NHLOKOMHAKA YA DJONDZO 42
Tiyiseka Swaku U Wu Kumile Ntiyiso
“Kambisisani swilo hinkwaswu; khomelelani swi tiya ka swa swinene.” — 1 TES. 5:21.
LISIMU 142 Ahi Khomeni Swi Tiya Ka Ntshembo wa Hina
LESWI HI NGA TA SWI DJONDZA *
1. Hi mhaka muni vanhu va tiyentxa swivutiso hi wukhongeli?
VANHU va vanyingi lava nga ka wukhongeli namuntlha va tibyela swaku i Vakreste ni swaku va gandzela Xikwembu hi ndlela ya yinene. Leswo swi yentxa vanhu va tivutisa leswi: “Ku nga va swaku li kona wukhongeli la ntiyiso, leli tsakisaka Xikwembu?” Ha tiyiseka swaku Timboni ta Yehovha ti djondzisa ntiyiso ni swaku ndlela leyi ti gandzelaka Yehovha hi yona ya mu tsakisa. Kasi i yini leswi nga hi pfunaka ku tiyiseka hi swoleswo? A hi voneni leswi nga hi pfunaka ku tiyiseka swaku Timboni ta Yehovha ti djondzisa ntiyiso ni swaku ti gandzela Xikwembu hi ndlela ya yinene.
2. Hi ku ya hi 1 Vatesalonika 1:5, i mpsini leswi a swi yentxa Pawulo a tiyiseka swaku a kume ntiyiso?
2 Mupostolo Pawulo a a tiyiseka swaku a wu kumile ntiyiso. (Lerha 1 Vatesalonika 1:5.) Leswi nga yentxa mupostolo Pawulo a kholwa ni ku tiyiseka swaku a a wu kumile ntiyiso hi leswi a a li mudjondzi wa munene wa Rito la Xikwembu. Naswona a a kholwa swaku “Matsalwa hinkwawu ma kongomisiwa hi Xikwembu.” (2 Tim. 3:16) Kasi i yini leswi Pawulo a nga swi djondza leswi nga mu tiyisekisa swaku a wu kumile ntiyiso? Pawulo a kume Matsalwa lawa ma nga mu tiyisekisa swaku Yesu a a li Mesiya ni swaku varhangeli va wukhongeli la Vayuda a va nga ta mu yingisa Yesu. Phela varhangeli lava a va vula swaku va djondzisa vanhu ntiyiso hi Xikwembu, kambe a va yentxa swilo leswi a xi nga swi tsakeli. (Tito 1:16) Kambe Pawulo a a nga fani na vona, hikusa a a tinyimisele ku yingisa hinkwaswu leswi nga ka Rito la Xikwembu. Pawulo a a tinyimisele ku djondzisa ni ku tirhisa “minchumu hinkwayu leyi taka hi ka Xikwembu.” — Mint. 20:27.
3. Ku nga va swaku swi lava hi tiva tinhlamulu ta swivutiso hinkwaswu kuva hi tiyiseka swaku hi wu kumile ntiyiso? (Vona kwadru leli nge “ Mintirho Ni Mimpimiso Ya Yehovha — ‘Swi Tele’”)
3 Vanhu van’wana va pimisa swaku wukhongeli la ntiyiso li fanele li hlamula swivutiso hinkwaswu, hambi hi swivutiso leswi kalaka swi nga hlamuliwi hi ku kongoma ka Bibele. Kambe ku nga va swaku leswo swa koteka? Pimisa hi leswi Pawulo a nga swi vula. A byele Vakreste swaku va fanele va “kambisisa swilo hinkwaswu,” kambe Pawulo a tlhele a vula swaku ku ni minchumu ya yinyingi leyi a a nga yi twisisi. (1 Tes. 5:21) Yena a te: “A hi na wutivi la ku helela,” a tlhele a ku: “A hi voni kahle; swi fana ni loko hi tilanguta ka xipelhu.” (1 Kor. 13:9, 12) Ku fana na hina, Pawulo na yena a a nga twisisi hinkwaswu. Kambe Pawulo a a wu twisisa ntiyiso hi Xikwembu ni leswi xi lavaka ku swi yentxa. Leswi a a swi twisisa a swi mu yentxa a tiyiseka swaku a kume ntiyiso!
