1-2. a) I mpsini leswi tolovelaka ku yendleka loko munhu a tsakamisiwa? b) I mpsini leswi u faneleke u pimisa hi swona?

 U TSHAMA u va vona vanhu lava yaka ku tsakamisiweni amasembleya kumbe makongresu? Ndlela leyi va swi hlamulaka hi yona swivutiso swimbirhi leswi va yendliwaka swona yi kombisa swaku va tsakile. Kambe a hi vona ntsena va nga tsaka, hambi hi maxaka ni vanghanu va vona va tsakile. Leswo swa voneka hikusa nkama lowu va humaka matini, vanyingi ka lava nga kona va ba mavoko hi ku tsaka; se leswo swi yendla swaku na vona va tsaka. Phela leswi swi nga tlhamuseliwa lana swa yendleka vhiki lin’wani ni lin’wani loko vanhu vavanyingi va tinyiketela, va tsakamisiwa swaku va va Timboni ta Yehovha.

² Se swi li yini hi wena? Loko swi ku u pimisa hi ku lava ku tsakamisiwa, swi tivi swaku Yehovha wa tsaka hi xiboho xa wena, hikusa ka misava leyi ya Sathana a hi vangani lava yendlaka xiboho xa ku fana ni lexo, xa ku lavetela Yehovha. (Pis. 14:1, 2) Se, ku nga na mhaka swaku u jovhem kumbe se u kulile, nhlokomhaka leyi yi ta ku pfuna swinene. Hambi hi hina van’wani va ku se hi tsakamisiwile, nhlokomhaka leyi yi ta hi pfuna swaku hi tama hi lava ku tirhela Yehovha. A hi voneni swilo swinharhu leswi faneleke swi hi yendla hi lava ku tirhela Yehovha.

3. Hi mhaka muni vanhu va Yehovha va rhandza ntiyiso ni swilo swa ku lulama? (Tipisalema 119:128, 163)

³ Yehovha a lava swaku vanhu va yena va rhandza ntiyiso. (Zak. 8:19) Yesu na yena a byele vadjondzisiwa va yena swaku va fanele va lwela ku va vanhu va ku lulama. (Mat. 5:6) Leswo swi vula swaku na hina hi fanele hi lwela ku yendla swilo swaswinene leswi tsakisaka Yehovha. Wena ke, wa wu rhandza ntiyiso naswona wa swi rhandza swilo swaswinene? Ha tiyiseka swaku wa swi rhandza, funtshi swa ku nyenyentsa ku vona mavunhwa lawa ma nga tala ka misava leyi ya Sathana. (Lerha Tipisalema 119:128, 163.) Phela lava rhandzaka  ku hemba va tekelela Sathana mufumi wa misava leyi. (Yoh. 8:44; 12:31) Lexi Sathana a xi lavisisaka hintamu i ku chimisa vito la Yehovha hilani a nga kotaka hi kona. Sathana a karhi a yendla swoleswo ku sukela ka nkama wa Adamu na Evha. A vula mavunhwa hi Yehovha a hlaya swaku Yena a nga na mhaka na hina, a nga hi rhandzi funtshi a hi fihlela minchumu yayinene leyi a yi ta hi pfuna. (Gen. 3:1, 4, 5) Vanhu va ma kholwa mavunhwa wolawo, naswona leswo swi yendla swaku va pimisa swaku Yehovha i Xikwembu lexi nga ni mona. Se loko vanhu va yendla leswo handle ka ku rhandza ntiyiso, va va va pfulela xipfalu Sathana swaku a va kutxetela kuva va yendla mixaka hinkwayu ya swilo swa ku biha. — Rom. 1:25-31.

4. Yehovha a swi kombisisa ku yini swaku i Xikwembu xa ntiyiso? (Vona mufoto.)

⁴ Yehovha i Xikwembu xa ntiyiso naswona wa va djondzisa ntiyiso hinkwavu lava mu rhandzaka. (Pis. 31:5) Leswo swi yendla swaku vanhu va nga kanganyisiwi hi Sathana va va swibonekana swa yena. Yehovha a tlhela a djondzisa vanhu va yena swaku va tshembeka va tlhela va yendla swa ku lulama funtshi leswo swi yendla swaku va va ni wutomi la kahle va tlhela va hanya hi ku rhula. (Swi. 13:5, 6) Se wena ke, indjhe wa swi vona leswo ka djondzo ya wena ya Bibele? Phela se u djondzile swaku minawu ya Yehovha yi pfuna vanhu hinkwavu naswona yi nga ku pfuna hambi hi wena hi ku kongoma. (Pis. 77:13) Hi mhaka leyo, u lava ku yendla leswi Yehovha a vulaka swaku swi lulamile. (Mat. 6:33) U lava ku nyimelela ntiyiso ni ku kombisa swaku ka Yehovha na Sathana lweyi a hembaka i Sathana. Se u nga swi yendlisa ku yini leswo?

