1. Hi mhaka muni Yesu a kombele Yehovha swaku a vhikela vadjondzisiwa va yena?

KA WUSIKU la wugamu Yesu na a li lani misaveni, a a pimisa hi swikarhatu leswi vadjondzisiwa va yena a va ta kumana na swona. Leswi a a va rhandza, a kombele ka Papayi wa yena swaku a va “vhikela ka lweyi wa ku biha”. (Yoh. 17:14, 15) Yesu a a swi tiva swaku loko a tlhelela amatilweni, Sathana a a ta tama a lwisana ni lava lavaka ku tirhela Yehovha. Leswo swi yentxa swaku vanhu va Yehovha va lava ku vhikeliwa.

2. I yini lexi xi hi kholwisaka swaku Yehovha a ta swi hlamula swikhongelo swa hina?

² Yehovha a xi hlamulile xikhongelo xa N’wana wa yena Yesu hikusa a mu rhandza hintamu. Loko hi yentxa leswi hi nga swi kotaka swaku hi tsakisa Yehovha, na hina a ta hi rhandza. Naswona loko hi khongela hi kombela swaku a hi pfuna a tlhela a hi vhikela, a ta hi yingisa a tlhela a hi hlamula. Ku fana ni papayi lweyi a nga ni lirhandzu, Yehovha a ta tama a hlayisa vana va yena hi lirhandzu hikusa loko a nga swi yentxi leswo a nga chimisa vito la yena.

3. Hi mhaka muni hi lava ku pfuniwa hi Yehovha?

³ Phela hi swi lava hintamu ku pfuniwa hi Yehovha hikusa Sathana a hlongoliwile matilweni naswona “a kwatile hintamu”. (Nhla. 12:12) A swi kotile ku yentxa lava va hi hluphaka va pimisa swaku va “yentxela Xikwembu ntirho wa ku kwetsima”. (Yoh. 16:2) Vanhu va ku kala va nga kholwi ka Xikwembu va hi hlupha hi leswi mahanyelo ya hina ma kalaka ma nga fani ni ya misava leyi. Hambi ko yentxeka yini ni yini a hi nga ta chava, hikusa a Rito la Xikwembu li vula leswi: “Hosi ya tshembeka, yi ta mi tiyisa ni ku mi vhikela ka Davulosi.” (2 Tes. 3:3) Se swoswi a hi voneni swaku Yehovha a hi vhikelisa ku yini.

4. Hi ku ya hi Vaefeza 6:13-17, i yini leswi Yehovha a nga hi nyika swaku swi hi pfuna ku lwisana na Sathana?

⁴ Phela Yehovha a hi nyika mpahla ya nyimpi leyi nga ta hi pfuna ku lwisana na Sathana. (Lerha Vaefeza 6:13-17.) Naswona mpahla yoleyo ya ku fanekisela, yi tiyile naswona yi nga hi pfuna hikakunene. Kambe yi nga hi pfuna ntsena loko hi yi tirhisa hi ndlela ya yinene. Se mpahla yoleyo yi nga hi pfunisa ku yini? A hi swi voneni.

5. I yini bandhi la ntiyiso, naswona hi mhaka muni hi fanele hi li boha?

⁵ Bandhi la ntiyiso li fanekisela mintiyiso hinkwayu leyi nga ka Bibele. Se, hi mhaka muni hi fanele hi li boha? Hikusa Sathana i “papayi wa mavunhwa.” (Yoh. 8:44) A ni malembe ni malembe na a hembela vanhu naswona a kanganyisa vanhu va “misava hinkwayu”! (Nhla. 12:9) Kambe ntiyiso lowu nga ka Bibele wa hi vhikela swaku hi nga kanganyisiwi. Se, hi li bohisa ku yini bandhi la ntiyiso? Hi nga li boha hi ku djondza ntiyiso wa Yehovha hi tlhela hi mu gandzela na hi ‘kongomisiwa hi moya wa yena wa ku kwetsima ni ntiyiso,’ ni ku va hi tshembeka ka swilo hinkwaswu. — Yoh. 4:24; Efe. 4:25; Heb. 13:18.

