1. Hi nkama muni swi nga hi karhatelaka ku tirhela Yehovha?

HI NKAMA MUNI swi karhataka ku tirhela Yehovha? Hi loko hi ni swikarhatu awuton’wini kumbe hi loko hi nga li na swona? Loko hi kumana ni swikarhatu hi talisa ku tshemba Yehovha, kambe ku yentxeka yini loko wutomi li hi fambela kahle? Swi nga ha yentxeka hi nga mu tirheli kahle Yehovha. Leswi Yehovha a swi tivaka leswi, a basopise Vayisrayele hi mhaka leyi. — Det. 6:10-12.

2. Hi xihi xikombiso xa xinene, lexi Hosi Asa a nga hi vekela xona?

² Hosi Asa i xikombiso xa kahle xa munhu lweyi a nga tshemba Yehovha hi ku helela. A nga tirhelanga Yehovha ka minkama ya ku karhata ntsena, kambe ni loko ku rhulile. Ku sukela ku sunguleni “Asa a a rhandza Yehovha hi mbilu hinkwayu”. (1 Tiho. 15:14.) Asa a kombise swaku a a rhandza Yehovha hi mbilu hinkwayu hi ku helisa wukhongeli la mavunhwa aYuda. Bibele li li: “Se a susa ma altari ya swikwembu swa mavunhwa ni tindhawu ta ku tlakuka, a hahlula mapilari ya ku kwetsima a tlhela a tsema ni timhandzi ta ku kwetsima.” (2 Tikro. 14:3, 5) Phela hambi hi vhovho wa yena Maka, a mu susile ka xitshamu xa lisima hi mhaka ya leswi a a yentxa swaku vanhu va gandzela swikwembu swa mavunhwa. — 1 Tiho. 15:11-13.

3. Hi ta bula hi yini ka djondzo leyi?

³ Asa a nga helisanga wukhongeli la mavunhwa ntsena, kambe a pfune vanhu va Yehovha swaku va tlhela va mu tirhela.  Yehovha a katekise Asa ni Vayisrayele hinkwavu hi ku va nyika ku rhula. * Ka mfumu wa yena ku ve ni 10 wa malembe lawa “tiko a li rhulile”. (2 Tikro. 14:1, 4, 6) Ka nhlokomhaka leyi, hi ta vona swaku Asa a yentxe yini nkama a ku ni ku rhula a tikweni, hi ta gama hi vona swaku Vakreste va minkama ya vapostolo va yentxe yini a nkama a ku ni ku rhula, hi wugamu hi ta hlamula xivutiso lexi: Loko u tshama ka tiko leli swi kalaka swi nga tsimbisiwi ku tirhela Yehovha u nga wu tirhisisa ku yini nkama wa wena?

4. Hi ku ya hi 2 Tikronika 14:2, 6, 7, Asa a wu tirhisise ku yini nkama wa ku rhula?

⁴ Lerha 2 Tikronika 14:2, 6, 7. Asa a byele vanhu a ku: “[Yehovha] a hi yentxa hi humula ka valala va hina hinkwavu.” Asa a a nga pimisi swaku nkama lowu wa ku rhula a ku li nkama wa ku tshama a nga yentxi nchumu, kambe Asa a sungule ku yaka madoropa, maprediyu, mimuru ni swipfalu. A byele Vayuda a ku: “Hi hina ha ha fumaka ka ndhawu leyi”. A a lava ku vula yini hi leswo? A a lava ku vula swaku vanhu va nga fambafamba na va nga chavi ka tiko leli Xikwembu xi nga va nyika lona, ni swaku va nga yaka na va nga karhatiwi hi valala. A kombele vanhu swaku va wu tirhisa kahle nkama lowu wa ku rhula.

5. Hi mhaka muni Asa a tiyise masonchwa ya yena?

⁵ Asa a tlhele a tiyisa masonchwa ya yena ka nkama lowu wa ku rhula. (2 Tikro. 14:8) Leswo swi vula swaku a a nga mu tshembi Yehovha? A a mu tshemba. Kambe leswi a a li hosi, a a swi tiva swaku i ntirho wa yena wa ku tiyisa vanhu swaku va lunghekela swiyimu swa ku karhata swa nkama lowu taka. Phela Asa a a swi tiva swaku ku rhula loku a va li na  kona a ku ta fika nkama ku hela. Swoleswo swi yentxekile.

