1. a) Hi kwini ku navela loku vanhu va nga yentxiwa na kona? b) Ku navela koloko ku nga va pfunisa ku yini swaku va tsaka?

 KU TSAKA ka ntiyiso, a hi ku tsaka swa nkamanyana, kambe i ku va munhu a tshama na a tsakile wutomi la yena hinkwalu. Swi nga kotekisa ku yini leswo? Ka Dixkursu la yena la le Nhaveni, Yesu a vule swaku “va tsaka lava tikarhatelaka ku va vanghanu va Xikwembu.” (Mat. 5:3) Yesu a a swi tiva swaku vanhu va yentxiwe na va ni ku navela ku tiva Yehovha Xikwembu va tlhela va mu gandzela. Leswo swi vula ku ‘tikarhatela ku va vanghanu va Xikwembu.’ Naswona leswi Yehovha a nga “Xikwembu xa ku tsaka,” lava va mu gandzelaka na vona va nga tsaka. — 1 Tim. 1:11.

2-3. a) Hi ku ya hi Yesu, i vamani van’wana lava na vona va nga kumaka ntsaku wa ntiyiso? b) Hi ta bula hi yini ka nhlokomhaka leyi, naswona swi ta hi pfunisa ku yini?

² Swi nga koteka kuva hi tsaka hambiloko hi kumana ni swikarhatu? Ina. Ka Dixkursu la yena la le Nhaveni, Yesu a vule swaku va tsaka “lava rilaka” ku nga na mhaka swaku va rilisiwa hi leswi va titwaka nandzu hi mhaka swidjoho leswi va nga swi yentxa, kumbe va rilisiwa hi swikarhatu leswi va kumanaka na swona. A tlhele a vula swaku hambi lava va “hluphiwaka hi mhaka ya swa ku lulama” kumbe lava ‘rhuketeliwaka’ hi mhaka leswi va nga valandzeli va Kreste, swi nga koteka swaku va tsaka. (Mat. 5:4, 10, 11) Kambe swi nga kotekisa ku yini kuva munhu a tsaka ka swiyimu leswi?

³ Leswi Yesu a nga swi vula, swi hi djondzisa swaku a ntsaku wa ntiyiso a wu yi hi swiyimu leswi hi nga ka swona, kambe hi ngo wu kuma ntsena loko hi ni wunghanu la likulu ni Xikwembu. (Yak. 4:8) Hi nga swi yentxisa ku yini leswo? Ka nhlokomhaka leyi, hi ta vona 3 wa swilo leswi nga hi pfunaka ku kuma ntsaku wa ntiyiso.

4. Hi wini nchumu wa ku sungula lowu hi nga wu yentxaka swaku hi kuma ntsaku wa ntiyiso? (Tipisalema 1:1-3)

⁴ XA KU SUNGULA: Leswaku hi kuma ntsaku wa ntiyiso, hi fanele hi djondza Bibele. Yesu a fanise Rito la Xikwembu ni swakudla. Phela vanhu ni swiharhi, swi lava va dla leswaku va kota ku hanya. Kambe ko va vanhu ntsena lava swi lavaka va hanya hi Rito la Xikwembu naswona leswo swa va pfuna. Hi mhaka leyo, Yesu a vule leswi: “Munhu a nga fanelanga a hanya hi pawu ntsena, kambe a fanele a hanya ni hi rito lin’wana ni lin’wana leli humaka ka nomo wa Yehovha.” (Mat. 4:4) Se, a hi fanelanga hi pfumelela siku li hundza na hi nga djondzanga Bibele. Mupisalema a vule leswi: ‘Wa tsaka munhu lweyi a tsakelaka nawu wa Yehovha, a lerha nawu wa yena hi rito la le hansi wusiku ni nhlikanhi.’ — Lerha Tipisalema 1:1-3.

5-6. a) I mpsini leswi hi nga swi djondzaka ka Bibele? b) Hi nga yentxa yini swaku Bibele li hi pfuna?

⁵ Hi ku tirhisa Bibele, Yehovha a hi byela leswi nga hi pfunaka swaku hi va ni wutomi la ku tsakisa. Bibele li hi djondzisa swaku hi mhaka muni Yehovha a yentxe vanhu, ni swaku hi nga yentxa yini swaku hi va vanghanu va yena ni ku tlhela hi rivaleliwa hi yena. Li tlhela li hi nyika ntshembo wa leswi nga ta yentxeka ka nkama lowu taka. (Yer. 29:11) Ku djondza swilo leswi hinkwaswu ka Bibele swi hi yentxa hi tsaka!

