1. Yesu a rhambe Petro ni van’wana lava a va phasa tihlampfi swaku va yentxa yini naswona vona va te yini?

VADJONDZISIWA va Yesu, kunga Petro, Andreya, Yakobe na Yohane a va li vaphasi va tihlampfi. Va hlamale hintamu loko Yesu a va rhamba a ku: “Nilandzeni, nitamiyendla vaphasi va vanhu.” * Se va yentxe yini? Bibele li li: “Vasiya tinkoka ta vona kumbe maredi, vamulandza.” (Mat. 4:18-22) Leswi va nga swi yentxa swi txintxe wutomi la vona. A va nga ha li vaphasi va tihlampfi se a va li vaphasi va vanhu. (Luk. 5:10) Ni namuntlha Yesu a rhamba vanhu va timbilu letinene ni lava rhandzaka ntiyiso swaku va va vadjondzisiwa va yena. (Mat. 28:19, 20) Wena ke? Wa pfumela ku rhambiwa hi Yesu swaku u va muphasi wa vanhu?

2. Hi mhaka muni hi fanele hi sungula hi ku pimisa loko hi lava ku va vachumayeli naswona i mpsini swi nga hi pfunaka?

² Swi nga yentxeka se u djondze Bibele u tlhela u txintxa mahanyelo ya wena kambe swoswi u fanele u tiyentxela xiboho xa ku va muchumayeli wa mahungu ya ku tsakisa. Loko wa ha kanakana ku va muchumayeli u nga godoli. Phela ku kanakana swi kombisa swaku u xi nyika lisima xiboho lexi u lavaka ku xi yentxa. I ntiyiso swaku Bibele li li Petro ni vanghanu va yena va tekele ku tshika maredi ya vona lawa a va phasa hi wona tihlampfi ivi va landzela Yesu. Kambe leswo a swi vuli swaku a va sungulanga hi ku pimisa hikusa a va ni 6 wa tiwheti kumbe ku tlula na va mu tiva Yesu funtshi a va kholwa swaku hi yena Mesiya. (Yoh. 1:35-42) Hi ku fanana, swi nga yentxeka na wena se u djondze swilo swa swinyingi hi Yehovha na Yesu naswona u lava ku tama u va munghanu wa vona. Kambe  swi lava u sungula hi ku pimisa na u nga se yentxa xiboho xa ku va muchumayeli. I mpsini swi nga pfuna Petro na Andreya ni van’wana swaku va va valandzeli va Yesu?

3. I mpsini leswi nga ku pfunaka swaku u yamukela xirhambu xa Yesu?

³ Vadjondzisiwa va Yesu va ku sungula a va rhandza ku tirha, a va ni wutivi, a va nga chavi nchumu funtshi a va kota ku tikhoma. Leswo swi va pfunile swaku va va vachumayeli va kahle va mahungu ya ku tsakisa. Ka nhlokomhaka leyi, hi ta vona leswi na wena u nga swi yentxaka swaku u va muchumayeli wa mahungu ya ku tsakisa.

4. Hi mhaka muni Petro a a li muphasi wa tihlampfi?

⁴ Petro a a phasa tihlampfi swaku a hlayisa ndjangu wa yena kambe swi ti komba a a wu rhandza hintamu ntirho lowu. (Yoh. 21:3, 9-15) Hi ku famba ka nkama a sungule ku wu rhandza hintamu ntirho wa ku chumayela. Naswona leswi Yehovha a a mu seketela, a a swi kota ku wu yentxa kahle ntirho lowu. — Mint. 2:14, 41.