6. Vakreste va minkama ya vapostolo va wu tirhisise ku yini nkama wa ku rhula?

⁶ Hambileswi Vakreste va minkama ya vapostolo a va xanisiwa, ku ve ni nkama lowu na vona va nga ti khorisa hi ku rhula. Va wu tirhisise ku yini nkama wolowo? Va wu tirhise kahle hi ku chumayela mahungu ya ku tsakisa hilaha va nga kota ha kona. Buku la Mintirho li vula swaku a va hanya hi ku hlonipha Yehovha. Leswi a va tama va chumayela mahungu ya ku tsakisa, Bibele li vula swaku a va ya va tala. Swa tikomba swaku Yehovha a a yi katekisa minzamu ya vona ya ku chumayela hi nkama lowu a ku ni ku rhula. — Mint. 9:26-31.

7-8. Tlhamusela swaku Pawulo ni Vakreste van’wana va yentxe yini loko va pfulekeliwa hi nkama wa ku chumayela?

⁷ Vakreste va minkama ya vapostolo a va chumayela hinkwaku lomu a va li kona. Hi xikombiso, mupostolo Pawulo a vone swaku a a ta chumayela vanhu va vanyingi aEfesa, hi mhaka leyo, a tshamile swaku a chumayela ni ku pfuna vanhu va vanyingi swaku va tiva Yehovha. — 1 Kor. 16:8, 9.

⁸ Pawulo ni Vakreste van’wana va kote ku chumayela vanhu va vanyingi hi lembe la 49 nkama ku nga lunghisiwa mhaka ya ku fambelana ni ku soka. (Mint. 15:23-29) A nkama mabandla ma nga tivisiwa xiboho lexi xi nga yentxiwa, Vakreste va ye “vapaluxa mahungu lamanene ya rito” la Yehovha. (Mint. 15:30-35) Ku yentxeke yini? Bibele li li Mabandla a ma ya ma ‘tiyisiwa kupfumeleni, mayandza siku lin’wana ni lin’wana.’ — Mint. 16:4, 5.

9. Xiyimu xi tshamise ku yini swoswi ka matiko ya manyingi naswona hi fanele hi tivutisa yini?

⁹ Ka matiko ya manyingi swoswi, a swi tsimbisiwi ku chumayela. Lomu u tshamaka kona ke? Swa tsimbisiwa? Loko swi nga tsimbisiwi tivutise leswi: ‘Ni nga wu tirhisisa ku yini nkama wa mina?’ Ka masiku lawa ya wugamu, vanhu va Yehovha va tsakile hikusa va chumayela ni ku djondzisa vanhu amisaveni hinkwayu. (Marka 13:10) Hi mhaka leyo, ku ni swilo swa swinyingi hi nga swi yentxaka ka ntirho lowu.

10. I yini leswi 2 Timotiya 4:2 a hi pfunaka ku swi yentxa?

¹⁰ Hi nga wu tirhisisa ku yini nkama lowu wa ku rhula? (Lerha 2 Timotiya 4:2.) Kambela swaku wena kumbe mun’wana ka ndjangu wa wena a nga yengesela ntirho wa ku chumayela kumbe ku va mupfuli wa ndlela. Swoswi a hi nkama wa ku lwela ku ganya kumbe ku va ni swilo swa ku tala hikusa swilo leswo a swi nga ta hi pfuna ka nhlomulu lowukulu. — Swi. 11:4; Mat. 6:31-33; 1 Yoh. 2:15-17.

11. I yini leswi van’wana va swi yentxaka swaku va chumayela vanhu va vanyingi?

¹¹ Vachumayeli va ku tala va djondza tirimi tin’wana leswaku va ta chumayela hi tona. Nhlengeletanu ya Yehovha ya va pfuna hi ku yentxa mabuku ya manyingi hi tirimi ta ku tala. Hi xikombiso, hi 2010 mabuku ya hina a ma li kona hi tirimi ta ku tlula 500, kasi swoswi se ma kona hi tirimi ta ku tlula 1.000!

