhela u tivona na u li ka ndhawu yoleyo. Zama ku vona swilo leswi a a swi vona kumbe ku titwisa leswi a a titwisa xiswona.

5. Swi vula yini ku pimisa hileswi u swi djondzaka, naswona u nga swi yentxisa ku yini?

⁵ 3) Pimisa hi leswi u swi djondzaka. Leswo swi vula ku pimisa kahle hi leswi u swi djondzaka, u tlhela u vona swaku u nga swi tirhisisa ku yini ka wutomi la wena. Phela ku yentxa leswo swi nga ku pfuna ku twisisa swilo hinkwaswu leswi u swi djondzaka. Hi xikombiso, leswaku u sweka swakudla swa ku nandzika u fanele u patsa hinkwaswu leswi lavekaka swaku u sweka hi swona, loko u nga yentxi leswo swakudla a swi nge nandziki. Hilani ku fanaka, ku pimisa hileswi u swi djondzaka, swi fana ni ku patsanisa leswi u lavaka ku sweka hi swona swaku ku huma swakudla swa ku nandzika. Leswaku u swi twisisa kahle leswi u swi lerhaka u nga ha tivutisa leswi: ‘Lweyi ni djondzaka hi yena a yentxe yini swaku a hlula xikarhatu xa yena? Yehovha a mu pfunise ku yini? Ni nga swi tirhisisa ku yini leswi ni nga swi djondza leswaku ni hlula swikarhatu?’

6. Hi mhaka muni hi fanele hi tirhisa leswi hi swi djondzaka?

⁶ 4) Tirhisa leswi u swi djondzaka. Yesu a vule swaku loko u nga swi tirhisi leswi u swi djondzaka, swi fana ni munhu lweyi a yakaka yindlo a henhla ka misava. A tirha yi nga chayi kambe i nyuku wa mbyana, hikusa nkama ku nga ta ta ndhambi ku tlhela ku ba xidzedze yindlo ya yena yi ta hahluleliwa. (Mat. 7:24-27) Hi ku fanana, na hina hambi ho khongela, hi tivona na swi hi yentxekela hi tlhela hi pimisa hi swona kambe hi nga swi tirhisi ka wutomi la hina hi ta va na ho tihetela nkama. Loko hi kumana ni swikarhatu kumbe hi hluphiwa a hi nga ta swi kota ku tiyisela. Kambe loko hi tirhisa leswi hi swi djondzaka hi ta yentxa swiboho swa swinene, hi ta va ni ku rhula naswona hi ta tiyisa lipfumelo la hina. (Esa. 48:17, 18) A hi tirhiseni tipontu leti ta 4 swaku hi vona swaku hi nga djondza yini ka leswi nga yentxekela Hosi Davhida.

7. Hi ta djondza hi yini swoswi?

⁷ Ku nga va swaku u ni munghanu kumbe xaka leli nga ku kwatisa? Loko a li kona a nga ku kwatisa u ta tsaka hintamu hi ku djondza hi xikombiso xa Absalomu n’wana wa Hosi Davhida, lweyi a nga zama ku kanganyisa papayi wa yena, a tlhela a zama ku mu tekela mfumu. — 2 Sam. 15:5-14, 31; 18:6-14.

8. U fanele u yentxa yini swaku Yehovha a ku pfuna?

⁸ 1) Khongela. Khumbuka swaku i swa lisima ku byela Yehovha leswi u titwisaka xiswona hi mhaka ya leswi u nga kwatisiwa. (Pis. 6:6-9) Mu byeli kahle Yehovha leswi u titwisaka xiswona, u nga djikadjiki. U gama u mu kombela a ku  pfuna ku kuma swilo leswi nga ta ku pfuna ku hlula xikarhatu lexo.

