1, 2. Hayini kuli wutlharhi kuyingisa Muvumbi wa hina loko hi yendla swiboho leswingata khumba wumundzuku la hina? (Vona swifaniso akusunguleni ka djondzo.)

LOKO u li mumpsha, swinga yendleka u khutaziwa kuyendla minchumu yo hambanahambana leswaku uta va ni wumundzuku lelinene. Vaprisori kumbe vanhu van’wana vangahaku khutaza kulandzelela mawunivershidade kumbe mintirho leyingataku holela male yotala. Kambe leswi ahi swona leswi Yehovha aku navelelaka swona. I ntiyiso leswaku a lava u tinyiketela axikolweni leswaku uta kota kudjondza ntirho lowungataku pfuna leswaku u tihanyisa. (Vakolosa 3:23) Hambileswo, waswi tiva leswaku leswi unga mumpsha, ku ni swiboho swa swikulu leswi u faneleke uswi yendla, leswingata khumba wumundzuku la wena. Hi mhaka leyo, aku nyika nkongomiso lowungataku pfuna kuhanya hi ndlela leyingatamu tsakisa ka masiku lawa ya wugamu. — Matewu 24:14.

² Unga rivali leswaku Yehovha a tiva hinkwaswo. Waswi tiva leswingata humelela ka nkama lowu taka naswona waswi tiva leswaku se kuchota nkama muni leswaku magamu ma fika. (Esaya 46:10; Matewu 24:3, 36) Handle ka leswo, Yehovha aku tiva kahle. Waswi tiva leswingataku pfuna leswaku u va ni wutomi la kutsakisa ni leswingata honha wutomi la wena. Leswi vanhu vaku khutazaka swona  swingaha tikomba swi li swinene, kambe loko swinga seketeliwanga ka Rito la Xikwembu, aswi pfuni nchumu. — Swivuriso 19:21.

3, 4. Xiboho lexi Adamu na Eva vaxi yendleke xi ve ni vuyelo lihi ka vona kupatsa ni vanhu hinkwavo?

³ Kusukela khale, kuve ni vanhu lava khutazaka van’wana kuyendla swilo leswi hoxeke. Wa kusungula kuyendla leswo i Sathana. A byele Adamu na Eva leswaku a vata tsaka loko avo tiyendlela swiboho hi voxe. (Genesa 3:1-6) Kambe hi kuvula leswo, Sathana a akombisa kukhatala hi yena ntsena! A alava leswaku Adamu na Eva, kupatsa ni vana hinkwavo lava avatava psala hi kufamba ka nkama, va yingisa ni kugandzela yena matshan’wini ya Yehovha. Kambe xana xi kona lexi Sathana a tshameke axi yendlela vanhu lexi aximu yendla a faneleka kuyingisiwa ni kugandzeliwa? Axi kona. Yehovha hi yena aava nyikile swilo hinkwaswo. Ava chadisile, ava nyika jaradi la kusaseka leswaku va tshama ka lona ni mirhi lowu awungata bola, kuvabya kumbe kufa.

⁴ Lexi vavisaka, Adamu na Eva avaxi yingisanga Xikwembu. Hi kuyendla leswo, va tseme wuxaka leli ava li na lona ni Lweyi ava nyikeke wutomi. Mavuyelo ya xiboho xa vona ma tsema nhlana. Kufana ni swiluva leswi khayiwaka ka ximilana, Adamu na Eva va gugile va gama va fa. Vana va vona, lava patsaka na hina, ha guga hi tlhela hi fa. (Varhoma 5:12) Vanhu vanyingi namuntlha a va na mhaka ni leswi Xikwembu xiswi vulaka. Va lava kuyendla kurhandza ka vona ntsena. (Vaefesa 2:1-3) Hi wahi mavuyelo lawa vama kumaka hi kuyendla leswo? Bibele li vula leswaku aku na “wutlharhi” ka lava lwisanaka na Yehovha. — Swivuriso 21:30.

5. a) I yini leswi Yehovha a atiyiseka ha swona? b) Xana leswi Yehovha a atiyiseka hi swona swa humelela?