5. Hi ku ya hi Luka 5:8-11, Petro a a chava yini naswona i yini xi nga hi pfunaka loko na hina hi chava?

⁵ Ku rhandza Yehovha hi swona swi hi yentxaka hi chumayela van’wana hambiloko hi swi vona swi nga hi faneli ku yentxa ntirho lowu. A nkama Yesu a nga rhamba Petro swaku a va muphasi wa vanhu, a te: “Ungachavi”. (Lerha Luka 5:8-11.) Petro a a nga chavi leswi a swi ta mu yentxekela loko se a li mudjondzisiwa wa Yesu. Kambe a a hlamalisiwa hi singita leli Yesu a nga li yentxa nkama na va phasa tihlampfi, naswona a a vona na swi nga mu faneli kuva a tirha xikan’we na Yesu. Ku fana na Petro, na wena swi nga ha yentxeka u vona i nga ku a wu nge swi koti ku yentxa hinkwaswu leswi yentxiwaka hi vachumayeli. Loko u titwisa xileswo, swi lava u tama u  kulisa lirhandzu la wena hi Yehovha, Yesu ni va vhizinyu va wena. Naswona leswo swi ta ku pfuna kuva u yamukela xirhambu xa Yesu xa ku va muchumayeli. — Mat. 22:37, 39; Yoh. 14:15.

6. I mpsini swin’wana swi hi yentxaka hi chumayela?

⁶ A hi voneni swin’wana leswi swi hi yentxaka hi chumayela. Hi chumayela vanhu hi mhaka leswi Yesu a nga hi rhuma a ku: ‘Fambani . . . miva yendla vadjondzisiwa va mina’. (Mat. 28:19, 20) Xin’wana xi hi yentxaka hi chumayela hi leswaku vanhu va “hluphiwa ni kukayakayisiwa kufana ni tinyempfu leti pfumalaka murisi” naswona va swi lava hintamu ku djondza ntiyiso. (Mat. 9:36, NM) Yehovha a lava swaku vanhu hinkwavu va ponisiwa va tlhela va kuma wutivi la ntiyiso. — 1 Tim. 2:4.

7. Hi ku ya hi Varhoma 10:13-15, hi mhaka muni ntirho wa ku chumayela wu li wa lisima?

⁷ Ntirho wa ku chumayela i wa lisima funtshi wu ponisa vanhu. Naswona ku pimisa hi lisima la ntirho lowu swi hi yentxa hi wu rhandza. Ku hambana ni vaphasi va tihlampfi lava va dlaka kumbe ku xavisa tihlampfi leti va ti phasaka, hina hi ‘phasa’ vanhu swaku hi ponisa wutomi la vona. — Lerha Varhoma 10:13-15; 1 Tim. 4:16.

8-9. I mpsini leswi muphasi wa tihlampfi a a fanele a swi tiva naswona hi mhaka muni?

⁸ Aminkameni ya Yesu Vayisrayele lava a va li vaphasi va tihlampfi, a va fanele va swi tiva swaku i tihlampfi muni leti a va lava ku ti phasa. (Lev. 11:9-12) Funtshi a va fanele va tiva swaku ti kumeka kwini. Phela a tihlampfi ti talisa ku kumeka lomu ku nga ni mati ya manene ni swakudla swa swinyingi. Muphasi wa tihlampfi a fanele a tiva ni nkama wa wunene wa ku phasa hi wona. Vona leswi swi nga yentxeka ka ilha leli kumekaka a Oceano Pacífico, makwerhu a rhambe misiyonariyo swaku va ya phasa tihlampfi, misiyonariyo a te: “Hi ta kumana mundzuku nimixo hi ma 9 wora.” Makwerhu a mu hlamule leswi: “A wu swi twisisi, hi famba hi nkama wa wunene lowu tihlampfi ti kumekaka hi wona, a hi fambi hi nkama lowu hina hi wu lavaka.”

