NHLOKOMHAKA YA DJONDZO 41
Pfuna Lava U Djondzaka Na Vona Bibele Swaku Va Tsakamisiwa — Parti 1
‘Swavoneka leswaku n’wina mipapela la Kreste, lelihumesiweke hi hina’. — 2 KOR. 3:3.
LISIMU 52 Kutinyiketela ka Xikwembu
LESWI HI NGA TA SWI DJONDZA *
A ku na nchumu xi va tsakisaka hintamu vamakwerhu ku tlula ku vona munhu lweyi a a djondzeliwa Bibele a tsakamisiwa! (Vona paragrafu 1)
1. Buku la 2 Vakorinto 3:1-3, li hi pfunisa ku yini swaku hi tlangela ntirho wa lisima lowu hi nga na wona wa ku djondzisa vanhu Bibele ni ku va pfuna swaku va tsakamisiwa? (Vona foto li nga ka pajina la ku sungula.)
U TITWISA ku yini loko u vona munhu abandleni la n’wina a tsakamisiwa? I ntiyiso swaku hinkwerhu ha tsaka. (Mat. 28:19) Loko ku li swaku hi wena a wu djondza na yena Bibele, u tsaka hintamu loko u mu vona a tsakamisiwa! (1 Tes. 2:19, 20) Lava ha ku tsakamisiwaka va fana ni “mapapela lawa mahitivisaka” kumbe la ma vulavulaka kahle hi hina ni hi vamakwerhu hinkwavu abandleni. — Lerha 2 Vakorinto 3:1-3.
2. a) Hi xini xivutiso xa lisima lexi hi nga ta bula hi xona naswona hi mhaka muni? b) Djondzo ya Bibele i yini? (Vona ntlhamuselo ya le hansi.)
2 Swa tsakisa ku tiva swaku ka 4 wa malembe lama nga hundza hi ve ni swidjondzo swa Bibele * swa kolomu ka 10.000.000 amisaveni hinkwayu wheti ni wheti. Naswona ku tlula 280.000 wa vanhu a va tsakamisiwa va va Timboni ta Yehovha lembe ni lembe. Se, hi nga va pfunisa ku yini vanhu van’wana lava hi djondzaka na vona Bibele swaku va tsakamisiwa? Leswi Yehovha a lehisaka mbilu funtshi a pfumelela vanhu swaku va djondza hi yena, hi fanele hi yentxa hinkwaswu leswi hi nga swi kotaka swaku hi va pfuna va tsakamisiwa hi xihantla hikusa nkama se wu fambile! — 1 Kor. 7:29a; 1 Pet. 4:7.
3. Hi ta djondza yini ka nhlokomhaka leyi?
3 Leswi ntirho wa ku pfuna vanhu swaku va tsakamisiwa wu nga wa lisima, Ntlawa lowu Rhangelaka wu kombele Mabetele swaku ma kambisisa leswi ma nga swi yentxaka swaku ma pfuna vanhu lava va djondzeliwaka Bibele swaku va tsakamisiwa. Ka djondzo leyi ni leyi landzelaka, hi ta vona leswi hi nga swi djondzaka ka vapfuli va ndlela, vamisiyonariyu ni vadjikelezi. * (Swi. 11:14; 15:22) Va tlhamusele leswi vachumayeli ni lava va djondzeliwaka Bibele va nga swi yentxaka swaku djondzo yi famba kahle. Ka djondzo leyi, hi ta vona 5 wa minchumu leyi lava va djondzeliwaka Bibele va faneleke va yi yentxa, swaku va kota ku tsakamisiwa.
DJONDZANI VHIKI NI VHIKI
Vutisa lweyi u djondzaka na yena swaku swi nga koteka a tinyika nkama wa ku mi tshama hansi mi bula (Vona maparagrafu 4-6)
4. I mpsini leswi swi kalaka swi nga koteki loko munhu a nga tinyiki nkama wa ku djondza Bibele?
4 Vamakwerhu va vanyingi va djondza ni vanhu Bibele na va nyime nyanghweni ka kaya ka n’winyi wa munti. Hambileswi lawa ku nga masungulu ya manene ya ku djondza ni vanhu Bibele, kambe nkama lowu va djondzaka wona i wutsongo naswona swi nga yentxeka va nga djondzi vhiki ni vhiki. Leswaku va va pfuna, vamakwerhu van’wana va kombela tinumeru ta vona ta telefoni swaku va ta va ligarela kumbe ku va tsalela mensaji, va bula na vona hi Bibele na va li kaya. Naswona swi nga yentxeka va heta tiwheti na va bulisa xileswi na vona na va nga se sungula ku va fambisela djondzo ya Bibele. A swi nge koteki swaku munhu a tinyiketela a tlhela a tsakamisiwa loko a nga tinyiki nkama kumbe ku yentxa minzamu ya ku djondza Bibele.