⁵ Yehovha a atiyiseka leswaku aata va ni vanhu lava patsaka ni vampsha votala, lava avata tsakela kumu tiva va tlhela vamu gandzela. (Tipisalema 103:17, 18; 110:3) Vampsha volavo i va lisima swinene ka Yehovha! Loko u li mun’we wa vona, tiyiseka leswaku wa tikorhisa hi swilo “leswinene swa Xikwembu” ni leswaku swi yengetela ntsako wa wena awuton’wini. (Lerha Tipisalema 103:5; Swivuriso 10:22) Ka djondzo leyi hita bula hi 4 wa swilo leswi vampsha va tikhorisaka hi swona: Swakudla swa moya, vanghanu lavanene, swikongometo leswinene ni ntshunxeko wa ntiyiso.

6. Hayini u fanele u khatala hi xilaveko xa wena xa moya, naswona i yini leswi Yehovha aku nyikaka swona leswaku aku pfuna?

⁶ Swiharhi aswi na xilaveko xa moya. Hi mhaka leyo, aswi titwi swi li ni xilaveko xa kutiva Muvumbi wa swona. Kambe hina hi na xona. (Matewu 4:4) Loko hi yingisa Xikwembu hita va ni wutlharhi, wutivi ni ntsako. Yesu a vule leswaku vatsaka “lavakhatalaka hi xilaveko xa vona xa moya, hikusa Mfumu wa matilo i wa vona.” (Matewu 5:3, NM) Xikwembu xihi nyika Bibele xi tlhela xi tirhisa nandza ‘lweyi atshembekeke ni kutlhariha’ leswaku ahi nyika mabuku lamangatahi pfuna kutiyisa lipfumelo la hina. (Matewu 24:45) Mabuku wolawo ma vitaniwa swakudla swa moya hikolaho ka leswi ma tiyisaka lipfumelo ni wuxaka la hina na Yehovha. Kunene ha tsaka hileswi hinga ni swakudla swotala swa moya! — Esaya 65:13, 14.

7. Xana swakudla swa moya leswi taka hi ka Yehovha swihi pfunisa kuyini?

⁷ Swakudla swa moya swingaku nyika wutivi ni wuswikoti la kupimisa hi ndlela leyinene, lelingataku sirhelela hi tindlela totala. (Lerha Swivuriso 2:10-14.) Hi xikombiso, wutivi litaku pfuna kutiva mavunwa, yofana ni lawa ma vulaka  leswaku aku na Muvumbi kumbe leswaku male yotala ni swilo leswi vonekaka switaku nyika ntsako. Linga tlhela liku pfuna kupapalata kunavela mikhuva leyi yingataku twisa kuvava. Kutani, yendla hinkwaswo leswi ungaswi kotaka leswaku u va ni wutivi ni kupimisa hi ndlela leyinene. Loko u yendla leswo, uta tivonela hi ya wena leswaku Yehovha waku rhandza naswona aku navelela leswinene. — Tipisalema 34:8; Esaya 48:17, 18.

8. Hayini u fanele u tshinela ka Yehovha swoswi, naswona kuyendla leswo switaku vuyelisa hi yini ka nkama lowu taka?

⁸ Kungali khale misava hinkwayo ya Sathana yita helisiwa. I Yehovha ntsena lweyi angatahi sirhelela a tlhela a yenelisa swilaveko swa hina, kupatsa ni swakudla swa siku ni siku. (Habakuku 3:2, 12-19) Kutani swoswi i nkama wa leswaku hi tshinela ka Yehovha hi tlhela himu tshemba swinene. (2 Petro 2:9) Loko hi yendla leswo, hambi swoyini, hita titwa kufana na Davhida, lweyi ange te: “Niveka Yehovha mahlweni ka mina minkama hinkwayo. Hikuva a le vokweni la mina la xinene, aningetsekatsekisiwi.” — Tipisalema 16:8.

9. a) Hikuya hi Yohane 6:44, i yini leswi Yehovha aswi yendlaka? b) I yini leswi hiswi tivaka hi Mboni ya Yehovha leyi hi tlhanganaka na yona kosungula?

⁹ Loko u tlhangana ni munhu lweyi anga tiviki ntiyiso, i yini leswi uswi tivaka hi yena? Swingaha yendleka u tiva vito la yena kumbe ndlela leyi a langutekaka ha yona. Hambileswo, awu tivi swotala hi yena. Kambe swa hambana loko u tlhangana ni munhu lweyi a tivaka ntiyiso hikuva u tiva swotala hi yena. Hi xikombiso, waswi tiva leswaku a rhandza Yehovha ni leswaku a ni wumunhu lelinene leli susumeteleke Yehovha kumu rhamba leswaku a va xirho xa ndjangu wa vagandzeli va yena. (Lerha Yohane 6:44.) Kunga khataliseki leswaku munhu yolweyo a ta hi kwihi ni leswaku a wundlisiwe kuyini, u tiva swotala hi yena. Na yena a tiva swotala hi wena!