4. Hi nga swi kotisa ku yini ku tiyiseka swaku hi kume ntiyiso, naswona hi ta vona yini ka djondzo leyi?
4 Nchumu wun’wana lowu wu hi yentxaka hi tiyiseka swaku hi wu kumile ntiyiso, i ku fananisa leswi Yesu a nga swi djondzisa ni leswi Timboni ta Yehovha ti swi yentxaka namuntlha. Ka djondzo leyi, hi ta vona swaku Vakreste va ntiyiso 1) a va tipatsi ni wukhongeli la mavunhwa, 2) va hlonipha vito la Yehovha, 3) va rhandza ntiyiso, naswona 4) va rhandzana.
A HI TIPATSI NI WUKHONGELI LA MAVUNHWA
5. Hi djondza yini ka ndlela leyi Yesu a a gandzela Xikwembu hi yona, naswona hi nga xi tekelelisa ku yini xikombiso xa yena?
5 Leswi Yesu a mu rhandzaka hintamu Yehovha, minkama hinkwayu a a gandzela yena ntsena, loko a li tilweni ni nkama lowu a a li lani misaveni. (Luk. 4:8) A byele vadjondzisiwa va yena swaku va fanele va gandzela Yehovha ntsena. Yesu ni vadjondzisiwa va yena va ku tshembeka a va zanga hi ku tirhisa swifaniso leswaku va gandzela Xikwembu. Leswi Xikwembu hi kalaka hi nga xi voni a nga kona munhu lweyi a nga yentxaka nchumu xa ku fana ni Xikwembu! (Esa. 46:5) Se swi nga va swinene ku va vanhu va yentxa swifaniso leswi va swi vulaka swaku swi kwetsimile va tlhela va khongela ka swona? Nawu wa wumbirhi ka leyi Yehovha a nga yi nyika Vayisrayele a wu ku: “Mi nga tshuki mi tiyentxela xifaniso xa ku vatliwa kumbe xifaniso xa nchumu lexi nga matilweni kumbe lexi nga misaveni kumbe lexi nga matini hansi ka misava . . . a wu fanelanga u swi khizamela.” (Ekso. 20:4, 5) Vanhu lava lavaka ku tsakisa Xikwembu va wu twisisa kahle nawu lowu.
6. Timboni ta Yehovha ti xi tekelelisa ku yini xikombiso xa Vakreste va ku sungula loko ti gandzela Yehovha?
6 Vanhu lava va nga djondza hi swilo swa khale va vula swaku ka minkama ya vapostolo, Vakreste a va gandzela Xikwembu ntsena. Hi xikombiso, buku lin’wana leli vulavulaka hi swilo leswi nga yentxeka khale li vula swaku Vakreste va ku sungula “a va swi nyenya” ku tirhisa swifaniso loko va gandzela Xikwembu. Ni namuntlha Timboni ta Yehovha ti tekelela xikombiso xa Vakreste va ku sungula. A hi khongeli ka swifaniso kumbe ka tintsumi; naswona a hi khongeli ka Yesu. A hi gwimbi mabandera kumbe ku yimbelela hino nacional naswona a hi yentxi nchumu lowu nga ta kombisa swaku hi gandzela mimfumu ya misava leyi. Phela ku nga na mhaka swaku i yini lexi nga hi yentxekelaka, hi tinyimisele ku yingisa marito ya Yesu lawa ma nge: “U fanele u gandzela Yehovha Xikwembu xa wena naswona u fanele u tirhela yena ntsena.” — Mat. 4:10.
7. Hi mhaka muni Timboni ta Yehovha ti hambana ni wukhongeli lin’wana?
7 Vanhu va ku tala namuntlha va kholwa ka leswi varhangeli va wukhongeli va swi vulaka. Phela vanhu va tsaka hintamu loko va vona varhangeli volavo, lakaku va za va va gandzela. Ku hambana ni vanhu volavo, hina vanhu va Yehovha a hi valandzeli va vanhu. Hambileswi hi va hloniphaka lava hi rhangelaka ka nhlengeletanu, hi hanya hi leswi Yesu a nga swi vula loko a te: “N’wina hinkwenu mi vamakwavu.” (Mat. 23:8-10) Phela a hi gandzeli vanhu, hambi ku li varhangeli va wukhongeli kumbe vafumi va misava. A hi seketeli kumbe ku nyima ni politika, naswona a hi nyimi ni wukhongeli. Handle ka leswo, hi yentxa hinkwaswu hi nga swi kotaka swaku hi tihambanisa ni misava leyi, naswona leswi swi hi yentxa hi hambana ni wukhongeli la ku tala leli li ti vulaka Vakreste. — Yoh. 18:36.