5. U nga swi kombisisa ku yini swaku u rhandza ntiyiso ni swa ku lulama?

⁵ Leswi u hanyisaka xiswona siku ni siku swi nga kombisa swaku u langa ku nyima na Yehovha kumbe ihim! U nga swi kombisa swaku Sathana hi yena a hembaka ni swaku u rhandza ntiyiso, naswona u nga swi kombisa swaku u lava swaku Yehovha a li yena a ku fumaka ni swaku minawu ya yena i yinene. Kambe hi wini nchumu wun’wani lowu nga ta kombisa swaku hikakunene u lange ku nyima na Yehovha? I ku nyiketela wutomi la wena ka yena hi xikhongelo ni ku swi kombisa ka vanhu swaku u tinyiketelile hi ku tsakamisiwa. Phela ku rhandza Yehovha ni swa ku lulama, hi swona leswi faneleke swi ku yendla u lava ku tsakamisiwa.

6. Hi ku ya hi Tipisalema 45:4, i mpsini swi ku yendlaka u rhandza Yesu?

⁶ Hi mhaka muni wena u mu rhandza Yesu? Swin’wani swi ku yendlaka u rhandza Yesu hi leswi  kumekaka ka Tipisalema 45:4. (Lerha.) Ndzimana leyi yi vula swaku Yesu a a rhandza ntiyiso, a a rhandza swa ku lulama funtshi a a tiveka hansi. Se leswi wena u rhandzaka ntiyiso ni swa ku lulama, swa twala kuva u mu rhandza Yesu Kreste hikusa a rhandza leswi na wena u swi rhandzaka. Phela Yesu a a lwela ntiyiso ni swilo swa ku lulama. (Yoh. 18:37) Se a swi kombisise ku yini swaku a a tiveka hansi?

7. Ku tiva swaku Yesu a a tiveka hansi swi fanele swi ku susumetela ku yendla yini?

⁷ Nkama Yesu na a li lani misaveni a swi kombisile swaku hi fanele hi tiveka hansi. Hi xikombiso, yena a a nga tidzunisi kambe a a dzunisa Papayi wa yena. (Marku 10:17, 18; Yoh. 5:19) Ku tiva swaku Yesu a a tiveka hansi swi fanele swi ku yendla u titwisa ku yini? Swi fanele swi ku yendla u mu rhandza u tlhela u lava ku mu landzela. Phela Yesu a a tiveka hansi hileswi a a rhandza Papayi wa yena ni leswi a a lwela ku mu tekelela, hikusa na Yena wa tiveka hansi. (Pis. 18:35; Heb. 1:3) Hinkwaswu leswi swi fanele swi ku yendla u mu rhandza.

8. Hi mhaka muni swi hi tsakisa ku fumiwa hi Yesu?

⁸ Lexi hi yendlaka hi rhandza Yesu hileswaku i Hosi ya hina naswona a ku na hosi yin’wani leyi nga fanisiwaka na yena. Phela Yesu a djondzisiwe hi Yehovha hi ku kongoma funtshi hi Yena lweyi a nga mu veka swaku a va Hosi. (Esa. 50:4, 5) Handle ka leswo, Yesu a tlhele a kombisa swaku wa hi rhandza hi ku tinyikela swaku a hi fela. (Yoh. 13:1) Hi mhaka leyo, swo fanela swaku hi mu rhandza Yesu. Yesu a vitana hinkwavu lava mu rhandzaka swaku i vanghanu va yena. Se hi nga kombisa swaku hi vanghanu va yena ni swaku ha mu rhandza hi ku mu yingisa. (Yoh. 14:15; 15:14, 15) Phela ku va munghanu wa yena i nkateko wawukulu swinene!

