NHLOKOMHAKA YA DJONDZO 42
Pfuna Lava U Djondzaka Na Vona Bibele Swaku Va Tsakamisiwa — Parti 2
‘Tikambisise hi wexe, ni djondzo leyi uyidjondzisaka.’ — 1 TIM. 4:16.
LISIMU 77 Wutivi La Voninga Munyameni
LESWI HI NGA TA SWI DJONDZA *
1. Hi swi tivisa ku yini swaku a ntirho wa ku chumayela wu nga ponisa wutomi la vanhu?
NTIRHO wa ku djondzisa vanhu i wa lisima hikusa wu ponisa wutomi la vona. Hi swi tivisa ku yini? A nkama Yesu a nga rhuma vadjondzisiwa va yena ka Matewu 28:19, 20 a te: ‘Fambani . . . mivayentxa vadjondzisiwa va mina, mivakhuvula.’ Hi mhaka muni swi li swa lisima ku tsakamisiwa? I swa lisima hikusa hi fanele hi tsakamisiwa loko hi lava ku ponisiwa. Lava va lavaka ku tsakamisiwa va fanele va kholwa swaku hi nga kuma wutomi la ku kala li nga heli hi mhaka leswi Yesu a nga hi fela a tlhela a pfuxiwa. Hi mhaka leyo, mupostolo Petro a byele Vakreste van’wana a ku: ‘Ntsakamiso . . . swoswi wa miponisa . . . hi mhaka ya kupfuka ka Yesu Kreste kufeni.’ (1 Pet. 3:21) Hi mhaka leyo, loko munhu a tsakamisiwa a kuma ntshembo wa ku ponisiwa.
2. Hi ku ya hi 2 Timotiya 4:1, 2, hi fanele hi va vadjondzisi va ku tshamisa ku yini?
2 Leswaku hi pfuna vanhu va tiva ntiyiso, hi fanele hi tiva ‘ku djondzisa’. (Lerha 2 Timotiya 4:1, 2.) Hi mhaka muni? Hi mhaka Yesu a hi rhumile a ku: ‘Fambani . . . mivayentxa vadjondzisiwa va mina . . . mivadjondzisa.’ Mupostolo Pawulo na yena a te: “Tiya” ka ntirho lowu ‘hikuva loko uyentxisa swoswo, utatiponisa ni kuponisa vayingisi va wena.’ Phela Pawulo a a ni xivangelo lexi twalaka loko a ku: ‘Tikambisise hi wexe, ni djondzo leyi uyidjondzisaka.’ (1 Tim. 4:16) Leswi swi lavaka hi tiva ku djondzisa swaku hi kota ku pfuna vanhu va tiva ntiyiso, swi lava hi yampsisa madjondziselo ya hina.
3. Hi ta djondza yini ka nhlokomhaka leyi?
3 Hi djondza Bibele ni vanhu va vanyingi a misaveni hinkwayu. Kambe hi lani hi nga swi vona ha kona ka nhlokomhaka leyi nga hundza, hi lava ku va pfuna swaku va tsakamisiwa. Ka djondzo leyi, hi ta vona swilo swin’wana swa 5 leswi hi nga swi yentxaka swaku hi pfuna lava hi djondzaka na vona swaku va tsakamisiwa.
TIRHISA BIBELE LOKO U DJONDZISA
Kombela makwerhu lweyi a tivaka ku djondzisa kahle swaku a ku pfuna ku vona lani u fanelaka u yampsisa kona loko u djondzisa (Vona maparagrafu 4-6) *
4. Hi mhaka muni hi nga fanelanga hi vulavula hintamu loko hi djondza ni munhu Bibele? (Vona ntlhamuselo ya le hansi.)
4 Ha swi rhandza leswi hi swi djondzaka ka Bibele. Hi mhaka leyo, hi tshuka hi vulavula hintamu loko hi djondza ni vanhu. Hambileswo, loko u fambisa Djondzo ya Murindzi, Djondzo ya Bibele ya Bandla kumbe u djondza ni munhu Bibele a wu fanelanga u vulavula ngopfu. U fanele u tikhoma, u nga tlhamuseli hinkwaswu leswi u swi tivaka hi mhaka ya kona. Kambe tirhisa Bibele swaku ku va lona li djondzisaka. * (Yoh. 16:12) Fananisa leswi u swi tivaka swoswi ni leswi a wu swi tiva nkama lowu u nga tsakamisiwa ha wona. U ta vona swaku nkama lowuyani a wo tiva swilo swa switsongo ntsena. (Hev. 6:1) U hete malembe swaku u tiva hinkwaswu leswi u swi tivaka swoswi. Hi mhaka leyo, u nga zami ku djondzisa lweyi u djondzaka na yena minchumu hinkwayu hi nkama wun’we.
