1-2. a) Hi ku ya hi Swivuriso 16:31, hi fanele hi va vonisa ku yini vamakwerhu lava nga guga? b) Hi swini swivutiso leswi hi nga ta swi hlamula ka djondzo leyi?

AESTADOS UNIDOS ku ni ndhawu leyi swi vevukaka ku kuma maribye ya lisima ka yona, kambe leswi maribye wolawo ma kalaka ma nga voneki kahle, vanhu va vanyingi va hundza hi kolanu na va nga ma vonanga.

² Hi ku fana vamakwerhu va hina va ku tshembeka lava se va nga guga va fana ni maribye wolawo ya lisima, hikusa i va lisima ka Yehovha. Rito la Xikwembu li fanisa misisi ya vona ni harhi. (Lerha Swivuriso 16:31; 20:29) Kambe lisima leli vamakwerhu lava va nga na lona swi nga yentxeka va ku tala va nga li voni. Loko majovhem ma va nyika lisima vamakwerhu lava nga guga, ma nga pfuneka hintamu. Ka djondzo leyi, hi ta hlamula 3 wa swivutiso: Hi mhaka muni vamakwerhu lava nga guga va li va lisima ka Yehovha? Hi mhaka muni vamakwerhu lava nga guga va li va lisima ka nhlengeletanu ya Yehovha? Xikombiso xa vamakwerhu lava va nga guga xi nga hi pfunisa ku yini?

3. Hi ku ya hi Tipisalema 92:12-15, hi mhaka muni vamakwerhu va ku tshembeka lava se va nga guga va li va lisima ka Yehovha?

³ Vamakwerhu va ku tshembeka lava se va nga guga i va lisima ka Yehovha. Yehovha a vona leswi vamakwerhu lava va nga tshamisa xiswona, a tlhela a li nyika lisima wumunhu la vona la linene. Yehovha a tsaka hintamu loko a vona vamakwerhu lava nga guga va pfuna majovhem hi wutlharhi leli va nga li kuma ka nhlengeletanu ya yena. (Yobo 12:12; Swi. 1:1-4) Yehovha a tlhela a va nyika lisima hileswi va tiyiselaka swikarhatu. (Mal. 3:16) Phela vamakwerhu lava va kumane ni swikarhatu swa swinyingi, hambileswo va tame va va ni lipfumelo la ku tiya ka Yehovha. Phela swoswi va tiyiseka hintamu swaku Yehovha a ta swi hetisisa switshembiso swa yena swa nkama lowu taka. Hambileswi  vamakwerhu lava se va nga ‘guga’, Yehovha a va rhandza hintamu hikusa va tama va mu tirhela hi ku tshembeka. — Lerha Tipisalema 92:12-15.

4. I yini leswi nga tiyisaka vamakwerhu lava se va nga guga?

⁴ Loko ku li swaku u ya u guga, tiyiseka swaku Yehovha wa wu khumbuka ntirho hinkwawu lowu u nga mu yentxela wona. (Heb. 6:10) Phela u tama u wu seketela ntirho wa ku chumayela, naswona leswo swi mu tsakisa hintamu Yehovha. Funtshi u kumana ni swikarhatu swa swinyingi hambi leswi swi karhataka ku swi tiyisela, u hanya hi leswi Bibele li swi vulaka, funtshi u ve ni mintirho ya yinyingi ka nhlengeletanu ya Yehovha, u tlhela u djondzisa van’wana. Minkama hinkwayu u tinyimisele ku titwananisa ni ku txintxa loku nga yentxeka ka nhlengeletanu ya Yehovha. U tlhele u pfuna ni vamakwerhu lava nga ka ntirho wa nkama hinkwawu. Phela ku tshembeka ka wena ku yentxa swaku Yehovha a ya a ku rhandza hintamu. Yena a tshembisa swaku “a nge va tshiki lava tshembekaka ka yena”! (Pis. 37:28) Naswona a ku tiyisekisa swaku ‘a ta tama a ku pfuna anze misisi ya wena yi va ya ku basa.’ (Esa. 46:4) Se u nga tshuki u pimisa swaku leswi u nga guga, a wa ha li wa lisima ka nhlengeletanu ya Yehovha. Ku vula ntiyiso u wa lisima hintamu!