9. Ku tsakamisiwa ka Yesu ni ku tsakamisiwa ka hina swi fana kwini?

⁹ Yesu a vule swaku valandzeli va yena va fanele va tsakamisiwa. (Mat. 28:19, 20) Funtshi yena a ve xikombiso xaxinene ka leswo. Hambileswi ku tsakamisiwa ka Yesu ku kalaka ku nga fani kahle ni ku tsakamisiwa ka hina, ku ni minchumunyana leyi fanaka. (Vona kwadru leli nge: “ Ku Tsakamisiwa Ka Yesu Ku Hambanisa Ku Yini Ni Ka Hina?”) Leswi yendlaka swaku ku tsakamisiwa ka Yesu ku yelana ni ku tsakamisiwa ka hina hileswaku yena a tsakamisiwile swaku a yendla ku rhandza ka Papayi wa yena. (Heb. 10:7) Hilani ku fanaka, na hina loko hi tsakamisiwa hi swi kombisa ka vanhu swaku hi nyiketele wutomi la hina ka Yehovha Papayi wa hina. Hi tlhela hi kombisa swaku ku sukela siku lolelo a xa lisima ka hina i ku yendla ku rhandza ka Yehovha. Se hinkwaswu leswo swi kombisa swaku hi tekelela xikombiso xa Yesu.

10. Hi mhaka muni ku rhandza Yesu swi ku yendla u lava ku tsakamisiwa?

¹⁰ Pimisa hi leswi se u swi tivaka hi Yesu. Phela se wa swi tiva swaku Yesu i N’wana wa Xikwembu ni swaku hi yena lweyi Yehovha a nga mu langa swaku a va Hosi ya Mfumu wa Xikwembu. Wa swi tiva swaku Yesu i munhu wa ku hetiseka lweyi a tivekaka hansi a tekelela Papayi wa yena. Wa swi tiva kambe swaku Yesu a nyike swakudla lava a va twa ndlala, a tiyisa lava a va hele ntamu a tlhela a daha lava a va vabya. (Mat. 14:14-21) Funtshi ha tiyiseka swaku wa swi tiva swaku Yesu hi yena lweyi a kongomisaka nhlengeletanu ya Yehovha namuntlha. (Mat. 23:10) Wa swi tiva kambe swaku ku nga li khale a ta tisa minkateko loko se a ta fuma lani misaveni. Leswi se u tivaka hinkwaswu leswi, u nga swi kombisisa ku yini swaku wa mu rhandza? U nga swi kombisa hi ku tekelela xikombiso xa yena. (Yoh. 14:21) Xa ku sungula lexi u nga xi yendlaka i ku nyiketela wutomi la wena ka Yehovha u tlhela u tsakamisiwa.

11. Hi wini nchumu wa lisima lowu faneleke wu ku yendla u lava ku tsakamisiwa naswona hi mhaka muni?

¹¹ Hi wini nchumu wa lisima ku tlula hinkwayu lowu faneleke wu ku yendla u lava ku tsakamisiwa? Yesu a swi kombisile leswo nkama a nga vulavula hi minawu yimbirhi ya lisima ku tlula hinkwayu.  A te: “U fanele u rhandza Yehovha Xikwembu xa wena hi mbilu ya wena hinkwayu, hi wutomi la wena hinkwalu, hi mimpimisu ya wena hinkwayu ni hi matimba ya wena hinkwawu.” (Marku 12:30) Indjhe leswi Yesu a nga swi hlaya a hi swona leswi wena u titwisaka xiswona?

12. I mpsini swin’wani swi ku yendlaka u rhandza Yehovha? (Vona mufoto.)

¹² I mpsini swin’wani swi nga ku yendlaka u rhandza Yehovha? Hi xikombiso, wa swi tiva swaku Yehovha hi yena “Munyiki wa wutomi” ni swaku “nyiko yin’wana ni yin’wana ya yinene ni xihiwa xin’wana ni xin’wana lexi nga hetiseka” swi ta hi ka Yena. (Pis. 36:9; Yak. 1:17) Phela hinkwaswu leswi u nga na swona i Yehovha a nga ku nyika hikusa wa ku rhandza.

