Ndzimana leyi ya ku tsakisa yi li: “U nga hlamali loko u vona xisiwana xi hluphiwa naswona wuyavanyisi ni ku lulama swi nga li kona lomu u tshamaka kona, hikusa lweyi a nga tlakuka ngopfu ku tlula lweyi a fumaka wa swi vona naswona ku ni van’wani lava nga tlakuka ku va tlula hi vambirhi.” — Ekl. 5:8.

Hi ku ya hi mavonelo ya vanhu, ndzimana leyi yi vulavula hi tihosi ta lani misaveni kambe loko hi pimisa kahle hi yona hi ta vona swaku ku ni leswi yi hi djondzisaka swona hi Yehovha leswi swi hi tiyisaka.

Eklesiasta 5:8 yi vulavula hi hosi leyi kalaka yi nga lulamanga yi tlhela yi xanisa xisiwana. Kambe hosi leyi, yi fanele yi khumbuka swaku ku ni munhu lweyi a yi vonaka lweyi a nga ni matimba ku tlula yona. Ku vula ntiyiso, ka mfumu ku nga ha va ni vanhu lava nga ni matimba ku tlula hosi. Lexi vavisaka hi swaku ka mimfumu ya vanhu, hinkwavu la va fumaka swi nga ha yentxeka va li vakanganyisi naswona va nga va khomi kahle vanhu lava nga swisiwana.

Hambiloko swiyimu swi karhata hi nga tiyiseka swaku Yehovha wa va vona hinkwavu lava fumaka. Hi fanele hi kombela swaku a hi pfuna ni ku mu byela hinkwaswu leswi swi hi karhataka. (Pis. 55:22; Filp. 4:6, 7) Ha swi tiva swaku “matihlo ya Yehovha ma fambafamba amisaveni hinkwayu swaku a kombisa ntamu wa yena ka lava mu rhandzaka hi mbilu hinkwayu.” — 2 Tikro. 16:9.

Hi mhaka leyo, Eklesiasta 5:8 a hi yentxa hi pimisa hi vanhu lava fumaka, swaku minkama hinkwayu ku ni munhu wa mukulu lweyi a va vonaka. Xa lisima hintamu, ndzimana leyi yi hi pfuna ku vona swaku Yehovha hi yena a nga Tlakuka ku tlula tihosi hinkwatu. Swoswi wa fuma hi ku tirhisa N’wana wa yena Yesu Kreste, Hosi ya Mfumu wa yena. Yehovha Xikwembu xa Matimba hinkwawu lweyi a vonaka swilo hinkwaswu ni N’wana wa yena Yesu Kreste va lulamile.