1-2. Hi yini ndlela ya kahle ya ku lerha ni ku djondza Bibele? Nyikela xikombiso.

 PIMISA hi leswi: Loko u lava ku xava yindlo, indjhe a wu ta pfumela ku yi xava na u nga zanga hi ku yi vona, kumbe ku yi xava na u yo vona mufoto ntsena? Ha tiyiseka swaku na u nga se yi xava a wu ta tsakela ku famba lomu yi nga kona, u fika u nghena ka yona u vona makwartu, u vonavona ni minchumu yin’wani leyi nga kona ka yona. Handle ka leswo u nga ha tsakela ni ku vona a planta, leli kombaka leswi yindlo yi nga tshamisa xiswona swaku u vona swaku yindlo leyi yi yakisiwe ku yini.

² Ntivi yin’wani yi fanise rungula la Bibele ni “prediyu la ku leha swinene, leli nga yakiwa kahle.” Se ku fana ni leswi prediyu la ku leha li nga ni swilo swa swinyingi naswona swi lavaka swaku u fambafamba hinkwaku swaku u tiva leswi swi nga ndzeni ka lona, na lona Bibele li ni swilo swa swinyingi leswi swi lavaka swaku hi swi djondza kahle swaku hi swi tiva hi tlhela hi swi twisisa. Loko ho li lerha ntsena swaku hi hundzisa nkama hi to tiva ntsena “swilo swa ku sungula” swa Rito la Xikwembu. (Heb. 5:12) Ndlela ya kahle ya ku djondza Bibele i ku vona ndlela leyi rungula la Bibele li twananaka hi yona. Zama ku tiva leswi u kholwaka ka swona ni leswaku hi mhaka muni u kholwa ka swona.

3. I mpsini leswi mupostolo Pawulo a nga kutxa Vakreste swaku va swi yendla naswona hi mhaka muni? (Vaefeza 3:14-19)

³ Swaku hi li twisisa kahle Rito la Xikwembu ni ku yenta ka lona, swi lava hi djondza mintiyiso ya ku yenta ya Bibele. Mupostolo Pawulo a kutxe Vakreste swaku va li djondza kahle Bibele kuva va “twisisa ku yanama ni ku leha ni ku tlakuka ni ku yenta ka ntiyiso.” Leswo a swi ta tiyisa lipfumelo la vona. (Lerha Vaefeza 3:14-19.) Na hina hi lava ku yendla swa ku fana. Swoswi a hi voneni swaku hi nga li djondzisa ku yini Rito la Xikwembu swaku hi twisisa hinkwaswu leswi swi nga ka lona.

4. I mpsini leswi hi nga swi yendlaka leswaku hi ya hi tshinela ka Yehovha? Nyikela swikombiso.

⁴ Hina Vakreste a hi tsaki ntsena hi ku va ni wutivi la tidjondzo ta masungulo ta Bibele. Kambe leswi Yehovha a hi pfunaka hi ku tirhisa moya wa yena wa ku kwetsima, hi lava ku tiva hambi hi “swilo swa ku yenta swa Xikwembu.” (1 Kor. 2:9, 10) Se u swi vonisa ku yini ku va u sungula ku djondza hi swilo leswi nga ta ku pfuna kuva u tshinela ka Yehovha? Hi xikombiso, u nga ha djondza hi swaku Yehovha a swi kombise ku yini swaku a a va rhandza vatirheli va yena va nkama lowu nga hundza ni leswaku swoleswo swi swi kombisisa ku yini swaku na wena wa ku rhandza. Kumbe u nga ha djondza hi ndlela leyi Yehovha a a lava swaku Vayisrayele va mu gandzela hi yona ni ku tlhela u swi fananisa ni leswi yena a lavaka swaku hi mu gandzelisa xiswona namuntlha. U nga ha tlhela u tivekisela ku djondza hi ndlela leyi wuprofeta la Bibele li nga hetiseka hi yona ka Yesu Kreste nkama na a li lani misaveni.

