Vayisrayele A Va Ya Nyimpini, Se Hi Mhaka Muni Hina Hi Nga Yi?
“LOKO mun’we wa n’wina o yala ku ya lwa ni tiko la França ni Inglaterra, hinkwenu mi ta fa!” Marito lawa ma byeliwe Timboni ta Yehovha hi murhangeli wa masonchwa ya mfumu wa Manazi hi nkama wa Nyimpi ya Wumbirhi ya Misava. Hambileswi masonchwa a ma tshamela ku chavisela Timboni ta Yehovha, a yi kona ni Mboni ni yin’we yi nga tshika ku tshembeka. Phela a va nga chavi! Mhaka leyi, yi swi kombisa kahle swaku hina Timboni ta Yehovha a hi tipeti ka tinyimpi ta misava leyi. Hambiloko va lava ku hi dlaya, hi nyima hi tiyile.
Kambe, a hi hinkwavu lava va tivulaka Vakreste lava va nyimaka ni mhaka leyi. Vanyingi va kholwa ka leswaku Mukresre a fanele a lwela tiko la yena. Swi nga yentxeka va tibyela leswi: ‘Vayisrayele a va li vanhu va Xikwembu kambe a va ya nyimpini, hi mhaka muni Vakreste va nga fanelanga va ya?’ A wu ta va hlamulisa ku yini? Swi nga ha lava u va tlhamusela swaku hi mhaka muni Vayisrayele a va ya nyimpini ni swaku swiyimu swa vona swi hambanise ku yini ni swa hina namuntlha. A hi voneni 5 wa minchumu leyi kombisaka swaku ha hambana na vona.
1. VAYISRAYELE HINKWAVU A VA LI VA TIKO LIN’WE
Khale, Yehovha a hlengelete vanhu va yena leswaku va va tiko lin’we ku nga Israyele. A vule swaku Vayisrayele a va li ‘nhundzu ya Yena ya ku hlawuleka xikarhi ka vanhu hinkwavu.’ (Ekso. 19:5) A tlhele a va nyika ndhawu leswaku va tshama ka yona. Hi mhaka leyo, loko Yehovha a vule swaku Vayisrayele a va fanele va ya lwa ni matiko man’wana, a va nga ta ya lwa ni vamakwavu kumbe vanhu lava a va gandzela Yehovha ku fana na vona. *
Namuntlha, vanhu lava va gandzelaka Yehovha i va ‘matiko hinkwawu ni tinxaka hinkwatu ni tirimi hinkwatu.’ (Nhla. 7:9) Se, loko vanhu va Xikwembu namuntlha a vo ya nyimpini a va ta ya lwa kumbe ku dlaya vamakwavu va vona.
2. I YEHOVHA A NGA BYELA VAYISRAYELE SWAKU VA YA NYIMPINI
Khale, Yehovha hi yena a a byela Vayisrayele swaku hi mhaka muni ni swaku hi loko swi te yini a va fanele va ya nyimpini. Hi xikombiso, Yehovha a byele Vayisrayele swaku va ya lwa ni Vakanana. Phela vanhu volavo a va tiviwa hi ku gandzela madimona, ku yentxa nsila ya swa masangu ni ku hisa magandzelo hi vana. Funtshi Vakanana a va tshama ka tiko leli Xikwembu a xi tshembise ku li nyika vanhu va xona. Hi mhaka leyo, Yehovha a byele Vayisrayele swaku va helisa tiko leliyani leswaku swilo swa ku biha leswi a va swi yentxa swi nga va hambukisi. (Lev. 18:24, 25) Hambiloko Vayisrayele se va nghenile ka Tiko la Xitshembiso, minkama yin’wana Yehovha a a va pfumelela swaku va lwa ni valala va vona. (2 Sam. 5:17-25) Kambe Yehovha a nga zanga a pfumelela Vayisrayele swaku va ya nyimpini na a nga va byelanga. Minkama leyi va nga zama ku swi yentxa leswo, swi va bavelile. — Tinhl. 14:41-45; 2 Tikro. 35:20-24.