10, 11. I yini lexi yendlaka vanhu va Yehovha va va van’we naswona leswo swiva khumbisa kuyini?

¹⁰ Hambiloko ungese bula swaku yini ni Mboni ya Yehovha leyi wahakuyi tivaka, waswi tiva leswaku hawumbirhi la n’wina miyi nyika lisima hintamu minchumu leyi fanaka. Waswi  tiva leswaku hambileswi mi vulavulaka lirimi lohambana, mi vulavula lirimi lin’we “lelibaseke” la ntiyiso. (Sofaniya 3:9) Leswi swi vula leswaku hawumbirhi la n’wina maxi tshemba Xikwembu, mi hanya hi minawu leyi fanaka ya mahanyelo naswona mi ni ntshembo lowu fanaka hi wumundzuku. Swilo leswi swimi pfuna kutshembana ni kuyaka wunghanu lelingata tshama hilaha kunga heliki.

¹¹ Hinkwaswo leswi swi yendla hi gimeta leswaku lava gandzelaka Yehovha i vanghanu lavanene. Hambiloko hingese tshama hi tlhanghana ni votala va vona, hinga vula leswaku hi ni vanghanu amisaveni hinkwayo! Xana wu kona ntlawa wun’wana wa vanhu lowunga ni wuxaka ni xinghanu lexi handle ka vanhu va Yehovha?

12. Hi swihi swikongometo leswi ungahaswi fikelelaka?

¹² Lerha Eklesiasta 11:9–12:1. Xana u ni swikongometo leswi u zamaka kuswi fikelela? Kumbexana u ni xikongometo xa kudjondza Bibele siku ni siku, xa kunyikela tinhlamulo kumbe tinkulumi letinene aminhlanganwini. Kumbe u karhi u lwela kuyampsisa ndlela leyi u tirhisaka ha yona Bibele loko u li kuchumayeleni. Xana u titwisa kuyini loko u xiya leswaku waswi fikelela swikongometo leswi kumbe loko van’wana vaku byela leswaku u karhi uswi fikelela? Ha tiyiseka leswaku wa tsaka. Phela awungata titwa hi ndlela leyi hambaneke. Hayini? Hikuva u yendla leswi Yehovha a lavaka leswaku uswi yendla, hilaha Yesu a yendleke ha kona. — Tipisalema 40:8; Swivuriso 27:11.

13. Hayini kutirhela Xikwembu swi yampsa kutlula kulandzelela swikongometo swa misava leyi?

¹³ Kuveka miyanakanyo ya wena ka ntirho wa Yehovha ntsena switaku nyika ntsako ni wutomi lelinga ni xikongomelo. Pawulo a vule leswi: ‘Hikolaho, vamakwerhu lavarhandzekaka, tiyani swinene mingatsekatsekeni; tiyiselani swinene, mitirhela Hosi masiku hinkwawu, na mili karhi miswitiva leswaku mintirho ya n’wina Hosini ayingaweli hansi.’ (1 Vakorinto 15:58) Loko vanhu va veka miyanakanyo ya vona ka swilo swa misava, swa kufana ni kuyendla male yotala kumbe kulava ndhuma, avawu kumi tsako wa ntiyiso. Hambiloko va tikomba va tsakile, hi ndzeni ava tsaki. (Luka 9:25) Leswaku hi twisisa mhaka leyi, ahi kambisiseni xikombiso xa Hosi Solomoni. — Varhoma 15:4.

14. Xikombiso xa Solomoni xingahi djondzisa yini?

¹⁴ Hosi Solomoni i mun’wana wa vanhu lava ava fuwile va tlhela va va ni matimba swinene lava va tshameke va hanya. Yena hi yexe a tibyele leswi: “Nitaringa ntsako leswaku nivona vuyelo la kona.” (Eklesiasta 2:1-10) Solomoni a yake tiyindlo ta tikulu ta kusaseka, a yendla majaradi yosaseka ni kuva ni xin’wana ni xin’wana lexi aaxi lava. Kambe, xana a atsakile a tlhela a yeneliseka? Loko Solomoni a langute ndzhaku ivi a vona swilo hinkwaswo leswi a ali na swona, a vule leswi: “Hinkwaswo i wuhava [ni] kuhlongolisa moya”. A yengetele a ku: “Akungali na nchumu lexipfunaka”. (Eklesiasta 2:11) Xana xikombiso lexi axiswi veki livaleni leswaku kuhlongolisa swilo leswi vonekaka i wuphukuphuku?

