1. Hi titwisa ku yini loko munhu lweyi hi mu rhandzaka a tshika ku tirhela Yehovha?

KU NGA VA swaku ku ni munhu lweyi u mu rhandzaka hintamu lweyi a nga susiwa bandleni? Phela leswo swa vavisa! Makwerhu Hilda, lweyi a nga feliwa hi nuna a vula leswi: “Nkama lowu nuna wa mina a nga fa, se a hi ni 41 wa malembe na hi chadile naswona leswo swi ni vave hintamu. * Kambe nkama n’wana wa mina a nga tshika ku tirhela Yehovha a tlhela a tshika nsati wa yena ni vana va yena swi ni tshove mbilu.”

2-3. Hi ku ya hi Tipisalema 78:40, 41, Yehovha a titwisa ku yini loko munhu a tshika ku mu tirhela?

² Pimisa hi leswi Yehovha a nga vavisekisa xiswona nkama tintsumi tin’wana ti nga tshika ku mu tirhela! (Yuda 6) Tlhela u pimisa hi leswi Yehovha a nga vavisekisa xiswona nkama Vayisrayele a va tshamela ku kala va nga mu yingisi. (Lerha Tipisalema 78:40, 41.) Tiyiseka swaku Papayi wa hina Yehovha lweyi a hi rhandzaka hintamu swa mu vava loko a vona munhu lweyi u mu rhandzaka a tshika ku mu tirhela. Funtshi wa ku twisisa ku vava loku wena u ku twaka, naswona leswi a ku rhandzaka hintamu a ta ku tiyisa a tlhela a ku pfuna.

³ Ka nhlokomhaka leyi hi ta vona leswi hi nga swi yentxaka swaku Yehovha a hi pfuna loko munhu lweyi hi mu rhandzaka a tshika ku mu tirhela. Hi ta tlhela hi vona swaku hi nga yentxa yini swaku hi pfuna vamakwerhu lava xaka la vona li nga susiwa bandleni. Kambe swoswi a hi sunguleni hi ku vona leswi hi kalaka hi nga fanelanga hi swi yentxa.

4. Vapsali va vanyingi va titwisa ku yini loko vana va vona va susiwa bandleni?

⁴ Swi tolovelekile swaku loko n’wana a tshika ku tirhela Yehovha vapsali va tibyela swaku a va mu pfunanga hintamu n’wana wa vona  kuva a tiyisa wunghanu la yena na Yehovha. Nkama n’wana wa makwerhu Luke a nga susiwa bandleni, makwerhu Luke a te: “Ni titwe nandzu hi leswi nga yentxeka, hambi hi ku yetlela a swi ni karhatela. Minkama yin’wana a ni rila naswona mbilu ya mina a yi vava hintamu.” Makwerhu Elizabete lweyi na yena a nga humeleliwa hi swa ku fana na makwerhu Luke, a li: “A ni pimisa swaku swi nga yentxeka ni nga mu djondzisanga kahle n’wana wa mina, ni swaku ku ni nchumu xa ku biha lexi ni nga xi yentxa.”

5. I yini leswi vapsali va faneleke va swi khumbuka loko vana va vona va tshika ku tirhela Yehovha?

⁵ Hi fanele hi khumbuka swaku Yehovha a hi yentxe na hi kota ku langa leswi hi swi lavaka. Leswo swi vula swaku hi nga langa ku mu yingisa kumbe hi nga mu yingisi. Ku ni majovhem lawa hambiloko vapsali va wona va nga li xikombiso xa xinene ma langaka ku tirhela Yehovha ma tlhela ma tshembeka ka yena. Vapsali van’wana va nga ha tikarhata hintamu swaku va djondzisa vana va vona ku rhandza Yehovha, kambe hi ku famba ka nkama vana va vona va tshika ku tirhela Yehovha. Hinkwaswu leswi swi kombisa swaku mun’wana ni mun’wana wa hina a fanele a langa swaku a ta tirhela Yehovha kumbe a nga ta mu tirhela. (Yoxu. 24:15) Se n’wina vapsali mi vavisekaka hileswi vana va n’wina va nga tshika ku tirhela Yehovha, mi nga pimiseni swaku mi ni nandzu hi leswi nga yentxeka!