Namuntlha, Yehovha a nga va pfumeleli vanhu swaku va ya nyimpini. Mimfumu yi lwela leswi swi nga ta pfuna yona, a yi na mhaka ni Xikwembu. Yi pfuxa tinyimpi swaku yi fuma matiko lawa ma nga ta yi nghenisela male kumbe swaku yi lwela timfanelo ta yona ta politika. Se, swi li yini hi lava va vulaka leswaku va lwa hi vito la Xikwembu swaku va vhikela wukhongeli la vona kumbe va dlaya valala va vona? Yehovha a ta vhikela vanhu va yena va ku tshembeka loko a helisa valala va yena ka nkama lowu taka ka nyimpi ya Armajedoni. (Nhla. 16:14, 16) Ka nyimpi yoleyo, masonchwa ya Xikwembu ku ta va tintsumi ku nga li vanhu va nyama lava va mu gandzelaka. — Nhla. 19:11-15.
3. VAYISRAYELE A VA NGA VA DLAYI LAVA A VA KOMBISA LIPFUMELO KA YEHOVHA
Indje Xikwembu xi lwela matiko namuntlha hilani xi nga va lwela hi kona Vayisrayele ka tiko la Yeriko?
Khale, Vayisrayele a va va twela wusiwana lava a va kombisa lipfumelo ka Xikwembu, kambe a va dlaya hinkwavu lava Yehovha a a vula swaku a va fanele va fa. Vona swikombiso swimbirhi. Xa kusungula, Yehovha a lerhise leswaku tiko la Yeriko li helisiwa, kambe Vayisrayele va mu twele wusiwana Rahava ni ndjangu wa yena hileswi va nga kombisa lipfumelo. (Yoxu. 2:9-16; 6:16, 17) Xa wumbirhi, tiko hinkwalu la Gibiyoni a li helisiwanga hi mhaka leswi Vagibiyoni va nga kombisa swaku a va xi hlonipha Xikwembu. — Yoxu. 9:3-9, 17-19.
Namuntlha, loko mimfumu yi ya nyimpini yi dlaya ni vanhu lava va nga ni lipfumelo. Naswona minkama yin’wana, vanhu lava va kalaka va nga na nandzu va dlayiwa ka tinyimpi toleto.
4. VAYISRAYELE A VA FANELE VA YINGISA NAWU WA YEHOVHA HAMBILOKO VA YA NYIMPINI
Khale, Yehovha a a lava leswaku masonchwa ya Vayisrayele ma yingisa nkongomiso wa yena hambiloko ma li ku lweni a nyimpini. Hi xikombiso, minkama yin’wana Xikwembu a xi byela Vayisrayele swaku va “yentxa ku rhula” ni doropa la valala. (Det. 20:10) Yehovha a a lava leswaku masonchwa ya Vayisrayele ma tshama na ma basile minkama hinkwayu. (Det. 23:9-14) Hi xikombiso, minkama ya yinyingi masonchwa ya matiko man’wana a ma pfinya vavasati va matiko lawa a ma lwa na wona nyimpini, kambe Yehovha a byele Vayisrayele swaku va nga swi yentxi leswo. Ku vula ntiyiso, a o va pfumelela ku chada ni wansati wa tiko leli va nga li hlula loko se ku hundze wheti. — Det. 21:10-13.
Namuntlha, matiko ya manyingi ma yentxe swipfumelelwanu leswi swi faneleke swi va kongomisa loko va ya nyimpini. Xikongomelo xa minawu yoleyo i ku vhikela vanhu. Kambe, lexi xi twisaka ku vava hi leswaku a hi minkama hinkwayu yi landziwaka minawu yoleyo.
5. XIKWEMBU XI LWELE VANHU VA XONA
Ku nga va swaku tinyimpi leti ti nga kona namuntlha ta va vhikela lava va nga ni lipfumelo, hilani swi nga va hi kona nkama Vayisrayele va nga helisa tiko la Yeriko kambe va ponisa Rahava ni ndjangu wa yena?