5. Hi yini mhaka leyi a wu tsakela ku yendla mapexkiza swaku u tiva leswi yengetelekeke hi yona?

⁵ Van’wani lava va rhandzaka ku swi kambisisa kahle leswi va swi djondzaka ka Bibele, va vulavule hi swilo swin’wani leswi va navelaka ku swi djondza kahle. Swin’wani swa kona swi kumeka ka kwadru leli nge: “ Leswi U Nga Swi Djondzaka Ka Djondzo Ya Wena Wexe.” Phela u nga tsaka hintamu loko wo hamba mapexkiza hi ku tirhisa Índice das Publicações da Torre de Vigia kumbe Nkongomiso Wa Ku Yendla Pexkiza Wa Timboni Ta Yehovha. Ku li djondza kahle Bibele swi ta ku pfuna ku tiyisa lipfumelo la wena u tlhela u kuma “wutivi la Xikwembu.” (Swi. 2:4, 5) Swoswi a hi buleni hi mintiyiso yin’wani ya Bibele ya ku yenta, leyi u nga yi djondzaka kahle.

6. a) Hi kwini ku hambana ka planu ni xikongomelo? b) Hi mhaka muni hi nga vulaka swaku Yehovha a lava swaku a vanhu ni misava swi tama swi va kona? (Vaefeza 3:11)

⁶ Vona leswi Bibele li swi vulaka hi xikongomelo xa Xikwembu. Phela ku ni ku hambana xikarhi ka planu ni xikongomelo. Planu i ndlela leyi u nga ta yi tirhisa swaku u fikelela leswi u lavaka ku swi yendla, kasi xikongomelo hi leswi u lavaka ku swi yendla. Hi xikombiso, pimisa hi loko u lava ku yendza, u lava ku ya ka ndhawu ya ku karhi. Hi nga ha fanisa planu ni xitaratu lexi u nga ta xi tirhisa swaku u fika ka ndhawu yoleyo, se a xikongomelo hi nga ha xi fanisa ni ndhawu leyi u yaka ka yona. Kambe xitaratu  minkama yin’wani xi nga ha pfaliwa, leswo swi nga ha lava leswaku u tirhisa a switaratu swin’wanyani. Ku fana ni xitaratu, a planu minkama yin’wani swi nga ha lava leswaku li txintxiwa, kasi xikongomelo a xi tshamisanga xileswo. Loko xitaratu xi pfaliwa, u nga ha tirhisa switaratu swin’wani swaku u fika lomu u lavaka ku ya kona, se na xona xikongomelo xi nga ha hetisisiwa hi tindlela ta ku hambanahambana. Se, ha khensa hileswi Yehovha a hi byelaka hi xikongomelo xa yena ka Bibele. (Efe. 3:11) Naswona Yehovha a tirhise tindlela ta ku hambanahambana leswaku a hetisisa xikongomelo xa yena. (Swi. 16:4) Naswona leswi Yehovha a swi yendlaka swi tshama hi masiku ni masiku. Kasi hi xini xikongomelo xa Yehovha, naswona swi lave a txintxa yini leswaku a hetisisa xikongomelo xa yena?

7. Ndzhaku ka ku vanhu va djohele Yehovha, i mpsini leswi Yehovha a nga swi yendla swaku a hetisisa xikongomelo xa yena? (Matewu 25:34)

⁷ Xikwembu xi byele vanhu va ku sungula swaku a ku li xini xikongomelo xa xona hi vona. A nkama xi nga va vumba, xi va nyike nawu wa leswaku va ‘psalanana va va vanyingi va tata misava,’ va tlhela va fuma ni swiharhi. (Gen. 1:28) Kambe nkama Adamu na Evha va nga djikela Xikwembu, va nghenise xidjoho amisaveni, se xikongomelo xa Xikwembu xi nga ha hetiseki hi nkama lowuyani. Se leswo swi yendle swaku Yehovha a txintxa maplanu ya yena leswaku a fikelela xikongomelo xa yena. A yendle xiboho xa ku veka Mfumu wa yena lowu a a ta wu tirhisa swaku a hetisisa xikongomelo xa yena xa lani misaveni. (Lerha Matewu 25:34.) A tlhele a rhumela a N’wana wa yena Yesu Kreste leswaku a ta lani misaveni kuva a djondzisa vanhu hi Mfumu wa yena, ni ku tlhela a nyikela wutomi la yena leswaku hi suseliwa xidjoho ni lifu. Ndzhaku ka leswo, Yesu a game a pfuxiwa ivi a tlhelela tilweni swaku a ta fuma ka Mfumu wa Xikwembu. Kambe ku ni swilo swin’wani leswi hi nga swi djondzaka hi xikongomelo xa Xikwembu.