6. Ester a titwise ku yini nkama lowu papayi wa yena a nga tshika ku tirhela Yehovha?

⁶ Minkama yin’wana vapsali va tshika ku tirhela Yehovha va tlhela va tsukula ni mindjangu ya vona. (Pis. 27:10) Leswo swi va vavisa hintamu vana va vona, hikusa va va rhandza naswona va tshemba swaku hi vona va nga ta va pfuna. Ester lweyi papayi wa yena a nga susiwa bandleni a li: “Ni rile hintamu hikusa papayi wa mina a a ngo yo tshika ku tirhela Yehovha swa nkamanyana, kambe a a lange ku tshika ku mu tirhela hi ku helela. Ni mu rhandza hintamu papayi wa mina, se nkama a nga susiwa bandleni a ni vilela swaku wutomi la yena li ta tshamisa ku yini. Phela hinkwaswu leswo swi ni hete ntamu.”

7. Yehovha a titwisa ku yini hi majovhem lawa vapsali va wona va nga susiwa bandleni?

⁷ N’wina majovhem, tiyisekani swaku vamakwerhu bandleni na vona va vaviseka loko vapsali va n’wina va susiwe bandleni. Naswona khumbukani swaku Yehovha a swi twisisa hi ku helela leswi mi titwisaka xiswona. Yehovha a mi rhandza hintamu naswona wa tsaka loko a mi vona mi tshembeka, funtshi ni vamakwerhu abandleni va tsaka hintamu. Naswona khumbukani swaku a mi fanelanga mi titwa nandzu hileswi vapsali va n’wina va nga langa ku kala va nga ha mu tirheli Yehovha, hikusa Yehovha a hi yentxe na hi kota ku langa ku mu tirhela kumbe hi nga mu tirheli. Phela mun’wana ni mun’wana lweyi a nga tinyiketela ka Yehovha a tlhela a tsakamisiwa “a ta rhwala ndzhwalu wa yena.” — Gal. 6:5.

8. I yini leswi u nga swi yentxaka na wa ha nyimela swaku xaka la wena leli u li rhandzaka li tlhelela ka Yehovha? (Vona kwadru leli nge “ Tlhelela Ka Yehovha.”)

⁸ Loko munhu lweyi u mu rhandzaka a susiwa bandleni, hi ntolovelo u nga ha nyimela swaku siku lin’wana a tlhelela ka Yehovha. Se u nga yentxa yini na wa ha mu nyimela swaku a tlhelela ka Yehovha? U nga tama u tiyisa lipfumelo la wena. Phela loko u yentxa leswo, u ta va xikombiso xa xinene ka ndjangu wa wena ni ka munhu lweyi a nga susiwa. Naswona loko u yentxa leswo, u ta tama u tiyisela hambiloko leswi nga yentxeka swi ku vava. A hi voneni swilo swin’wana leswi u nga swi yentxaka swaku u tiyisa lipfumelo la wena.

9. U nga yentxa yini swaku u tama u tiyisa lipfumelo la wena? (Vona kwadru leli nge “ Tindzimana Leti Nga Ku Tiyisaka Loko Lweyi U Mu Rhandzaka A Tshika Ku Tirhela Yehovha.”)

⁹ I swa lisima ku tama u tiyisa lipfumelo la wena u tlhela u tiyisa maxaka ya wena lawa na wona ma nga vaviseka hi leswi nga yentxeka. U nga swi yentxisa ku yini leswo? Hi ku tama u tiyisa wunghanu la wena na Yehovha, u lerha Bibele, u pimisa hi leswi u swi lerhaka ni ku tlhela u ya mintlhanganwini. Makwerhu Joana lweyi papayi wa yena ni makwavu wa yena wawansati va nga tshika ku tirhela Yehovha a li: “Ni titwa ni rhulile loko ni lerha hi swikombiso swa Bibele swa ku fana ni swa Abigayele, Estere, Yobo, Yosefa na Yesu. Swikombiso swa vona swa ni tiyisa swi tlhela swi ni rhulisa mbilu ni mimpimiso. Naswona tinsimu ta Broadcasting ti ni tiyisa hintamu.”

