1-2. Hi mani lweyi a nga pfunaka lava djondzeliwaka Bibele swaku va tsakamisiwa?

AMY lweyi a tshamaka Fiji, a li: “A ni swi rhandza leswi a ni swi djondza ka Bibele, a ni swi tiva swaku leswi ni swi djondzaka i ntiyiso. Kambe ni sungule ku txintxa mahanyelo ya mina ni tlhela ni lava ku tsakamisiwa nkama ni nga sungula ku ya mintlhanganwini.” Leswi swi nga humelela Amy swi hi djondzisa nchumu wa lisima, wa leswaku xidjondzo xa Bibele xi nga tiyisa wunghanu la xona na Yehovha xi tlhela xi tsakamisiwa loko xi pfuniwa hi vamakwerhu van’wana abandleni.

² Vachumayeli hinkwavu va nga pfuna lava va djondzeliwaka Bibele swaku va va vamakwerhu. (Efe. 4:16) Leilani, mupfuli wa ndlela lweyi a tshamaka a Vanuatu, a li: “Vanhu va talisa ku vula swaku a n’wana a nga djondzisiwi hi munhu mun’we. Ni vona swaku leswo swa tirha loko swi ta ka ku djondzisa vanhu ntiyiso, hikusa a bandla hinkwalu li nga pfunisa leswaku munhu a djondza ntiyiso.” Ndjangu, vanghanu ni vaprisori va pfunisa leswaku n’wana a kula kahle. Va yentxa leswo hi ku mu pfuna ni ku mu djondzisa a minchumu ya lisima. Hi ku fanana vamakwerhu hinkwavu bandleni va nga pfuna lava djondzeliwaka Bibele hi ku va vekela xikombiso xa xinene leswaku va tsakamisiwa. — Swi. 15:22.

3. U djondza yini ka leswi swi nga vuliwa hi Ana, Dorin na Leilane?

³ Hi mhaka muni makwerhu lweyi a nga ni xidjondzo xa Bibele a fanele a pfumela ku pfuniwa hi vachumayeli van’wana? Ana, mupfuli wa ndlela wa ku hlawuleka lweyi a tshamaka a Moldova, a li: “Swa karhata swaku munhu mun’we a vona hinkwaswu leswi xidjondzo xi lavaka ku pfuniwa ka swona loko xi sungula ku tiyisa wunghanu la xona na Yehovha.” Dorin, lweyi a nga mupfuli wa  ndlela wa ku hlawuleka a Moldova, a vule leswi: “Ha kanyingi swa yentxeka makwerhu mun’wana a vula nchumu lexi nga ta khumba mbilu ya munhu lweyi u mu djondzelaka Bibele, nchumu xa ku a wu nge se tshama u xi pimisa.” Se Leilani, a li: “Loko vamakwerhu va komba xidjondzo swaku va xi rhandza, swi yentxa swaku xi swi vona swaku hi vanhu va Yehovha.” — Yoh. 13:35.

4. Hi ta djondza hi yini ka nhlokomhaka leyi?

⁴ Phela u nga ha tivutisa leswi: ‘Ni nga mu pfunisa ku yini lweyi a djondzeliwaka Bibele, swaku a tiyisa wunghanu la yena na Yehovha na ku nga li mina ni mu djondzisaka?’ A hi voneni leswi u nga swi yentxaka loko makwerhu a ku rhamba leswaku mi ya djondza ni munhu, ni leswi u nga swi yentxaka loko munhu lweyi a djondzeliwaka Bibele a sungula ku ya mintlhanganwini. Naswona hi ta vona swaku madoda ma nga va pfunisa ku yini lava djondzeliwaka Bibele, leswaku va tsakamisiwa.

5. U fanele u yentxa yini loko makwerhu a ku rhamba swaku mi ya djondzisa munhu Bibele?

⁵ Makwerhu lweyi a nga ni xidjondzo xa Bibele, hi yena ku sungula a faneleke a xi pfuna kuva xi twisisa Rito la Xikwembu. Loko a ku rhamba swaku u famba na yena, khumbuka swaku ntirho wa wena i ku mu pfuna. (Ekl. 4:9, 10) Se, u nga yentxa yini swaku u mu pfuna nkama lowu a djondzisaka?