5. Hi ku ya hi Luka 14:27-33, i mpsini leswi Yesu a nga swi vula leswi nga hi pfunaka loko hi djondzisa vanhu Bibele?
5 Siku lin’wana Yesu a yentxe xikombiso swaku a tlhamusela leswi munhu a faneleke a swi yentxa, loko a lava ku va mudjondzisiwa wa yena. A vulavule hi munhu lweyi a lavaka ku yaka prediyu ni hosi leyi lavaka ku ya nyimpini. Yesu a vule swaku a ku na muyaki ‘lweyi angarhangiki hi kutshama hansi . . . akonta leswi angatahumesa swona’ swaku a heta ku yaka prediyu la yena. Naswona a vule swaku a ku na hosi leyi yi nga yaka nyimpini na “yingarhanganga hi kutshama hansi, yivona” swaku masonchwa yi nga na wona ma ringana ku va ma ya yentxa leswi yi swi lavaka. (Lerha Luka 14:27-33.) Hi ku fanana, Yesu a vule swaku loko munhu a lava ku va mudjondzisiwa wa yena, ku sungula a fanele a kambela swaku i mpsini leswi swi lavekaka. Hi mhaka leyo, hi fanele hi pfuna lava hi djondzaka na vona Bibele swaku va twisisa lisima la ku djondza Bibele vhiki ni vhiki. Hi nga swi yentxisa ku yini leswo?
6. Hi nga yentxa yini swaku hi pfuna lweyi hi djondzaka na yena Bibele?
6 Sungula hi ku lehisanyana mabulu loko u djondza ni munhu na u nyimile a nyanghweni ya kaya ka yena. U nga ha bula na yena hi tindzimana timbirhi ta Bibele. Loko se a ku tolovelile, mu vutise swaku swi nga koteka ku kuma ndhawu leyi mi nga tshamaka mi bula ka yona. Nhlamulu ya yena yi ta kombisa swaku wa swi lava ku djondza Bibele kumbe a nga swi lavi. Leswaku a hantla a kulisa wuxaka la yena na Yehovha, mu vutise swaku a nga swi kota ku djondza kambirhi hi vhiki. Kambe ku djondza kan’we kumbe kambirhi hi vhiki a swi yenelanga. Ku ni swin’wana leswi a faneleke a swi yentxa.
RHANGA HI KU LUNGHISELELA NA MI NGA SE DJONDZA
Rhanga hi ku lunghiselela kahle na mi nga se ya djondza naswona komba lweyi u djondzaka na yena ku lunghiselela (Vona maparagrafu 7-9)
7. U fanele u yentxa yini na u nga se ya u ya djondza ni munhu?
7 Leswi u nga mudjondzisi, sungula hi ku lunghiselela na mi nga se djondza. Sungula hi ku lerha mhaka ya kona u tlhela u lerha ni tindzimana. Vekisa tipontu ta lisima leti nga ta mu pfuna. Pimisa hi nhlokomhaka, swinhlokwanamhaka, swivutiso, tindzimana leti va nga tsala swaku “lerha”, mafoto ni mavhidiyo lama nga ta ku pfuna ku tlhamusela mhaka. U gama u pimisa hi lweyi u djondzaka na yena Bibele ni leswi u nga ta mu tlhamuselisa xiswona hi ndlela ya ku vevuka swaku a ta swi twisisa a tlhela a swi tirhisa ka wutomi la yena. — Neh. 8:8; Swi. 15:28a.
8. Marito ya mupostolo Pawulo lama nga ka Vakolosa 1:9, 10, ma hi djondzisa yini hi ku khongela ka Yehovha hi kombela swaku a pfuna lava hi djondzaka na vona?
