1-2. Xikombiso xa mupostolo Pawulo xi nga ma pfunisa ku yini madoda?

 MUPOSTOLO Pawulo a a va rhandza vamakwerhu. A a yentxa hinkwaswu leswi a a swi kota swaku a va pfuna. (Mint. 20:31) Na vona vamakwerhu a va mu rhandza hintamu Pawulo. Siku lin’wana, madoda ya bandla la Efeza ma ‘sungule ku rila’ nkama ma nga tiva swaku a ma nge he te mu vona. (Mint. 20:37) Na wona madoda ma va rhandza hintamu vamakwerhu naswona ma yentxa hinkwaswu ma nga swi kotaka swaku ma va pfuna. (Filp. 2:16, 17) Minkama yin’wana, madoda na wona ma kumana ni swikarhatu. Se, i yini lexi nga ma pfunaka swaku ma swi hlula?

² Xikombiso xa Pawulo xi nga ma pfuna madoda. (1 Kor. 11:1) Na yena Pawulo a a nga hetisekanga, naswona minkama yin’wana a swi mu karhatela ku yentxa swa swinene. (Rom. 7:18-20) Hambileswi Pawulo a a kumana ni swikarhatu swa swinyingi, a a nga heli matimba, kambe a a tshama na a tsakile. Loko madoda ma tekelela xikombiso xa mupostolo Pawulo, ma nga swi kota ku lwisana ni swikarhatu leswi ma kumanaka na swona ma tlhela ma tsaka nkama ma tirhelaka Yehovha. A hi voneni swaku ma nga swi yentxisa ku yini leswo.

3. Hi ta bula hi yini ka djondzo leyi, naswona i mpsini swin’wana leswi hi nga ta swi vona?

³ Ka djondzo leyi hi ta bula hi 4 wa swikarhatu leswi madoda ma kumanaka na swona: 1) Ku kuma nkama swaku ma chumayela ni ku yentxa mintirho yin’wana leyi ma faneleke ma yi yentxa, 2) ku kuma nkama swaku ma tiyisa vamakwerhu, 3) ku hela ntamu hi mhaka ku kala ku hetiseka ka vona, ni 4) ku hela ntamu hi mhaka ku kala ku hetiseka ka van’wana. Hi ta vona swaku i yini lexi nga pfuna mupostolo Pawulo swaku a hlula swikarhatu leswi ni leswaku madoda ma nga mu tekelelisa ku yini.

4. Hi mhaka muni minkama yin’wana swi ma karhatela madoda ku rhangela ntirho wa ku chumayela?

⁴ Hi mhaka muni leswo swi nga ha vaka xikarhatu? Madoda ma fanele ma rhangela ntirho wa ku chumayela kambe ma ni mintirho yin’wana ya yinyingi leyi ma faneleke ma yi yentxa. Hi xikombiso, ma rhangela mintlhanganu ya xikarhi ka vhiki ma tlhela ma fambisa Djondzo ya Bibele ya Bandla. Ma fanele ma veka madixkursu abandleni, ma trenara vapfunisi va bandla ma tlhela ma heta nkama wa wunyingi na ma tiyisa vamakwerhu abandleni. (1 Ped. 5:2) Madoda man’wana ma pfunisa ku yaka ni ku lunghisa Tiyindlo ta Wugandzeli ni tindhawu tin’wana ta nhlengeletanu. Kambe, ku fana ni vamakwerhu van’wana abandleni, madoda na wona ma hiseka swinene ka ntirho wa ku chumayela. — Mat. 28:19, 20.

