Ni psaliwe hi 1983. Nkama na ni li mutsongo a ni nga tshameli ku vabya kambe nkama ni nga tlhanganisa 10 wa malembe ni sungule ku twa ku va va ka miri wa mina hinkwawu. Siku lin’wana na ku hundze 2 wa malembe ni pfuke na ni nga swi koti ku famba. Ni zamile ku menxa minenge kambe a yi nga pfumeli. Ku sukela ka siku lelo a na ha tlhelanga ni swi kota ku famba. Mavabyi ya mina ma ni yentxe ni nga ha kuli, ni swoswi loko wo ni vona ingaku no ho va xin’wanana.

Ni tshame tiwheti na ni nga humi kaya kambe siku lin’wana hi pfuxeliwe hi Timboni ta Yehovha. Loko ku ta vayeni a ni talisa ku tumbela kambe siku lelo ni tshamile ni va yingisela. Leswi a va vulavula hi Paradesi ni khumbuke leswi ni nga tshama ni swi twa ka 5 wa malembe lawa ma nga hundza. Ka nkama wolowo a ku ni misiyonariyu mun’we lweyi a va ku hi Jethro lweyi a a tshama aSuriname. A a talisa ku ta kan’we hi wheti a ta hi pfuxela funtshi a a djondza Bibele ni papayi wa mina. Jethro a a li munhu wa munene naswona a ni mu rhandza. Phela vavhovho va mina va tshama va ni teka hi ya ka mintlhanganu ya Timboni ta Yehovha kusuhi ni lomu a hi tshama kona. A nkama Florence, ku nga mun’we wa Timboni leti nga ta hi pfuxela, a nga ni vutisa swaku na swi lava ku djondza ke? Ni pfumelile.

Florence a tlhele a ta ni nuna wa yena Justus naswona va sungule ku djondza na mina Bibele. A nkama va nga vona swaku a ni swi koti ku lerha, va ni djondzisile. Hi ku famba ka nkama a ni swi kota ku tilerhela hi noxe. Siku lin’wana va ni byele swaku va rhumiwe ku ya tirha aSuriname. Lexi vavisaka hi swaku a ku nga ha na munhu lweyi a a ta sala a ni djondzisa Bibele. Kambe na tsaka hi leswi Yehovha a kalaka a nga ni khohlwanga.

Na ku nga se hundza nkama wa wunyingi ku fike mupfuli wa ndlela mun’wana lweyi a vitaniwaka Floyd, naswona a ni kumile na a chumayela hi munti ni munti. A nkama a nga ni vutisa swaku na swi lava kudjondza Bibele, ni sungule ku hlekelela. A gama a ni vutisa a ku: “U hleka yini?” Ni mu byele swaku a ni hetile ku djondza broxura leli nge: I Yini Leswi Xikwembu Xi Swi Languteleke Eka Hina? ni tlhela ni sungula ku djondza buku leli nge: Vutivi Lebyi Yisaka eVuton’wini Lebyi Nga Heriki. * Ni tlhele ni mu byela swaku hi mhaka muni ni nyime ku djondza. Hi game hi hetisa xikan’we buku leli nge: Vutivi kambe na yena va game  va mu rhumela ka ndhawu yin’wana. Ni tlhele ni sala ni nga na munhu wa ku ni djondzisa Bibele.

Hi 2004, vapfuli va ndlela vambirhi va ku hlawuleka ku nga Granville na Joshua va rhumeliwe ku ta tirha aOrealla. Na vona va ni kumile na va chumayela hi munti ni munti. A nkama va nga ni vutisa swaku na swi lava ku djondza ni yo hlekelela. Ni va kombele swaku hi sungulisa buku leli nge: Vutivi hikusa a ni lava ku vona swaku leswi va swi djondzisaka swa fana ni leswi lava van’wana va nga ni djondzisa swona. Granville a ni byele swaku a ku ni mintlhanganu kusuhi ni lomu a hi tshama kona kambe hambileswi a ni ni 10 wa malembe na ni nga humi kaya a ni lava ku ya. Hi mhaka leyo Granville a ni chovhile hi cadeira de rodas swaku hi ya mintlhanganwini.

