Hi Mani Lweyi A Lawulaka Miyehleketo ya Wena?
‘Mingalandzeni mahanyela ya nguva leyi.’ — VARHOMA 12:2.
TINSIMU: 69, 57
1, 2. a) Xana Yesu a hlamule njhani loko Petro amu byele leswaku a titsetselela? (Vona xifaniso akusunguleni ka djondzo.) b) Hayini Yesu a hlamule hi ndlela leyo?
VADJONDZISIWA va Yesu ava yehleketa leswaku Yesu aata pfuxa mfumu wa Israyele; kambe loko ava byele leswaku kungali khale aata hlupheka ni kufa, va tsemeke nhlana! Mupostola Petro a byele Yesu a ku: ‘Titsetselele, Hosi; Swilo leswi, swingakala swingakuhumeleli nikatsongo.’ Yesu amu hlamule a ku: ‘Suka ka mina Sathana! U xikhunguvanyiso ka mina, hikuva awuyehleketi swa Xikwembu, uyehleketa swa vanhu ntsena.’ — Matewu 16:21-23; Mintirho 1:6.
2 Hi kuvula leswo, Yesu aswi veke livaleni leswaku miyehleketo ya Yehovha yi hambanile ni mavonelo ya misava leyi fumiwaka hi Sathana. (1 Yohane 5:19) Petro a khutaze Yesu leswaku a khatala hi yena ntsena, kunga moya lowu votala vanga na wona ka misava leyi. Kambe Yesu aaswi tiva leswaku Yehovha a alava ati lulamisela kuhluphiwa ni lifu leli aata langutana na lona kungali khale. Nhlamulo ya Yesu yi kombise leswaku a yamukele miyehleketo ya Yehovha naswona ayi papalate hi kuhelela miyehleto ya misava.
3. Hayini swi karhata kuyamukela miyehleketo ya Yehovha ni kupapalata miyehleketo ya misava?
3 Kuvuliwa yini hi hina? Xana hi yehleketa kufana na Yehovha kumbe kufana ni vanhu va misava leyi? Tani hi Vakreste, hi tikarhatela swinene kutiyiseka leswaku hi yendla leswi tsakisaka Xikwembu. Kambe kuvuliwa yini hi ndlela leyi hi pimisaka ha yona? Xana hi tikarhatela kuvona timhaka hi ndlela leyi Yehovha a tivonaka ha yona? Phela kuyendla tanu swi lava minzamu yotala. Kasi kupimisa kufana ni vanhu va misava leyi swa vevuka hikuva moya wa misava wu hinkwakonkwako. (Vaefesa 2:2) Vanhu va misava leyi va ni moya wokhatala hi vona ntsena, naswona hingaha ringeka kuyehleketa kufana na vona. Hakunene swa tika kuyehleketa kufana na Yehovha kambe swi vevuka swinene kuyehleketa kufana ni vanhu va misava leyi.
4. a) Xana kuta humelela yini loko hi pfumelela misava yi lawula miyehleketo ya hina? b) Hita vona yini ka djondzo leyi?
4 Loko hi pfumelela leswaku misava yi lawula miyehleketo ya hina, hita sungula kukhatala hi hina ntsena naswona hita lava kutibohela leswi swinga swinene ni leswinga swa kubiha. (Marka 7:21, 22) Kutani i swa lisima swinene kudjondza kuva ni ‘miyehleketo ya Xikwembu,’ kunga li ya “vanhu”. Ka djondzo leyi hita vona leswaku hingaswi yendlisa kuyi leswo. Hita vona swivangelo leswi kombisaka leswaku kuvona timhaka hilaha Yehovha ati vonaka ha kona aswihi tsoni nntshunxeko kambe swahi vuyelisa. Hita tlhela hi vona leswaku hingaswi papalatisa kuyini kulawuliwa hi miyehleketo ya misava leyi. Ka djondzo leyi landzelaka, hita vona leswaku hingaswi kotisa kuyini kuva ni miyehleketo ya Yehovha ka timhaka tokarhi ni ndlela leyi ha yona hinga yendlaka miyehleketo ya Yehovha yi va ya hina.
MIYEHLEKETO YA YEHOVHA YA HI VUYELISA
5. Hayini vanhu van’wana vangaswi lavi kulawuliwa?
5 Vanhu van’wana avaswi lavi leswaku ni mun’we a lawula ndlela leyi va yehleketaka ha yona. Vangaha ku: “Ni lava kuti yehleketela.” Hi marito lawa, vangaha vula leswaku vata tiyendlela swiboho swa vona naswona va ni mfanelo yoyendla tanu. Avaswi lavi kulawuliwa kumbe va sindzisiwa leswaku va fana ni vanhu van’wana. * (Vona nhlamuselo ya le hansi.)