13. Hi mhaka muni ku va Yehovha a nyikele hi Yesu swi hi yendla hi ya hi mu rhandza hintamu Yehovha?

¹³ Nchumu wun’wani lowu faneleke wu ku yendla u rhandza Yehovha hileswaku a nyikele hi N’wana wa yena swaku a hi fela. Phela leswo a swi nga vevuki hikusa Yehovha na Yesu a va li vanghanu vavakulu swinene. Hi xikombiso, Yesu a vule swaku ‘Papayi wa mu rhandza’ ni swaku ‘na yena wa mu rhandza Papayi.’ (Yoh. 10:17; 14:31) Phela leswo swa twala hikusa Yehovha na Yesu va hete malembe yamanyingi swinene na va li xikan’we. (Swi. 8:22, 23, 30) Se pimisa hi leswi Yehovha a nga titwisa xiswona nkama a nga pfumelela N’wana wa yena swaku a hluphiwa a tlhela a dlayiwa lani misaveni leswaku hina hi ta kota ku kuma wutomi la ku kala li nga heli. (Yoh. 3:16; Gal. 2:20)  Se leswo a hi swona leswi faneleke swi ku yendla u mu rhandza hintamu Yehovha?

14. Hi wini nchumu wa lisima lowu u nga tilangelaka ku wu yendla ka wutomi la wena?

¹⁴ Leswi se u nga swi djondza hi Yehovha swi ku yendle u ya u mu rhandza, swi tlhela swi ku yendla u lava ku va munghanu wa yena swoswi ni ka nkama lowu taka. Indjhe leswo swi nga koteka? Ina swi nga koteka, hikusa wa ku rhamba swaku u tsakisa mbilu ya yena. (Swi. 23:15, 16) Phela u nga yi tsakisa mbilu ya Yehovha ku nga li hi leswi u swi vulaka ntsena kambe ni hi leswi u swi yendlaka. Mahanyelo ya wena hi wona ma nga ta kombisa swaku hikakunene wa mu rhandza Yehovha. (1 Yoh. 5:3) Phela lowo hi wona nchumu wa lisima lowu u nga tilangelaka ku wu yendla ka wutomi la wena.

15. U nga swi kombisisa ku yini swaku wa mu rhandza Yehovha?

¹⁵ U nga swi kombisisa ku yini swaku wa mu rhandza Yehovha? U nga kombisa swaku wa mu rhandza hi ku yendla xikhongelo xa ku hlawuleka u tinyiketela ka Yena. (Pis. 40:8) Loko se u tinyiketelile, swi kombisi ka vanhu hi ku tsakamisiwa. Hi ku ya hi leswi se hi nga swi vona ka nhlokomhaka leyi, a ku tsakamisiwa i nchumu wa lisima ka wutomi la hina. Ku sukela siku leli u tsakamisiwaka hi lona u kombisa swaku a wa ha tihanyeli kambe u hanyela Yehovha. (Rom. 14:8; 1 Ped. 4:1, 2) Swa twala swaku a ku tsakamisiwa i xiboho xa lisima lexi u faneleke u pimisa kahle hi xona. Kambe loko u xi yendla xiboho lexi, u ta va ni wutomi la ku tsakisa swinene. Hi mhaka muni hi vula leswo?

16. Hi ku ya hi Tipisalema 41:12, Yehovha a ta ku katekisisa ku yini loko u langa ku mu tirhela?

¹⁶ Yehovha i munhu lweyi a rhandzaka ku nyika. Phela leswi Yehovha a nga ta ku nyika swona, swi tlula hinkwaswu leswi wena u nga mu nyikaka swona. (Marku 10:29, 30) Hambi hi swoswi ka misava ya ku biha leyi ya Sathana leyi ngo mbombomela, Yehovha a nga ku nyika wutomi la ku tsakisa, la ku nandzika hintamu swinene. Funtshi leswo ku to va masungulu! Phela ku sukela siku leli u tsakamisiwaka hi lona, u ta va u sungula wutomi la nyuwani leli kalaka li nga gami, u ta tama u tirhela Yehovha wutomi la wena hinkwalu, lirhandzu la wena hi Yehovha li ta ya li kula hintamu swinene; naswona ku fana na Yehovha, u ta hanya nkama wa ku kala wu nga heli. — Lerha Tipisalema 41:12.