15. Hikuya hi Tipisalema 32:8, hayini u fanele u va ni lipfumelo?

¹⁵ Vanhu van’wana va djondze kuvava awuton’wini la vona hi kuva va yendle swihoxo ivi va xaniseka hikolaho ka mavuyelo yobiha lawa va veke na wona. Yehovha angaswi lavi leswaku swilo swofana ni leswi swiku humelela. Matsan’wini ya leswo, a lava leswaku umu yingisa u tlhela u yendla kurhandza ka yena. Kambe kuyendla leswo swi lava lipfumelo. Hambileswo, ungata tshuka u tisola hi swiboho leswi uswi yendleke  awuton’wini la wena hikolaho ka lipfumelo. Yehovha ange tshuki a rivala ‘rirhandzu leri ulikombeke hi vito ra yena’. (Vaheveru 6:10) Kutani yendla hinkwaswo leswaku u tiyisa lipfumelo la wena. Loko u yendla leswo, uta kota kuyendla swiboho leswinene awuton’wini naswona uta tivonela hi wexe leswaku u ni B’ava wa le tilweni lweyi aku navelelaka leswinene. — Lerha Tipisalema 32:8.

16. Hayini hi fanele hiwu nyika lisima ntshunxeko ni kuwu tirhisa hi ndlela ya wutlharhi?

¹⁶ Pawulo a vule leswi: “Laha Moya wa Hosi [Yehovha] wunga kona, kutshunxeka ku kona.” (2 Vakorinto 3:17) Yehovha wawu rhandza ntshunxeko naswona aku yendle u li ni wuswikoti la kuva na wena uwu rhandza. Kambe a lava leswaku u tirhisa ntshunxeko wa wena hi ndlela ya wutlharhi leswaku wuku sirhelela. Van’wana va tintanga ta wena vangaha hlalela swifaniso swa vanhu va kukala vanga yambalanga nchumu, va tikhoma hi ndlela yobiha hi timhaka ta masangu, va veka wutomi la vona akhombyeni hi kuyendla mitlangu leyi yinga ni khombo kumbe va dzaha mbangi ni kukutlela byala. Swilo leswi swingaha tikomba swi li swinene, kambe swi hetelela hi mavuyelo yobiha, yofana ni kuva ni mavabyi, mikhuva yobiha kumbe kufa. (Vagalatiya 6:7, 8) Vampsha lava va yendlaka swilo leswi vangaha pimisa leswaku va ni ntshunxeko, kambe antiyisweni a va na wona. — Tito 3:3.

17, 18. a) Hayini hi vula leswaku kuyingisa Xikwembu swihi nyika ntshunxeko wa ntiyiso? b) Adamu na Eva ava ni ntshunxeko lowu tlulaka lowu vanga na wona namuntlha hi ndlela yihi?

¹⁷ Hi tlhelo lin’wana, kuyingisa Yehovha i swinene ka hina naswona swihi nyika lihanyo lelinene ni kuva ni ntshunxeko wa ntiyiso. (Tipisalema 19:7-11) Nakambe loko u tirhisa ntshunxeko wa wena hi ndlela ya wutlharhi, leswi vulaka kuyingisa minawu ni matshinya ya minawu ya Xikwembu leyi hetisekeke, uta komba Yehovha swin’we ni ndjangu wa wena leswaku u ni wutihlamuleli. Nakambe vapsali va wena vataku tshemba va tlhela vaku nyika ntshunxeko lowu yengetelekeke. Yehovha a tshembisa malandza ya yena yotshembeka leswaku kungali khale atama nyika ntshunxeko wohetiseka, lowu Bibele liwu vitanaka ‘ntshunxeko wokwetsima lowunga wa vana va Xikwembu’. — Varhoma 8:21.