10. Tipisalema 32:6-8 yi nga hi pfunisa ku yini loko hi karhatekile?

¹⁰ Byela Yehovha hinkwaswu leswi swi ku karhataka. Loko u karhatekile kumbe u kwatile u nga tshiki ku khongela ka Yehovha. Kombela Yehovha swaku a ku pfuna kuva u tiva leswi u nga swi yentxaka hi nkama wolowo, naswona mu kombeli swaku a ku nyika ku twisisa a tlhela a ku “djondzisa ndlela leyi u faneleke u famba hi yona.” (Lerha Tipisalema 32:6-8.) I ntiyiso swaku swi nga ha ku karhatela ku byela Yehovha hinkwaswu leswi nga ka mbilu ya wena, kambe Yehovha a ku twisisa kahle ku vava loku u ku twaka. Yena a ku rhandza hintamu naswona a lava u mu byela hinkwaswu leswi u nga na swona mbilwini. — Ekso. 34:6; Pis. 62:7, 8.

11. Hi ku ya hi Vaheberu 12:11, hi mhaka muni hi fanele hi tshemba swaku Yehovha a ta yavanyisa mhaka hi ndlela ya yinene ni hi lirhandzu? (Vona kwadru leli nge “ Ku Susiwa Bandleni Swi Kombisa Swaku Yehovha A Laya Lava A Va Rhandzaka.”)

¹¹ Nyima ni swiboho leswi madoda ma swi yentxaka. Phela i Yehovha a nga vula swaku loko munhu a nga mu yingisi a tlhela a nga tisoli a fanele  a susiwa bandleni. Ku va munhu a susiwa bandleni i ndlela ya yinene ya ku mu pfuna, swi tlhela swi pfuna ni vamakwerhu van’wana. (Lerha Vaheberu 12:11.) Van’wana abandleni va nga ha vula swaku madoda a ma yentxanga xiboho xa kahle hileswi ma nga susa munhu abandleni. Kambe khumbuka swaku vanhu volavo hakanyingi a va swi vuli swilo swa ku biha leswi lweyi a nga susiwa bandleni a nga swi yentxa. Phela a hi tivi mhaka hinkwayu loko munhu a susiwa. Hi mhaka leyo, i swa lisima ku tshemba swaku madoda ma yentxa hinkwaswu leswi ma nga swi kotaka swaku ma yavanyisa mhaka hi ku ya hi leswi Bibele li swi vulaka, na ma khumbuka swaku “ma yavanyisela Yehovha.” — 2 Tikro. 19:6.

12. Ku yentxeke yini hileswi makwerhu Elizabete ni nuna wa yena va nga nyima na Yehovha loko a laya n’wava wa vona?

¹² Loko u nyima ni xiboho xa madoda loko xaka la wena li susiwile, swi nga yentxeka u li pfuna swaku siku lin’wana li tlhelela ka Yehovha. Makwerhu Elizabete lweyi se hi nga bula hi yena a li: “A swi ni karhatela hintamu ku kala ni nga buli ni n’wana wa mina, kambe nkama n’wana wa mina a nga tlhelela ka Yehovha a swi vonile swaku ku va a sususiwe bandleni swi mu pfunile. Hi ku famba ka nkama n’wana wa mina a vule swaku a djondze minchumu ya yinene hileswi a nga susiwa bandleni. Phela leswo swi ni djondzise swaku minkama hinkwayu Yehovha a hi laya hi ndlela ya yinene.” Makwerhu Marcos ku nga nuna wa makwerhu Elizabete, a vula leswi: “Hi ku famba ka nkama, n’wana wa hina a ni byele swaku a a swi lava ku tlhelela ka Yehovha hileswi hi nga nyima ku bula na yena nkama lowu na a susiwile.”

