DIANA a ni malembe lawa ma tlulaka 80 naswona se i khale na a kumana ni swikarhato swotala. Nuna wa yena a ani mavabyi lawa ma hlakalisaka maselula ya byongo hi katsongokatsongo naswona a file na a li ka ndhawu leyi kukhataleliwaka vanhu lava gugeke. Diana a tlhele a feliwa hi vana vambirhi va xinuna naswona a tshame a khomiwa hi kankru la mavele. Hambiswilitano, vamakwerhu vamu vona a tsakili minkama hinkwayo loko a li minhlanganwini ni le ntirhweni wochumayela.

João a tirhe 43 wa malembe a li mulanguteli wa xifundza. Aaxi rhandza swinene xiyavelo lexi naswona aanga yanakanyi hi kuxi cinca hi ntirho wun’wana. Hambiswilitano, a boheke kunyima leswaku a ya khatalela xaka la yena leli ali vabya. Minkama hinkwayo, loko vamakwerhu va tlhangana na João ka masembleya ni ka makongresu, va xiye leswaku aha li yelwiya vamu tivaka. A atshama a tsakile minkama hinkwayo.

Xana Diana na João vaswi kotisa kuyini kutshama na va tsakile hambileswi va kumanaka ni swiyimo swa kukarhata? Munhu lweyi a hluphekaka angaswi kotisa kuyini kutshama na a tsakile? Xana angawu kumisa kuyini ntsako munhu lweyi a nyimaka kutirha ka xiyavelo lexi aaxi rhandza? Bibele lihi nyika nhlamulo ya swivutiso leswo loko li ku: “Lweyi wa kululama ata tsaka ka Yehovha.” (Tipisalema 64:10) Hingama twisisa kahle marito ya ndzimana leyi loko hi tiva leswingatahi tsona kumbe kuhi nyika ntsako wa hilaha kunga heliki.

Ku ni swilo swotala leswihi nyikaka ntsako. Hi xikombiso, wanuna ni wansati lava rhandzanaka va tsaka loko va chada; mupsali wa tsaka loko a va ni n’wana; naswona munhu wa tsaka loko a kuma xiyavelo leximpsha ka ntirho wa Yehovha. Swilo leswi swi tisa ntsako hikuva i swihiwa leswi humaka hi ka Yehovha, kunga lweyi a nyimiseke wukati, a nyikeke vanhu wuswikoti la kuva ni vana ni lweyi a nyikaka vanhu swiyavelo swohlawuleka. — Genesa 2:18, 22; Tipisalema 127:3; 1 Timotiya 3:1.

Hambiswilitano, swilo swin’wana leswihi nyikaka ntsako aswi tlhaveliwi hi dlambu. Lexi twisaka kuvava, munhu lweyi hi chadeke na yena angaha tshika kutshembeka ka hina kumbe a fa. (Ezekiyele 24:18; Hosiya 3:1) Vana vangaha tshika kuyingisa vapsali va vona ni Xikwembu ivi va susiwa bandleni. Hi xikombiso, vana va Samuwele avanga tirheli Yehovha hi ndlela leyi yamukelekaka. Davhida a tisele ndjangu  wa yena swikarhato swotala hileswi a yendleke xidjoho na Bati-xeba. (1 Samuwele 8:1-3; 2 Samuwele 12:11) Loko swilo swa kufana ni leswo swi humelela swingahi tsona ntsako swi tlhela swihi yendla hi khunguvanyeka ni kutwa kuvava swinene.

Hilaha kufanaka, kucinca loku yendliwaka hi nhlengeletano, mavabyi kumbe xilaveko xa kukhatalela maxaka ya hina swingaha boha leswaku hi tshika xiyavelo xohlawuleka lexi hinga na xona. Votala lava bohekeke kuyendla leswo va vula leswaku vawu xuva ntsako lowu avawu twa loko vaha li ka xiyavelo xa vona.