⁹ Hi ku fana, vadjondzisiwa va Yesu lava a va li vaphasi va vanhu, a va ya lomu vanhu a va kumeka kona hi nkama lowu a va talisa ku kumeka hi wona. Hi xikombiso, vadjondzisiwa va Yesu a va chumayela atempeleni, ka masinagoga, hi munti ni munti ni mabazara. (Mint. 5:42; 17:17; 18:4) Na hina hi fanele hi tiva leswi rhandziwaka hi vanhu ka teritoriyu la hina. Hi fanele hi titwananisa ni xiyimu hi chumayela lomu vanhu va kumekaka kona ni hi nkama lowu va kumekaka hi wona. — 1 Kor. 9:19-23.

10. Hi swihi swilo swa ku djondzisa hi swona leswi nhlengeletanu yi hi nyikaka?

¹⁰ Muphasi wa tihlampfi a fanele a va ni swilo swa swinene swa ku phasa hi swona ni kuva a kota ku swi tirhisa. Na hina hi fanele hi va ni swilo swa kahle swa ku chumayela hi swona hi tlhela hi kota ku swi tirhisa. Yesu a pfune vadjondzisiwa va yena ku tiva swaku va nga va phasisa ku yini vanhu. A va byele lomu a va ta chumayela kona, leswi a va ta famba na swona ni leswi a va ta swi vula. (Mat. 10:5-7; Luk. 10:1-11) Namuntlha nhlengeletanu ya Yehovha yi hi nyika swilo swa ku chumayela hi swona swa ku fana ni mabuku ni swin’wana leswi swi hi pfunaka ku chumayela. * Naswona yi hi djondzisa swaku hi nga swi tirhisisa ku yini. Leswo swi hi pfuna swaku hi nga chavi ku chumayela hi tlhela hi va vachumayeli va kahle. — 2 Tim. 2:15.

11. Hi mhaka muni vachumayeli va fanele va va ni xivindzi?

¹¹ Vaphasi va tihlampfi va fanele va va ni xivindzi hikusa minkama yin’wana va kumana ni swikarhatu a lwandle. Minkama yin’wana swi lava va tirha niwusiku funtshi va nga ha kumana ni swidzedze. Hi ku fanana, vachumayeli na vona va fanele va va ni xivindzi. Loko hi sungula ku chumayela naswona hi tiviwa swaku hi Timboni Ta Yehovha hi kumana ni swikarhatu swa swinyingi. Hi xikombiso, hi nga ha kanetiwa hi maxaka, hi hlekiwa hi vanghanu kumbe lava hi va chumayelaka va yala ku hi yingisa. Kambe leswo a swi hi hlamalisi hikusa Yesu a byele vadjondzisiwa va yena swaku a a ta va rhuma ka tindhawu leti a va ta kanetiwa. — Mat. 10:16.

12. Hi ku ya hi Yoxuwa 1:7-9, i mpsini leswi nga hi pfunaka swaku hi va ni xivindzi?

¹² I ntxini lexi nga ku pfunaka swaku u nga chavi? Xa ku sungula, tiyiseka swaku lweyi a rhangelaka ntirho wa ku chumayela i Yesu na a li matilweni. (Yoh. 16:33; Nhla. 14:14-16) U tlhela u kholwa swaku Yehovha a ta ku hlayisa. (Mat. 6:32-34) Loko lipfumelo la wena li ya li tiya, u ta ya u va ni xivindzi. Petro ni vanghanu va yena, va kombise lipfumelo nkama va nga tshika ntirho wa vona va gama va landzela Yesu. Hi ku fanana, na wena u kombise lipfumelo a nkama u nga byela maxaka ni vanghanu va wena swaku se u sungule ku djondza Bibele ni Timboni Ta Yehovha u tlhela u ya ka mintlhanganu ya tona. Ha tiyiseka swaku u txintxe mahanyelo ya wena leswaku u ta hanya hi minawu ya Yehovha. Ni swoleswo a  swi lava u va ni xivindzi. Leswi u yaka u va ni xivindzi, tiyiseka swaku “Yehovha Xikwembu xa wena a na wena hinkwaku lomu u yaka kona.” — Lerha Yoxuwa 1:7-9.