5. I yini leswi vamakwerhu lava nga guga va faneleke va swi khumbuka?

⁵ Vamakwerhu lava se va nga guga va fanele va khumbuka swaku ku ni swilo swa swinyingi leswi va nga swi yentxaka ka nhlengeletanu ya Yehovha. Phela Yehovha a nga tama a va djondzisa hi tindlela ta tinyingi. I ntiyiso leswaku a va ha na ntamu ku fana ni khale, kambe hi ku famba ka nkama ku ni swilo swa swinyingi leswi va nga swi djondza ka nhlengeletanu ya Yehovha. Swoswi hi ta vona swikombiso swa khale ni swa swoswi leswi kombaka swaku Yehovha wa ha tama a va tirhisa vamakwerhu lava nga guga.

6-7. Hi swini swikombiso swa Bibele swa vanhu lava nga katekisiwa hi Yehovha hambileswi se a va gugile?

⁶ Ka Bibele ku ni swikombiso swa swinyingi swa vanhu va ku tshembeka lava nga tama va tirhela Yehovha hambiloko se va gugile. Hi xikombiso, Moxe a a ni 80 wa malembe nkama a nga sungula ku va muprofeta wa Yehovha ni ku  tlhela a rhangela tiko la Israyele. Daniyele a a ni kolomu ka 90 wa malembe nkama Yehovha a nga mu tirhisa swaku a va muprofeta. Naswona swi nga yentxeka mupostolo Yohani a a ni kolomu ka 90 wa malembe nkama lowu Yehovha a nga mu tirhisa swaku a tsala buku la Nhlawutelo.

⁷ Kambe, ku ni vanhu va Yehovha va ku tshembeka lava ku kalaka ku nga vulavuliwi hintamu hi vona, lava swi nga yentxekaka van’wana va nga yi vonanga mintirho ya lisima leyi va nga yi yentxa. Hambileswo, Yehovha a yi vonile mintirho ya vona naswona a va katekisile hi ku tshembeka ka vona. Hi xikombiso Bibele a li hi byeli swa swinyingi hi Simiyoni, wanuna lweyi a a “lulamile naswona a a chava Xikwembu,” kambe Yehovha a mu pfunile swaku a profeta hi Yesu ni mamana wa yena Mariya. (Luk. 2:22, 25-35) Tlhela u pimisa hi xikombiso xa muprofeta wawansati Ana lweyi se a a gugile. Hambileswi se a a ni 84 wa malembe “a a nga kali tempeleni.” Hi mhaka leyo, Yehovha a yentxe swaku Ana a vona Yesu na a ha li mutsongo. Swa tikomba swaku Simiyoni na Ana a va li va lisima ka Yehovha. — Luk. 2:36-38.

8-9. Nyikela xikombiso lexi kombisaka swaku vamakwerhu lava nga feliwa hi vanuna va vona i va lisima ka Yehovha.

⁸ Swoswi, vamakwerhu va vanyingi va ku tshembeka lava se va nga guga i swikombiso swa swinene ka majovhem. Vona xikombiso xa makwerhu wawansati Lois Didur, a ve mupfuli wa ndlela wa ku hlawuleka aCanadá na a ni 21 wa malembe. Yena ni nuna wa yena João va tirhe malembe ya manyingi na va li vadjikelezi. Hi ku famba ka nkama va hete 20 wa malembe na va tirha aBetele la Canadá. Nkama lowu makwerhu Lois na a ni 58 wa malembe, yena ni nuna wa yena João va rhambiwe swaku va ya tirha aUcrânia. Va titwise ku yini hi xirhambo lexo? Phela swi nga yentxeka a va ta va va pimise leswi: Se hi vakulu a hi nge swi koti ku ya tirha ka tiko lin’wana. Handle ka leswo, va pfumelile ku ya tirha aUcrânia. Naswona João a vekiwe swaku a va mun’we wa vamakwerhu va Comissão la Filiyali la Ucrânia. Loko ku hundze 7 wa malembe makwerhu João a file, kambe makwerhu Lois a tama a tirha aBetele la Ucrânia. Swoswi makwerhu Lois a ni 81 wa malembe, kambe a ha tama a tirhela Yehovha hi ku tshembeka aBetele la Ucrânia naswona vamakwerhu va mu rhandza hintamu.

⁹ Ku fana na makwerhu Lois, ku ni vamakwerhu lava nga feliwa, kambe leswi se va nga feliwa a swi vuli swona swaku se a va ha li va lisima. Phela vamakwerhu lava va pfune vanuna va vona hi malembe ya manyingi naswona va tama va tirhela Yehovha hi ku tshembeka. (1 Tim. 5:3) Handle ka leswo, xikombiso xa vona xi nga ma pfuna hintamu majovhem.