9. I mpsini swi nga yentxeka ka Absalomu na Davhida?

⁹ 2) Tivoni na swi yentxekela wena leswi u swi djondzaka. Pimisa hi leswi nga yentxiwa hi Absalomu u tlhela u zama ku vona leswi Davhida a nga titwisa xiswona. Phela Absalomu a hete malembe ya manyingi na a zama ku yentxa swaku vanhu va mu rhandza. (2 Sam. 15:7) Nkama a nga vona swaku se yi chayile a rhume vanhu swaku va ya ka tiko hinkwalu la Israyele va ya xengetela xitshungu swaku xi pfumela ku fumiwa hi yena. A zame ku kanganyisa na Ahitofele munghanu wa papayi wa yena swaku a djikela Davhida. Absalomu a tiyentxe hosi a tlhela a zama ku dlaya papayi wa yena Davhida lweyi a a vabya hintamu. (Pis. 41:1-9) Kambe Davhida a swi tsumbulile leswi Absalomu a nga swi yentxa, a gama a baleka a ya Jerusalema. Funtshi masonchwa ya Absalomu ma game ma sungula ku lwa ni masonchwa ya Davhida, kambe masonchwa ya Absalomu ma hluliwile, naswona Absalomu a dlayiwile.

10. Hosi Davhida a a ta va a yentxe yini ka xikarhatu xa yena?

¹⁰ Se swoswi zama ku pimisa hileswi Davhida a nga titwisa xiswona hi mhaka ya leswi nga mu yentxekela. Phela a a mu rhandza Absalomu naswona a a mu tshemba Ahitofele kambe hinkwavu vavambirhi va mu djikelile. Va mu twise ku vava hintamu va tlhela va zama ku mu dlaya. Leswo a swi ta va swi yentxe Davhida a nga ha va tshembi vanghanu va yena lavan’wana hi ku pimisa swaku na vona va tipatse na Absalomu. Phela leswo a swi ta va swi mu yentxe a nga ha tshembi munhu, a tlhela a zama ku baleka na a li yexe. Kumbe a a ta va a hele ntamu swa wugamu a nga xi tivi ni xa ku xi yentxa. Kambe Davhida a nga swi yentxaka hinkwaswu leswo naswona a swi kotile ku hlula xikarhatu lexi xa xikulu. Kambe i yini lexi nga mu pfuna?

11. Davhida a yentxe yini nkama a nga kumana ni swikarhatu?

¹¹ 3) Pimisa hi leswi u swi djondzaka. U djondze yini ka xikombiso xa Davhida? Zama ku hlamula xivutiso lexi: “Davhida a yentxe yini swaku a kota ku hlula xikarhatu xa yena?” Davhida a nga chavanga, naswona a nga yentxanga swiboho na a nga rhanganga hi ku pimisa. Naswona a nga chavanga hintamu lakakuva a nga xi tivi ni xa ku xi yentxa. Kambe a khongele ka Yehovha a kombela ku pfuniwa. A tlhele a kombela vanghanu va yena swaku va mu pfuna. Naswona a nga hlwelanga ku yentxa leswi a nga swi pimisa ku swi yentxa. Hambi leswi va nga mu twisa ku vava, Davhida a nga txintxanga a va munhu wa ku biha kambe a tame a tshemba Yehovha ni vanghanu va yena.

12. Yehovha a mu pfunise ku yini Davhida?

¹² Yehovha a mu pfunise ku yini Davhida? Loko u yentxa mapexkiza u ta kuma swaku Yehovha a nyike Davhida ntamu lowu a a wu lava swaku a kota ku hlula xikarhatu lexi. (Pis. 3:1-8) Yehovha a katekise swiboho leswi Davhida a nga swi yentxa. A tlhele a pfuna vanghanu va Davhida lava va nga lwa swaku va mu vhikela.

13. U nga mu tekelelisa ku yini Davhida loko va ku twisa ku vava? (Matewu 18:15-17)

¹³ 4) Tirhisa leswi u swi djondzaka. Tivutisi leswi: ‘Ni nga mu tekelelisa ku yini Davhida?’ Loko u ni xikarhatu u nga ha lava ku xi lulamisa hi ku kahlula. Loko swi koteka u nga ha tirhisa marito ya Yesu lawa ma nga ka Matewu ndzima 18. (Lerha Matewu 18:15-17.) Kambe loko u kwatile u nga yentxi swiboho hi ku hantlisa. Kambe u fanele u khongela ka Yehovha u mu kombela swaku a rhulisa mbilu ya wena a tlhela a ku nyika wutlharhi swaku u kota ku lunghisa mhaka leyi u nga na yona. Naswona u nga tshiki ku tshemba vanghanu va wena, kambe pfumela loko va lava ku ku pfuna. (Swi. 17:17) Xa  lisima hintamu, loko u yentxa swiboho tirhisa leswi Bibele li swi vulaka. — Swi. 3:5, 6.