6. I yini xivhikelo xa xifuva, naswona hi mhaka muni hi fanele hi xi yambala?

⁶ Xivhikelo xa xifuva xa ku lulama xi fanekisela minawu ya Yehovha ya ku lulama. Se hi mhaka muni hi fanele hi xi yambala? Ku fana ni xivhikelo lexi vhikelaka mbilu ya musonchwa, na xona xivhikelo xa ku lulama xi nga vhikela timbilu ta hina swaku ti nga kanganyisiwi hi misava ya Sathana. (Swi. 4:23) Yehovha a lava swaku hi mu rhandza hi tlhela hi mu tirhela hi mbilu hinkwayu. (Mat. 22:36, 37) Kambe Sathana a zama ku kanganyisa mbilu ya hina hi ku hi yentxa hi rhandza swilo swa misava leyi, ku nga swilo leswi Yehovha a swi nyenyaka. (Yak. 4:4; 1 Yoh. 2:15, 16) Kambe loko a nga swi koti ku kanganyisa timbilu ta hina, a ta zama ku yentxa swaku vanhu va hi hlupha leswaku hi za hi yentxa swilo leswi Yehovha a swi nyenyaka.

7. Hi nga xi yambalisa ku yini xivhikelo xa ku lulama?

⁷ Hi nga tlhela hi yambala xivhikelo xa ku lulama hi ku hanya hi minawu ya Yehovha. (Pis. 97:10) Van’wana va nga ha pimisa swaku minawu ya Yehovha yi hi tsona nkhululeko. Kambe, loko hi tshika ku hanya hi minawu ya Yehovha hi nga ha fana ni sonchwa leli susaka xivhikelo xa lona na li li nyimpini hi ku pimisa swaku xa bindza. Phela swoleswo a ku ta va wuphunta! Lava va rhandzaka Yehovha va vona minawu ya yena na yi nga “karhati”, kambe na yi ponisa wutomi. — 1 Yoh. 5:3.

8. Swi vula yini ku yambala masandaliya kuva hi chumayela mahungu ya ku tsakisa?

⁸ Pawulo a tlhele a hi byela swaku hi yambala masandaliya swaku hi lunghekela ku chumayela mahungu ya ku tsakisa ya ku rhula. Hi marito man’wana, minkama hinkwayu hi fanele hi tshama na hi lunghekile swaku hi chumayela mahungu ya ku tsakisa. Loko hi bula ni van’wana hi Bibele, lipfumelo la hina la tiyisiwa. Swa tsakisa ku vona swaku vanhu va Yehovha amisaveni hinkwayu va tshama na va lunghekile swaku va chumayela mahungu ya ku tsakisa. Va chumayela mintirhweni, swikola, mabazara, hi munti ni munti, maxaka ya vona, ni vanhu lava va tivaka, naswona va chumayela hambiloko va nga swi koti ku huma makaya. Kambe loko hi chava hintamu ku chumayela lakakuva hi za hi swi tshika, hi nga fana ni musonchwa lweyi a hlivilaka masandaliya loko a li ku lweni anyimpini. Kambe loko a yentxa leswo, minenge ya yena yi nga vavisiwa hi ku vevuka. Hi mhaka leyo, a ta dumeliwa hi ku vevuka naswona swi nga mu karhatela ku yingisa minawu ya komandanti.

9. Xivhikelo xa xikulu xa lipfumelo xi nga hi pfunisa ku yini?

 ⁹ Xivhikelo xa xikulu xa lipfumelo xi fanekisela lipfumelo leli hi nga na lona hi Yehovha. Hi kholwa swaku a ta hi yentxela hinkwaswu leswi a hi tshembisaka swona. Lipfumelo leli li ta hi pfuna ku “kota ku timela maflexa hinkwawu lama pfurhaka”. Hi mhaka muni hi fanele hi tirhisa xivhikelo lexi? Hi mhaka lipfumelo leli la hi vhikela ka tidjondzo ta vanhu va nga tshika ntiyiso, naswona la hi pfuna swaku hi nga godoli loko vanhu va vulavula swa ku biha hi hina. Loko hi nga na lipfumelo a hi nga ta swi kota ku tiyisela loko vanhu van’wana va zama ku hi tshikisa ku yingisa minawu ya Yehovha. Kambe loko hi yala ku yentxa minchumu leyi Yehovha a yi nyenyaka, ku nga va xikola kumbe antirhweni, hi ta va hi tirhisa xivhikelo xa lipfumelo. (1 Ped. 3:15) Xivhikelo xolexo xi nga tlhela xi hi pfuna swaku hi nga pfumeli ku yentxa ntirho lowu nga ta hi yentxa hi nga mu tirheli kahle Yehovha. (Heb. 13:5, 6) Naswona xivhikelo xa xikulu xa lipfumelo xi nga hi pfuna swaku hi tirhela Yehovha ku nga na mhaka swaku hi hluphisiwa ku yini. — 1 Tes. 2:2.

