Ku tala ka vanhu lava va lerhaka mhaka leyi va hlamala swinene. Kambe ntiyiso wa mhaka hi leswaku a ku ni vavanuna vambirhi lava nga ni vito la ku Mefiboxete, naswona hi nga djondza minchumu ya lisima loko hi pimisa hi leswi swi nga yentxeka ka mhaka leyi.

Hosi Sawulo a a ni 7 wa vana vavanuna ni 2 wa vana vavasati. N’wana wa yena wa mativula a ku li Yonatani, kambe hi ku famba ka nkama Sawulo a game a va ni n’wana mun’wana wanuna ku nga Mefiboxete. Xa ku hlamalisa hi leswaku Yonatani n’wana wa Sawulo na yena a a ni n’wana wawanuna lweyi vito la yena a ku li Mefiboxete. Hi mhaka leyo, hosi Sawulo a a ni n’wana lweyi a a ni vito la ku Mefiboxete, a tlhela a va ni ntukulu lweyi a nga ni vito la ku fana.

Hi ku famba ka nkama, hosi Sawulo a game a nyenya Vagibiyoni a tlhela a zama ku va dlaya, naswona swi tikomba ku tala ka vona va dlayiwile. Kambe leswo a swi bihile hintamu hikusa ka nkama wa Yoxuwa Vayisrayele a va yentxe xipfumelelwanu xa ku hanyisana hi ku rhula ni Vagibiyoni. — Yoxu. 9:3-27.

Phela xipfumelelwanu lexi Vayisrayele va nga xi yentxa ni Vagibiyoni a xa ha tirha ka nkama wa Sawulo. Kambe leswi Sawulo a kalaka a nga xi hetisisanga, yena ni ndjangu wa yena hinkwawu va ve ni “nandzu wa ngati.” (2 Sam. 21:1) Kambe nkama lowu Davhida a nga va hosi, Vagibiyoni va mu yelile va ya mu byela hi xihoxo xa xikulu lexi Sawulo a nga xi yentxa. Se Davhida a va vutise swaku ku nga yentxiwa yini leswaku ku rivaleliwa xihoxo lexi ni swaku Yehovha a tama a va katekisa. Handle ka ku Vagibiyoni va mu kombela male Davhida, va mu kombele swaku ku dlayiwa 7 wa vana va Sawulo lava na vona a va ‘hambe maplanu’ ya ku dlaya Vagibiyoni. (Tinhl. 35:30, 31) Davhida a swi pfumelile leswi va nga mu kombela swona. — 2 Sam. 21:2-6.

Sawulo na Yonatani a va file nyimpini, kambe Mefiboxete n’wana wa Yonatani a a hanya, kambe a a limalile ku sukela a li mutsongo, naswona swi tikomba a a nga li kona nkama lowu vhovho wa yena Sawulo a nga dlaya Vagibiyoni. Davhida a a hlambanyile a byela Yonatani swaku a a ta sala a hlayisa vana va yena ku patsa na Mefiboxete. (1 Sam. 18:1; 20:42) Bibele li vula swaku Davhida a ‘mu twele wusiwana Mefiboxete n’wana wa Yonatani, n’wana wa Sawulo, hi mhaka ya leswi nga fungiwa phambheni ka Yehovha.’ — 2 Sam. 21:7.

Davhida a xi pfumelile xikombelo xa Vagibiyoni hikusa a va nyike 2 wa vana va Sawulo vavanuna naswona mun’we wa vona a ku li Mefiboxete, a tlhela a va nyika 5 wa vatukulu va Sawulo swaku va dlayiwa. (2 Sam. 21:8, 9) Phela leswi Davhida a nga swi yentxa swi yentxe swaku ku nga ha vi ni nandzu wa ngati tikweni.

Phela mhaka leyi yi hi djondzisa swaku nawu wa Yehovha lowu nge “vana va nga tshuki va dlayiwa hi mhaka ya vapsali va vona” wa twisiseka. (Det. 24:16) Phela Yehovha a a nga ta swi pfumelela swaku ku dlayiwa 2 wa vana va Sawulo ni 5 wa vatukulu va yena loko a va nga na nandzu. Nawu lowu wu tlhela wu vula leswi: “Mun’wana ni mun’wana a ta dlayiwa hi mhaka ya xidjoho xa yena.” Swi tikomba vana va Sawulo ni vatukulu va yena lava nga dlayiwa, na vona va nyime na Sawulo loko a ya dlaya Vagibiyoni. Hi mhaka leyo, va dlayiwe hi mhaka ya xidjoho xa vona.

Mhaka leyo yi hi djondzisa swaku a hi fanelanga hi yentxa swilo swa ku biha hi ku tshemba swaku hi ta ku a ho landza nkongomiso. Bibele li vula leswi: “Basisela minenge ya wena ndlela, tindlela ta wena hinkwatu ti ta va tinene.” — Swi. 4:24-27; Efe. 5:15.