Swi le livaleni leswaku swilo leswihi nyikaka ntsako aswi tshami hilaha kunga heliki. Loko swi li tano, xana hingaswi kota kutshama hi tsakile hambiloko swilo leswihi nyikaka ntsako swi hela? Ina, hikuva hambi Samuwele, Davhida ni van’wana ava lahlekeliwanga hi ntsako hambiloko va langutana ni swikarhato.

Yesu aaswi tiva leswaku ntsako wa ntiyiso i yini. Bibele lihi byela leswaku loko angese ta laha misaveni a ‘atsaka mahlweni ka yena [Yehovha] nkama hinkwawo.’ (Swivuriso 8:30) Hambileswi Yesu a langutaneke ni swikarhato swotika swinene laha misaveni, kuyendla kurhandza ka Yehovha aswimu tsakisa. (Yohane 4:34) Kuvuliwa yini hi swikarhato leswi a langutaneke na swona loko a li kusuhi ni kufa? Bibele li vula leswi: “Hikolaho ka ntsako lowu awu vekiwe mahlweni ka yena, a tiyisele mhandzi ya nxanisu.” (Vaheveru 12:2) Hi mhaka leyo, hinga djondza swotala ka swilo swimbirhi leswi Yesu aswi vuleke malunghana ni ntsako.

Loko 70 wa vadjondzisiwa va tlhelele ka Yesu ndzhaku kochumayela, ava tsake swinene hikolaho ka swilo leswi vaswi yendleke, kupatsa ni kuhlongola madimona. Kambe Yesu ava byele leswi: “mingatsakeni hi leswi mimoya yimiyingisaka; kambe tsakani hi leswi mavito ya n’wina matsaliweke tilweni.” (Luka 10:1-9, 17, 20) Kuyamukeliwa hi Yehovha i swa lisima naswona swihi tisela ntsako wa wukulu kutlula xiyavelo xihi ni xihi xohlawuleka.

Ka nkama wun’wana, loko Yesu a li karhi a vulavula ni xitshungu, wansati mu’wana wa Muyuda a hlamalisiwe swinene hi ndlela leyi a adjondzisa ha yona, la kakuva amu byela leswaku wa tsaka mamana lweyi amu velekeke. Xana Yesu amu hlamulise kuyini? Amu byele leswaku vatsaka swinene “lavayingisaka Rito ra Xikwembu, vava varihlayisa!” (Luka 11:27, 28) Hakunene, ha tibuma hileswi vana va hina vahi yendlaka hi tsaka. Kambe lexihi nyikaka ntsako wa hilaha  kunga heliki i kuyingisa Yehovha ni kuva ni wuxaka lelinene na yena.

Swihi nyika ntsako wa wukulu swinene kutiva leswaku Yehovha wahi yamukela. Hambileswi swinga tsakisiki kuweliwa hi miringo, ahingeyi pfumeleli leswaku yihi tekela ntsako wa hina. Loko hi tshama hi tshembekile hambiloko yihi wela, ntsako wa hina wuta ya wu kula swinene. (Varhoma 5:3-5) Handle ka leswo, Yehovha ava nyika moya lowokwetsima lavamu tshembaka. Leswo swi yendla leswaku va tsaka hikuva ntsako i xiphemu xa handzu wa moya lowokwetsima. (Vagalatiya 5:22) I hikolaho ka leswo Tipisalema 64:10 yi vulaka leswi: “Lweyi wa kululama ata tsaka ka Yehovha.”