6. a) Hi wihi ntshunxeko lowu Yehovha ahi nyikeke wona? b) Xana ntshunxeko lowu wu ni swipimelo?
6 Hi fanele hiswi tiva leswaku loko hi yamukela miyehleketo ya Yehovha aswi vuli swona leswaku ahinge ve ni mavonelo ya hina. Vakorinto Vawumbirhi 3:17 yi li: “Laha moya wa Hosi [Yehovha] wunga kona, kutshunxeka ku kona.” Yehovha ahi tumbuluxe hi ndlela yohlawuleka, ahi nyike ntshunxeko wohlawula muxaka wa vanhu lava hi lavaka kuva vona ni kuva ni swilo leswi hiswi rhandzaka. Kambe leswo aswi vuli swona leswaku hi ni ntshunxeko lowunga liki na swipimelo. (Lerha 1 Petro 2:16.) Loko hi lava kutiva leswaku nchumu wokarhi i wunene kumbe wu hoxile, Yehovha a lava leswaku hi tirhisa Rito la yena kuva lihi kongomisa. Xana kuyendla leswo swihi tsona ntshunxeko kumbe swahi vuyelisa?
7, 8. Xana kuvona swilo hi ndlela leyi Yehovha aswi vonaka ha yona swihi tsona ntsako? Nyikela xikombiso.
7 Hi xikombiso, vapsali va zama kudjondzisa
vana va vona mahanyelo lamanene. Vangava djondzisa kuva vanhu votshembeka, kutirha hi matimba ni kukhatala hi vanhu van’wana. Swilo leswi aswi kombisi leswaku va tsona swokarhi vana va vona kumbe kuva ni ntshunxeko. Kambe, hi kuyendla leswo va lungiselela vana va vona leswaku swiva fambela kahle awuton’wini. Loko vana va kula kutani va huma munti, vata va va tshunxekile leswaku va tiyendlela swiboho swa vona. Loko va hlawula mahanyela lawa vapsali va vona vava djondziseke wona, vata yendla swiboho swa kahle ni kupapalata swikarhato, kuvilela ni kutisola loku taka hi kuyendla swiboho leswi hoxeke.Yehovha ahi rhamba leswaku hi djondza kuvona swilo hilaha yena aswi vonaka ha kona ni kuhanya hi kulandza minawu ya yena
8 Kufana ni mupsali lwenene, Yehovha a lava leswaku vana va yena va va ni wutomi leli tsakisaka. (Esaya 48:17, 18) Kutani ahi djondzisa matshinya ya minawu mayelana ni kuva ni mahanyela lamanene ni ndlela leyi hi faneleke hi khoma van’wana ha yona. Ahi rhamba leswaku hi vona swilo hilaha yena aswi vonaka ha kona ni kuhanya hi kulandza minawu ya yena. Matshan’wini yohi tsona ntsako, swihi pfuna kuva ni wutlhari ni kuyendla swiboho leswinene. (Tipisalema 92:5; Swivuriso 2:1-5; Esaya 55:9) Hinga va ni swilo leswi hiswi rhandzaka kambe hita yendla swiboho leswinene leswingatahi yendla hi tsaka. (Tipisalema 1:2, 3) Hakunene, loko hi li ni miyehleketo ya Yehovha hi vuyeliwa hi tindlela totala!
MIYEHLEKETO YA YEHOVHA YI TLAKUKILE
9, 10. Xana i yini leswi kombisaka leswaku miyehleketo ya Yehovha yi tlakukile kutlula ya misava leyi?
9 Xivangelo xin’wana lexi xihi yendlaka hi lava kuyehleketa kufana na Yehovha, hi leswaku miyehleketo ya yena yi tlakukile kutlula ya misava. Misava yi nyikela switsundzuxo mayelana ni leswaku hi wahi mahanyela lawa ma baseke, ndlela yo va ni ndjangu lowu tsakeke, kuva ni ntirho wa kahle ni ka swilo swin’wana swa wutomi. Kambe switsundzuxo leswi aswi twanani ni miyehleketo ya Yehovha. Hi xikombiso, misava yi khutaza vanhu leswaku va tilavela swilo swa vona ntsena. Yi tlhela yi yendla vanhu va pimisa leswaku kutikhoma hi ndlela yobiha hi timhaka ta masangu aswi bihanga. Nkama wun’wana yi vula leswaku akuva lava chadeke va kuma ntsako lowu yengetelekeke va fanele va tshikana kumbe va dlaya wukati hambi hi swivangelo leswinga twaliki. Switsundzuxo leswo swi lwisana ni leswi Bibele liswi djondzisaka. Xana namuntlha switsundzuxo swa misava i swa lisima kutlula swa le Bibeleni?
