1. Swi vula yini ku tirhisa kahle mimpimiso ya hina? (2 Timotiyu 4:5)

 LOKO hi kwatisiwa, swi nga hi karhatela ku tshembeka ka Yehovha ni nhlengeletanu ya yena. Se leswaku swi nga yendleki leswo, swi lava leswaku hi yi tirhisa kahle mimpimiso ya ka hina, hi tshama hi pfule matihlo hi tlhela hi tiyisa lipfumelo la hina. (Lerha 2 Timotiyu 4:5.) Ku tirhisa kahle mimpimiso ya hina swi vula ku tama hi rhula, hi yi kambela kahle minchumu hi tlhela hi vona swilo hi ndlela leyi Yehovha a swi vonaka hi yona. Loko hi yendla leswo, a hi nga ta yendla swilo hi ku ya hi leswi hina hi titwisaka xiswona.

2. Hi ta bula hi yini ka nhlokomhaka leyi?

² Ka nhlokomhaka leyi nga hundza, hi bule hi 3 wa swikarhatu leswi nga ha vangiwaka hi vanhu va le handle ka nhlengeletanu. Ka nhlokomhaka leyi, hi ta vulavula hi 3 wa swikarhatu leswi hi nga ha kumanaka na swona a ndzeni ka nhlengeletanu leswi nga ringaka ku tshembeka ka hina ka Yehovha. Xa ku sungula, loko makwerhu a hi yendlela nchumu xa ku biha; xa wumbirhi, loko va hi laya; xa wunharhu, loko minchumu yi txintxa ka nhlengeletanu. Se hi nga yi tirhisisa ku yini mimpimiso ya hina, hi tlhela hi tshembeka ka Yehovha ni ka nhlengeletanu ya yena loko hi kumana ni swikarhatu leswi?

3. Hi wani mapimiselo lawa hi nga ha vaka na wona loko makwerhu a hi kwatisile?

³ U tshama u kwatisiwa hi makwerhu, kumbe hi munhu lweyi a nga ni mintirho ya yikulu bandleni, wa ku fana ni doda? Swi nga yendleka a nga yendlanga hi maxivomu. (Rom. 3:23; Yak. 3:2) Kambe leswo swi nga va swi ku vavisile hintamu swinene lakakuva ni ku yetlela u nga yetleli na u tshamela ku tivutisa  leswi: ‘Vamakwerhu va swi yendla leswi? Swi nga yendleka leyi ku nga li yona nhlengeletanu ya Yehovha.’ Phela hi swoleswo Sathana a swi lavaka. (2 Kor. 2:11) Mapimiselo lawa ma nga hi hambanisa na Yehovha ni nhlengeletanu ya yena. Se i ntxini hi nga xi yendlaka loko makwerhu a hi kwatisile?

4. Nkama Yosefa a nga khomiwa hi ndlela ya ku biha, a yendle yini naswona hi djondza yini? (Genesa 50:19-21)

⁴ U nga veketeli xiviti. Nkama Yosefa a a li djaha, vamakwavu va yena va mu yendlele swilo swa ku biha. A va mu nyenya funtshi van’wani va kona a va lava ku mu dlaya. (Gen. 37:4, 18-22) Va game va mu xavisa leswaku a ya va xikarawa. A hete 13 wa malembe na a hlupheka. Swi nga yendleka a tivutisile swaku indjhe Yehovha wa ha mu rhandza, kumbexana Yehovha a mu tshikile nkama lowu a a mu lava hintamu. Nhambileswo a nga veketelanga xiviti. A tame a rhula. Nkama a nga tlhela a tlhangana ni vamakwavu va yena, a nga zanga a va yendlela swa ku biha. A va kombe lirhandzu a tlhela a va rivalela. (Gen. 45:4, 5) A a nga tshameli ku pimisa hi swikarhatu swa yena, kambe xa lisima ka yena a ku li ku tsakisa Yehovha. (Lerha Genesa 50:19-21.) Se hi djondza yini? Loko hi khomiwa hi ndlela ya ku biha, hi nga mu vekeli xiviti Yehovha kumbe ku pimisa swaku a hi tshikile. A hi pimiseni hi ndlela leyi Yehovha a hi pfunaka hi yona ka xiyimu lexo. Loko vanhu va ku khoma hi ndlela ya ku biha, pfumelela lirhandzu li mbhonya a swihoxo swa vona. — 1 Ped. 4:8.