13. Ku khongela ni ku yanakanyisisa swi nga hi pfunisa ku yini swaku hi va ni xivindzi?

¹³ I mpsini swin’wana swi nga hi pfunaka swaku hi va ni xivindzi? I ku khongela hi kombela xivindzi. (Mint. 4:29, 31) Yehovha a ta hlamula swikhongelo swa wena naswona a nge tshiki ku ku seketela. Minkama hinkwayu a ta ku seketela. Xin’wana hi nga xi yentxaka i ku pimisa hi leswi Yehovha a nga va pfunisa xiswona vanhu va yena ka nkama wu nga hundza. U tlhela u pimisa hi leswi a nga ku pfunisa xiswona loko u kumana ni swikarhatu ni ku txintxa mahanyelo ya wena. Tiyiseka swaku Xikwembu lexi nga pfuna vanhu va xona va tlulela Lwandle La Ku Pshuka xi nga ku pfuna swaku u va mudjondzisiwa wa Kreste. (Ekso. 14:13) U nga tiyiseka ku fana ni mupisalema lweyi a nga te: “Yehovha a na mina; a ni nge chavi nchumu. I mpsini leswi munhu a nga ni yentxaka swona?” — Pis. 118:6.

14. Hi nga djondza yini ka leswi nga humelela Masae na Tomoyo?

¹⁴ Xin’wana xi nga hi pfunaka swaku hi va ni xivindzi i ku djondza hi vanhu lava a va ni tingana kambe Yehovha a nga va pfuna leswaku va nga chavi. Hi xikombiso, makwerhu lweyi va nge hi Masae, a a ni tingana naswona a a chava ku famba a chumayela. A swi mu karhatela hintamu ku vulavula ni vanhu lava a a nga va tivi funtshi a a tibyela swaku a a nga ta swi kota ni siku ni lin’we. Kambe a yentxe minzamu ya ku kulisa lirhandzu la yena hi Yehovha ni vavhizinyu va yena. A tinyike nkama wa ku pimisa hi mhaka leyi ni ku tlhela a vona swaku ntirho lowu i wa xihantla naswona a tlhele a khongela ka Yehovha a kombela swaku a mu pfuna kuva a kota ku chumayela. Hi ku famba ka nkama a tshike ku chava a gama a va mupfuli wa ndlela wa nkama hinkwawu. Yehovha a nga tlhela a pfuna lava va ha ku sungulaka ku chumayela swaku va va ni xivindzi. Vona leswi nga humelela makwerhu lweyi va nge hi Tomoyo. A nkama a nga sungula ku chumayela hi munti ni munti, ka munti lowu a nga nghena ka wona va mu bongelile va ku: “A hi lavi Timboni la!” Va gama va pfala xipfalu. Leswo a swi mu chavisanga Tomoyo, a byele makwerhu lweyi a a li na yena a ku: “U swi twile leswo, va hi tivile swaku hi Timboni na hi nga hlayanga nchumu, swa ni tsakisa swoleswo!” Swoswi Tomoyo i mupfuli wa ndlela wa nkama hinkwawu.

15. Ku tikhoma swi fambisana ni yini naswona hi mhaka muni swi li swa lisima ka hina Vakreste?

¹⁵ Leswaku muphasi wa tihlampfi swi mu fambela kahle a fanele a tiva ku tikhoma. Phela ku tikhoma swi fambisana ni “ku kota ku yentxa swilo leswi u faneneleke u swi yentxa hambi swo yini.” Hi xikombiso, vaphasi va tihlampfi va fanele va pfukela nimixo hintamu va tirha anze va heta ntirho wa vona ni ku tlhela va tiyisela hambiloko maxelo ma nga li kahle. Na hina leswaku hi tiyisela ni ku tlhela hi heta ntirho wa hina swi lava hi kota ku tikhoma. — Mat. 10:22.