5. a) Hi ku ya hi 1 Vatesalonika 2:13, hi lava swaku lava hi djondzaka na vona va twisisa yini? b) Hi nga mu pfunisa ku yini lweyi hi djondzaka na yena swaku a vulavula hi leswi a swi djondzaka?
5 Hi lava ku pfuna lava hi djondzaka na vona va twisisa swaku leswi va swi djondzaka swi tsaliwe ka Bibele. (Lerha 1 Vatesalonika 2:13.) Hi nga swi yentxisa ku yini leswi? Pfuna lweyi u djondzaka na yena swaku a vulavula hi leswi a swi djondzaka. Ku hambana ni ku va u mu tlhamusela leswi ndzimana yi swi vulaka, kombela yena a tlhamusela leswi a swi twisisaka. Mu pfuni a vona swaku a nga swi tirhisisa ku yini leswi a swi djondzaka ka Bibele ka wutomi la yena. Mu hambi swivutiso leswi nga ta ku pfuna ku vona swaku a titwisa ku yini ni swaku a pimisa yini hi leswi a swi djondzaka. (Luk. 10:25-28) Hi xikombiso, u nga ha mu vutisa u ku: “Ndzimana leyi, yi ku djondzisa yini hi Yehovha?” “Leswi u nga swi djondza ka Bibele swi nga ku pfunisa ku yini?” “U titwisa ku yini hi leswi u swi djondzaka?” (Swi. 20:5) Xa lisima ngopfu a hi ku lweyi u djondzaka na yena a tiva swilo swa swinyingi kambe i ku va a tirhisa leswi se a swi tivaka.
6. Hi mhaka muni swi li swa lisima ku famba ni vachumayeli lava tivaka ku djondzisa kahle loko hi ya ku djondziseni?
6 Loko u ya nsin’wini, wa famba ni vachumayeli lava tivaka ku djondzisa kahle? Loko u famba na vona, va vutise swaku va ma vonisa ku yini madjondziselo ya wena. Loko va ku byela leswi u faneleke u yampsisa ka swona, tiveki hansi u swi yentxa. (Fananisa ni Mintirho 18:24-26.) Vutisa makwerhu lweyi u fambaka na yena swaku a mu vonisa ku yini lweyi u djondzaka na yena. Loko u swi lava, u nga ha mu kombela swaku a sala a djondza na yena loko wena u nga li kona. Leswi swi ta pfuna lweyi a djondzeliwaka swaku a tama a djondza ni ku vona lisima la ku djondza. U nga tibyeli swaku lexi i xidjondzo xa “mina”, a ku na mun’wana lweyi a nga xi djondzelaka loko ni nga li kona. Hikusa u lava ku pfuna lweyi u djondzaka na yena swaku a tama a djondza ni ku kulisa wunghanu la yena na Yehovha.
KOMBISA SWAKU WA SWI RHANDZA LESWI U SWI DJONDZISAKA FUNTSHI WA SWI KHOLWA
Byela lweyi u djondzaka na yena leswi van’wana va nga swi yentxa swaku va yampsisa wutomi la vona, swaku a ta vona lisima la ku tirhisa leswi a swi djondzaka (Vona maparagrafu 7-9) *
7. U nga mu pfunisa ku yini lweyi u djondzaka na yena swaku a rhandza leswi a swi djondzaka ka Bibele?
7 Lweyi u djondzaka na yena a fanele a swi vona swaku wa swi rhandza funtshi wa swi kholwa leswi Bibele li swi djondzisaka. (1 Tes. 1:5) Loko u yentxa leswo na yena a ta swi rhandza leswi a swi djondzaka. Loko swi koteka mu byeli swaku ku hanya hi minawu ya Bibele swi ku pfunise ku yini ku txintxa wutomi la wena, swaku a ta swi vona swaku Bibele li nga mu pfuna ka wutomi la yena.