5. Hi xini xikombiso lexi Pawulo a nga hi vekela xona?

⁵ Xikombiso xa Pawulo. Leswi swi nga pfuna mupostolo Pawulo swaku a yentxa kahle ntirho wa yena hi leswi swi nga tsaliwa ka buku la Vafilipiya 1:10, lani a nga tsala a ku: “Langa swa lisima hintamu.” Pawulo a ma tirhisile marito lawa. Phela a hete malembe yamanyingi na a chumayela, funtshi ntirho lowu a wu li wa lisima hintamu ka wutomi la yena. A a chumayela lomu ku nga tala vanhu a tlhela a chumayela ni hi “munti ni munti.” (Mint. 20:20) Pawulo a a chumayela kun’wana ni kun’wana loko a pfulekeliwa hi nkama. A a nga vekisanga siku leli a a to chumayela hi lona ntsena! Hi xikombiso, nkama na a nyimela vamakwerhu a Atena, a chumayele mahungu ya ku tsakisa ka vanhu va ku hloniphiwa hintamu naswona van’wana va ma yamukelile. (Mint. 17:16, 17, 34) Hambi nkama na a li “djele,” Pawulo a nga tshikanga ku chumayela. — Filp. 1:13, 14; Mint. 28:16-24.

6. Pawulo a va pfunise ku yini vamakwerhu van’wana?

⁶ Pawulo a a wu tirhisa kahle nkama wa yena. Minkama hinkwayu a a rhamba vanhu leswaku a chumayela na vona. Hi xikombiso, ka liyendzo la yena la ku sungula, a fambe na Yohani; ka lawumbirhi, a fambe na Timotiyu. (Mint. 12:25; 16:1-4) Pawulo a a yentxa hinkwaswu leswi a nga swi kotaka swaku a pfuna vamakwerhu lava, hi ku va komba swaku va nga swi kotisa ku yini ku lulamisa swilo abandleni, ku tiyisa vamakwerhu ni ku va pfuna swaku va va vadjondzisi va kahle. — 1 Kor. 4:17.

7. Madoda ma nga ma tirhisisa ku yini marito ya Pawulo lawa ma kumekaka ka Vaefeza 6:14, 15?

⁷ Leswi hi swi djondzaka. Madoda ma nga tekelela xikombiso xa Pawulo hi ku chumayela hi munti ni munti ni ku tinyimisela ku chumayela kun’wana ni kun’wana lomu ma nga kona. (Lerha Vaefeza 6:14, 15.) Hi xikombiso, ma nga ha chumayela loko ma ya ku xaveni ka swilo kumbe loko ma li ntirhweni. Naswona loko  ma li ku yakeni ka Tiyindlo ta Wugandzeli, ma nga ha chumayela lava va tshamaka kusuhi na kona kumbe lava va va xaviselaka minchumu. Ku fana na Pawulo, madoda ma nga tirhisa nkama wa wona leswaku ma trenara van’wana, ku patsa ni vapfunisi va bandla.

8. Minkama yin’wana, i yini leswi madoda ma faneleke ma swi yentxa swaku ma nga khomeki ngopfu?

⁸ Madoda a ma fanelanga ma khomeka hintamu hi mintirho ya bandla lakakuva ma pfumala ni nkama wa ku chumayela. Swaku ma kota ku yentxa mintirho hinkwayu leyi ma faneleke ma yi yentxa, minkama yin’wana swi nga ha lava kuva ma nga pfumeli mintirho yin’wana. Loko doda li khongela hi mhaka leyi, swi nga li pfuna ku vona swaku ku pfumela ntirho wolowo swi nga ha yentxa leswaku li nga swi koti ku yentxa mintirho yin’wanyana leyi yi nga ya lisima. Mintirho leyo yi nga ha patsa wugandzeli la ndjangu la vhiki ni vhiki, ku chumayela nkama ni nkama, ni ku djondzisa vana swaku na vona va chumayela. Madoda man’wana swa ma karhatela ku yala mintirho yin’wana, kambe ku tiva swaku Yehovha wa swi twisisa swi nga ma pfuna ku veka nchumu wun’wana ni wun’wana ka ndhawu ya wona.

9. I yini leswi swi nga ha karhatelaka madoda ku swi yentxa hi mhaka leswi ma nga ni mintirho ya yinyingi?

⁹ Hi mhaka muni leswo swi nga ha vaka xikarhatu? Vanhu va Yehovha va kumana ni swikarhatu swa swinyingi. Ka masiku lawa ya wugamu, hinkwerhu hi lava ku tiyisiwa. Naswona minkama yin’wana van’wana va nga ha lava ku pfuniwa leswaku va tshika mahanyelo ya ku biha. (1 Tes. 5:14) Madoda a ma nge swi koti ku susa swikarhatu leswi vanhu va Yehovha va kumanaka na swona. Kambe, Yehovha a lava leswaku madoda ma yentxa hinkwaswu ma nga swi kotaka swaku ma va tiyisa ni ku va vhikela. Leswi ma nga ni mintirho ya yinyingi ya ku yi yentxa, ma nga swi kotisa ku yini ku kuma nkama wa ku pfuna vamakwerhu?