16. I yini lexi nga hi pfunaka swaku hi yentxa swilo leswi swi karhataka ku swi yentxa?

¹⁶ A nga kona a psaliwaka na a kota ku tikhoma naswona hi ntumbuluku swa karhata. Hi mhaka leyo, vanhu va rhandza ku yentxa swilo leswi swi va vevukelaka ku swi yentxa. Kambe minkama yin’wana swilo swa lisima hintamu leswi swi faneleke swi yentxiwa a swi vevuki. Hi mhaka leyo, swi lava hi tiva ku tikhoma. Phela Yehovha hi yena a hi pfunaka  hi kota ku tikhoma hi ku tirhisa moya wa yena wa ku kwetsima. — Gal. 5:22, 23.

17. Hi ku ya hi 1 Vakorinto 9:25-27, i mpsini leswi Pawulo a a swi yentxa swaku a kota ku tikhoma?

¹⁷ Mupostolo Pawulo a a tikhoma kambe a vule swaku a swi lava a ‘xanisa kumbe ku ba’ miri wa yena swaku a yentxa swilo swa swinene. (Lerha 1 Vakorinto 9:25-27.) A kombele van’wana swaku va tiva ku tikhoma ni ku yentxa swilo “khwatsi ni hi nawu wakona”. (1 Kor. 14:40) Swi lava hi tama hi tikhoma kuva hi tirhela Yehovha ni ku chumayela vanhu van’wana mahungu ya ku tsakisa. — Mint. 2:46.

18. Hi ku ya hi mavonelo ya Yehovha, i yini ku tirha kahle?

¹⁸ Vaphasi va tihlampfi va titwa na va tirhe kahle loko va phase tihlampfi ta tinyingi. Kambe leswo swi hambanile ni ntirho wa hina wa ku chumayela, ku tirha kahle a swi yi hi vanhu lava hi nga va pfuna ku nghena ka nhlengeletanu ya Yehovha. (Luk. 8:11-15) Loko hi tama hi chumayela ni ku djondzisa vanhu, ka Yehovha hi ta va hi yentxa ntirho wa wunene hikusa hi yentxa leswi yena ni N’wana wa yena va swi lavaka. — Marka 13:10; Mint. 5:28, 29.

19-20. I mpsini swin’wana swi hi yentxaka hi chumayela hintamu swoswi?

¹⁹ Ka matiko man’wana a hi tiwheti hinkwatu leti vaphasi va tihlampfi va pfumeleliwaka ku phasa. Ka matiko wolawo, vaphasi va tihlampfi va yentxa ntirho wa vona hi xihantla loko va vona swaku tiwheti ta vona ta ku phasa ti ya ku heleni. Ku fana ni vaphasi lava va tihlampfi, hi fanele hi yengetela ntirho wa hina wa ku chumayela hikusa magamu ma le kusuhi. Nkama lowu nga sala wa ku ponisa vanhu i wutsongo hintamu. U nga hlweli kumbe u heta nkama na u pimisa swaku u ta sungula ku chumayela loko swilo hinkwaswu swi ta tshamiseka. — Ekl. 11:4.

²⁰ Na ka ha li swoswi rhandza ntirho wa ku chumayela, u yengesela wutivi la wena hi Bibele, u va ni xivindzi u tlhela u kota ku tikhoma. Tipatsi ni vanhu lava tlulaka 8.000.000 lava chumayelaka mahungu ya ku tsakisa amisaveni hinkwayu naswona u ta tsaka hi ku kuma minkateko ya Yehovha. (Neh. 8:10) Tinyimiseli ku chumayela hi lani u nga kotaka hi kona anze nkama lowu Yehovha a nga ta nyimisa ntirho wa hina wa ku chumayela. Ka nhlokomhaka leyi landzelaka hi ta kambisisa swilo swinharhu leswi swi nga hi pfunaka ka ntirho wa hina wa ku chumayela.