10 Yesu a te: ‘Wutlharhi . . . litikomba na lilulamile hi mintirho ya lona.’ (Matewu 11:19) Hambileswi misava yi yendleke nhluvuko ka tekinolojiya, ayiswi koti kuhelisa swilo leswi swihi sivelaka leswaku hi va ni ntsako swofana ni tinyimpi, xihlawuhlawu ni wugevenga. Kutlula kolaho, misava yi vula leswaku kutikhoma hi ndlela yobiha hi timhaka ta masangu aswi bihanga. Hambileswo, vanhu va pfumela leswaku leswo swi hahlula mindjangu, swi vanga mavabyi ni mavuyelo man’wana yobiha. Xana kuvuliwa yini hi switsundzuxo swa Yehovha? Vakreste lava yamukelaka miyehleketo ya Yehovha va ni mindjangu leyi tsakeke, va ni lihanyo lelinene, va ni wuxaka lelinene ni vamakwerhu vaxinuna ni vaxisati amisaveni hinkwayo. (Esaya 2:4; Mintirho 10:34, 35; 1 Vakorinto 6:9-11) Swi le livaleni leswaku miyehleketo ya Yehovha yi tlakukile kutlula ya misava leyi.
11. I mani lweyi a alawula miyehleketo ya Moxe, naswona hi lihi vuyelo li veke kona?
11 Malandza yotshembeka ya Yehovha ya khale amaswi tiva leswaku miyehleketo ya Yehovha yi tlakukile. Hi xikombiso, hambileswi Moxe a adjondzisiwe ‘vutlhari hinkwalu la Vagibita,’ aaswi tiva leswaku wutlharhi la ntiyiso li ta hi ka Yehovha. (Mintirho 7:22; Tipisalema 90:12) Hi mhaka leyo a kombele Yehovha a ku: “Nitivisi tindlela ta wena.” (Eksoda 33:13) Tani hileswi Moxe a tshikeke Yehovha a lawula miyehleketo ya yena, Yehovha amu tirhise hi ndlela yohlawuleka leswaku a hetisisa xikongomelo xa Yena. A tlhele a nyika Moxe kudzuneka hi kumu vitana wanuna wa lipfumelo leli kulu. — Vaheveru 11:24-27.
12. Xana swiboho swa Pawulo aswi sekeliwe kwihi?
12 Mupostola Pawulo a ani wutivi, a adjondzekile naswona a avulavula Xiheberu ni Xigriki. (Mintirho 5:34; 21:37, 39; 22:2, 3) Kambe a papalate wutlhari la misava ivi a yendla swiboho hi kutirhisa minawu ya Rito la Xikwembu. (Lerha Mintirho 17:2; 1 Vakorinto 2:6, 7, 13.) Leswo swi ve ni vuyelo lelinene hikuva a humelelile ka ntirho wa yena wochumayela naswona a alangutele swinene ka hakelo leyi tshamaka hilaha kunga heliki. — 2 Timotiya 4:8.
13. I mani lweyi anga ni wutihlamuleli locinca miyehleketo ya hina leswaku hi vona swilo hi ndlela leyi Yehovha aswi vonaka ha yona?
13 Swilo dla leswaku miyehleketo ya Xikwembu yi tlakukile swinene kutlula ya misava. Loko hi hanya hi minawu ya Xikwembu hi kuma ntsako wa ntiyiso naswona switahi fambela kahle awuton’wini. Kambe Yehovha angehi sindzisi leswaku hi yehleketa kufana na yena. ‘Mutirhi kumbe nandza wotshembeka ni wotlhariha’ anga lawuli miyehleketo ya hina; hambi madoda amaswi yendli leswo. (Matewu 24:45; 2 Vakorinto 1:24) Mun’wana ni mun’wana wa hina a ni wutihlamuleli locinca miyehleketo ya yena leswaku a vona swilo hi ndlela leyi Yehovha aswi vonaka ha yona. Xana hingaswi yendlisa kuyini leswo?