HI HLONIPHA VITO LA YEHOVHA
Vakreste va ntiyiso va tsaka hintamu hi ku byela van’wana vito la Yehovha (Vona maparagrafu 8-10) *
8. Hi swi tivisa ku yini swaku Yehovha a lava hi dzunisa vito la yena hi tlhela hi li byela vanhu van’wana?
8 Khambi lin’wana Yesu a khongele a ku: “Papayi, dzunisa vito la wena.” Yehovha a xi hlamulile xikhongelo xolexo hi rito la ku twala na a li tilweni, a tshembisa Yesu swaku a ta li dzunisa vito la yena. (Yoh. 12:28) Hambi nkama lowu na a chumayela, Yesu a dzunise vito la Papayi wa yena. (Yoh. 17:26) Se swa twala kuva Vakreste va ntiyiso va tsaka hi ku tirhisa vito la Yehovha va tlhela va li byela vanhu van’wana.
9. Vakreste va nkama wa vapostolo va swi kombisise ku yini swaku a va li hlonipha vito la Xikwembu?
9 Nkama ku nga yentxiwa bandla la ku sungula ka nkama wa vapostolo, yi tikombile “ndlela leyi Xikwembu xi nga khumbuka vamatiko hi yona, ni leswaku xi sungule ku tilangela vanhu lava nga ta vitaniwa hi vito la xona xikarhi ka vona.” (Mint. 15:14) Vakreste volavo va nkama wa vapostolo va swi tsakele hintamu ku tirhisa vito la Xikwembu ni ku byela vanhu hi lona. Vapostolo ni vadjondzisiwa va tirhise vito la Xikwembu swaku va chumayela, naswona va li tirhisile nkama va nga tsala mabuku ya Bibele. * Hi ku yentxa leswo va kombise swaku a ku li vona ntsena lava a va dzunisa vito la Xikwembu. — Mint. 2:14, 21.
10. Hi swi tivisa ku yini swaku Timboni ta Yehovha hi tona ntsena leti tirhisaka vito la Yehovha ti tlhela ti yentxa swaku vanhu van’wana va li tiva?
10 Hi swi tivisa ku yini swaku Timboni ta Yehovha hi tona ti vitaniwaka hi vito la Xikwembu? Pimisa hi leswi. Namuntlha, vafundhisi va vanyingi va yentxa hinkwaswu swaku vito la Xikwembu li nga tiviwi. Va li susile ka Mabibele lawa va nga ma hundzuluxela, naswona a va va pfumeleli vanhu swaku va tirhisa vito la Xikwembu ka wukhongeli la vona. * Kambe Timboni ta Yehovha to va tona ntsena leti dzunisaka vito la Yehovha, ti li hlonipha ti tlhela ti chumayela van’wana hi lona. Leswi hi nga Timboni ta Yehovha hi yentxa hinkwaswu leswi hi nga swi kotaka swaku hi hanya hi leswi vito leli nge Timboni ta Yehovha li vulaka swona! (Esa. 43:10-12) Hi ni kolomu ka 240 milhões wa Mabibele lawa hi nga ma yentxa lawa ku nga ni vito la Yehovha hinkwaku lomu vahundzuluxeli van’wana va Mabibele va nga li susa. Naswona hi ni mabuku lawa ma tirhisaka vito la Xikwembu lawa ma kumekaka hi tirimi ta ku tlula 1.000!
HI RHANDZA NTIYISO
11. Vakreste va ku sungula va swi kombisise ku yini swaku a va wu rhandza ntiyiso?
11 Yesu a a wu rhandza ntiyiso hi Xikwembu, ni leswi xi lavaka ku swi yentxa. Yesu a hanye hi ku pfumelelana ni ntiyiso, a tlhela a djondzisa van’wana ntiyiso. (Yoh. 18:37) Valandzeli va Yesu va ntiyiso, na vona a va wu rhandza ntiyiso hi mbilu hinkwayu. (Yoh. 4:23, 24) Phela, swa twala leswi mupostolo Pedru a nga vula swaku wukhongeli la ntiyiso hi lona “ndlela ya Xikwembu.” (2 Ped. 2:2) Leswi Vakreste va ku sungula a va rhandza ntiyiso, a va zanga va tipatsa ka leswi wukhongeli la mavunhwa a li swi yentxa, swihena swa lomu a va tshama kona ni mavonelo ya vanhu, lawa a ma nga fambisani ni ntiyiso. (Kol. 2:8) Ni namuntlha Vakreste va ntiyiso va zama ku “khoma swi tiya ka ntiyiso” va tlhela va yentxa hinkwaswu swaku mahanyelo ya vona ni leswi va swi kholwaka swi fambisana ni leswi Bibele li swi vulaka. — 3 Yoh. 3, 4.