6. Loko va ku rhamba ku ya djondza Bibele ni munhu, u nga swi tirhisisa ku yini leswi nga ka Swivuriso 20:18?

⁶ Tilunghiseleli. Byela n’winyi wa xidjondzo leswaku a ku bulela hi lweyi mi yaka mi ya djondza na yena. (Lerha Swivuriso 20:18.) U nga ha mu vutisa swaku: “U tiva yini hi munhu lweyi hi yaka hi ya djondza na yena? I yini leswi mi nga ta ya djondza hi swona? U lava a twisisa yini ka mhaka leyi? Ku ni nchumu lexi u lavaka ni xi vula kumbe ni nga xi vuli loko hi djondza na yena? Ni nga mu pfunisa ku yini swaku a tiyisa wunghanu la yena na Yehovha?” Makwerhu a nga ta ku bulela hi swihundla swa xidjondzo kambe leswi a nga ta ku byela swi ta ku pfuna. Makwerhu Joy lweyi a nga misiyonariyu, a rhandza ku byela lava a humaka na vona nsimu swilo swa ku fana ni leswo. Yena a li: “Swilo leswi swi pfuna lweyi ni humaka na yena nsimu swaku a tiva ndlela leyi a nga pfunaka hi yona lweyi ni djondzaka na yena Bibele.”

7. Hi mhaka muni u fanele u lunghiselela loko va ku rhamba swaku mi ya djondza ni munhu?

⁷ Loko va ku rhamba swaku u ya ka xidjondzo, swi kahle kuva u lunghiselela leswi mi nga ta djondza hi swona. (Ezra 7:10) Dorin lweyi se hi nga vulavula hi yena, a li: “Na tsaka loko lweyi ni mu rhambaka a lunghiselela djondzo hikusa leswo swi yentxa swaku a pfunisa loko se hi djondza.” Leswo swi ta yentxa swaku lweyi a djondzeliwaka Bibele a vona swaku vachumayeli ha vambirhi va tilunghiselelile, naswona swi ta mu yentxa na yena a navela ku lunghiselela xidjondzo.  Hambiloko swi nga koteki kuva u lunghiselela kahle djondzo, i swinene swaku u tinyika nkama swaku u lunghiselela a tipontu ta lisima ta mhaka leyi mi lavaka ku djondza hi yona.

8. U nga yentxa yini leswaku xikhongelo xa wena xi pfuna lweyi a djondzeliwaka Bibele?

⁸ Ku khongela i swa lisima loko hi djondza ni munhu, hi mhaka leyo pimisa hi leswi u nga ta swi vula loko n’winyi wa xidjondzo a ku kombela swaku u yentxa xikhongelo, leswaku xikhongelo xa wena xi pfuna lweyi mi djondzaka na yena. (Pis. 141:2) Hanae, lweyi a tshamaka Japão, wa ha khumbuka xikhongelo lexi nga yentxiwa hi makwerhu lweyi a nga rhambiwa hi makwerhu lweyi a a mu djondzela Bibele. Yena a li: “Ni vone swaku a a li munghanu wa mukulu wa Yehovha, naswona leswo swi ni yentxe ni lava ku fana na yena. Naswona swi ni tsakisile loko a peta vito la mina ka xikhongelo.”

9. Hi ku ya hi Yakobo 1:19, u nga yentxa yini swaku u pfuna n’winyi wa xidjondzo?

⁹ Pfuna n’winyi wa xidjondzo. Makwerhu Omamuyovbi, mupfuli wa ndlela wa ku hlawuleka wa le Nigéria, a li: “Makwerhu lweyi a rhambiwaka ka djondzo ya Bibele a yentxa kahle loko a yingisela nkama lowu muchumayeli mun’wana a djondzisaka. A nga pfuna n’winyi wa xidjondzo, kambe a nga fanelanga a vulavula hintamu hikusa a xidjondzo a hi xa yena.” U nga wu tivisa ku yini nkama lowu u faneleke u vulavula hi wona? (Swi. 25:11) Yingisela kahle loko muchumayeli a vulavula ni xidjondzo xa yena. (Lerha Yakobo 1:19.) Leswo swi ta ku pfuna swaku u vulavula hi nkama wa wunene. U fanele u pimisa kahle na u nge se vulavula. Hi xikombiso, a wu nga ta vulavula hintamu lakakuva ku khohlwiwa leswi ku djondziwaka hi swona, kumbe ku vulavula hi mhaka yin’wana ya ku a yi fambelani ni leswi mi djondzaka hi swona. Kambe u nga pfuna xidjondzo hi ku vula marito ya matsongo, xikombiso kumbe xivutiso. Minkama yin’wana u nga ha vona swaku a ku na nchumu lexi u nga xi vulaka, kambe loko u xi khensa xidjondzo u tlhela u kombisa swaku u ni mhaka na xona, swi nga xi pfuna swaku xi va munghanu wa Yehovha.