8. U nga yentxa yini swin’wana swaku u pfuna lweyi u djondzaka na yena naswona hi mhaka muni?
8 Loko mi djondza, mu tlhamuseli swikarhatu leswi vamakwerhu va nga kumana na swona ni leswi va nga swi hlulisa xiswona. Loko swi koteka famba ni makwerhu lweyi a nga tshama a humeleliwa hi minchumu leyi nga mu pfunaka. Kumbe u nghena ka jw.org lani va nge: “Bibele Yi Hundzula Vutomi Bya Vanhu” * swaku u kuma swiperiyensiya leswi nga mu pfunaka. Tinhlokomhaka ni mavhidiyo lama nga kona ma ta mu pfuna ku vona swaku i wutlharhi ku tirhisa leswi Bibele li swi djondzisaka awuton’wini la yena.
9. U nga mu pfunisa ku yini lweyi u djondzaka na yena swaku a bula ni maxaka ni vanghanu va yena?
9 Loko lweyi u djondzaka na yena a chadile, nuna wa yena kumbe nsati wa yena na yena wa djondza Bibele? Loko a nga djondzi, mu kombeli swaku mi djondza na yena. Pfuna lweyi u djondzaka na yena swaku a bula hi leswi a swi djondzaka ni maxaka ya yena kumbe vanghanu. (Yoh. 1:40-45) U nga swi yentxisa ku yini? A swi karhati. U nga mu vutisa u ku: “A wu ta yi tlhamuselisa ku yini mhaka leyi ka xaka la wena?” Kumbe u ku: “A wu ta yi tirhisisa ku yini ndzimana leyi swaku u pfuna munghanu wa wena?” Loko u yentxa leswi, u ta pfuna lweyi u mu djondzelaka swaku na yena a va mudjondzisi. Hi ku famba ka nkama loko se a faneleka a nga sungula ku chumayela ni vamakwerhu. Mu vutisi swaku ku ni munhu lweyi a mu tivaka lweyi a lavaka ku djondzeliwa Bibele. Loko a li kona, mu laveteli u mu kombela swaku mi djondza xikan’we Bibele. Mu kombi vhidiyo leli nge: Xana Xifambisiwa Njhani Xidjondzo xa Bibele? *
PFUNA LWEYI U DJONDZAKA NA YENA SWAKU A VA NI VANGHANU ABANDLENI
Pfuna lweyi u djondzaka na yena swaku a kuma vanghanu abandleni (Vona maparagrafu 10-11) *
10. Hi ku ya hi 1 Vatesalonika 2:7, 8, hi nga xi tekelelisa ku yini xikombiso xa Pawulo?
10 Hi fanele hi va rhandza lava hi djondzaka na vona hikusa hi ku famba ka nkama swi nga yentxeka va va vamakwerhu. (Lerha 1 Vatesalonika 2:7, 8.) A swi vevuki swaku lweyi a djondzaka a tshika vanghanu va yena a gama a txintxa mahanyelo ya yena a tirhela Yehovha. Hi fanele hi mu pfuna swaku a kuma vanghanu va kahle abandleni. Zama ku va munghanu wa yena, u tinyika nkama wa ku bula na yena hambi loko mi nga li ka ku djondza. U nga ha mu fonela, u mu tsalela mensaji kumbe u ya kaya ka yena u ya mu pfuxela. Leswo swi ta kombisa swaku wa mu rhandza.
11. Hi nga mu pfunisa ku yini lweyi hi djondzaka na yena swaku a va ni vanghanu abandleni naswona hi mhaka muni?
11 Ku ni xihlayahlaya lexi nge: “A n’wana a hi wa munhu mun’we.” Na hina hi nga ha hlaya leswi: “A xidjondzo a hi xa munhu mun’we.” Hi mhaka leyo, mudjondzisi wa kahle a yentxa swaku lweyi a djondzaka na yena a tiva vamakwerhu abandleni, swaku va ta mu pfuna ku va munghanu wa Yehovha. Na yena lweyi a djondzeliwaka, a ta tsaka loko a tiva vamakwerhu swaku va ta mu pfuna loko a kumana ni swikarhatu. Hi lava swaku lava hi djondzaka na vona va tolovelana ni va makwerhu hinkwavu abandleni. Loko va yentxa leswo swi ta va vevukela ku tshika vanghanu lava kalaka va nga tirheli Yehovha. (Swi. 13:20) Loko vanghanu va vona va khale va sungula ku va nyenya, a va nga ta karhateka hikusa va ni vanghanu va vanene abandleni. — Marka 10:29, 30; 1 Pet. 4:4.