10. Hi ku ya hi 1 Vatesalonika 2:7, Pawulo a va pfunise ku yini vamakwerhu?

¹⁰ Xikombiso xa Pawulo. Pawulo a a lava tindlela ta ku khensa vamakwerhu ni ku va tiyisa. Madoda na wona ma nga tekelela xikombiso xa yena hi ku va rhandza ni ku va tiyisa. (Lerha 1 Vatesalonika 2:7.) Pawulo a a tiyisekisa vamakwerhu swaku wa va rhandza ni swaku Yehovha wa va rhandza. (2 Kor. 2:4; Efe. 2:4, 5) Pawulo a a vona vamakwerhu tanihi vanghanu va yena, naswona a a heta nkama wa wunyingi na vona. A va kombe swaku wa va tshemba hi ku va byela hi leswi a a titwisa xiswona ni ku va byela hi swihoxo swa yena. (2 Kor. 7:5; 1 Tim. 1:15) Pawulo a a nga tshameli ku pimisa hi swikarhatu swa yena, kambe a a yentxa hinkwaswu leswi a swi kotaka swaku a pfuna vamakwerhu.

11. Hi mhaka muni Pawulo a a laya vamakwerhu?

¹¹ Minkama yin’wana a swi lava Pawulo a laya vamakwerhu. Kambe a a nga yentxi leswo hi mhaka leswi a a kwatile. A a swi yentxa hikusa a a va rhandza naswona a a lava ku va vhikela  ka swilo swa ku biha. Yena a a zama ku va yentxa va twisisa leswi a a va layela swona, naswona a a lava swaku va swi yamukela. Hi xikombiso, ka karta a nga tsalela Vakorinto, Pawulo a va layile. Ndzhaku ka ku va a va tsalelile, a rhume Tito leswaku a ya va nyiketa karta lelo. Pawulo a a lava ku tiva swaku va li yamukelise ku yini. A nkama a nga tiva swaku va li yamukelile va tlhela va li tirhisa, swi mu tsakise hintamu! — 2 Kor. 7:6, 7.

12. Madoda ma va pfunisa ku yini vamakwerhu?

¹² Leswi hi swi djondzaka. Madoda ma nga tekelela xikombiso xa Pawulo hi ku heta nkama ni vamakwerhu. Ndlela yin’wana ya ku yentxa leswo i ku hantla va fika amintlhanganwini leswaku va bula ni vamakwerhu. Phela hambi marito ya matsongo lawa ma vuliwaka hi lirhandzu ma nga va tiyisa vamakwerhu. (Rom. 1:12; Efe. 5:16) Madoda lawa ma tekelelaka xikombiso xa Pawulo ma ta tiyisa vamakwerhu hi ku tirhisa Rito la Xikwembu ma tlhela ma va tiyisekisa swaku Xikwembu xa va rhandza hintamu. Naswona ma tiyisekisa vamakwerhu swaku ma va rhandza, ma tlhela ma tinyika nkama wa ku lava ku tiva swaku va ndjhani ni ku lava tindlela ta ku va byela swaku va yentxa ntirho wa kahle. Loko madoda ma tiyisa vamakwerhu, ma yentxa leswo hi ku tirhisa Rito la Xikwembu. Loko madoda ma pfuna vamakwerhu ma kongoma mhaka kambe ma swi yentxa hi ndlela ya kahle hikusa ma va rhandza. — Gal. 6:1.