8. a) Hi yini nhlokomhaka ya Bibele? b) Hi ku ya hi Vaefeza 1:8-11, hi xini xikongomelo xin’wani xaxikulu xa Xikwembu? (Vona mufoto wa pajina la ku sungula.)

⁸ A nhlokomhaka ya Bibele i ku kwetsimisiwa ka vito la Yehovha, naswona leswo swi ta yendleka nkama lowu Yehovha a hetisisaka xikongomelo xa yena hi misava hi ku tirhisa Mfumu wa yena lowu ku fumaka Yesu Kreste. A nga kona lweyi a nga txintxaka xikongomelo xa Yehovha. Ku nga na mhaka swaku ku yendleka yini, hi wugamu xikongomelo xa yena xi ta hetiseka. (Esa. 46:10, 11; Heb. 6:17, 18) Hi nkama wa kona a misava yi ta va paradesi, naswona hinkwavu vatukulu va Adamu na Evha va ta tshama ka yona hi masiku ni masiku. (Pis. 22:26) Xikongomelo xin’wani xaxikulu lexi Xikwembu xi nga na xona i kuva tintsumi hinkwatu ni vanhu hinkwavu va twanana. Loko leswo swi yendleka, vanhu hinkwavu lani misaveni ni tintsumi atilweni va ta va na va yingisa Yehovha va tlhela va tshembeka ka yena. (Lerha Vaefeza 1:8-11.) A swi ku hlamalisi ku vona xikongomelo xa Yehovha xi ya xi hetiseka hi kutsongokutsongo?

9. I mpsini leswi Bibele li nga swi vula leswi hi pfunaka ku tiva leswi kalaka swi nge se yendleka?

⁹ Pimisa hi wuprofeta leli nga tsaliwa ka buku la Genesa 3:15, b leli Yehovha a nga li vula ka jardim la Edeni. Lona li vulavula hi swilo leswi a swi ta yendla swaku a xikongomelo xa Xikwembu xi hetiseka. Kambe leswo a swi nga ta yendleka hi nkama lowuyani kambe loko se ku hundze nkama wa wunyingi na Yehovha a li vulile wuprofeta lolelo. Hi xikombiso, Xikwembu xi byele Abrahamu swaku ndzhaku ka malembe ya manyingi, mun’we wa vatukulu va yena a a ta va Mesiya. (Gen. 22:15-18) Se hi lembe la 33 ka nguva ya hina, Yesu Kreste a lumiwe xirhendze hi ku ya hi leswi se a swi profetiwile. (Mint. 3:13-15) A wuprofeta leli li nga ka Genesa 3:15 li ta hetiseka hi wugamu loko Sathana a ta pfotlosiwa nhloko, kambe lona wuprofeta leli ka ha chota nkama wa wunyingi leswaku li hetiseka. (Nhla. 20:7-10) Naswona Bibele li hi byela hi swilo swin’wani leswi nga ta yendleka ka nkama lowu taka hi mhaka ya ku  nyenyana loku nga kona a xikarhi ka misava ya Sathana ni nhlengeletanu ya Yehovha.

10. a) I mpsini leswi nga ta yendleka ku nga li khale? b) Hi nga yi lunghiselelisa ku yini mimpimiso ni mbilu ya hina? (Vona buku li nga ka ntlhamuselo.)