12. I yini leswi Ntlawa lowu Rhangelaka wu swi yentxaka loko wu vona swaku hi fanele hi txintxa matwisiselo naswona hi mhaka muni?
12 Timboni ta Yehovha ta swi tiva swaku a hi minkama hinkwayu leyi ti twisisaka swilo hinkwaswu leswi nga ka Bibele, hikusa minkama yin’wana ti yentxe swihoxo ka ndlela leyi a ti tlhamusela hi yona mintiyiso ya Bibele kumbe leswi a ti yi kongomisisa xiswona nhlengeletanu ya Yehovha. Leswo a swi hi hlamalisi hikusa Bibele li vulile swaku a hi ta twisisa ntiyiso hi kutsongokutsongo. (Kol. 1:9, 10) Phela Yehovha a hi yentxa hi twisisa ntiyiso hi kutsongokutsongo, naswona hi fanele hi lehisa mbilu anze hi wu twisisa kahle ntiyiso. (Swi. 4:18) Loko Ntlawa lowu Rhangelaka wu vona swaku ku ni ku txintxa ka ndlela leyi a hi wu twisisa hi yona ntiyiso, hi xihantla ku yentxiwa ku txintxa koloko. Hambileswi wukhongeli lin’wana li yentxaka ku txintxa swaku li tsakisa vanhu lava yaka ka tikereke ta vona, loko Timboni ta Yehovha ti yentxa ku txintxa ti swi yentxela ku dzunisa vito la Yehovha ti tlhela ti kulisa wunghanu la tona na yena ku nga leswi Yesu a nga swi yentxa. (Yak. 4:4) Phela a hi yentxi ku txintxa hi mhaka mavonelo ya vanhu kumbe hi leswi mahanyelo ya misava leyi ma txintxaka, kambe hi yentxa ku txintxa koloko hileswi hi li twisisaka ku yampsa Bibele ni leswi hi rhandzaka ntiyiso! — 1 Tes. 2:3, 4.
HI RHANDZANA SWI SUKA MBILWINI
13. Hi lini wumunhu la lisima leli Vakreste va ntiyiso va nga na lona, naswona Timboni ta Yehovha ti li kombisisa ku yini?
13 Vakreste va ku sungula a va tiviwa hi wumunhu la linene, kambe a la lisima ku tlula hinkwalu i lirhandzu. Yesu a te: “Hinkwavu va ta tiva swaku mi vadjondzisiwa va mina loko mi rhandzana.” (Yoh. 13:34, 35) Timboni ta Yehovha namuntlha ti tikhorisa hi lirhandzu ni ku twanana loku ti nga na kona. Hi hambanile ni wukhongeli lin’wana, hikusa hi ndjangu lowu rhandzanaka, hambileswi hi taka hi ka tindhawu ta ku hambana, naswona hi nga ni mahanyelo ya ku hambana. Phela lirhandzu leli hi nga na lona la tikomba loko hi li mintlhanganwini, hi li masembleya ni makongresu. Leswo swi hi pfuna ku vona swaku hi gandzela Yehovha hi ndlela leyi a lavaka swaku hi mu gandzela hi yona.
14. Hi ku ya hi Vakolosa 3:12-14, hi nga swi kombisisa ku yini swaku hi va rhandza hintamu vamakwerhu?
14 Bibele li vula swaku hi fanele hi ‘rhandzana hintamu.’ (1 Ped. 4:8) Hi kombisa swaku ha rhandzana loko hi rivalelana hi tlhela hi khohlwa swilo swa ku biha leswi van’wana va hi yentxelaka swona. Naswona hi lava tindlela ta ku pfuna vamakwerhu hinkwavu abandleni, hambi lava va nga tshama va hi kwatisa. (Lerha Vakolosa 3:12-14.) Phela a lirhandzu leli hi nga na lona li kombisa swaku hi Vakreste va ntiyiso.