8 A nkama u lunghiselelaka, khongela ka Yehovha u mu kombela swaku a pfuna lweyi u djondzaka na yena Bibele. Mu kombeli a ku pfuna swaku u khumba mbilu ya yena. (Lerha Vakolosa 1:9, 10.) Zama ku vona leswi swi nga ha mu tikelaka ku swi twisisa. Khumbuka swaku leswi u swi lavaka i ku mu pfuna swaku a tsakamisiwa.
9. Tlhamusela swaku u nga mu pfunisa ku yini lweyi u djondzaka na yena swaku a lunghiselela.
9 Hi tshemba swaku loko hi djondza na vona nkama ni nkama hi ta va pfuna swaku va khensa leswi Yehovha na Yesu va nga hi yentxela swona. Naswona va lava ku va tiva ku yampsa. (Mat. 5:3, 6) Leswaku lweyi u djondzaka na yena a pfuneka, a fanele a yingisela kahle loko mi djondza. Leswaku a yentxa leswo, mu byeli swaku i swa lisima kuva a lunghiselela, hi ku lerha ni ku pimisa hi leswi a nga swi tirhisisaka xiswona leswi mi nga ta swi djondza. U nga yentxa yini swaku u mu pfuna ku lunghiselela? Lunghiselela na yena, u mu komba leswi va yentxisaka xiswona. * Mu tlhamuseli swaku a nga ti kumisa ku yini tinhlamulu u tlhela u mu pfuna ku markara marito lama nga mu pfunaka ku kuma tinhlamulu. Mu byeli swaku i swa lisima ku hlamula hi marito ya yena. Phela loko a yentxa leswo, u ta swi vona swaku a swi twisisile kumbe a nga swi twisisanga leswi mi djondzaka hi swona. Kambe ka ha ni swin’wana leswi u faneleke u mu pfuna swaku a swi yentxa.
MU DJONDZISI KU VULAVULA NA YEHOVHA SIKU NI SIKU
Djondzisa lweyi u djondzaka na yena Bibele swaku a nga vulavulisa ku yini na Yehovha (Vona maparagrafu 10-11)
10. Hi mhaka muni swi li swa lisima swaku lweyi hi djondzaka na yena a lerha Bibele siku ni siku naswona a nga yentxa yini swaku leswi a swi lerhaka swi mu pfuna?
10 Handle ka kuva u djondza na yena vhiki ni vhiki, ku ni leswi lweyi u djondzaka na yena a faneleke a swi yentxa siku ni siku. A fanele a vulavula na Yehovha. A nga swi yentxisa ku yini leswo? A fanele a yingisa Yehovha a tlhela a mu byela leswi swi nga mbilwini ya yena. A nga yingisa Yehovha hi ku djondza Bibele siku ni siku. (Yoxu. 1:8; Pis. 1:1-3) Mu kombi swaku a nga xi tirhisisa ku yini “Xiyimiso xa Kulerha Bibele” lexi nga ka jw.org. * Leswaku a pfuneka hi leswi a swi djondzaka, mu byeli a yanakanyisisa ni ku tlhela a vona swaku a nga swi tirhisisa ku yini ka wutomi la yena. — Mint. 17:11; Yak. 1:25.
11. U nga mu pfunisa ku yini lweyi u djondzaka na yena swaku a tiva ku khongela, naswona hi mhaka muni swi li swa lisima swaku a khongela nkama ni nkama?
11 Pfuna lweyi u djondzaka na yena swaku a vulavula na Yehovha hi xikhongelo siku ni siku. Khongela hi mbilu ya wena hinkwayu loko mi sungula ku djondza ni loko mi heta u tlhela u peta ni vito la yena ka xikhongelo. Loko a ku twa na wu khongela, a ta djondza swaku na yena a nga khongelisa ku yini hi mbilu ya yena hinkwayu ka Yehovha hi ku tirhisa vito la Yesu Kreste. (Mat. 6:9; Yoh. 15:16) Pimisa hi leswi ku lerha Bibele siku ni siku (ku nga ku yingisa Yehovha) ni ku khongela (ku nga ku vulavula na Yehovha) swi nga ta mu pfunisa xiswona lweyi u djondzaka na yena Bibele swaku a va munghanu wa Yehovha! (Yak. 4:8) Loko a yentxa leswo siku ni siku, swi ta mu pfuna swaku a kulisa wunghanu la yena na Yehovha, a tinyiketela a tlhela a tsakamisiwa. Kambe i mpsini swin’wana swi nga mu pfunaka?