¹⁰ Pimisa hi swilo swa ku hlamalisa leswi Bibele li vulaka swaku swi ta yendleka ka nkama lowu taka. Ku sungula, matiko ma ta huwelela ma ku “ku ni ku rhula naswona hi hlayisekile.” (1 Tes. 5:2, 3) Na swi nge se ya kule, ku ta sungula nhlomulu wawukulu hi nkama lowu a matiko ma nga ta dumela wukhongeli la mavunhwa. (Nhla. 17:16) Loko leswo se swi yendlekile, a ‘N’wana wa munhu a ta ta na a li ka marhefu hi matimba ni ku phatima kakukulu.’ (Mat. 24:30) Phela ku ta va hi nkama wolowo lani Yesu a nga ta yavanyisa vanhu va matiko hinkwawu, a hambanisa lava nga tinyempfu ka timbuti. (Mat. 25:31-33, 46) Kambe Sathana a nga ta tshama hi mavoko, a ta yendla xan’wanchumu. Leswi a va nyenyaka hintamu vanhu va Yehovha a ta yendla swaku a ntlawa wa matiko, lowu Bibele li vulaka swaku i Goge wa tiko la Magoge wu dumela a vanhu va ku tshembeka lava gandzelaka Yehovha. (Ezek. 38:2, 10, 11) Ku ta va hi nkama wolowo lowu a vatotiwa lava nga ta va lani misaveni va nga ta ya tilweni swaku va ya tipatsa na Yesu ni tintsumi leti nga tilweni kuva va lwa ni matiko ka nyimpi ya Armajedoni, naswona hi nkama wolowo ku ta va ku hela nhlomulu wawukulu. c (Mat. 24:31; Nhla. 16:14, 16) Loko swilo leswi hinkwaswu swi ta va se swi yendlekile, Yesu a ta sungula ku fuma ka Mfumu wa yena wa 1.000 wa Malembe lani misaveni. — Nhla. 20:6.

11. Ku va ni wutomi la ku kala li nga heli swi vula yini ka wena? (Vona mufoto.)

¹¹ Swoswi nyimanyana u pimisa hi leswaku a wutomi li ta tshamisa ku yini loko 1.000 wa Malembe se ma hundzile. Phela Bibele li vula swaku Xikwembu xi yendle swaku a vanhu “va navela ku hanya hi masiku ni masiku.” (Ekl. 3:11) Pimisa hi leswaku ku hanya hi masiku ni masiku swi vula yini ka wena ni ka wunghanu la wena na Yehovha. A buku leli nge Tshinela Eka Yehovha ka pajina 319, li vulavula hi nchumu xa ku hlamalisa. Lona li li: “Loko se hi hanye malembe ya manyingi hintamu swinene ya ku ni ku ma konta hi nga swi koti ku ma konta, hi ta va na hi tiva swilo swa swinyingi hi Yehovha Xikwembu ku tlula swilo leswi hi swi tivaka swoswi. Kambe hambileswi hi nga ta va hi tiva swilo swa swinyingi, hi ta va hi nge se tiva swilo hinkwaswu hi Yehovha. . . . Phela wutomi la ku kala li nga heli li ta  tsakisa hintamu swinene, naswona a nchumu xa ku tsakisa hintamu lexi hi nga ta va na xona hi nkama wolowo, hileswaku hi ta va kusuhi hintamu na Yehovha.” Kambe na nkama wolowo wu nge se fika, i mpsini swin’wani hi nga swi djondzaka ka Rito la Xikwembu?

12. Hi nga swi tivisa ku yini leswi swi yendlekaka tilweni? Nyikela xikombiso.

¹² A Bibele li hi byela hi leswi vulaka swona ku va kusuhi ni lani Yehovha a tshamaka kona, ku nga tilweni. (Esa. 33:5) Lona li tlhela li hi byela swilo swa ku hlamalisa hi Yehovha ni tintsumi leti nga tilweni. (Esa. 6:1-4; Dan. 7:9, 10; Nhla. 4:1-6) Hi xikombiso, loko hi lerha leswi Yehovha a nga swi komba Ezekiyele, hi kuma swaku a vone ‘matilo na ma pfulekile . . . se a sungula ku vona leswi Xikwembu a xi mu komba swona hi ndlela ya singita.’ — Ezek. 1:1.