HI NI “LIPFUMELO LIN’WE”
15. I yini swin’wana leswi hi swi yentxaka leswi kombisaka swaku hi tekelela Vakreste va ku sungula?
15 Hi tekelela xikombiso xa ndlela leyi Vakreste va ku sungula a va gandzela Yehovha hi yona. Hi xikombiso, a nhlengeletanu ya hina yi tirhisa xileswi Vakreste va ku sungula a va tirhisa xiswona. Ku fana ni Vakreste va ku sungula na hina hi ni vadjikelezi, madoda, ni vapfunisi va bandla. (Filp. 1:1; Tito 1:5) Naswona hi tekelela Vakreste va ku sungula hi ku hanya hi leswi Bibele li swi vulaka hi swa masangu, muchadu, ku tirhisiwa ka ngati ni ku vhikela bandla hi ku yingisa leswi Bibele li swi vulaka hi mudjohi lweyi a kalaka a nga tisoli. — Mint. 15:28, 29; 1 Kor. 5:11-13; 6:9, 10; Heb. 13:4.
16. Hi djondza yini ka marito lawa ma kumekaka ka Vaefeza 4:4-6?
16 Yesu a vule swaku vanhu va vanyingi a va ta vula swaku i vadjondzisiwa va yena, kambe a hi hinkwavu lava a va ta landzela leswi a swi vulaka. (Mat. 7:21-23) Bibele li vule swaku ka masiku ya wugamu, vanhu a va ta ‘vula swaku va tirhela Xikwembu, kambe a swi nga ta tikomba hi mahanyelo ya vona.’ (2 Tim. 3:1, 5) Hambileswo, Bibele li tlhele li vula swaku ku ni “lipfumelo lin’we” leli tsakisaka Xikwembu. — Lerha Vaefeza 4:4-6.
17. I vamani lava va nga ni lipfumelo lin’we naswona va hanyaka hi ntiyiso?
17 Kasi i vamani lava nga ni lipfumelo lin’we va tlhela va hanya hi ntiyiso namuntlha? Se hi swi vonile swaku wukhongeli la ntiyiso li fanele li hanya hi ku ya hi leswi Yesu a nga swi vula li tlhela li tekelela xikombiso xa Vakreste va ku sungula. Se a swi kanakanisi swaku ko va Timboni ta Yehovha ntsena leti nga ni lipfumelo lin’we ti tlhela ti hanya hi ntiyiso. Phela i nkateko wa wukulu ku va mun’we wa Timboni ta Yehovha ni ku tiva ntiyiso hi yena ni leswi a lavaka ku swi yentxa! Se a hi yentxeni hinkwaswu leswi hi nga swi kotaka swaku hi tama hi tiyiseka swaku hi wu kumile ntiyiso.
LISIMU 3 Matimba ya Hina, Ntshembo wa Hina
^ par. 5 Ka nhlokomhaka leyi hi ta djondza hi leswi Yesu a nga swi vula hi wukhongeli la ntiyiso ni swaku vadjondzisiwa va yena va swi tirhisise ku yini leswi Yesu a nga swi vula hi wukhongeli la ntiyiso. Naswona, hi ta tlhela hi kambisisa leswi hi kholwisaka swaku Timboni ta Yehovha ti le ka wukhongeli la ntiyiso.
^ par. 9 Vona kwadru leli nge “Xana Vakreste Vo Sungula A Va Ri Tirhisa Vito Ra Xikwembu?” ka Murindzi wa 1 ka Julho wa 2010, paj. 6 (hi Xitsonga).
^ par. 10 Hi xikombiso, hi 2008, Papa Bento XVI a veke nawu wa leswaku vito la Xikwembu “a li fanelanga li tirhisiwa” ka swikhongelo, ka tinsimu, kumbe mintirho yin’wana leyi yentxiwaka ka wukhongeli la Katolika.
^ par. 63 NTLHAMUSELO WA MUFOTO: Nhlengeletanu ya Yehovha yi humese Bibele la Wuhundzuluxeli La Misava Ya Nyuwani hi tirimi ta ku tlula 200 leswaku vanhu va djondza Bibele hi lirimi la vona naswona Bibele lolelo li ni vito la Yehovha.