MU PFUNI SWAKU A VA MUNGHANU WA YEHOVHA
12. U nga mu pfunisa ku yini lweyi u djondzaka na yena swaku a va munghanu wa Yehovha?
12 Hi lava swaku lava hi djondzaka na vona Bibele, va mu tiva kahle Yehovha. Kambe swaku leswo swi koteka, leswi va swi djondzaka swi fanele swi khumba timbilu ta vona, va ta kota ku swi tirhisa ka wutomi la vona. Yesu a djondzise vanhu swilo swa swinyingi naswona vanhu a va swi rhandza ku djondzisiwa hi yena hikusa a a khumba timbilu ta vona. (Luk. 24:15, 27, 32) Lweyi u djondzaka na yena Bibele, a fanele a vona Yehovha na a li munhu wa kakunene. Funtshi a fanele a twisisa swaku Yehovha a nga va Papayi, Xikwembu ni Munghanu wa yena. (Pis. 25:4, 5) Loko mi djondza mu yentxi a twisisa swaku Yehovha a tshamise ku yini. (Ekso. 34:5, 6; 1 Pet. 5:6, 7) Ka mhaka yin’wana ni yin’wana leyi mi djondzaka ha yona, mu pfuni a vona swaku Yehovha a tshamise ku yini. Mu pfuni a vona swaku Yehovha wa hi rhandza, a ni wunene ni ntwelawusiwana. Yesu a vule swaku “nawu lowukulu, lowu worhanga” i ku “rhandza Hosi [Yehovha] Xikwembu xa wena.” (Mat. 22:37, 38) Mu pfuni swaku a rhandza Yehovha hi mbilu hinkwayu.
13. U nga yentxa yini swaku u pfuna lweyi u djondzaka na yena Bibele kuva a tiva swaku Yehovha a tshamise ku yini?
13 Loko u bula na yena mu tlhamuseli swaku hi mhaka muni u rhandza Yehovha, leswo swi nga ha mu pfuna swaku a rhandza Yehovha funtshi a lava ku va munghanu wa yena. (Pis. 73:28) Hi xikombiso, ku nga va swaku ku ni ndzimana ya Bibele leyi u yi rhandzaka kumbi marito lama nga ka mabuku ya hina lama vulavulaka hi lirhandzu la Yehovha, wutivi, ku lulama ni matimba ya yena? Loko ku li swaku swi kona, swi tirhisi swaku u mu pfuna a vona swaku hi mhaka muni u rhandza Yehovha. Kambe ku ni swin’wana leswi lava u djondzaka na vona Bibele va faneleke va swi yentxa swaku va ya va rhandza Yehovha va tlhela va tsakamisiwa.
MU PFUNI SWAKU A VA KONA MINTLHANGANWINI
Hantla u pfuna lweyi u djondzaka na yena swaku a va kona mintlhanganwini (Vona maparagrafu 14-15)
14. I yini leswi Vaheveru 10:24, 25 yi swi vulaka swaku yi pfuna lava hi djondzaka na vona Bibele?
14 Hinkwerhu hi lava ku pfuna lava hi djondzaka na vona swaku va tsakamisiwa. Xa lisima lexi hi faneleke hi xi yentxa, i ku va rhamba swaku va va kona mintlhanganwini. Vachumayeli lava nga ni xiperiyensiya, va vula swaku munhu lweyi a tekelaka ku ta mintlhanganwini, a nga hlweli ku kulisa lirhandzu la yena hi Yehovha. (Pis. 111:1) Kasi van’wana, va tlhamusela lava va djondzaka na vona swaku akuva va djondza kahle, va fanele va va kona mintlhanganwini. Lerha Vaheveru 10:24, 25 ni lweyi u djondzaka na yena Bibele u gama u mu tlhamusela swaku hi mhaka muni swi li swa lisima swaku a va kona a mintlhanganwini. Mu kombi vhidiyo leli nge: Xana Kumaheka Yini Salão do Reino? * Mu pfuni a vona swaku mintlhanganu i ya lisima hintamu ka wutomi la yena.