VULAVULA NA YENA HI KU TINYIKETELA KA YEHOVHA NI KU TSAKAMISIWA
Hi kutsongo kutsongo lweyi u djondzaka na yena a ta swi kota ku tsakamisiwa! (Vona maparagrafu 12-13)
12. Hi mhaka muni swi li swa lisima ku vulavula ni lweyi u djondzaka na yena hi ku tinyiketela ni ku tsakamisiwa?
12 U fanele u bula na yena hi lisima la ku munhu a tinyiketela a tlhela a tsakamisiwa. Phela lexi hi yentxaka hi djondza ni vanhu i ku va pfuna swaku va tirhela Yehovha va tlhela va tsakamisiwa. Loko se u djondze na yena tiwhetinyana a tlhela a sungula ku ta mitlhanganwini, a fanele a swi twisisa swaku hi lava ku mu pfuna a va Mboni ya Yehovha.
13. I mpsini leswi lweyi a djondzeliwaka Bibele a faneleke a swi yentxa swaku a ta kota ku tsakamisiwa?
13 Ku ni swilo swa swinyingi leswi lweyi a djondzeliwaka Bibele a faneleke a swi yentxa swaku a ta kota ku tsakamisiwa. Xa ku sungula, a fanele a tiva Yehovha ni ku mu rhandza a tlhela a va ni lipfumelo ka yena. (Yoh. 3:16; 17:3) Funtshi a fanele a va munghanu wa Yehovha ni vamakwerhu abandleni. (Hev. 10:24, 25; Yak. 4:8) Handle ka leswo, lweyi a djondzisiwaka a fanele a tshika mahanyelo ya ku biha a tlhela a tisola ka swidjoho swa yena. (Mint. 3:19) Swin’wana leswi a nga swi yentxaka i ku djondzisa van’wana leswi a nga swi djondza ka Bibele. (2 Kor. 4:13) Loko se a yentxi leswo, hi kona a nga tinyiketelaka ka Yehovha a tlhela a tsakamisiwa. (1 Pet. 3:21; 4:2) Phela a siku leli a tsakamisiwaka ha lona, vamakwerhu hinkwavu abandleni va tsaka! Loko u vona swaku lweyi u djondzaka na yena wa swi yentxa leswi hi kutsongo kutsongo, mu khensi hileswi a swi yentxaka u tlhela u mu pfuna swaku a tama a swi yentxa.
KAMBELA LESWI A FANELEKE A SWI YAMPSISA
14. U nga mu kambelisa ku yini lweyi u djondzaka na yena Bibele?
14 Hi fanele hi lehisa mbilu loko hi pfuna munhu swaku a tinyiketela a tlhela a tsakamisiwa. Kambe hi nkama wun’we, hi fanele hi kambela swaku wa mu rhandza Yehovha ke? Kambela swaku wa swi lava ku yentxa leswi Yesu a nga hi rhuma swaku hi swi yentxa kumbe o lava ku djondza Bibele ntsena.
15. I mpsini leswi nga ku pfunaka ku vona swaku lweyi u djondzaka na yena wa tilunghiselela swaku a ta tsakamisiwa?
15 Minkama hinkwayu kambela swaku hi kwini lani a nga yampsisaka kona. Hi xikombiso, wa kombisa swaku wa mu rhandza Yehovha? Naswona wa khongela ka yena? (Pis. 116:1, 2) Wa swi rhandza ku djondza Bibele? (Pis. 119:97) Wa ya mintlhanganwini nkama ni nkama? (Pis. 22:22) Se a txintxile mahanyelo ya yena? (Pis. 119:112) Se a sungulile ku bula ni vanghanu kumbe maxaka hi leswi a swi djondzaka? (Pis. 9:1) Xa lisima hintamu wa swi lava ku va Mboni ya Yehovha? (Pis. 40:8) Loko lweyi u djondzaka na yena a nga swi yentxi hinkwaswu leswi, zama ku vona swaku hi mhaka muni. Naswona bula na yena hi lirhandzu kambe u nga mu feleli. *