13. Ku kala ku hetiseka ka madoda ku nga ha yentxa swaku ma titwisa ku yini?

¹³ Hi mhaka muni leswo swi nga ha vaka xikarhatu. Madoda a ma hetisekanga. Na wona ma yentxa swihoxo, ku fana ni vanhu van’wana. (Rom. 3:23) Minkama yin’wana swi nga ha ma karhatela ku va ni vonelo lalinene hi swihoxo swa wona. Van’wana va nga ha pimisa hintamu hi swihoxo swa vona lakakuva va hela matimba. Kambe van’wana va nga ha pimisa swaku swihoxo swa vona a hi swa nchumu, lakakuva va nga yentxi ku txintxa loku ku lavekaka.

14. Hi ku ya hi Vafilipiya 4:13, ku tiveka hansi swi mu pfunise ku yini Pawulo swaku a hlula swikarhatu swa yena?

¹⁴ Xikombiso xa Pawulo. Pawulo a a swi tiva swaku a a nga ta swi kota ku hlula swikarhatu leswi a a li na swona hi matimba ya yena. A a swi tiva swaku a a lava matimba ya Xikwembu. Na a nge se va Mukreste, Pawulo a a ni mona a tlhela a hisekela ku hlupha Vakreste. Kambe a game a swi twisisa swaku leswi a a swi yentxa a swi bihile ivi a txintxa wumunhu la yena. (1 Tim. 1:12-16) Yehovha a mu pfunile leswaku a kombisa lirhandzu, timpsalu, ni ku va munhu lweyi a tivekaka hansi. A a swi twisisa swaku a yentxe minchumu ya yinyingi ya ku biha;  kambe a a tshemba swaku Yehovha a a mu rivalelile, kutani a a nga tshameli ku pimisa hi swona. (Rom. 7:21-25) Pawulo a a nga nyimeli swaku a ta yentxa hinkwaswu leswi nga swinene. Kambe, a a yentxa leswi a swi kotaka swaku a va Mukreste wa munene lweyi a tivekaka hansi ni lweyi a tshembaka swaku Yehovha a ta mu pfuna swaku a yentxa ntirho wa kahle. — 1 Kor. 9:27; lerha Vafilipiya 4:13.

15. Madoda ma nga swi kotisa ku yini ku yampsisa wumunhu la wona?

¹⁵ Leswi hi swi djondzaka. Madoda a ma kumi ntirho lowu hi mhaka leswi ma nga hetiseka. Kambe Yehovha a nyimela swaku ma swi tiva swaku ma yentxa swihoxo ni ku va ma tama ma va ni wumunhu lalinene la Wukreste. (Efe. 4:23, 24) Madoda ma fanele ma tama ma tikambela hi ku tirhisa Bibele ku vona swaku wumunhu la wona la ha li kahle ni loko swi lava swaku ma txintxa. Loko ma yentxa leswo Yehovha a ta ma pfuna swaku ma tsaka ma tlhela ma va madoda ya kahle.  — Yak. 1:25.

16. Ku nga yentxeka yini loko madoda ma tshamela ku vona swihoxo swa vamakwerhu?

¹⁶ Hi mhaka muni leswo swi nga ha vaka xikarhatu? Leswi madoda ma tirhaka kusuhi na kusuhi ni vamakwerhu abandleni swi nga ha ma vevukela ku vona swihoxo swa vona. Kambe ma fanele ma tivonela swaku ma nga va kwateli, ku va khoma hi ndlela ya mona, kumbe ku va yavanyisa. Pawulo a basopise Vakreste hi ku vula swaku leswo hi swona leswi Sathana a swi lavaka. — 2 Kor. 2:10, 11.

17. Pawulo a a va vonisa ku yini vamakwerhu?

¹⁷ Xikombiso xa Pawulo. Pawulo a a ni vonelo la linene hi vamakwerhu. A a swi tiva swaku va yentxa swihoxo, kambe a a nga pfumeleli swaku leswo swi mu kwatisa. Pawulo a a swi tiva swaku ku va munhu a phazama a yentxa swa ku biha a swi lavi ku hlaya swaku i munhu wa ku biha. Hi mhaka leswi a a va rhandza vamakwerhu a a tshamela ku pimisa hi swilo swa swinene leswi a va swi yentxa. Hambiloko minkama yin’wana swi va karhatela ku yentxa swa swinene, Pawulo a a swi tiva swaku va swi lava ku swi yentxa kambe vo lava ku pfuniwanyana.