15. Hi nga yentxa yini swaku hi pfuna lava hi djondzaka na vona swaku va va kona mintlhanganwini nkama ni nkama?
15 U nga yentxa yini loko lweyi u djondzaka na yena a nga ti mintlhanganwini nkama ni nkama? Mu tlhamuseli leswi u nga swi djondza ka mintlhanganu ya vhiki lolelo. Loko a vona leswi u yi rhandzisaka xiswona mintlhanganu, na yena a ta va kona. Mu nyike revhixta la Murindzi kumbe xibukwana lexi nge: Mahanyelo ni Ntirhu wa Hina wa Wukreste — Xibukwana xa Mintlhanganu, lexi nga ta tirhisiwa ka vhiki lolelo. Mu kombi leswi nga ta djondziwa ka vhiki lolelo u tlhela u mu vutisa swaku hi swini leswi mu tsakisaka. Leswi a nga ta swi vona ni ku swi twa ka siku la yena la ku sungula la ku ya mintlhanganwini swi tlula hinkwaswu leswi a nga tshama a swi vona ka tindhawu tin’wana. (1 Kor. 14:24, 25) A ta kuma vamakwerhu lava a nga tekelelaka xikombiso xa vona va tlhela va mu pfuna swaku a tsakamisiwa.
16. Ku laveka yini swaku hi pfuna lava hi djondzaka na vona Bibele swaku va tsakamisiwa naswona hi ta djondza hi yini ka nhlokomhaka leyi landzelaka?
16 Hi nga yentxa yini swaku hi pfuna munhu lweyi hi djondzaka na yena Bibele swaku a tsakamisiwa? Hi fanele hi mu pfuna, a vona lisima la ku djondza vhiki ni vhiki ni ku lunghiselela loko hi nga se djondza. Funtshi hi fanele hi mu pfuna a vulavula na Yehovha siku ni siku hi xikhongelo a tlhela a va munghanu wa yena. Hi nga khohlweni ku mu pfuna swaku a va kona mintlhanganwini vhiki ni vhiki. (Vona kwadru leli nge: “ Leswi Lava Djondzeliwaka Bibele Va Nga Swi Yentxaka Swaku Va Tsakamisiwa”.) Ka djondzo leyi landzelaka hi ta vona 5 wa minchumu yin’wana leyi hi nga yi yentxaka swaku hi pfuna lava hi djondzaka na vona Bibele swaku va tsakamisiwa.
LISIMU 76 Swa Tsakisa Kutirhela Yehovha!
^ par. 5 Ku djondzisa munhu swi vula ku mu pfuna, “a txintxa mapimiselo ya yena, leswi a titwisaka xiswona ni mahanyelo ya yena.” Ndzimana ya hina ya lembe ya 2020 ku nga Matewu 28:19, yi hi khumbukisa lisima la ku djondza ni vanhu Bibele ni ku va pfuna swaku va tsakamisiwa. Ka djondzo leyi ni leyi taka, hi ta vona swaku hi nga swi yentxisa ku yini swoleswo.
^ par. 2 MARITO LAMA NGA TLHAMUSELIWA: Loko u kombinara ku djondza ni munhu Bibele u tlhela u mu komba leswi mi nga ta djondzisa xiswona, se u sungulile a djondzo ya Bibele. U nga ha tsala swaku u ni djondzo ya Bibele loko mi djondze kambirhi funtshi u kholwa swaku mi ta tama mi djondza.
^ par. 3 Ka tidjondzo leti, hi ta vona tipontu leti nga kombisiwa ka nhlokomhaka leyi nge: “Ku Fambisa Tidyondzo Ta Bibele Leti Endlaka Nhluvuko” ka Vutirheli Bya Hina Bya Mfumo la ku sukela ka Julho wa 2004 ku ya ka Maio wa 2005.
^ par. 9 Sixtira vhidiyo la 4 minutu leli nge: Ndlela Yopfuna Lava hi Djondzaka na Vona Kulunghiselela Djondzo. Nghena ka JW Library®, lani va nge: ÁUDIO E VÍDEO > AS NOSSAS REUNIÕES E OBRA DE PREGAÇÃO > COMO SER UM PUBLICADOR MELHOR.
^ par. 10 Nghena lani va nge: BIBLIYOTEKA > MABUKU NI MABROXURA.
^ par. 14 Loko u li ka JW Library®, nghena lani va nge: ÁUDIO E VÍDEO > AS NOSSAS REUNIÕES E OBRA DE PREGAÇÃO > AJUDAS PARA A PREGAÇÃO.