17. I mpsini leswi u nga swi nyikaka Yehovha leswi a kalaka a nga li na swona?

¹⁷ Loko u yendla hinkwaswu leswi u nga swi kotaka swaku u tinyiketela ka Yehovha hi xikhongelo u tlhela u tsakamisiwa, u ta va ni lunghelo la ku nyika Yehovha nchumu lexi a kalaka a nga li na xona. I ntiyiso swaku Yehovha hi yena a ku nyikaka minchumu hinkwayu ya ku tsakisa leyi u nga na yona, kambe loko u yendla xiboho xa ku mu tirhela wutomi la wena hinkwalu, u ta mu nyika nchumu lexi a kalaka a nga li na xona, ku nga ku tshembeka ka wena ni ku va u mu tirhela hi mbilu ya wena hinkwayu. (Yobo 1:8; 41:11; Swi. 27:11) Phela a ku na ndlela yin’wani ya ku tirhisa wutomi la wena ku tlula ndlela leyo. Se loko u mu rhandza Yehovha u ta swi lava ku tsakamisiwa.

18. I mpsini leswi u nga tivutisaka swona?

¹⁸ Se wena ke, wa swi lava ku tsakamisiwa? Phela hi wena ntsena u nga hlamulaka xivutiso lexi. Kambe i swinene kuva u tivutisa leswi: ‘Kasi na ha nyimela yini?’ (Mint. 8:36) Ka nhlokomhaka leyi hi bule hi 3 wa minchumu leyi u nga pimisaka hi yona. Wa ku sungula, wena u rhandza ntiyiso ni swa ku lulama. Se tivutisi leswi: ‘Na swi lava ku hanya ka misava leyi vanhu hinkwavu va vulavulaka ntiyiso va tlhela va yendla swaswinene?’ Xa wumbirhi, wena u rhandza Yesu Kreste. Se tivutisi leswi: ‘Na swi lava kuva Yesu a va Hosi ya mina naswona ni tinyimiselile ku tekelela xikombiso xa yena?’ Xa wugamu naswona xaxikulu ku tlula hinkwaswu, u rhandza Yehovha. Se tivutisi leswi: ‘Na swi lava ku tsakisa mbilu ya Yehovha ni ku mu tirhela hilani ni nga kotaka hi kona?’ Loko tinhlamulu ta swivutiso leswi hinkwaswu ku li ina, hi mhaka muni u nga tekeli ku tsakamisiwa? Wa ha nyimela yini? — Mint. 16:33.

19. Hi mhaka muni u nga fanelanga u kanakana ku tsakamisiwa? Nyikela xikombiso. (Yohani 4:34)

¹⁹ Loko u kanakana ku tsakamisiwa pimisa hi xikombiso xa Yesu. (Lerha Yohani 4:34.) Yesu a fanise ku yendla ku rhandza ka Yehovha ni swakudla. Hi mhaka muni? Phela swakudla i swinene ka miri wa hina. Se Yesu a a swi tiva swaku hinkwaswu leswi Yehovha a kombelaka swaku hi swi yendla i swinene ka hina. A a nga ta hi kombela nchumu lexi a xi tivaka swaku xi ta hi vavisa. Xin’wani lexi Yehovha a lavaka swaku hi xi yendla i ku va hi tsakamisiwa. (Mint. 2:38) Se tiyiseka swaku loko u mu yingisa Yehovha hi ku va u tsakamisiwa, swi ta va swinene ka wena. Ha tiyiseka swaku a wu nga ta kanakana ku dla swakudla leswi u swi tivaka swaku swa nandzika. Se hi mhaka muni u kanakana ku tsakamisiwa?

20. Hi ta bula hi yini ka nhlokomhaka leyi taka?

²⁰ Van’wani loko va vutisiwa swaku kasi wa ha nyimela yini swaku u tsakamisiwa? Va tolovela ku hlamula va ku: “Haa mina a ni se lunga, swa ha chotanyana kutsongo.” I ntiyiso swaku xiboho xa ku tinyiketela ni ku tsakamisiwa i xiboho xaxikulu lexi munhu a faneleke a xi yendla, naswona xi lava nkama ni minzamu yayikulu swaku xi fikeleliwa. Se loko swi ku wena wa swi lava hi mbilu hinkwayu ku tsakamisiwa, i mpsini u nga swi yendlaka swaku u tilunghiselela? Xivutiso lexi hi ta bula hi xona ka nhlokomhaka leyi taka.