13. U titwisa ku yini hi leswi Yesu a swi yendlaka tilweni? (Vaheberu 4:14-16)

¹³ Pimisa hi ntirho lowu Yesu a nga na wona tanihi Hosi ya Mfumu wa Xikwembu ni Muprista Wamukulu lweyi a nga ni ntwelawusiwana. Phela hi mhaka ya yena swa koteka swaku hi tshinela ka “xitshamu xa wuhosi xa timpsalu tatikulu” ta Xikwembu hi xikhongelo hi tlhela hi kombela ku pfuniwa. (Lerha Vaheberu 4:14-16.) Hi mhaka leyo, a hi yendleni hinkwaswu leswi hi nga swi kotaka, swaku siku ni siku hi tinyika nkama wa ku pimisa hi leswi Yehovha na Yesu se va nga swi yendla ni leswi va ha hi yendlelaka swona ku ta fikela swoswi. Leswi vona va hi rhandzisaka xiswona swi fanele swi khumba timbilu ta hina swi tlhela swi hi yendla hi hiseka nkama lowu hi tirhelaka Yehovha. — 2 Kor. 5:14, 15.

14. I ntxini hi nga xi yendlaka lexi nga kombisaka swaku ha swi khensa leswi Yehovha na Yesu va hi yendlelaka swona? (Vona mafoto.)

¹⁴ Ndlela yin’wani ya ku kombisa swaku ha swi khensa leswi Yehovha na Yesu va nga hi yendlela swona, i ku va hi yendla hinkwaswu leswi hi nga swi kotaka swaku hi pfuna van’wani swaku va va Timboni ta Yehovha va tlhela va va vadjondzisiwa va Yesu. (Mat. 28:19, 20) Hi swona leswi mupostolo Pawulo a nga swi yendla kuva a kombisa swaku a a  khensa leswi Yehovha na Yesu va nga mu yendlela swona. Yena a a swi tiva swaku a ku rhandza ka Yehovha a ku li leswaku vanhu “hinkwavu va ponisiwa va tlhela va wu tiva kahle ntiyiso.” (1 Tim. 2:3, 4) Hi leswo swi nga yendla swaku a tirha hi matimba swaku a pfuna vanhu va vanyingi ‘leswaku hi tindlela hinkwatu a ta kota ku ponisa van’wani.’ — 1 Kor. 9:22, 23.

15. Hi ku ya hi Tipisalema 1:2, i mpsini leswi nga yendlaka swaku hi tsaka?

¹⁵ Mutsali wa Tipisalema a vule swaku a munhu a a ta tsaka swi tlhela swi mu fambela kahle loko a rhandza nawu wa Yehovha a tlhela ‘a gayela hi wona wusiku ni nhlikanhi.’ (Pis. 1:1-3; ntlhamuselo.) Muhundzuluxeli mun’wani wa Bibele, ku nga Joseph Rotherham, ka buku la yena leli vulavulaka hi Tipisalema a vule swaku “a munhu a fanele a swi lava hintamu ku kongomisiwa hi minawu ya Xikwembu a tlhela a yi kambisisa kahle a nkama lowu a yi djondzaka a tlhela a heta nkama wa wunyingi na a pimisa hi leswi a swi djondzaka ka nawu wa Xikwembu.” Mudjondzi lweyi a tlhele a vula swaku a munhu lweyi a djondzaka Bibele a fanele a vaviseka loko ku hundza siku na a nga li djondzanga. Se na wena u nga tsaka loko nkama lowu u djondzaka Bibele u yendla hinkwaswu leswi u nga swi kotaka swaku u twisisa hinkwaswu leswi u swi lerhaka u tlhela u vona swaku mhaka leyi u yi djondzaka yi yelanisa ku yini ni swilo swin’wani leswi se u nga swi djondza. Phela hi nga vula na hi tiyisekile swaku a ku djondza Rito la Xikwembu swi tsakisa hintamu.

16. Hi ta bula hi yini ka nhlokomhaka leyi landzelaka?

¹⁶ Ka nhlokomhaka leyi landzelaka hi ta bula hi tempele yayikulu ya Yehovha leyi Pawulo a nga vulavula hi yona ka karta leli a nga li tsalela Vaheberu. Phela ntiyiso lowu, ku fana ni mintiyiso yin’wani leyi yi djondzisiwaka ka Rito la Xikwembu a wu karhati ku wu twisisa. Ha tshemba swaku ku djondza hi wona swi ta ku tsakisa hintamu.