10. Hi djondza yini ka xikombiso xa makwerhu Toni?

¹⁰ Vamakwerhu va vanyingi va ku tshembeka lava se va nga guga va kalaka va nga swi koti ku huma makaya ka vona na vona i va lisima. Hi xikombiso, makwerhu Toni a le ka xiyimu lexi fanaka. A tsakamisiwe na a ni 20 wa malembe hi  Agosto wa 1942 aPensilvânia, aEstados Unidos. Kambe loko se a tsakamisiwile a sindzisiwe ku ya nyimpini. Leswi a nga yala, a petiwe djele ku ringana malembe mambirhi ni hafu. Yena ni nsati wa yena Hilda, va kulise 2 wa vana na va va djondzisa hi Yehovha. Naswona hi ku famba ka nkama makwerhu Toni a tirhe ka 3 wa mabandla na a li mutlhanganisi wa ntlawa wa madoda, funtshi a tlhele a va muvoneleli wa ma asembleya. A fambise mintlhanganu a tlhela a djondza ni vanhu a djele. Swoswi makwerhu Toni a ni 98 wa malembe naswona a tama a tirhela Yehovha hi ku tshembeka. A tlhela a tirhisana kahle ni vamakwerhu va bandla la yena!

11. Hi nga swi kombisisa ku yini swaku vamakwerhu lava nga guga va kalaka va nga swi koti ku huma makaya hi mhaka ya ntanga i va lisima ka hina?

¹¹ Hi nga yentxa yini swaku hi kombisa swaku ha va nyika lisima vamakwerhu lava kalaka va nga humi makaya hi mhaka ya ntanga? Loko swi koteka madoda ma nga patsa vamakwerhu lava ka mintirho ya bandla. Naswona hi nga va pfuna hi ku va yendzela kumbe hi va fonela hi ku tirhisa vhidiyo chamada. Loko hi tiva makwerhu lweyi a kalaka a nga humi kaya hi mhaka ya ntanga, naswona a nga kule ni bandla hi fanele hi mu pfuna. Hikusa loko hi nga tivoneli, hi nga va khohlwa vamakwerhu lava va lisima. Van’wana ka vamakwerhu lava swi nga va karhatela ku vulavula hi wutomi la vona, kumbe va pimisa swaku a hi swa lisima ku yentxa leswo. Kambe loko hi va yentxa swivutiso hi tlhela hi va yingisela kahle loko va hi byela hi minkateko leyi va nga yi kuma ka nhlengeletanu ya Yehovha, swi ta hi pfuna hintamu.

12. I vamakwerhu va ku tshamisa ku yini lava hi nga va kumaka mabandleni ya hina?

¹² Phela swi nga ku hlamalisa ku tiva swaku hambi hi ka mabandla ya hina, va kona vamakwerhu va ku tshembeka lava se va nga guga lava nga swikombiso swa swinene leswi nga hi pfunaka. Hi xikombiso, makwerhu Hariete se a a tirhela Yehovha malembe ya manyingi ka bandla la yena aNova Jersey, aEstados Unidos. Kambe swi lave a rhurha a ya tshama ni n’wana wa yena. Vamakwerhu va bandla leli a nga ya ka lona va tinyike nkama wa ku mu tiva kahle naswona va djondze minchumu ya lisima ka yena. Makwerhu Hariete a va byele hi minchumu ya yinyingi ya yinene leyi nga yentxeka ka ntirho wa ku chumayela nkama lowu a nga djondza ntiyiso kolomuyani ka 1925. Hi nkama wolowo, loko makwerhu Hariete a ya nsin’wini a a tolovela ku famba ni xikovha xa matinyu ka paxta leswaku loko o tshuka a khomiwa a ta xi tirhisa loko a li djele. Phela hi 1933 makwerhu Hariete a petiwe djele makhambi mambirhi ndzeni ka vhiki, kambe nuna wa yena lweyi na a nga li Mboni a mu pfune hi ku sala a hlayisa 3 wa vana va vatsongo. Impela, hi fanele hi va hlonipha hintamu vamakwerhu va ku tshembeka lava se va nga guga va ku fana na makwerhu Hariete!