Khale, Yehovha a va lwelile vanhu va yena naswona minkama ya yinyingi a va hlula hi ndlela ya singita. Hi xikombiso, Yehovha a va pfunise ku yini Vayisrayele swaku va hlula doropa la Yeriko? Hi ku landza nawu wa Yehovha, loko Vayisrayele “va huwelele hi rito leli li twalaka a muru wu wile,” leswo swi yentxe leswaku va hlula doropa. (Yoxu. 6:20) Se, va va hlulise ku yini va Amori? ‘Yehovha a va nisela marhalala ya makulu ma va dlaya. . . . Ku vula ntiyiso lava va nga dlayiwa hi marhalala a va li vanyingi ku tlula lava va nga dlayiwa hi xipada xa Vayisrayele.’ — Yoxu. 10:6-11.
Namuntlha, Yehovha a nga ha lweli matiko ya misava. Yesu a vule swaku Mfumu wa yena, “a hi wa misava leyi.” (Yoh. 18:36) Hi hala tlhelo, Sathana hi yena a kongomisaka tihosi hinkwatu ta misava. Wubihi hinkwalu leli li yentxekaka ka tinyimpi li kombisa wumunhu la yena. — Luk. 4:5, 6; 1 Yoh. 5:19.
VAKRESTE VA NTIYISO VA RHULILE
Hilani hi nga swi vona hi kona, xiyimu xa hina a xi fani ni xa Vayisrayele. Kambe ku hambana loku, a hi kona koxe ku yentxaka swaku hi nga yi nyimpini. Hi xikombiso, Xikwembu xi vule swaku ka masiku ya wugamu, vanhu lava a va ta djondzisiwa hi xona, ‘a va nga ha ta djondzisiwa nyimpi,’ hambi ku ya nyimpini. (Esa. 2:2-4) Handle ka leswo, Yesu a vule swaku vadjondzisiwa va yena “a hi va misava leyi”; kumbe a va nga ta tinghenisela ka maguwa ya misava. — Yoh. 15:19.
Kambe Yesu a djondzise valandzeli va yena swaku va yentxa swaku tlula leswo. A va djondzise swaku va tshika ku veketela xiviti, ku kwata ni ku djondza nyimpi. (Mat. 5:21, 22) A tlhele a va byela swaku va tikarhatela ku yentxa ku rhula ni van’wani va tlhela va rhandza ni valala va vona. — Mat. 5:9, 44.
Se hi nga ku yini hi hina? Swi nga yentxeka hi yi nyenya nyimpi, kambe ku nga va swaku a mbilwini ya hina hi veketela xiviti lakakuva swi nga yentxa swaku ku va ni ku yavana abandleni? A hi tameni hi tikarhatela ku hlivila wumunhu lolelo. — Yak. 4:1, 11.
A hi ngheneleli ka tinyimpi ta misava. Handle ka leswo, hi yentxa hinkwaswu leswi hi nga swi kotaka swaku ku va ni ku rhula xikarhi ka hina. (Yoh. 13:34, 35) Leswi hi nyimelaka nkama lowu Yehovha a nga ta helisa tinyimpi hinkwatu, hi tinyimisele ku kala hi nga tipeti ka maguwa ya misava leyi. — Pis. 46:9.
^ Minkama yin’wana, tinxaka tin’wana ta Israyele a ti holovisana ti tlhela ti lwa, kambe leswo a swi nga mu tsakisi Yehovha. (1 Tiho. 12:24) Hambileswo, minkama yin’wana Yehovha a a swi pfumelela swaku va lwisana loko lixaka la ku karhi li nga tshembeki ka Yena kumbe li yentxe xidjoho xa xikulu. — Vaava. 20:3-35; 2 Tikro. 13:3-18; 25:14-22; 28:1-8.