10. I yini kapaseti la ku ponisa, naswona hi mhaka muni hi fanele hi li yambala?

¹⁰ Kapaseti la ku ponisa i ntshembo lowu Yehovha a hi nyikaka wona, ntshembo wa leswaku a ta hi ponisa ka lifu naswona a ta hakela vanhu  hinkwavu lava yentxaka ku rhandza ka yena. (1 Tes. 5:8; 1 Tim. 4:10; Tito 1:1, 2) Ku fana ni kapaseti leli vhikelaka nhloko ya musonchwa, na wona ntshembo wu vhikela mimpimiso ya hina. Hi ndlela yini? Ntshembo lowu wu hi yentxa hi pimisa ntsena hi switshembiso swa Xikwembu naswona wu hi pfuna swaku hi nga hluliwi hi swikarhatu swa hina. Se hi nga li yambalisa ku yini kapaseti leli? Hi nga yentxa leswo hi ku vona swilo hi ndlela leyi Yehovha a swi vonisaka xiswona. Hi xikombiso, a hi swi tshembi swilo leswi hi nga na swona, kambe hi tshemba Yehovha. — Pis. 26:2; 104:34; 1 Tim. 6:17.

11. I yini xipada xa moya wa ku kwetsima, naswona hi mhaka muni hi fanele hi xi tirhisa?

¹¹ Xipada xa moya wa ku kwetsima i Rito la Xikwembu, ku nga Bibele. Xipada xolexo xi ni matimba ya ku pfuna vanhu hinkwavu swaku va djondza ntiyiso va tlhela va nga ha kanganyisiwi hi tidjondzo ta mavunhwa, va tlhela va tshika mahanyelo ya ku biha. (2 Kor. 10:4, 5; 2 Tim. 3:16, 17; Heb. 4:12) Hi djondza ku xi tirhisa kahle xipada lexi loko hi djondza Bibele hi tlhela hi yingisa leswi nhlengeletanu yi hi byelaka swona. (2 Tim. 2:15) Kambe handle ka mpahla ya nyimpi, Yehovha a hi nyika nchumu wun’wana swaku hi lwisana na Sathana. Hi wihi nchumu wolowo?

12. I yini swin’wana hi swi lavaka, naswona hi mhaka muni?

¹² A sonchwa la ku tlhariha la swi tiva swaku a li nge swi koti ku lwa nyimpi ya yikulu na li li loxe, kambe li ta lava ku pfuniwa hi masonchwa man’wana. Se na hina a hi nge swi koti ku hlula na hi li hoxe nyimpi leyi hi yi lwaka na Sathana ni vanhu va yena. Swi ta lava hi pfuniwa hi vamakwerhu. Yehovha a hi nyika “vamakwerhu” va misava hinkwayu swaku va hi pfuna. — 1 Ped. 2:17.

13. Hi ku ya hi Vaheberu 10:24, 25, mintlhanganu yi hi pfunisa ku yini?

¹³ Leswaku hi pfuniwa, hi fanele hi ya mintlhanganwini. (Lerha Vaheberu 10:24, 25.) Minkama yin’wana hi titwa hi hela ntamu, kambe loko hi ya mintlhanganwini hi nga pfuneka. Loko hi ya mintlhanganwini hi pfuneka swinene hi tinhlamulu leti vamakwerhu va ti nyikelaka. Naswona madixkursu ni minkombiso leyi hi yi vonaka yi hi yentxa hi tinyimisela ku tama hi tirhela Yehovha. Mabulu ya ku tsakisa lawa hi nga na wona na mintlhanganu yi nge se sungula kumbe loko yi gamile ma hi tiyisa hintamu. (1 Tes. 5:14) Naswona mintlhanganu yi hi hi pfulela xipfalu xa ku pfuna van’wana. (Mint. 20:35; Rom. 1:11, 12) Mintlhanganu yi tlhela yi hi pfuna hi tindlela tin’wana. Yi hi pfuna ku yampsisa machumayelelo ya hina ni madjondziselo ya hina. Hi xikombiso, hi pfuniwa ku swi tirhisa kahle swilo leswi hi djondzisaka hi swona swa ku fana ni mabuku, mabroxura ni swin’wana. Hi mhaka leyo, tilunghiseleli kahle loko u ya mintlhanganwini. Funtshi loko u li mintlhanganwini, yingisela kahle leswi vulavuliwaka. Loko mintlhanganu yi helile, tirhisa leswi u nga swi djondza. Phela loko u yentxa swilo leswi u ta va “musonchwa wa munene wa Kreste Yesu.” — 2 Tim. 2:3.