⁶ Hi lani hi swi tivaka hi kona, Bibele li tlhela li hi nyika minawu leyi nga hi pfunaka siku ni siku. Se, loko hi landzela minawu yoleyo hi ta tsaka. Hambiloko u kumana ni swikarhatu ka wutomi la wena, u nga tshiki ku djondza  Bibele u tlhela u pimisa hi leswi u swi djondzaka. Yesu a te: “Va tsaka lava twaka Rito la Xikwembu va tlhela va yentxa leswi li swi vulaka!” — Luk. 11:28.

7. U nga yentxa yini swaku u swi twisisa kahle leswi u swi djondzaka?

⁷ Nkama u djondzaka Bibele, zama ku swi twisisa kahle leswi u swi djondzaka. Hi xikombiso, swi nga yentxeka u tshame u swekeliwa swakudla leswi u swi rhandzaka hintamu, kambe u nga swi twanga ku nandzika ka swona hileswi u nga swi dla na u djahile kumbe na u karhatekile. Loko se u gamile ku dla, u tsumbula swaku loko a wu nga swi dlanga hi ku kahlula a wu ta va u swi twile ku nandzika ka swona. Leswo swa fana ni ku djondza Bibele. Minkama yin’wana, hi nga li djondza hi ku kahlula lakakuva hi nga swi twisisi leswi hi swi djondzaka. Pfumelela swaku leswi u swi djondzaka swi khumba mbilu ya wena. Tivoni na u li ka ndhawu ya kona, u twa marito ya vanhu lava vulavulaka ni leswi va vulavulisaka xiswona u tlhela u pimisa hi leswi u swi djondzaka. Leswo swi ta ku yentxa u tsaka.

8. Impsini leswi “mutirhi wa ku tshembeka ni wa ku tlhariha” a swi yentxaka swaku a hetisisa ntirho wa yena? (Vona ni ntlhamuselo wa le hansi.)

⁸ Yesu a veke “mutirhi wa ku tshembeka ni wa ku tlhariha” swaku a hi nyika leswi hi swi lavaka hi nkama wa kona swaku hi kota ku va vanghanu va Yehovha. * (Mat. 24:45) Hinkwaswu leswi mutirhi wa ku tshembeka ni wa ku tlhariha a hi nyikaka swona swi seketeliwe ka Bibele. (1 Tes. 2:13) A marevhixta ni mavhidiyo lawa a hi humeselaka wona, ma hi pfuna ku mu tiva kahle Yehovha hilani a tlhamuseliwaka hi kona ka Bibele. Leswo hi swona swi hi yentxaka hi tama hi lerha marevhixta ya Murindzi ni Khindlimuka! ku patsa ni tinhlokomhaka leti nga ka jw.org hi tlhela hi lunghiselela mintlhanganu ya xikarhi ka vhiki ni ya ku hela ka vhiki. Naswona wheti ni wheti hi sixtira JW Broadcasting^®. Hinkwaswu leswi mutirhi wa ku tshembeka ni wa ku tlhariha a hi nyikaka swona, swi hi pfuna ku fikelela nchumu wa wumbirhi lowu nga hi yentxaka hi tsaka.

9. Hi wini nchumu wa wumbirhi lowu nga hi pfunaka ku va ni ntsaku wa ntiyiso?

⁹ XA WUMBIRHI: Leswaku hi va ni ntsaku wa ntiyiso, hi fanele hi hanya hi minawu ya Yehovha. Mupisalema a te: “Wa tsaka munhu lweyi a hloniphaka Yehovha, lweyi a fambaka ndleleni ya yena.” (Pis. 128:1) Ku hlonipha Yehovha swi vula ku tshika ku yentxa swilo leswi nga mu kwatisaka. (Swi. 16:6) Hi mhaka leyo, hi ta tama hi yentxa hinkwaswu leswi hi nga swi kotaka swaku hi hanya hi minawu ya yena leyi nga ka Bibele. (2 Kor. 7:1) Hi to tsaka ntsena loko hi yentxa leswi Yehovha a swi lavaka hi tlhela hi fambela kule ni leswi a swi nyenyaka. — Pis. 37:27; 97:10; Rom. 12:9.