13. I yini lexi nga ku pfunaka loko u godola?

¹³ Bula ni vanghanu lava nga ta twisisa leswi u titwisaka xiswona. Heta nkama ni vamakwerhu lava nga ni wunghanu la linene na Yehovha, lava nga ta ku pfuna swaku u nga godoli. (Swi. 12:25; 17:17) Makwerhu Joana lweyi se hi nga bula hi yena a li: “A ni titwa ni li noxe, kambe ku bula ni vanghanu swi ni pfune hintamu.” Kambe u nga yentxa yini loko makwerhu abandleni a ku byela marito lawa ma vavisaka?

14. Hi mhaka muni hi fanele hi ‘tama hi lehiselana mbilu ni ku rivalelana hi ku chunseka’?

¹⁴ Va lehiseli mbilu vamakwerhu. Hi fanele hi khumbuka swaku minkama yin’wana vamakwerhu va ta hi byela marito lawa ma nga ta hi kwatisa. (Yak. 3:2) Phela hinkwerhu a hi hetisekanga. Hi mhaka leyo, a swi hi hlamalisi loko makwerhu a tshuka a hi byela marito lawa ma nga hi kwatisaka. Khumbuka leswi mupostolo Pawulo a nga swi vula. Yena a te: “Tamani mi lehiselana mbilu ni ku rivalelana hi ku chunseka hambiloko munhu a ni xa ku mu sola hi xona munhu mun’wana.” (Kol. 3:13) Makwerhu mun’wana lweyi a nga ni xaka leli nga susiwa bandleni a te: “Yehovha a ni pfunile swaku ni rivalela makwerhu lweyi a nga ni tlhava hi marito na a ku o zama ku ni tiyisa.” Se i yini leswi vamakwerhu bandleni va nga swi yentxaka swaku va pfuna vamakwerhu lava nga ni xaka leli nga tshika ku tirhela Yehovha?

15. Hi nga yentxa yini swaku hi pfuna vamakwerhu lava nga ni xaka leli nga susiwa bandleni?

¹⁵ Va khomi hi lirhandzu vamakwerhu lava nga ni xaka leli nga susiwa bandleni. Makwerhu  Miriam a vula swaku a swi mu karhatela ku ya mintlhanganwini nkama makwavu wa yena a nga susiwa bandleni. Yena a li: “A ni karhateka hileswi vamakwerhu a va ta swi vula, kambe ku ni vamakwerhu va vanyingi lava na vona a va vavisekile hileswi nga yentxeka, naswona a va nga tshameli ku vulavula ku biha hileswi makwerhu wa mina a nga susiwa. Phela va ni pfunile swaku ni nga titwi na ni li noxe.” Makwerhu mun’wana wawansati a vule leswi: “Nkama n’wana wa hina a nga susiwa, vamakwerhu va tile kaya ka hina va ta hi tiyisa. Van’wana va vule swaku a va nga xi tivi xa ku xi vula, kambe va rile na mina, funtshi van’wana va ni tsalele makarta lawa ma nga ni tiyisa. Phela leswi va nga swi yentxa swi ni tiyise hintamu!”

16. Vamakwerhu abandleni va nga yentxa yini swaku va tama va pfuna vamakwerhu lava nga ni xaka leli nga susiwa bandleni?

¹⁶ Tama u tiyisa vamakwerhu lava nga ni xaka leli nga susiwa bandleni. Phela vamakwerhu lava, swoswi va swi lava hintamu ku tiyisiwa hi wena. (Heb. 10:24, 25) Minkama yin’wana, vamakwerhu lava nga ni xaka leli nga susiwa bandleni va titwe ingaku na vona va yo susiwa, hileswi vamakwerhu van’wana bandleni a va nga ha buli hintamu na vona. Kambe hina a hi swi lavi ku yentxa vamakwerhu va hina va titwisa xileswo! Majovhem lawa ma nga ni mupsali lweyi a nga tshika ku tirhela Yehovha, na wona ma swi lava hintamu ku tiyisiwa. Makwerhu Maria lweyi nuna wa yena a nga susiwa bandleni a tlhela a tsukula munti a te: “Vanghanu va mina va te kaya va ta ni pfuna ku sweka va tlhela va ni pfuna ku djondzisa n’wana wa mina. Vanghanu va mina a va ni tsetsa naswona va rile na mina. Va tlhele va ni nyimelela loko vanhu va vulavula ku biha hi mina. Phela va ni pfunile hintamu!” — Rom. 12:13, 15.