13. Hi djondza yini hi lisima leli vamakwerhu lava nga guga va nga na lona ka nhlengeletanu ya Yehovha?

¹³ Vamakwerhu va hina lava nga guga i va lisima hintamu ka nhlengeletanu ya Yehovha. Vamakwerhu lava va swi vonile swaku Yehovha a va pfunile ka wutomi la vona, naswona a katekise nhlengeletanu ya yena hi tindlela ta tinyingi. Vamakwerhu lava va djondze minchumu ya yinyingi ka swihoxo leswi va nga swi yentxa. Se u fanele u vona vamakwerhu lava na va li “xihlovo xa wutlhari,” u tlhela u pfumela swaku va ku pfuna. (Swi. 18:4) Loko u tinyika nkama wa ku tiva vamakwerhu lava, lipfumelo la wena li ta tiya naswona u ta djondza hintamu hi xikombiso xa vona!

14. Deteronoma 32:7 yi hi byela swaku hi yentxa yini?

¹⁴ Tinyiki nkama wa ku bula ni vamakwerhu lava se va nga guga. (Lerha Deteronoma 32:7.) Phela swi nga yentxeka va nga ha voni  kahle, va nga ha vulavuli kahle kumbe va nga ha swi koti ku famba, kambe ka timbilu ta vona va ha li majovhem hikusa va tiyentxele vito la linene ka matihlo ya Yehovha. (Ekl. 7:1) Minkama hinkwayu khumbuka swaku vamakwerhu lava i va lisima ka Yehovha. Naswona tama u va hlonipha vamakwerhu lava. Fana na Elixa lweyi a nga yentxa hinkwaswu swaku a tama a va na Eliya ka masiku ya wugamu lawa a va ta va xikan’we. Phela hi makhambi manharhu Elixa a byele Eliya a ku: “A ni nge ku siyi.” — 2 Tiho. 2:2, 4, 6.

15. Hi swini swivutiso leswi hi nga swi yentxaka vamakwerhu lava se va nga guga?

¹⁵ Loko u bula ni vamakwerhu lava se va nga guga kombisa swaku wa va rhandza hi ku va yentxa swivutiso hi ndlela ya lirhandzu. (Swi. 1:5; 20:5; 1 Tim. 5:1, 2) U nga va yentxa swivutiso swa ku fana ni leswi: “Nkama na wa ha li jovhem i yini xi nga ku tiyisekisa swaku u kume ntiyiso?” “Swilo leswi nga ku humelela ka wutomi la wena swi ku pfunise ku yini swaku u tama u tiyisa wunghanu la wena na Yehovha?” “I yini lexi nga ku pfuna swaku u tama u tirhela Yehovha na wu tsakile?” (1 Tim. 6:6-8) Loko se u va vutise swivutiso leswi, va yingiseli kahle loko va ku hlamula.

16. Ku ta yentxeka yini loko vamakwerhu lava se va nga guga ni majovhem va bulisana?

¹⁶ Loko vamakwerhu lava nga guga va bula ni majovhem, hinkwavu va ta tiyisana. (Rom. 1:12) Majovhem ma ta tiyiseka swaku Yehovha wa va hlayisa vanhu va yena va ku tshembeka lava se va nga guga, naswona vamakwerhu lava se va nga guga va ta tama va swi vona swaku Yehovha wa va rhandza. Loko u tinyika nkama wa ku bula ni vamakwerhu lava, va ta swi tsakela hintamu ku ku byela leswi Yehovha a nga va katekisisa xiswona ka wutomi la vona.

17. Hi mhaka muni hi ku famba ka nkama vamakwerhu lava se va nga guga va ya va saseka ka Yehovha?

¹⁷ Hi ntolovelo loko munhu a ya a kula, ni ku saseka ka yena ka pumbeka, kambe lava tshembekaka ka Yehovha a va vona na va sasekile minkama hinkwayu. (1 Tes. 1:2, 3) Hikusa hi ku famba ka nkama va pfumelele moya wa ku kwetsima wa Xikwembu leswaku u va pfuna ku ya va yampsisa a wumunhu la vona. Se loko hi ya hi va tiva kahle vamakwerhu lava hi tlhela hi pfumela swaku va hi pfuna, hi ta swi vona swaku i va lisima ka nhlengeletanu ya Yehovha!

18. Hi ta djondza yini ka nhlokomhaka leyi taka?

¹⁸ Phela loko majovhem ni vamakwerhu lava se va nga guga va nyikana lisima, bandla li ta ya li tiya. Ka nhlokomhaka leyi taka, hi ta djondza swaku vamakwerhu lava se va nga guga va nga swi kombisisa ku yini swaku va ma nyika lisima majovhem abandleni.