10. Hi ku ya hi Varoma 12:2, i mpsini leswi mun’wana ni mun’wana wa hina a faneleke a swi yentxa?

¹⁰ Lerha Varoma 12:2. Swi nga yentxeka munhu a swi tiva swaku Yehovha a ni mfanelo ya ku hi byela leswi nga swinene ni leswi kalaka swi nga li swinene. Kambe ku swi tiva ntsena a swi yenelanga, a fanele a tlhela a hanya hi minawu ya yena. Hi xikombiso, swi nga yentxeka munhu a swi tiva swaku mimfumu yi ni mfanelo ya ku veka minawu ya ndlela leyi mimovha yi faneleke yi famba hi yona xitaratwini, kambe swi nga yentxeka a nga nyimi na yona. Hi mhaka leyo, a nga yi yingisi minawu yoleyo nkama lowu a fambisaka. Se, munhu a fanele a swi kombisa hi mahanyelo  ya yena swaku minawu ya Yehovha ya pfuna hikakunene. (Swi. 12:28) Davhida a a titwa hi ndlela yoleyo. Hi mhaka leyo, a byele Yehovha a ku: “U ni tivisa ndlela ya wutomi. Ku ni ku tsaka ka kukulu amahlweni ka wena; ka voko la wena la xinene ku ni ku tsaka hi masiku ni masiku.” — Pis. 16:11.

11-12. a) Loko hi karhatekile kumbe hi hele ntamu i mpsini leswi hi faneleke hi tivonela ka swona? b) Vafilipiya 4:8 yi hi pfunisa ku yini ku langa kahle leswi hi hungataka hi swona?

¹¹ Loko hi karhatekile kumbe hi hele ntamu, hi nga ha lavetela swilo swa ku hungataka hi swona, swaku hi khohlwa swikarhatu swa hina. Leswo swa twala, kambe hi fanele hi tivonela swaku hi nga hungati hi swilo leswi Yehovha a swi nyenyaka. — Efe. 5:10-12, 15-17.

¹² Ka karta leli mupostolo Pawulo a nga li tsalela Vafilipiya, a va byele swaku va fanele va tama va pimisa hi minchumu “ya ku lulama, . . . leyi nga basa, . . . ya ku rhandzeka, [ni] leyi nga yinene.” (Lerha Vafilipiya 4:8.) Hambileswi Pawulo a kalaka a nga vulavulanga hi ku hungata hi ku kongoma, leswi a nga swi vula swi nga hi pfuna kuva hi langa kahle leswi hi hungataka hi swona. Zama ku yentxa leswi: Lani ku taka rito leli nge “minchumu” ka ndzimana leyi, ku txintxi hi leswi: “mamuzika,” “mafilme,” “manovhela,” kumbe “magemi.” Ku yentxa leswo swi ta ku pfuna ku vona leswi Yehovha a nga swi tsakelaka ni leswi swi nga mu kwatisaka. Minkama hinkwayu hi lava ku hanya hi minawu ya Yehovha. (Pis. 119:1-3) Loko hi yentxa leswo, hi ta swi kota ku fikelela nchumu wa wunharhu lowu nga hi pfunaka swaku hi tsaka. — Mint. 23:1.

13. Hi wini nchumu wa wunharhu lowu hi nga wu yentxaka swaku hi tsaka? (Yohani 4:23, 24)

¹³ XA WUNHARHU: Ku gandzela Yehovha a swi ve swa lisima ka wutomi la wena. Leswi Yehovha a nga Muyentxi wa hina, swa mu fanela kuva hi mu gandzela. (Nhla. 4:11; 14:6, 7) Hi mhaka leyo, hi fanele hi mu gandzela hi ndlela leyi Yena a yi lavaka, ku nga “hi moya wa ku kwetsima ni ntiyiso.” (Lerha Yohani 4:23, 24.) Hi lava swaku moya wa ku kwetsima wu li wona lowu hi kongomisaka ka wugandzeli la hina, leswaku li fambisana ni ntiyiso lowu nga ka Rito la Xikwembu. Hi nga kombisa swaku ku gandzela Yehovha i swa lisima ka wutomi la hina hambiloko hi hanya ka matiko lawa ntirho wa hina wu tsimbisiwaka. Swoswi ku ni ku tlula 100 wa vamakwerhu lava va nga petiwa djele hi leswi va nga Timboni ta Yehovha. * Kambe vamakwerhu lava, a va tshiki ku khongela, va djondza Bibele ni ku chumayela van’wana na va tsakile. Phela hambiloko hi hluphiwa hi nga tsaka hi ku tiva swaku Yehovha a na hina ni swaku a ta hi hakela. — Yak. 1:12; 1 Ped. 4:14.