14. Marito lawa ma nga ka 2 Timotiyu 1:12-16; 4:6-11, 17-22, ma nga ku pfuna loko swi te yini?

¹⁴ Ku nga va swaku maxaka ya wena a ma ku rhandzi hi mhaka leswi u nga Mboni ya Yehovha? Kumbe u tshama lomu ntirho wa hina wu yalisiwaka? Loko ku li leswo, buku la 2 Timotiyu 1:12-16 ni 4:6-11, 17-22 li nga ku tiyisa hintamu. * Phela nkama Pawulo a nga tsala leswi nga ka tindzimana leti a a li djele.

15. I yini leswi u nga mu kombelaka swona Yehovha?

¹⁵ 1) Khongela. Na u nge se lerha tindzimana leti, byela Yehovha leswi ku karhataka ni leswi u titwisaka xiswona. U nga djikadjiki, kongoma mhaka. Gama u kombela Yehovha swaku a ku pfuna ku vona ndlela leyi u nga ti tirhisaka hi yona tindzimana leti ka xikarhatu lexi u kumanaka na xona.

16. U nga xi tlhamuselisa ku yini xiyimu xa Pawulo?

¹⁶ 2) Tivoni na swi yentxekela wena leswi u swi djondzaka. Tivoni na u li Pawulo, na u boheleliwe hi machini ka djele la le Roma. Phela a wo sungula a ku nghena djele, kambe swoswi wa tiyiseka swaku u ta dlayiwa. Van’wana va vanghanu va wena va ku balekile naswona u yo pfotlo hi ku karhala. — 2 Tim. 1:15.

17. I yini leswi Pawulo a a ta tshamela ku swi pimisa?

¹⁷ Pawulo a a ta va a pimise hi swiboho leswi a nga swi yentxa, a tibyela swaku loko a a nga li Mukreste a a nga ta kumana ni swikarhatu leswi a nga kumana na swona. A a ta va ni xiviti hi vanghanu va yena lava nga mu baleka, naswona a a nga ha ta va tshemba vanghanu va yena. Kambe Pawulo a nga swi yentxanga leswo. Kambe i yini lexi nga mu tiyisekisa swaku vanghanu va yena a va ta tama va tshemabeka ni swaku Yehovha a a ta mu katekisa?

18. Pawulo a yentxe yini nkama a nga kumana ni swikarhatu?

¹⁸ 3) Pimisa hi leswi u swi djondzaka. Zama ku hlamula xivutiso lexi: “I yini leswi Pawulo a nga swi yentxa swaku a kota ku tiyisela swikarhatu?” Hambileswi Pawulo a a swi tiva swaku a a li kusuhi ni ku dlayiwa, a nga khohlwanga swaku nchumu wa lisima i ku dzunisa Yehovha. Naswona a tame a pimisa hi tindlela ta ku pfuna van’wana. A tame a tshemba Yehovha hi ku khongela minkama hinkwayu. (2 Tim. 1:3) Phela Pawulo a a nga tshameli ku pimisa hi vamakwerhu lava nga mu baleka, kambe a a pimisa swinene hi vamakwerhu lava va nga mu pfuna. Naswona Pawulo a tame a lerha Rito la Xikwembu. (2 Tim. 3:16, 17; 4:13) Xa lisima hintamu, Pawulo a a tiyiseka swaku Yehovha na Yesu va mu rhandza. A va nga ta mu tshika, naswona a va ta mu hakela hileswi a nga tshama a tshembekile.

19. Yehovha a mu pfunise ku yini Pawulo?

¹⁹ Yehovha se a a mu byelile Pawulo swaku a a ta kumana ni swikarhatu hi mhaka ya leswi a nga Mukreste. (Mint. 21:11-13) Se Yehovha amu pfunise ku yini Pawulo? A hlamule swikhongelo swa yena, naswona hi ku famba ka nkama a mu nyike ntamu Pawulo. (2 Tim. 4:17) Pawulo a a tiyisekisiwile swaku a ta yi kuma hakelo leyi a nga yi tirhela. Phela Yehovha a yentxe swaku vanghanu va Pawulo va mu pfuna hi ku mu nyika swilo leswi a a swi lava.