5. Hambileswi Miqueas a nga khomiwa hi ndlela ya ku biha, i mpsini leswi a nga tama a swi yendla?

⁵ A hi voneni xikombiso xa doda la le América do Sul, ku nga Miqueas. b Khambi lin’wani a kwatile hileswi a nga titwa ingi a khomiwe hi ndlela ya ku biha hi vamakwerhu lava a va rhangela abandleni. Yena a li: “A swi nga se tshama swi ni yendlekela swa ku fana ni leswiyani. A ni karhatekile ni tlhela ni rila. Hambi wurhongo a ni nga li kumi, ni nga xi tivi ni xa ku xi yendla.” Hambileswi a nga titwisa xileswi, Miqueas a tame a va ni mapimiselo ya manene a tlhela a tikhoma. A a khongela nkama ni nkama a kombela Yehovha swaku a mu nyika moya wa yena wa ku kwetsima lowu a wu ta mu pfuna kuva a tiyisela. A a kambisisa mabuku ya nhlengeletanu lawa a ma ta mu pfuna ka xiyimu lexi a a li ka xona. Se hi djondza yini ka xikombiso lexi? Loko hi kwatisiwile, A hi tameni hi rhula hi tlhela hi nga pimisi swilo swa ku biha hi makwerhu lwiyani, hikusa swi nga yendleka hi nga swi tivi swaku hi mhaka muni a vulavulile kumbe ku yendla swilo hi ndlela liyani. Khongela ka Yehovha, u mu kombela ku vona swilo hi ndlela leyi van’wani va swi vonaka hi yona. Ku yendla leswo swi ta ku pfuna swaku u nga mu nyiki nandzu makwerhu, u tlhela u pimisa swaku swi nga yendleka a nga swi yendlanga hi maxivomu funtshi u mu rivalela. (Swi. 19:11) Khumbuka swaku Yehovha wa xi tiva xiyimu lexi u tlhangavetanaka na xona naswona a ta ku pfuna swaku u kota ku xi tiyisela. — 2 Tikro. 16:9; Ekl. 5:8.

6. Hi mhaka muni swi li swa lisima ku tiva swaku Yehovha a hi laya hileswi a hi rhandzaka? (Vaheberu 12:5, 6, 11)

⁶ Swa vava ku layiwa, kambe loko hi tshamela ku pimisa hi ku vava koloko, hi nga ha sungula ku tinyimelela hi vula swaku va hoxile hileswi va nga hi laya naswona a va nga fanelanga va yendla leswo. Loko hi yendla leswo, hi nga gama hi khohlwa swaku lweyi a hi layaka hi Yehovha ni leswaku a yendla leswo hikusa wa hi rhandza. (Lerha Vaheberu 12:5, 6, 11.) Loko hi tshamela ku pimisa hi leswi hi titwisaka xiswona hileswi hi nga layiwa, hi va hi  nyika Sathana ndhawu. Phela yena a lava leswaku hi yala ku layiwa naswona hi va kule na Yehovha ni bandla. Se loko u layiwa, i ntxini xi nga ku pfunaka leswaku u vhikela mimpimiso ya wena?

7. a) Leswi Pedru a nga pfumela ku layiwa, Yehovha a mu katekise ku yini? (Vona mufoto ka pajina 22.) b) U djondze yini ka xikombiso xa Pedru?

⁷ Pfumela ku layiwa u tlhela u txintxa. Pedru a layiwile makhambhi yamanyingi hi Yesu Kreste phambheni ka vapostolo. (Marku 8:33; Luk. 22:31-34) Swi nga yendleka leswi swi mu danisile, kambe Pedru a tame a tshembeka ka Yesu. A pfumele ku layiwa a tlhela a djondza ka swihoxo swa yena. Hi mhaka leyo, Yehovha a ku katekisile ku tshembeka ka Pedru hi ku mu nyika mintirho yayinyingi abandleni. (Yoh. 21:15-17; Mint. 10:24-33; 1 Ped. 1:1) Hi djondza yini ka xikombiso xa Pedru? Hambiloko hi karhateka hi tlhela hi dana loko va hi laya, a xa lisima i ku pfumela ku layiwa hi tlhela hi txintxa. Loko hi yendla leswo, hi ta va va lisima ka Yehovha ni ka vamakwerhu.