10. Loko u byela lweyi a djondzeliwaka Bibele leswi nga ku humelela ka wutomi la wena, swi nga mu pfunisa ku yini?

¹⁰ Byela xidjondzo leswi nga tshama swi ku humelela. Loko swi fanelile, u nga ha byela xidjondzo swaku u djondzise ku yini ntiyiso, u swi hlulise ku yini swikarhatu, naswona Yehovha a ku pfunise ku yini ka wutomi la wena. (Pis. 78:4, 7) Swi nga yentxeka leswi u nga ta mu byela swi mu pfuna hintamu. Swi nga mu pfuna swaku a tiyisa lipfumelo la yena ni wunghanu la yena na Yehovha a tlhela a tsakamisiwa. Swi nga tlhela swi mu pfuna ku vona leswi a nga swi yentxaka loko a tshuka a kumana ni swikarhatu. (1 Ped. 5:9) Gabriel, mupfuli wa ndlela wa Brasil, a vula leswi nga mu pfuna na a ha djondzeliwa Bibele. A li: “Nkama lowu vamakwerhu va nga ni kontarela swiperiyensiya swa vona, ni vone swaku Yehovha wa swi vona swikarhatu leswi hi kumanaka na swona. Naswona loko vona va swi kotile ku swi hlula, na mina ni nga swi kota.”

11-12. Hi mhaka muni hi fanele hi va yamukela kahle vanhu lava va sungulaka ku ya mintlhanganwini?

¹¹ Leswaku xidjondzo xi tsakamisiwa, swi lava swaku xi ya mintlhanganwini nkama ni nkama. (Heb. 10:24, 25) Muchumayeli hi yena a nga ta rhamba lweyi a djondzaka na yena Bibele swaku a ta mintlhanganwini. Se loko lweyi a djondzeliwaka Bibele a ta mintlhanganwini, hina vachumayeli van’wana, hi fanele hi mu pfuna swaku a tlhela a ta masiku man’wana. Kambe hi nga swi yentxisa ku yini leswo?

¹² Yamukela lweyi a djondzeliwaka Bibele hi lirhandzu. (Rom. 15:7) Loko hi mu yamukela kahle lweyi a djondzeliwaka Bibele, a ta titwa na a li kaya naswona a ta tlhela a ta mintlhanganwini masiku man’wana. U nga mu danisi, kambe mu xoweti u tlhela u mu komba ka vamakwerhu van’wana. U nga pimisi swaku lweyi a mu djondzelaka Bibele hi yena ntsena a nga ta mu pfuna. Hikusa swi nga yentxeka n’winyi wa xidjondzo a xwela kumbe a yentxa mintirho yin’wana. Mu yingiseli kahle loko a vulavula, naswona kombisa swaku u ni mhaka na yena. Ku yentxa leswo swa pfuna. A hi voneni leswi nga yentxekela makwerhu Dmitrii, lweyi a nga ni malembe ya matsongo na a tsakamisiwile naswona i nga mupfunisi wa bandla. Loko a vulavula hi siku la ku sungula a nga ya mintlhanganwini, a li: “Makwerhu mun’wana a ni vone na ni nyimile a handle ka Yindlo ya Wugandzeli na ni chava, hi lirhandzu a ni vitanile swaku hi nghena xikan’we. Vamakwerhu va vanyingi va tile va ta ni xoweta, leswo swi ni hlamalise hintamu naswona ni tsake hintamu lakakuva a ni navela ku ya mintlhanganwini siku ni siku. Leswi ni nga swi vona mintlhanganwini a ni nge se tshama ni swi vona.”

13. Mahanyelo ya wena ma nga mu pfunisa ku yini lweyi a djondzeliwaka Bibele?

¹³ Veka xikombiso xa xinene. Mahanyelo ya wena ma nga pfuna lweyi a djondzeliwaka Bibele swaku a kholwa swaku hi Vakreste va ntiyiso. (Mat. 5:16) Vitalii, mupfuli wa ndlela wa Moldova, a li: “Ni djondze hintamu ka leswi vamakwerhu abandleni a va hanyisa xiswona, mavulavulelo ya vona ni leswi a va tikhomisa xiswona. Leswo swi ni yentxe ni vona swaku hikakunene Timboni ta Yehovha i vanhu va Xikwembu xa ntiyiso.”