Leswi swi tlhela swihi yendla hi twisisa leswaku hayini Diana na João ava tshama va tsakile hambileswi ava langutana ni swikarhato. Diana a vula leswi: “Kufana ni xin’wanana lexi tsutsumelaka ka papayi wa xona loko xi ni xikarhato, na mina ni tsutsumela ka Yehovha ka hinkwaswo leswi ni kumanaka na swona.” A tlhela a yengetela a ku: “Naswi vona leswaku Yehovha a na mina. Wani pfuna kuhambeta ni chumayela wheti yin’wana ni yin’wana na ni tsakile.” I yini lexi pfuneke João kutshama a tsakile ni kuhisekela ntirho wa kuchumayela hambileswi xiyavelo xa yena xi cinceke? Yena a vula leswi: “Kusukela loko ni kombeliwe kuva mudjondzisi ka Xikola xa Wutirheli la Mfumu hi 1998, ani yendla djondzo ya munhu a li yexe makhambi yotala kutlula nkama aningese yamukela xiyavelo lexi.” João a tlhela a hlamusela leswaku swiva vevukelile kuyamukela kucinca lokuyani hikuva minkama hinkwayo leswi aswi li mbilwini ya vona aku li kuyendla xin’wana ni xin’wana lexi Yehovha aatava rhuma xona. A gamisa hi ku: “Ahi tisoli hi leswi hiswi yendleke.”

Vanyingi vama vonile ma hetiseka ka wutomi la vona a marito lawa ma kumekaka ka Tipisalema 64:10. Hi xikombiso, nuna na nsati lava tirheke Betele la Estados Unidos kuringana 30 wa malembe va yaveliwe kutirha tani hi maphayona yohlawuleka. Va hlamusele leswaku va twe kuvava hikolaho ka leswi avata tshika swilo leswi avaswi rhandza. Kambe va tlhele va ku: “Awunge tshameli kurila wutomi la wena hinkwalo.” Hi mhaka leyo, ndzhaku nyana ka loko va humile Betele, va sungule kuhlanganyela ka ntirho wa kuchumayela ka bandla leli va yaveliweke ka lona. Va tlhele va vula leswi: “Ahi khongela ka Yehovha himu byela xin’wana ni xin’wana lexi axihi karhata. Loko hi vona Yehovha a hlamula swikhongelo swa hina ahi khutazeka hi tlhela hi tsaka. Ndzhaku nyana ka loko hi fike ka bandla leliyani, vamakwerhu van’wana na vona va teke wuphayona. Handle ka leswo, swihi tsakisile kuvona 2 wa swidjondzo swa hina swa Bibele swi yendla nhluvuku.”

I ntiyiso leswaku aswi vevuki kutshama hi tsakile nkama hinkwawo. Minkama yin’wana hingaha khunguvayeka. Hambileswo, marito ya Yehovha lawa ma kumekaka ka Tipisalema 64:10 mahi thova mbilu. Hambiloko hi hela ntamu, ahi tiyisekeni leswaku loko hi tshama hi tshembekile hambiloko koba “xidzedze” xa kukarhata awuton’wini la hina, hita “tsaka ka Yehovha”. Xin’wana lexingahi pfunaka i kuveka miyanakanyo ya hina ka xitshembiso xa Yehovha xa “matilo lamampsha ni misava leyimpsha”. Loko xitshembiso lexo xi hetiseka, vanhu hinkwavo vata va ni wutomi leli hetisekeke naswona vata ‘tsaka vatsakisisa hilaha kungaheliki’ hikolaho ka leswi Yehovha angataswi yendla. — Esaya 65:17, 18.

Pimisa hi ndlela leyi swingata tsakisa hi yona. Hita va ni lihanyo la linene, hi pfuka siku ni siku na hinga twi kuvava kokarhi amirhini wa hina. Swilo leswi aswihi khunguvanyisa khale swingaha li kona. Hilaha Yehovha a vulaka ha kona, “swilo leswingahundza aswingetekhumbukiwa, hambi mbilwini aswingeheti.” Hita hoyozela varhandziwa va hina lava feke naswona hita titwisa xileswi vapsali va xintombhana xa 12 wa malembe lexi pfuxiweke hi Yesu va titwiseke xiswona: “Vahlamala hi kuhlamala lokukulu.” (Marka 5:42) Ndzhaku ka nkama nyana, hinkwavo lavangata hanya misaveni vata va vanhu lava lulameke naswona vata “tsaka ka Yehovha” hi masiku.