Hi ku famba ka nkama Granville a ni byele swaku ni titsalisa ka Escola Teocrática. A te: “A wu swi koti ku famba kambe wa swi kota ku vulavula. Siku lin’wana hambi hi wukaneli u ta li veka. Phela swi ta yentxeka leswo!” Marito ya yena ma ni tiyisile.

Ni game ni sungula ku chumayela na yena kambe leswi switaratu a swi nga tshamisekanga a swi karhata ku famba hi cadeira de rodas. Hi mhaka leyo ni kombele Granville swaku a ni peta ka karinya a ni chovha, leswo swini pfunile hintamu. Hi Abril wa 2005 ni tsakamisiwile. Vamakwerhu abandleni va ni djondzise ku hlayisa mabuku ya bandla ni ku tirha ka som.

Lexi vavisaka hi 2007 papayi wa mina a dibe ni boti a fa. Hinkwerhu a kaya a hi vavisekile. Granville a tile a ta khongela na hina a tlhela a hi tiyisa hi ku tirhisa Bibele kambe loko ku hundze malembe mambirhi, Granville na yena a dibe ni boti a fa. Leswo swi hi yentxe hi vaviseka hintamu.

Bandla la hina li sale li nga ha na doda, a ku yo sala mupfunisi mun’we wa bandla. Ni twe ku vava hintamu nkama ku nga fa Granville hikusa a a li munghanu wa mina funtshi a ni mu rhandza. A a ni pfuna swaku ni va munghanu wa Yehovha a tlhela a ni pfuna hi ku ni nyika swilo swin’wana. Ka siku la ku sungula hi nga ya mintlhanganwini na Granville a file va ni kombele swaku ni lerha maparagrafu ka Djondzo ya Murindzi. Ni yo gwenta ku lerha maparagrafu mambirhi ni gama ni sungula ku rila. Ni rile hintamu swi za swi lava ni suka a palku.

Swilo swi sungule ku yampsa nkama ku nga ta vamakwerhu va bandla lin’wana va ta pfunisa aOrealla. Nakambe ku tlhele ku rhumeliwa makwerhu Kojo lweyi a a li mupfuli wa ndlela wa ku hlawuleka. Lexi tsakisaka hi leswaku mamana wa mina ni makwenu wa mina wa mutsongo va sungule ku djondza Bibele va tlhela va tsakamisiwa. Se, hi Março wa 2015 ni vekiwe swaku ni va mupfunisi wa bandla. Hi ku famba ka nkama ni veke wukaneli la mina la ku sungula. Siku lelo ni rile hi ku tsaka na ni khumbuka leswi Granville a nga tshama a ni byela swona swaku: “Siku lin’wana hambi hi wukaneli u ta li veka. Phela swi ta yentxeka leswo!”

Ka JW Broadcasting^® ni vone vamakwerhu van’wana lava na vona va nga ka xiyimu xa ku fana ni xa mina. Hambileswi va nga limala a va hanya wutomi la ku tsakisa funtshi a va swi kota ku yentxa swilo swa swinyingi. Ni vone swaku na mina ni nga swi kota ku yentxa swilo swa swinyingi naswona leswi a ni navela ku yengesela ntirho wa mina ni ve mupfuli wa ndlela wa nkama hinkwawu. Hi Setembro wa 2019 ku yentxeke minchumu ya ku a ni nga yi nyimelanga. Hi wheti leyo ni vekiwe swaku ni va doda ka bandla la hina leli nga ni 40 wa vachumayeli.

Na va khensa vamakwerhu lava nga ni djondzisa ntiyiso va tlhela va ni pfuna swaku ni tirhela Yehovha. Kambe ku tlula hinkwaswu ni khensa Yehovha hikusa a nga ni rivalanga.