14. Xikombiso xa wena xi nga mu pfunisa ku yini munhu mun’wana kuva a kulisa wunghanu la yena na Yehovha?

¹⁴ Leswaku lava djondzeliwaka Bibele va tsakamisiwa, va fanele va tirhisa leswi va swi djondzaka ka wutomi la vona. Phela ku yentxa leswo a swi vevuki. Kambe loko lweyi u mu djondzelaka Bibele a vona swaku wa pfuneka hi leswi u swi djondzaka ka Bibele, na yena a ta lava ku swi tirhisa. (1 Kor. 11:1) Hanae, lweyi se hi nga bula hi yena, a li: “A nkama a ni djondzeliwa Bibele, vamakwerhu a va ni vekela xikombiso xa xinene, hikusa a va yentxa leswi a ni swi djondza naswona a va vulavula kahle hi van’wana. Hi mhaka leyo ni djondze ku pfuna vanhu van’wana, ni va rivalela ni tlhela ni va komba lirhandzu. Hikakunene a ni swi lava ku tekelela vamakwerhu lava.”

15. Hi ku ya hi Swivuriso 27:17, hi mhaka muni swi li swa lisima swaku hi va vanghanu va lava va djondzeliwaka Bibele?

 ¹⁵ Vana munghanu wa lava va djondzeliwaka Bibele. Loko lweyi a djondzeliwaka Bibele a tama a ya mintlhanganwini, na wena tama u kombisa swaku u ni mhaka na yena. (Filp. 2:4) Bula na yena u mu khensa hi minchumu leyi a nga yi txintxa ka wutomi la yena, u mu vutisa swaku yi fambisa ku yini djondzo ya yena ya Bibele, nakambe u nga ha bula na yena hi ndjangu wa yena kumbe ntirho wa yena. Kambe tivoneli swaku u nga mu yentxi swivutiso leswi nga ta mu yentxa a dana. Mabulu lawo ma nga mi yentxa mi va vanghanu. Loko u va munghanu wa lweyi a djondzeliwaka Bibele, swi ta mu pfuna swaku a tsakamisiwa. (Lerha Swivuriso 27:17.) Hanae, lweyi se i nga mupfuli wa ndlela, loko a khumbuka nkama a nga sungula ku ya mintlhanganwini, a li: “Nkama ni nga sungula a ku va ni vanghanu bandleni, a ni swi rhandza hintamu ku ya mintlhanganwini, naswona a ni ya mintlhanganwini hambiloko ni karhalile. A ni swi rhandza hintamu ku va na vona, naswona leswo swi ni pfunile ku tshika vanghanu lava a va nga mu tirheli Yehovha. A ni lava ku tama ni va munghanu wa Yehovha ni tlhela ni tama ni va munghanu wa vamakwerhu. Leswo swi ni yentxe ni lava ku tsakamisiwa.”

16. U nga mu pfunisa ku yini lweyi a djondzeliwaka Bibele swaku a titwa na a li kaya loko a li bandleni?

¹⁶ Loko lweyi a djondzeliwaka Bibele a tama a txintxa wutomi la yena a tlhela a tiyisa wunghanu na Yehovha, mu pfuni swaku a titwa na a lumba bandla. U nga yentxa leswo hi ku mu rhamba swaku a ta kaya ka wena kumbe kun’wana. (Heb. 13:2) Denis, lweyi a tirhelaka Moldova, loko a khumbuka a nkama na a djondzeliwa Bibele, a li: “Minkama yinyingi vamakwerhu a va ni rhamba ni nsati wa mina swaku hi ya hungata na vona. Loko hi li na vona, a va hi byela swaku Yehovha a va pfunise ku yini ka wutomi la vona, leswo a swi hi tiyisa hintamu. Nakambe swi hi pfune ku vona swaku a hi fanele hi tirhela Yehovha, naswona wutomi la hina a li ta tsakisa loko hi yentxa leswo.” Loko munhu a va muchumayeli wa ku kala a nga tsakamisiwanga, u nga ha mu rhamba swaku u huma na yena nsimu. Diego, makwerhu wa Brasil, a vula leswi: “Vamakwerhu va vanyingi a va ni rhamba swaku ni huma na vona nsimu. Leswo a swi ni pfuna swaku ni va tiva kahle, naswona leswo swi ni yentxe ni djondza minchumu ya yinyingi, swi tlhela swi ni yentxa ni tiyisa wunghanu la mina na Yehovha na Yesu.”