12. Vanhu va titwisa ku yini loko va twa ntiyiso hi lirimi la vona? Nyikela xikombiso.

¹² Vanhu va titwisa ku yini loko va twa ntiyiso hi lirimi la vona? Hi xikombiso, vona leswi swi nga humelela makwerhu wa wansati lweyi a nga sixtira kongresu aEstados Unidos  hi Xikinyaruwanda, ku nga lirimi leli li vulavuliwaka a Ruanda, Congo ni Uganda. Loko kongresu li helile makwerhu lweyi a te: “Se ni ni 17 wa malembe na ni li lomu aEstados Unidos, kambe i khambi la ku sungula ni yi twisisa kahle mintlhanganu hinkwayu”. Makwerhu lweyi a tsake hintamu hi leswi a nga twa mintlhanganu hi lirimi la yena. Loko swiyimu swi ku pfumelela djondza lirimi lin’wana swaku u ta pfuna vanhu ka teritoriyu la wena. Leswo swi nga pfuna hintamu loko ku ni vanhu lava va vulavulaka lirimi lin’wana ka teritoriyu la wena, funtshi swi ta ku yentxa u tsaka.

13. Vamakwerhu va Russia va wu tirhisise ku yini nkama wa vona wa ku rhula?

¹³ A hi vamakwerhu hinkwavu va nga ni chunseko wa ku chumayela amisaveni. Ka matiko man’wana mimfumu ya tsimbisa swaku ntirho lowu wu yentxiwa. Hi xikombiso, pimisa hi vamakwerhu lava va nga Russia, va hete malembe ya manyingi na va xanisiwa. Hi Março wa 1991, a mfumu wu va pfumeleli swaku va tirhela Yehovha na va chunsekile, hi nkama wolowo a ku ni kolomo ka 16.000 wa vamakwerhu aRussia. Kambe loko se ku hundze 20 wa malembe va talile va za va fika ka 160.000 wa vona. Swa ti komba swaku vamakwerhu va wu tirhise kahle nkama wa vona wa ku chumayela na va chunsekile. Kambe leswo swi game swi txintxa. Hambileswi swilo swi nga txintxa aRussia, vamakwerhu a va tshikanga ku tirhela Yehovha. Va tama va yentxa hinkwaswu va nga swi kotaka swaku va mu tirhela.

14-15. Yehovha a mu pfunise ku yini Asa?

¹⁴ Ka nkama wa Asa, ku rhula ku game wu hela. Va dumeliwe hi masonchwa ya ku tlula 1.000.000 lawa a ma ta hi Etiopia.  Masonchwa lawa a ma rhangeliwa hi Zara, funtshi a a tshemba swaku a ta hlula Vayuda. Hambileswo Hosi Asa a a nga tshembi masonchwa lawa a a li na wona kambe a a tshemba Yehovha. A khongele a ku: “Hi pfuni Yehovha, hikusa hi tshembe wena Xikwembu xa hina naswona hi te ka xitshungu lexi hi vito la wena.” — 2 Tikro. 14:11.

¹⁵ Hambileswi masonchwa ya Etiopia a ma li manyingi hintamu, Asa a a swi tiva swaku Yehovha a ni matimba funtshi wa swi kota ku pfuna vanhu va yena. Yehovha a va pfunile, va swi kotile ku hlula masonchwa ya Etiopia. — 2 Tikro. 14:8-13.