16. I mpsini swi nga ku pfunaka ku vona swaku u fanele u tshika ku djondza ni munhu?
16 Pfana u kambela swaku lweyi u djondzaka na yena swa ha laveka ku tama u mu djondzisa ke? Tivutise leswi: ‘Wa lunghiselela leswi hi nga ta swi djondza? Wa swi rhandza ku va kona mintlhanganwini? A ha ni mahanyelo ya ku biha? Wa ha ya kerekeni?’ Loko ku li swaku wa ha swi yentxa swilo leswo, loko u tama u djondza na yena swi fana ni ku djondzisa munhu ku hlambeta na a nga swi lavi ku tsakama. Loko munhu yelweyo a nga swi rhandzi leswi mi swi djondzaka funtshi a nga lavi ku txintxa mahanyelo ya yena, hi mhaka muni wa ha djondza na yena?
17. Hi ku ya hi 1 Timotiya 4:16, i mpsini leswi hi faneleke hi swi yentxa?
17 Ntirho wa hina wa ku djondzisa vanhu ni ku va pfuna swaku va tsakamisiwa i wa lisima hintamu. Hi mhaka leyo, hi fanele hi tirhisa Bibele loko hi djondzisa hi tlhela hi komba lava hi djondzaka na vona swaku ha swi rhandza leswi hi va djondzisaka swona funtshi ha swi kholwa. Hi fanele hi pfuna lweyi hi djondzaka na yena Bibele swaku a va ni vanghanu abandleni. Hi bula na yena hi mhaka ya ku tinyiketela ni ku tsakamisiwa hi tlhela hi mu kambela lomu a faneleke a yampsisa kona. (Vona kwadru leli nge: “ Leswi U Nga Swi Yentxaka Swaku U Pfuna Lava U Djondzaka Na Vona Swaku Va Tsakamisiwa”.) Hi tsaka swinene loko hi yentxa ntirho lowu nga ta ponisa wutomi la vanhu. Hi fanele hi yentxa leswi hi nga swi kotaka swaku hi pfuna lava hi djondzaka na vona swaku va tsakamisiwa.
LISIMU 79 Va Djondzisi Leswaku Va Tiya
^ par. 5 Loko hi djondza ni vanhu Bibele hi yentxa ntirho wa lisima, hikusa hi va pfuna swaku va pimisa va tlhela va yentxa leswi Yehovha a swi lavaka. Ka djondzo leyi, hi ta ya hi vona swaku i mpsini leswi hi nga swi yentxaka swaku hi va vadjondzisi va kahle.
^ par. 4 Vona nhlokomhaka leyi nge: “Papalata Mintlhamu Leyi Loko U Ri Karhi U Fambisa Dyondzo Ya Bibele” ka Mahanyelo ni Ntirhu wa Hina wa Wukreste — Xibukwana xa Mintlhanganu xa Setembro wa 2016 (hi xiTsonga).
^ par. 8 Nghena la va nge: MALUNGHANA NA HINA > MITOKOTO.
^ par. 9 Ka JW Library®, nghena lani va nge: > ÁUDIO E VÍDEO > AS NOSSAS REUNIÕES E OBRA DA PREGAÇÃO > AJUDAS PARA A PREGAÇÃO.
^ par. 15 Vona nhlokomhaka leyi nge: “Kurhandza Yehovha Switaku Yendla U Lava Kutsakamisiwa” ni leyi nge: “Se U Lunghekile Akuva U Tsakamisiwa?” ka Murindzi wa Março wa 2020.
^ par. 77 NTLHAMUSELO WA SWIFANISO: Hi nkama wun’wana loko se va hete ku djondzisa, makwerhu lweyi a tivaka ku djondzisa kahle a pfuna makwerhu lweyi a a fambisa djondzo swaku a nga vulavuli ngopfu loko a djondzisa.
^ par. 79 NTLHAMUSELO WA SWIFANISO: Nkama va djondzaka, lweyi a djondzeliwaka a vona swaku a nga yentxa yini swaku a va wansati wa munene. Loko se va hete ku djondza, a bula ni nuna wa yena hi leswi a nga swi djondza.
^ par. 81 NTLHAMUSELO WA SWIFANISO: Lweyi a djondzeliwaka ni nuna wa yena, va hungata ni vanghanu lava va nga va kuma abandleni.