14. Makwerhu Jovidon a humeleliwe hi yini naswona hi mhaka muni?

¹⁴ Vamakwerhu van’wana va kumana ni swikarhatu swa swikulu. Kambe 3 wa swilo leswi se hi nga djondza hi swona, swa va pfuna swaku va va ni ntsaku wa ntiyiso. Pimisa hi leswi nga yentxekela makwerhu Jovidon Bobojonov lweyi a nga ni 19 wa malembe, lweyi a nga yala ku ya nyimpini. Hi 4 ka Outubro wa 2019, a dumeliwili kaya ka yena, a petiwa djele ku ringana tihweti a tlhela a hlupiwa ku fana ni xigevenga. Mhaka leyi yi tiviwile ka tindhawu ta tinyingi ta misava. Ku kombisiwa swaku a biwe swi phela na a sindzisiwa ku pfumela ku va musonchwa a tlhela a yambala uniformi.  Va vule swaku a a ni nandzu, va tlhela va mu yisa ka ndhawu leyi ku hluphiwaka vanhu anze nkama lowu hosi ya tiko lolelo yi nga vula swaku a a fanele a chunsiwa. Ka nkama hinkwawu lowu, Jovidon a nga tshikanga ku tshembeka na a tsakile. Kambe leswo a swi yo tiyentxekela, swi kotekile ntsena hileswi a a tiyisa wunghanu la yena na Yehovha.

15. Jovidon a swi kotise ku yini ku tama a djondza hi Yehovha hambileswi a a li djele?

¹⁵ Nkama na a li djele, Jovidon a tame a djondza hi Yehovha hambileswi a a nga na Bibele kumbe mabuku man’wana ya nhlengeletanu. A swi kotise ku yini? Vamakwerhu lava a va mu heleketela swakudla, a va tsala Tsalwa La Siku lolelo ka minkwama leyi a va peta ka yona swakudla. Leswo a swi mu pfuna ku djondza Bibele a tlhela a pimisa hi leswi a swi djondzaka siku ni siku. Nkama a nga huma hi djele, a vule leswi ka lava va kalaka va nge se tshama va kumana ni swikarkatu swa ku fana ni swa yena: “I swa lisima kuva u tirhisa nkama lowu u nga na wona na u nge se kumana ni swikarhatu, swaku u yengetela wutivi leli u nga na lona hi Yehovha hi ku djondza Rito la yena ni mabuku ya nhlengeletanu.”

16. Makwerhu Jovidon a a tshamela ku pimisa hi yini?

¹⁶ Makwerhu Jovidon a a hanya hi minawu  ya Yehovha. A a nga tshameli ku pimisa hi minchumu ya ku biha. Hi mhaka leyo, a swi kotile ku kala a nga mu kwatisi Yehovha. Kambe a a tshama hi ku pimisa hi swilo swa ku saseka leswi Yehovha a nga swi yentxa. Siku ni siku a a pfuxiwa hi swinyanyani loko swi yimbelela, ni madlambu a a txuvukisela ku saseka ka n’weti ni tinyeleti. Yena a li: “Swilo leswi swi ni tshinete hintamu ka Yehovha swi tlhela swi ni yentxa ni tsaka ni tlhela ni tiyisela.” Loko hi mu khensa Yehovha hi swilo hinkwaswu leswi a hi yentxelaka swona, hi ta tsaka funtshi ntsaku wolowo wu ta hi pfuna ku tama hi tiyisela.

17. Marito lama nga ka 1 Pedru 1:6, 7 ma nga mu pfunisa ku yini munhu lweyi a nga ka xiyimu xa ku fana ni xa Jovidon?

¹⁷ Ku gandzela Yehovha a swi li swa lisima ka Jovidon. A a swi tiva swaku i swa lisima ku tshembeka ka Yehovha. Yesu a te: “U fanele u gandzela Yehovha Xikwembu xa wena naswona u fanele u tirhela yena ntsena.” (Luk. 4:8) A masonchwa a ma lava swaku a tshika ku va Mboni ya Yehovha. Kambe yena a a khongela yi nga chayi wusiku ni nhlikanhi a kombela Yehovha swaku a mu pfuna swaku a nga godoli a tlhela a tama a tshembeka. Hambileswi a nga hluphiwa hi ndlela ya ku vava, Jovidon a nga zanga a tshika ku tirhela Yehovha. Hi mhaka leyo, swoswi a tsakile naswona lipfumelo la yena li tiyile hileswi li nga ringiwa. — Lerha 1 Pedru 1:6, 7.

18. U nga wu kumisa ku yini ntsaku wa ntiyiso?

¹⁸ Yehovha wa swi tiva leswi nga hi yentxaka hi tsaka. Loko u tirhisa 3 wa minchumu leyi hi nga djondza hi yona ka nhlokomhaka leyi, u nga swi kota ku va ni ntsaku wa ntiyiso hambiloko u kumana ni swikarhatu. Hi mhaka leyo, na wena u ta fana ni mupisalema lweyi a nga te: “Va tsaka vanhu lava Xikwembu xa vona ku nga Yehovha!” — Pis. 144:15.