14. Hi wini nchumu wun’wana lowu Yehovha a hi nyikaka wona swaku hi lwisana na Sathana?

¹⁴ Phela hi tlhela hi pfuniwa hi tintsumi ta tinyingi. Pimisa hi leswi ntsumi yin’we ntsena yi nga kotaka ku swi yentxa! (Esa. 37:36) Se swoswi pimisa hi leswi tintsumi ta tinyingi ti nga kotaka ku swi yentxa. A ku na munhu kumbe dimoni leli nga kotaka ku hlula tintsumi ta Yehovha ta matimba. Yehovha i Xikwembu xa matimba hinkwawu. Se loko Yehovha a na hina hi ta va ni matimba ku tlula vanhu hinkwavu lava va lwaka na hina ku nga na mhaka swaku i  vanyingi ku fikela kwini. (Vaava. 6:16) Phela leswo i ntiyiso! Loko u tshuka u chavisiwa hi vakolega va wena va xikola, va ntirhweni kumbe hi maxaka ya wena ya ku a hi Timboni, khumbuka swaku loko u na Yehovha u ni matimba. U nga khohlwi, a wu wexe ka nyimpi leyi, u na Yehovha.

15. Hi ku ya hi Esaya 54:15, 17, hi mhaka muni vanhu va nga swi koti ku nyimisa ntirho wa ku chumayela?

¹⁵ Misava leyi fumiwaka hi Sathana yi ni swivangelo swa swinyingi swa ku yi hi nyenya. A hi ngheneleli ka timhaka ta politika naswona a hi yi nyimpini. Hi chumayela vito la Xikwembu, hi chumayela swaku ko va ntsena Mfumu wa Xikwembu lowu nga ta tisa ku rhula lani misaveni, hi tlhela hi yingisa minawu ya Yehovha. Hi byela vanhu swaku lweyi a fumaka misava leyi i muhembi a tlhela a va mudlayi. (Yoh. 8:44) Hi tlhela hi va djondzisa swaku ku sale nkama wa wutsongo swaku misava leyi yi helisiwa. Hambileswo, Sathana ni vanhu va yena a va nge swi koti ku hi miyeta. Kambe hi ta tama hi tirhisa tindlela ta ku hambanahambana swaku hi dzunisa Yehovha! I ntiyiso swaku Sathana a ni matimba, kambe a nge swi koti ku nyimisa ntirho wa ku chumayela amisaveni hinkwayu. Hinkwaswu leswo, swi koteka hi mhaka Yehovha a na hina. — Lerha Esaya 54:15, 17.

16. Yehovha a ta va ponisisa ku yini vanhu va yena ka nhlomulu wa wukulu?

¹⁶ I yini leswi hi nga swi nyimela? Hi nyimele swaku ka nhlomulu wa wukulu Yehovha a hi ponisa hi tindlela timbirhi ta ku hlamalisa. Ku sungula, Yehovha a ta ponisa vanhu va yena nkama lowu a nga ta yentxa swaku mimfumu ya misava yi helisa wukhongeli hinkwalu la mavunhwa. (Nhla. 17:16-18; 18:2, 4) Xa wumbirhi, a ta gama a ponisa vanhu va yena loko a helisa vanhu hinkwavu lava seketelaka Sathana ni mfumu wa yena, ka Armajedoni.— Nhla. 7:9, 10; 16:14, 16.

17. Hi pfuneka hi yini loko hi tama hi va vanghanu va Yehovha?

¹⁷ Loko hi tama hi va vanghanu va Yehovha, Sathana a nge hi yentxi nchumu lexi nga ta hi vavisa wutomi la hina hinkwalu. Ku hambana ni leswo, hi yena a nga ta lovisiwa. (Rom. 16:20) Hi mhaka leyo, tama u yambala mpahla hinkwayu ya nyimpi, naswona u nga tshuki u yi susa! U nga zami ku lwa nyimpi na u li wexe. Pfumelela vamakwerhu va ku pfuna. Naswona yentxa leswi Yehovha a ku byelaka swona. Loko u yentxa leswo, tiyiseka swaku Papayi wa hina wa matilweni, a ta ku tiyisa a tlhela a ku vhikela. — Esa. 41:10.