17. Madoda ma nga va pfunisa ku yini lava va djondzeliwaka Bibele?

¹⁷ Tinyiki nkama wa ku bula ni lava djondzeliwaka Bibele. Madoda, loko mi komba lava djondzeliwaka Bibele swaku ma va rhandza swi ta va pfuna swaku va tsakamisiwa. Zamani ku bula ni lava djondzeliwaka Bibele loko mi li mintlhanganwini. Va ta swi vona swaku ma va rhandza, ngopfungopfu loko mi khumbuka mavito  ya vona ni ku va vitana hi wona loko va hlamula mintlhanganwini. Tinyikeni nkama wa ku famba ni vachumayeli van’wana loko va ya fambisa swidjondzo. Loko mi yentxa leswo, mi ta pfuna lava va djondzeliwaka Bibele hi ndlela ya ku a mi nga yi nyimelanga. Jackie, lweyi a nga mupfuli wa ndlela lweyi a tshamaka Nigéria, a vule leswi: “Lava ni djondzaka na vona Bibele swa va hlamalisa loko va vona swaku ni fambe ni doda swaku ni ya djondza na vona Bibele. Mun’we wa vona a tshama a vula leswi: ‘Mufundhisi wa mina a nge swi yentxi leswi. O yendzela ntsena lava va mu nyikaka male.’” Xidjondzo lexi se xi sungule ku ya mintlhanganwini.

18. Madoda ma nga swi tirhisisa ku yini leswi swi nga ka Mintirho 20:28?

¹⁸ Djondzisa vachumayeli u tlhela u va tiyisa. Madoda, mi ni ntirho wa lisima wa ku pfuna vachumayeli swaku va wu yentxa kahle ntirho wa vona wa ku chumayela ni ku djondzisa vanhu. (Lerha Mintirho 20:28.) Loko muchumayeli a chava ku djondzisa munhu loko a li na wena, tinyikeli swaku u fambisa djondzo. Jackie, lweyi hi nga vulavula hi yena ku sunguleni, a li: “Minkama ya ku tala madoda ma ni vutisa swaku swi fambisa ku yini swidjondzo swa mina swa Bibele. Naswona loko swi ni karhatela ku fambisa xidjondzo, ma tinyikela swaku ma ni pfuna.” Madoda ma nga va pfuna hintamu vachumayeli swaku va tama va yentxa ntirho wa vona. (1 Tes. 5:11) Jackie a tlhela a ku: “Na tsaka loko madoda ma ni tiyisa ma tlhela ma ni byela swaku ma wu nyika lisima ntirho wa mina. Marito lawa ma ni pepisa moya ku fana ni ku nwa mati ya ku titimeta hi siku la ku hisa. Marito wolawo ma ni yentxa ni vona swaku ni yentxa ntirho wa wunene loko ni djondzisa vanhu, naswona ma ni yentxa ni tsaka hintamu. — Swi. 25:25.

19. Hi wini nchumu lowu hinkwerhu wu hi tsakisaka?

¹⁹ Hambiloko ku nga li na munhu lweyi hi djondzaka na yena Bibele, hi nga swi kota ku pfuna vanhu swaku va tsakamisiwa. Loko makwerhu a ku rhamba swaku mi ya fambisa xidjondzo xa yena, zama ku lunghiselela marito lawa u nga ta ma vula swaku ma tiyisa munhu lweyi mi nga ta djondza na yena kambe na u nga vulavuli ngopfu. Xin’wana hi nga xi yentxaka i ku va vanghanu va lava djondzeliwaka Bibele loko va ta mintlhanganwini, hi tlhela hi va vekela xikombiso xa xinene. Madoda ma nga pfuna lava djondzeliwaka Bibele hi ku tinyika nkama wa ku bula na vona. Naswona ma nga pfuna vachumayeli bandleni hi ku va djondzisa ma tlhela ma va khensa hi ntirho wa vona. Phela a ku na nchumu xa ku tsakisa ku tlula ku tiva swaku hi pfunisile swaku munhu a rhandza Yehovha a tlhela a mu tirhela.