¹⁸ Ntshunxeko lowu wa ntiyiso wu fana ni lowu Adamu na Eva ava tikhorisa hi wona. A jaradi la Edeni, ako va ni nchumu wun’we ntsena lowu Xikwembu xingava byela leswaku avanga fanelanga vawu yendla, kunga kudla handzu wa nsinya wun’we ntsena lowu awu li ka jaradi. (Genesa 2:9, 17) Xana u pimisa leswaku Xikwembu axo va khoma hi ndlela yokala wululami kumbe kuva tikisela hi kuva nyika nawu lowu? Nikatsongo! Pimisa hi minawu yotala leyi vanhu vayi vekaka ni kusindzisa van’wana leswaku vayi yingisa. Kambe Yehovha ayo nyika Adamu na Eva nawu wun’we ntsena.

19. I yini leswi Yehovha na Yesu vahi djondzisaka swona, leswingatahi pfuna kuva ni ntshunxeko?

¹⁹ Yehovha ahi khoma hi ndlela ya wutlharhi. Agahi nyiki minawu yotala. Matshan’wini ya leswo, hi kulehisa mbilu ahi djondzisa leswaku lirhandzu hi lona li faneleke lihi susumetela  kumu yingisa. A tlhela ahi djondzisa kuhanya hi kupfumelelana ni matshinya ya yena ya minawu ni kuva hi nyenya swilo swobiha. (Varhoma 12:9) Ka djondzo ya yena ya le ntshaveni, Yesu ahi pfune kutwisisa leswaku hayini vanhu va yendla swilo swobiha. (Matewu 5:27, 28) Nakambe amisaveni leyimpsha, loko se a fuma misava, Yesu ata hambeta ahi djondzisa kuvona swilo leswinene ni leswobiha hilaha yena aswi vonaka ha kona. (Vaheveru 1:9) Yesu ata tlhela a yendla leswaku hi va ni miyanakanyo ni mirhi lowu hetisekeke. Yehleketa hi ndlela leyi swingata tsakisa ha yona loko se hi fumiwa hi Yesu! Ahingahata ringiwa kuyendla swilo swobiha naswona ahingahata xaniseka hikolaho ka kukala kuhetiseka. Hita tikhorisa hi ‘ntshunxeko wokwetsima lowunga wa vana va Xikwembu’ lowu Yehovha ahi tshembisaka wona.

20. a) Xana Yehovha awu tirhisa kuyini ntshunxeko wa yena? b) Xana ugamu tekelelisa kuyini Yehovha?

²⁰ Amisaveni leyimpsha, ntshunxeko wa hina wuta va ni swipimelo. Hayini hi vula leswo? Hikusa hinkwaswo leswi hingataswi yendla swi fanele swi kombisa leswaku haxi rhandza Xikwembu swin’we ni vamakwerhu va hina. Phela loko hinkwaswo leswi hiswi yendlaka swi susumeteliwa hi lirhandzu, hita va hi tekelela Yehovha. Hambileswi anga ni ntsunxeko lowu heleleke, lirhandzu hi lona li kongomisaka hinkwaswo leswi aswi yendlaka, kupatsa ni ndlela leyi ahi khomaka ha yona. (1 Yohane 4:7, 8) Hi ndlela leyi, swa twala kuvula leswaku ntshunxeko lowu heleleke hingowu kuma ntsena loko hi tekelela Yehovha.

21. a) Davhida a titwise kuyini hi Yehovha? b) Hita bula hi yini ka djondzo leyi landzelaka?

²¹ Xana waswi tlangela swilo hinkwaswo leswi Yehovha aku nyikaka swona? Aku nyika swakudla swo moya, vanghanu lavanene, swikongometo leswinene, ntshembo wa leswaku uta va ni ntshunxeko lowu hetisekeke amisaveni leyimpsha ni tinyiko tin’wana totala letinene. (Tipisalema 103:5) Hinkwaswo leswi swingahaku yendla u titwa hilaha Davhida a titweke ha kona loko a vula marito lama kumekaka ka Tipisalema 16:11: “Uni tivisa ndlela ya wutomi. Ku ni kutsaka lokukulu amahlweni ka wena; ku ni kutsaka hilaha kungaheliki”. Ka djondzo leyi landzelaka, hita bula hi mintiyiso yin’wana ya lisima leyinga ka buku ya Tipisalema ndzima 16. Yona yitaku pfuna kuvona leswaku ungaswi kotisa kuyini kuva ni wutomi loyampsa.