Minkama yin’wana hi nga tirhisa mamensajem swaku hi bula ni maxaka ni vamakwerhu van’wana. Hi fanele hi khumbuka marito lawa ma nge: “Munhu wa ku tlhariha wa tumbela loko a vona nghozi, kambe lava kalaka va nga tivi va kongoma lomu yi nga kona se va kumana ni khombo.” — Swi. 27:12.

Ha swi tiva swaku Yehovha a lava ku hi vhikela. Hi mhaka leyo, a hi nga ta va vanghanu va vanhu lava yentxaka swaku ku nga vi ni ku twanana bandleni, lava nga susiwa, kumbe lava djondzisaka minchumu ya ku biha. (Rom. 16:17; 1 Kor. 5:11; 2 Yoh. 10, 11) Van’wana lava yaka mintlhanganwini a va hanyi hi minawu ya Xikwembu. (2 Tim. 2:20, 21) Loko hi langa vanghanu, hi fanele hi swi khumbuka leswo. Kambe swi nga hi karhatela ku langa vanghanu va vanene loko hi tirhisa mamensajem ntsena.

Loko hi nghena ka grupu ya yikulu, ka ma aplicativo wolawo, swi lava hi tivonela loko hi langa vanghanu. Vamakwerhu van’wana lava nga nghena ka magrupu lawo a swi va fambelanga kahle. Se makwerhu a nga yentxa yini swaku a tivonela loko a li ka grupu leli nga ni vanhu va vanyingi? A nge swi koti ku tiva swaku hinkwavu lava nga ka grupu i vanghanu va Yehovha. Buku ya Tipisalema 26:4 yi li: “A ni tipatsi ni vanhu va ku hemba; funtshi ni fambela kule ni vanhu lava fihlaka leswi va nga swona.” Marito lawa, ma kombisa swaku i swinene kuva hi tirhisa mamensajem swaku hi vulavula ntsena ni vanhu lava hi va tivaka.

Hambi ko va grupu li nga ni vanhu va vatsongo, hi fanele hi tivonela swaku hi nga heti nkama wa wunyingi ka magrupu wolawo, hi tlhela hi swi vona kahle leswi vanhu va magrupu wolawo va bulaka hi swona. A hi fanelanga hi titwa na hi boheka ku hlamula mamensajem hinkwawu hambiloko va nga mandareli hina naswona hi vona swaku ma ta hi tekela nkama wa wunyingi. Pawulo a byele Timotiyu swaku a tivonela ka vanhu va ku “hleva ni ku tipeta ka timhaka ta van’wana.” (1 Tim. 5:13) Swoswi leswo swa koteka hi ku tirhisa ma aplicativo ya ku rhumela van’wana mamensajem.

Makwerhu lweyi a rhandzaka Yehovha a nga vulavuli ku biha hi vanhu van’wana, naswona a nga vulavuli hi swihundla swa vamakwerhu. (Pis. 15:3; Swi. 20:19) Naswona a nga tsutsumeli ku byela vanhu swilo swaku a nga tiyiseki swaku i ntiyiso. (Efe. 4:25) Hikusa ha swi tiva swaku a ma novhidadi ya ntiyiso hi ta ma kuma ka site la hina la jw.org ni ka programa la JW Broadcasting^®.

Vamakwerhu van’wana, va tirhisa ma aplicativo ya ku rhumela mamensajem swaku va xavisa kumbe va xava minchumu ka vamakwerhu van’wana. Leswo swi fambisana ni manegosiyu, kambe a swi ngheneleli ka leswi hi mu tirhelisaka xiswona Yehovha. Vamakwerhu lava kalaka va nga ‘rhandzi male’ a va nga ta yentxa nchumu swaku va kanganyisa vamakwerhu hi ku lava ku kuma male ya yinyingi. — Heb. 13:5.

Se, ku vuliwa yini hi ku tirhisa mamensajem swaku ku kombeliwa male kuva ku pfuniwa vamakwerhu lava nga humeleliwa hi tinghozi kumbe swikarhatu swin’wana? Leswi hi va rhandzaka vamakwerhu, loko va humeleliwa hi minchumu ya ku fana ni leyo, ha swi lava ku va pfuna. (Yak. 2:15, 16) Kambe ku yentxa leswo hi ku tirhisa ma aplicativo ya ku rhumela mamensajem swi nga yentxa swaku leswi betele ni mabandla ma swi yentxaka swaku ku pfuniwa vamakwerhu lava, swi nga fambi kahle. (1 Tim. 5:3, 4, 9, 10, 16) Naswona a hi lavi ku yentxa vamakwerhu va pimisa swaku hi vekiwile kuva hi yentxa ntirho lowu wa ku pfuna lava nga humeleliwa hi tinghozi.

Hi lava ku yentxa swilo leswi dzunisaka Yehovha. (1 Kor. 10:31) Hi mhaka leyo, na hi nge se tirhisa a aplicativo la ku rhumela mamensajem hi lava ku rhanga hi ku pimisa hi tinghozi leti nga vaka kona loko hi nga li tirhisi kahle, hi tlhela hi tivonela.