18. Hi djondza yini ka ndlela leyi Pawulo a nga va pfunisa xiswona Evhodiya na Sintika? (Vafilipiya 4:1-3)

¹⁸ A hi pimiseni hi xikombiso xa Pawulo, xa leswi a nga swi yentxa ka vamakwerhu vambirhi va xisati va bandla la le Filipiya. (Lerha Vafilipiya 4:1-3.) Swi nga ha yentxeka Evhodiya na Sintika va pfumelele ku hambana loku a va li na kona ku yentxa leswaku va nga twanani. Pawulo a nga va khomanga hi ndlela ya mona kumbe ku va yavanyisa, kambe a pimise hi swilo swa swinene leswi a va swi yentxa. Vamakwerhu lava, se a ku li khale na va tirhela Yehovha hi ku tshembeka. Pawulo a a swi tiva swaku Yehovha a a va rhandza. Mavonelo lawo ma yentxe leswaku Pawulo a va pfuna ku lulamisa  xikarhatu lexi a va li na xona. Ku va Pawulo a vona swa swinene ka vamakwerhu swi yentxe leswaku a tshama na a tsakile ni ku tama a tiyisa wunghanu la yena ni vamakwerhu abandleni.

19. a) Hi lini vonelo leli madoda ma faneleke ma va na lona hi vamakwerhu? b) U djondza yini ka mufoto lowu kombisaka doda na li basisa Yindlo ya Wugandzeli?

¹⁹ Leswi hi swi djondzaka. Madoda ma txuvuka wumunhu la linene leli vamakwerhu va nga na lona. Hinkwerhu a hi hetisekanga; kambe mun’wana ni mun’wana a ni wumunhu leli hi nga pfunekaka hi lona. (Filp. 2:3) Minkama yin’wana swi nga ha la,va ku madoda ma hi laya. Kambe ku fana na Pawulo, madoda a ma fanelanga ma landzisela leswi vamakwerhu va swi hlayaka kumbe ku swi yentxa. Handle ka leswo, ma fanele ma vona lirhandzu leli makwerhu a li kombisaka ka Yehovha, ku tiyisela ka yena, ni minzamu leyi a yi yentxaka swaku a yentxa swa swinene. Madoda lawa ma vonaka minchumu yayinene ka vamakwerhu ma pfuna vamakwerhu abandleni ni ku yentxa swaku va titwa na va rhandziwa.

20. I yini leswi madoda ma nga swi yentxaka swaku ma tama ma djondza hi xikombiso xa Pawulo?

²⁰ Madoda ma nga pfuneka loko ma djondza hi xikombiso xa Pawulo. Hi xikombiso, ma nga ha nghena ka Índice das Publicações da Torre de Vigia, ma ya ka xinhlokwanamhaka lexi nge “Paulo” ma gama ma ya lani ku nge “exemplo para os anciãos” (hi Xiputukezi). Nkama u lerhaka timhaka leti, tivutisi leswi: ‘Xikombiso xa Pawulo xi nga ni pfunisa ku yini swaku ni tshama ni tsakile ni ku tama ni wu yentxa kahle ntirho wa mina wa ku va doda?’

21. I mpsini leswi madoda ma nga tiyisekaka hi swona?

²¹ Madoda ma fanele ma khumbuka swaku Yehovha a nga lavi swaku ma hetiseka; kambe a lava swaku ma tshembeka. (1 Kor. 4:2) Yehovha a a wu nyika lisima ntirho lowu Pawulo a a wu yentxa ni ku tshembeka ka yena. Na n’wina madoda mi nga tiyiseka swaku Yehovha a wu nyika lisima ntirho lowu mi mu yentxelaka wona. Naswona Yehovha ‘a nge wu khohlwi ntirho wa n’wina ni lirhandzu leli mi nga li kombisa hi mhaka ya vito la yena, hi ku tirhela vakwetsimi naswona ma ha tamaka mi va tirhela.’ — Heb. 6:10.