20. Hi ku ya hi Varoma 8:38, 39, hi nga mu tekelelisa ku yini Pawulo?

²⁰ 4) Tirhisa leswi u swi djondzaka. Tivutisi leswi: ‘Ni nga mu tekelelisa ku yini Pawulo?’ Ku fana na Pawulo, na hina hi ta hluphiwa hi mhaka ya lipfumelo la hina. (Marku 10:29, 30) Leswaku hi tshama hi tiyile loko hi kumana ni swikarhatu, minkama hinkwayu hi fanele hi  tshemba Yehovha hi ku yentxa swikhongelo hi tlhela hi lerha Bibele. Naswona hi fanele hi khumbuka swaku a nchumu wa lisima ku tlula hinkwaswu i ku dzunisa Yehovha. Loko hi yentxa leswo hi nga tiyiseka swaku Yehovha a nga ta hi tshika, naswona a ku na nchumu lexi nga yentxaka swaku Yehovha a nga ha hi rhandzi. — Lerha Varoma 8:38, 39; Heb. 13:5, 6.

21. I ntxini xi nga pfuna Aya na Hector swaku va hlula swikarhatu swa vona?

²¹ Loko hi lerha hi swikombiso swi nga ka Bibele swi nga hi tiyisa, ku nga na mhaka swaku hi kumana ni yini wuton’wini. Hi xikombiso, makwerhu Aya, lweyi a nga mupfuli wa ndlela wa nkama hinkwawu aJapão, a li loko a lerha xitoriya xa Yonasi xi mu pfunile swaku a nga chavi ku chumayela lomu ku nga tala hi vanhu. Makwerhu Hector, lweyi a nga jovhem la Indonésia naswona vapsali va yena va kalaka va nga li Timboni ta Yehovha, a li xikombiso xa Ruti xi mu pfunile kuva a djondza hi Yehovha a tlhela a mu tirhela.

22. U nga pfunekisa ku yini loko u sixtira mavhidiyo, u yingisela madrama ni ku lerha a switoriya swi nga ka site lani ku nge: “Tekelela Ripfumelo”?

²² U nga swi kuma kwini swikombiso swa Bibele leswi nga ku tiyisaka? U nga swi kuma ka mavhidiyo, ka madrama ya ku yingisela ni ka site, lani ku nge: “Tekelela Ripfumelo” (hi Xitsonga). Loko u yentxa leswo, u swi twisisa kahle leswi nga yentxekela vanhu va minkama ya Bibele. * Na u nge se sixtira mavhidiyo, kumbe u yingisela madrama ni ku djondza, rhanga hi ku kombela Yehovha swaku a ku pfuna kuva u kuma tipontu leti u nga ti tirhisaka. Tivoni na u li ka xiyimu xa munhu lweyi u djondzaka hi yena. Pimisa hileswi vavanuna ni vavasati lava a va ni wunghanu la likulu na Yehovha va nga swi yentxa ni leswi Yehovha a nga va pfunisa xiswona swaku va hlula swikarhatu swa vona. Se u gama u lava tindlela ta ku swi tirhisa ka wutomi la wena. U nga khohlwi ku khensa Yehovha hileswi a ku pfunaka. Naswona kombisa swaku hikakunene wa mu khensa hi ku lava tindlela ta ku tiyisa van’wana u tlhela u va pfuna.

23. Hi ku ya hi Esaya 41:10, 13, i yini leswi Yehovha a tshembisaka ku hi yentxela swona?

²³ Swa karhata ku hanya ka misava leyi fumiwaka hi Sathana. (2 Tim. 3:1) Kambe a hi fanelanga hi vilela kumbe hi chava. Yehovha wa swi tiva leswi hi yentxekelaka. Loko hi lava ku pfuniwa, Yehovha a ta hi khoma swi tiya hi voko la yena la xinene. (Lerha Esaya 41:10, 13.) A hi kanakani swaku Yehovha a ta hi pfuna, naswona Bibele li nga hi nyika ntamu lowu hi wu lavaka swaku hi tiyisela swikarhatu.