8-9. a) Nkama Bernardo a nga layiwa, a titwise ku yini ku sunguleni? b) I mpsini swi nga pfuna Bernardo swaku a txintxa mimpimiso ya yena?

⁸ Pimisa hi leswi nga yendlekela Bernardo, makwerhu wa le Moçambique. A titwise ku yini ku sunguleni nkama va nga mu nyimisa ku va doda? Yena a li: “Ni kwate hintamu, funtshi a ni tsakanga hileswi va nga ni nyimisa ntirho wa mina.” Yena a a karhateka hileswi vamakwerhu a va ta mu vonisa xiswona. A tlhela a vula leswi: “Swi teke tiwheti swaku ni tlhela ni vona swilo hi ndlela ya kona ni ku tlhela ni tshemba Yehovha ni nhlengeletanu ya yena. I mpsini leswi nga pfuna Bernardo leswaku a txintxa mimpimiso ya yena?

⁹ Yena a li: “Nkama na na ha li doda, a ni tirhisa Vaheberu 12:7 swaku ni pfuna van’wani kuva va vona ku layiwa ka Yehovha hi ndlela leyi a ku vonaka hi yona. Se ni game ni tivutisa leswi: I mani lweyi a faneleke a swi tirhisa leswi nga ka ndzimana leyi? Phela i hinkwavu, ku patsa na mina.” Leswo swi mu pfunile Bernardo kuva a yendla leswi a nga swi kotaka kuva a tlhela a tshemba Yehovha ni nhlengeletanu ya yena. A tame a djondza Bibele a tlhela a pimisa hi leswi a a swi djondza. Hambileswi minkama yin’wani a a karhateka hi swaku vamakwerhu va mu vonisa ku yini, a a famba na vona nsin’wini, a a li kona ka mintlhanganu hinkwayu funtshi loko a li ka yona a a hlangamela. Hi ku famba ka nkama, Bernardo a tlhele  a va doda. Se na wena, ku fana na Bernardo, loko ku li swaku u layiwile, u nga tshameli ku pimisa hi leswi u titwisaka xiswona hileswi u nga layiwa. Pfumela ku layiwa koloko naswona zama ku txintxa. c (Swi. 8:33; 22:4) Loko u yendla tanu, tiyiseka swaku Yehovha a ta ku katekisa hileswi u nga tshembeka ka yena ni ka nhlengeletanu ya yena.

10. I ku txintxa kwini loku nga ringa ku tshembeka ka Vayisrayele lava a va li valumuzana?

¹⁰ Ku txintxa ka minchumu ndzeni ka nhlengeletanu ku nga ringa ku tshembeka ka hina. Loko hi nga tivoneli, leswo swi nga hi hambanisa na Yehovha. Hi xikombiso, Vayisrayele va kumane na xona xikarhatu xa ku fana ni lexi. Na Nawu wa Moxe wu nga se va kona, valumuzana hi vona a va yendla mintirho ya wuprista. A va yaka ma altari va tlhela va nyikelela mindjangu ya vona magandzelo ka Yehovha. (Gen. 8:20, 21; 12:7; 26:25; 35:1, 6, 7; Yobo 1:5) Kambe a nkama ku nga fika Nawu, swilo swi txintxile. Yehovha a veke vaprista ka ndjangu wa Aroni swaku va nyikela magandzelo. Leswi vulaka swaku loko valumuzana lava kalaka va nga lumbi ndjangu wa Aroni a vo suketana va nyikela magandzelo, a va ta dlayiwa. d (Lev. 17:3-6, 8, 9) Swi nga yendleka ku ve leswo swi nga yendla Kora, Datani, Abirami ni 250 wa tixefi swaku va djikela Moxe na Aroni. (Tinhl. 16:1-3) Loko ku li swaku hi swona leswo, hi nga vula swaku Kora ni lavan’wani hinkwavu va tsandzekile ku tshembeka ka Yehovha. U nga yendla yini loko ku txintxa loku nhlengeletanu yi ku yendlaka ku ringa ku tshembeka ka wena?