17. Madoda ma nga yentxa yini swaku ma pfuna vamakwerhu lava nga karhateka?

¹⁷ Madoda, yentxani hinkwaswu leswi mi nga swi kotaka swaku mi pfuna vamakwerhu lava nga ni maxaka lawa ma nga susiwa bandleni. Phela mi ni ntirho wa lisima wa ku tiyisa vamakwerhu lava nga ni xaka leli nga tshika ku tirhela Yehovha. (1 Tes. 5:14) Leswaku mi va tiyisa, mi fanele mi bula na vona loko mintlhanganu yi nge se sungula, ni loko yi hela. Va pfuxeleni mi tlhela mi khongela na vona ni ku ya nsin’wini na vona kumbe mi va rhamba swaku va va na n’wina ka wugandzeli la ndjangu. Phela madoda ma fanele ma pfuna  ni ku tiyisa vamakwerhu lava nga karhateka ma tlhela ma va komba swaku ma va rhandza. — 1 Tes. 2:7, 8.

18. Hi ku ya hi 2 Pedru 3:9, Yehovha a lava swaku lava nga tshika ku mu tirhela va yentxa yini?

¹⁸ Yehovha “a nga swi lavi leswaku ku helisiwa munhu ni mun’we, a lava leswaku vanhu hinkwavu va txintxa.” (Lerha 2 Pedru 3:9.) Hambiloko munhu a yentxe xidjoho xa xikulu, wutomi la yena li tama li va la lisima ka Yehovha. Khumbuka swaku Yehovha a nyikele hi N’wana wa yena lweyi a mu rhandzaka swaku a hakela swidjoho swa mun’wana ni mun’wana wa hina. Phela Yehovha a tirhisa lifu la Yesu kuva a pfuna lava nga tshika ku mu tirhela swaku va tlhelela ka yena. Yehovha a nyimela swaku hinkwavu lava nga susiwa bandleni va tlhelela ka yena, ku fana ni n’wana wa ku lahleka lweyi Yesu a nga vulavula hi yena ka xifaniso xa yena. (Luk. 15:11-32) Ku tala ka lava a va tshike ntiyiso va game va tlhelela ka Yehovha, naswona vamakwerhu bandleni va va yamukelile hi ku tsaka. Makwerhu Elizabete lweyi se hi nga vulavula hi yena a tsake hintamu loko n’wana wa yena a tlhelele ka Yehovha. Yena a te: “Ni va khensa hintamu vamakwerhu lava nga hi pfuna ku tiyisela nkama n’wana wa hina a a susiwe bandleni.”

19. Hi mhaka muni hi fanele hi tshemba Yehovha?

¹⁹ Minkama hinkwayu hi fanele hi tshemba Yehovha hikusa minawu ya yena ya hi pfuna minkama hinkwayu. Yehovha i Papayi wa hina lweyi a rhandzaka hinkwavu lava mu tirhelaka a tlhela a va nyika hinkwaswu leswi va swi lavaka. Se tiyiseka swaku loko u kumana ni swikarhatu, a nga ta ku tshika. (Heb. 13:5, 6) Makwerhu Marcos lweyi se hi nga bula hi yena a te: “Phela Yehovha a nge se tshama a hi tshika. A kusuhi na hina minkama hinkwayu loko hi kumana ni swikarhatu.” Hi nga tiyiseka swaku Yehovha a ta tama a hi pfuna hi ku hi nyika “matimba ya makulu lama tlulaka hinkwaswu.” (2 Kor. 4:7) Phela u nga swi kota ku tama u tshembeka u tlhela u tiyisela hambiloko u ni xaka leli nga tshika ku tirhela Yehovha.