16. Hi swi tivisa ku yini swaku ku rhula hi nga na kona swoswi ku ta hela?

¹⁶ A hi swi tivi hi ku helela swaku ku ta yentxeka yini hi hina ka nkama lowu taka, kambe ha swi tiva swaku ku rhula hi nga na kona swoswi ku ta hela. Khumbuka swaku Yesu a byele vadjondzisiwa va yena swaku ka masiku ya wugamu a va ta vengiwa hi “vanhu va matiko hinkwawu”. (Mat. 24:9) Hi ku fanana Pawulo a te: ‘Hinkwavu lavanavelaka kuhanya vutomi la wukhongeli ka Kreste Yesu, vataxanisiwa’. (2 Tim. 3:12) Phela Sathana a ‘hlundzuke ngopfu’ naswona hinkwerhu a hi nge baleki ku xanisiwa hi yena. — Nhla. 12:12.

17. Lipfumelo la hina li nga ha ringisiwa ku yini?

¹⁷ Ka nkama lowu taka hinkwerhu hi ta ringiwa. Ku sale nkamanyana wa wutsongo swaku misava yi va ni ‘nhlomulu lowukulu’ wa ku a wu se tshama wu va kona ku sukela misava yi va kona. (Mat. 24:21) Ka nkama wolowo, hambi hi maxaka ya hina ma nga hi djikela naswona hambi ntirho wa hina wu nga ha tsimbisiwa. (Mat. 10:35, 36) Hinkwerhu hi fanele hi tshemba swaku Yehovha a ta hi pfuna ni ku hi hlayisa ku fana na Asa.

18. Hi ku ya hi Vaheveru 10:38, 39, i yini lexi nga ta hi pfuna ku tshama na hi lunghekile loko ku rhula ku ta hela?

¹⁸ Yehovha a hi lunghiselela swoswi swaku hi tiyisa lipfumelo la hina. A tirhisa ‘mutirhi lweyi atshembekeke ni kutlhariha’ leswaku a hi nyika swakudla hi nkama wa kona swaku a hi pfuna hi tshama na hi tiyile. (Mat. 24:45) Kambe leswaku hi pfuneka hi fanele  hi tirhisa swilo leswi swaku hi tiyisa wuxaka la hina na Yehovha. — Lerha Vaheveru 10:38, 39.

19-20. Hi ku ya hi 1 Tikronika 28:9, hi swihi swivutiso leswi hi faneleke hi tivutisa swona naswona hi mhaka muni?

¹⁹ Ku fana na Hosi Asa, hi fanele hi lava ku pfuniwa hi Yehovha. (2 Tikro. 14:4; 15:1, 2) Hi nga kombisa swaku hi lava swaku Yehovha a hi pfuna loko hi djondza hi yena hi tlhela hi tsakamisiwa ni ku yentxa hinkwaswu hi nga swi kotaka ku kombisa swaku ha mu rhandza. Leswaku hi tikambela hi fanele hi tivutisa leswi: ‘Indje na ya mintlhanganwini nkama ni nkama?’ Phela a mintlhanganwini hi pfuniwa swaku hi tama hi tirhela Yehovha hi tlhela hi tiyisiwa hi vamakwerhu. (Mat. 11:28) Swin’wana leswi u faneleke u tivutisa hi leswi: ‘Na swi rhandza ku lerha Bibele nkama ni nkama?’ Loko u tshama ni ndjangu wa wena wa tinyika nkama wa ku mi djondza hi ndjangu? Loko u tshama wexe indje wa tinyika nkama wa ku va u djondza ku fana ni leswi a wu swi yentxa nkama a wu tshama ni ndjangu wa wena? Wa ya ku chumayeleni nkama ni nkama swaku u pfuna vanhu va djondza hi Yehovha?

²⁰ Hi mhaka muni hi fanele hi tiyentxa swivutiso leswi? Bibele li vula swaku Yehovha a kambisisa mimpimiso ni timbilu ta hina. Na hina hi fanele hi yentxa swa ku fana. (Lerha 1 Tikronika 28:9.) Loko hi vona swaku hi fanele hi txintxa leswi hi swi rhandzaka, mapimiselo ya hina ni mahanyelo ya hina hi fanele hi kombela Yehovha swaku a hi pfuna. Leswi hi swi tivaka swaku hi ta ringiwa, swoswi i nkama wa ku tilunghiselela. U nga pfumeleli nchumu xi ku phazamisa ku wu tirhisa kahle nkama lowu wa ku rhula!