11. Hi djondza yini ka xikombiso xa Vakohata?

¹¹ Nyima ni ku txintxa kun’wani ni kun’wani loku yendliwaka hi nhlengeletanu. A nkama Vayisrayele a va famba mananga, Vakohata a va ni ntirho wa lisima hintamu swinene. Loko va suka ka ndhawu leyi va ya ka ndhawu yin’wani, hi vona a va rhwala areka ya ntwananu ya Yehovha. (Tinhl. 3:29, 31; 10:33; Yoxu. 3:2-4) Phela ntirho lowu a wu li wa lisima swinene! Kambe nkama Vayisrayele va nga fika ka tiko la Xitshembiso, swilo swi txintxile, hikusa a swi nga ha lavi swaku areka yi tshamela ku rhwaliwa. Nkama lowu Solomoni a a li hosi, Vakohata va nyikiwe mintirho yin’wani. Van’wani a va yimbelela, van’wani a va li vagwardu kasi van’wani a va vonelela tindhawu leti a ku hlayisiwa ka tona swilo. (1 Tikro. 6:31-33; 26:1, 24) Kambe Vakohata a va zanga va khala, va vula swaku mintirho leyi a va yi yendla khale ya yampsa ku tlula mintirho leyi va yi yendlaka swoswi. Se hi djondza yini ka mhaka leyi? Loko ku va ni ku txintxa ka nhlegeletanu ya Yehovha, seketela hi mbilu ya wena hinkwayu hambiloko ku txintxa koloko ku ku khumba. Tama u tsaka, ku nga na mhaka swaku hi wini ntirho lowu va ku nyikaka, na u khumbuka swaku a lisima la wena ka Yehovha a li pimiwi hi ntirho lowu u wu yendlaka. Lexi nga xa lisima ka Yehovha i ku va u mu yingisa. — 1 Sam. 15:22.

12. Zaina a titwise ku yini nkama va nga mu nyika ntirho wun’wani?

¹² Pimisa hi xikombiso xa makwerhu Zaina, lweyi a nga heta 23 wa malembe ni ku tlula na a tirha Betele, kambe a nga gama a txintxeliwa ntirho wa yena aBetele swaku a ya nsin’wini. Yena a li: “Ku txintxa koloko ku ni vavisile. A  ni titwa ni nga pfuni nchumu naswona a ni tshamela ku tivutisa swaku kasi a ni yo wonha nchumu ke. Lexi twisaka ku vava, vamakwerhu van’wani na vona a va tshamela ku ni byela va ku: Loko a wu nga wonhanga nchumu wena, a va nga ta ku susa Betele.” Ka nkama wolowo, leswo a swi mu heta ntamu Zaina funtshi a a tshamela ku rila siku ni siku. Kambe yena a li: “A ni zanga ni pfumelela swaku ku txintxa koloko ku ni yendla ni kanakana swaku nhlengeletanu ya Yehovha ku patsa na yena Yehovha va ni rhandza.” I mpsini leswi nga pfuna makwerhu Zaina?

13. Zaina a swi kotise ku yini ku susa mimpimiso ya ku biha?

¹³ Zaina a swi kotise ku yini ku susa mimpimiso ya ku biha? A a lerha mabuku lawa a ma mu pfuna ka xikarhatu lexi a a li na xona. Murindzi wa 1 ka Fevereiro wa 2001, lweyi a nga ni nhlokomhaka leyi nge: “U Nga Swi Kota Ku Lwisana Ni Ku Godola” a mu pfunile hintamu swinene. Murindzi lweyi a a vulavula hi Marku, mutsali wa buku la Marku, lweyi a a titwa ku fana na yena. Zaina a li: “Xikombiso xa Marku xi ni pfunile hintamu swinene ka xiyimo lexi a ni li ka xona.” Zaina a nga tshikanga ku tlhangana ni vamakwerhu ni ku chumayela na vona funtshi a a nga titwi ingi o va n’wambiyangwana. A a nga kanakani swaku moya wa ku kwetsima hi wona wu kongomisaka nhlengeletanu leyi ni leswaku vamakwerhu lava rhangelaka va ni mhaka na yena. A tlhele a swi vona swaku nhlengeletanu ya Yehovha yi yendla xin’wani ni xin’wani lexi lavekaka swaku ntirho wa Yehovha wu tama wu ya phambheni.

14. Hi kwini ku txintxa loku makwerhu Vlado a nga kumana na kona, naswona i ntxini xi nga mu pfuna?

¹⁴ Makwerhu Vlado, wa 73 wa malembe, lweyi a nga doda a Eslovénia, a kumane ni xikarhatu nkama bandla la yena li nga patsiwa ni bandla lin’wani, kutani Yindlo ya Wugandzeli leyi a va ya ka yona yi pfaliwa. Yena a li: “A ni nga swi twisisi swaku hi mhaka muni Yindlo liyani ya Wugandzeli yi pfaliwa. Swi ni kwatisile hikusa Yindlo liyani ya Wugandzeli a ya ha li ku yakisiwa xinyuwani, funtshi swin’wani swa leswi a swi li ndzeni ka yona, hi mina ni nga swi yendla hikusa ni karpinteru. Phela a swi hi vevukelanga hina lava se ku nga khale na hi li vachumayeli ka bandla leliyani”. I ntxini lexi nga pfuna Vlado kuva a titwananisa ni ku txintxa koloko? Yena a li: “Ku txintxa  kun’wani ni kun’wani loku yendliwaka hi nhlengeletanu ya Yehovha ku tisa minkateko naswona loko hi titwananisa na kona hi tilunghiselela ku txintxa kakukulu loku nga ta va kona ka nkama lowu taka.” Xana na wena u kumana ni xiyimu xa ku fana ni lexo xa ku va bandla la wena li patsiwa ni lin’wani, kumbe u yamukela mintirho yin’wani? Tiyiseka swaku Yehovha wa ku twisisa. Loko u titwananisa ni ku txintxa koloko, u tlhela u seketela Yehovha ni nhlengeletanu ya yena, u ta kuma minkateko yayinyingi. — Pis. 18:25.

15. Hi nga yi vhikelisa ku yini mimpimiso ya hina loko hi langutana ni swikarhatu abandleni?

¹⁵ Leswi misava ya Sathana yi yaka yi va kusuhi ni ku hela, ha swi tiva swaku swikarhatu swi ta va kona bandleni ni swaku swikarhatu swoleswo swi ta ringa ku tshembeka ka hina ka Yehovha. Se hi fanele hi yi tirhisa kahle mimpimiso ya hina. Loko u yendleliwa nchumu xa ku biha hi makwerhu, u nga veketeli xiviti. Loko u layiwa, hambiloko swi ku khumba, pfumela u tlhela u txintxa. Naswona loko ku txintxa loku nhlengeletanu yi ku yendlaka ku ku khumba, landzela nkongomiso hi mbilu ya wena hinkwayu.

16. U nga swi kotisa ku yini ku tama u tshemba Yehovha ni nhlengeletanu ya yena?

¹⁶ U nga swi kota ku tshemba Yehovha ni nhlengeletanu ya yena loko ku tshembeka ka wena ku ringiwa. Kambe leswaku leswo swi koteka, u fanele u yi tirhisa kahle mimpimiso ya wena, leswi vulaka ku tama u rhula, u yi kambela kahle minchumu, u tlhela u vona swilo hi ndlela leyi Yehovha a swi vonaka hi yona. Tinyimiseli ku djondza swikombiso swa le Bibeleni swa lava nga swi kota ku langutana ni swikarhatu swa ku fana ni leswi u nga na swona u tlhela u pimisa hi swona. Khongela ka Yehovha, u mu kombela swaku a ku pfuna naswona u nga tshiki ku tlhangana ni vamakwerhu. Loko u yendla leswo, hambi xo ta lexi taka, Sathana a nga ta swi kota ku xi tirhisa swaku a ku hambanisa na Yehovha ni nhlengeletanu ya yena. — Yak. 4:7.