PAPALATA KULAWULIWA HI MISAVA LEYI
14, 15. a) Hi fanele hi yanakanyisisa hi yini leswaku hi yehleketa kufana na Yehovha? b) Hayini hinga fanelanga hi pfumelelela mavonelo ya misava ma nghena ka miyakanyo ya hina? Nyikela xikombiso.
14 Varhoma 12:2 yi li: ‘Mingalandzeni mahanyela ya nguva leyi, kambe mipfumela kuhundzuka miva vampsha kupimiseni ka n’wina, mitakota kutwisisa leswi kurhandza lokunene ka Xikwembu, lokukhensekaka ni kuhetiseka, kunga swona.’ Ndzimana leyi yi kombisa leswaku kunga khataliseki leswaku i yini leswi aswi lawula miyehleketo ya hina hingase djondza ntiyiso, hingaswi kota kuyi cinca leswaku yi fana ni ya Xikwembu. Hambileswi wumunhu leli hi psaliweke na lona kumbe swilo leswi swi tshameke swihi yendlekela awuton’wini aswi lawula ndlela leyi ahi yehleketa ha yona ka swilo swokarhi, miyehleketo ya hina yita hambeta yi cinca. Naswona yita hambeta yi cinca swinene hi kuyelana ni leswi hi hlawulaka kupimisa hi swona. Loko hi yanakanyisisa hi miyehleketo ya Yehovha, hitaswi vona leswaku ndlela leyi a vonaka swilo ha yona yi lulamile nkama hinkwawo. Loko hi yendla leswo, kunavela ka hina kutava kuvona timhaka hi ndlela leyi Yehovha ati vonaka ha yona.
15 Kambe leswaku hi twananisa miyehleketo ya hina ni ya Yehovha ahi fanelanga ‘hilandzela mahanyela ya nguva leyi.’ Leswi swi vula leswaku ahi fanelanga hi b’ukela ni kulerha swilo leswi lwisanaka ni miyehleketo ya Xikwembu. Kuyendla leswo i swa lisima swinene. Hi xikombiso, munhu lweyi a lavaka kuva ni lihanyo lelinene angaha hlawula kudla swakudla leswinene. Kambe minzamu leyi hinkwayo yinga va nyuku wa mbyana loko a tolovela kudla swakudla leswi boleke! Hilaha kufanaka, minzamu ya hina yodjondza hi miyehleketo ya Yehovha ayinge pfuni nchumu loko hi pfumela mavonelo ya misava ma nghena ka miyanakanyo ya hina.
16. Hi fanele hiti sirhelela ka yini?
16 Xana hingaswi kota kuyi papalata hilaha kuheleleke miyehleketo ya misava? Nikatsongo. Hita khumbeka nyana hi yona hikuva aswinge koteki kurhurha amisaveni leyi. (1 Vakorinto 5:9, 10) Hambiloko hi li kuchumayeleni, hingaha twa vanhu va vula mavonelo lawa ma hoxeke ni tidjondzo ta mavunwa. Hambileswi swinga kotekiki kubaleka hi kuhelelela ka mavonelo lawa ma hoxeke, ahi fanelanga hi yanakanya hi wona kumbe hima yamukela. Kufana na Yesu, hi fanele hiyi papalata hi xihantla miyanakanyo leyi Sathana a lavaka leswaku hi va na yona. Hinga tisirhelela ka mavonelo ya misava hi kupapalata kuma twa kumbe kuma hlalela na swinga bohi. — Lerha Swivuriso 4:23.
17. Xana hingati sirhelelisa kuyini leswaku hinga twi kumbe kuvona mavonelo ya misava swinga bohi?
17 Hi xikombiso, hi fanele hi hlawula vanghanu hi wutlhari. Bibele li hi byela leswaku loko hi li ni wunghanu ni vanhu lavanga gandzeliki Yehovha, hita sungula kuyehleketa kufana na vona. (Swivuriso 13:20; 1 Vakorinto 15:12, 32, 33) Hi fanele hi tlhela hi hlawula kahle leswi hi hungataka hi swona. Loko hi papalata wuhungasi leli kombisaka wugevenga, kutikhoma hi ndlela yobiha hi timhaka ta masangu kumbe leli djondzisaka leswaku swilo hinkwaswo swiyo tiyendlekela, hita va hi papalata kuchimisa miyanakanyo ya hina hi swilo leswi ‘swisivelaka vanhu kutiva Xikwembu.’ — 2 Vakorinto 10:5.
Xana hi pfuna vana va hina leswaku va papalata wuhungasi lelinga ni khombo? (Vona maparagrafu 18 na 19)
18, 19. a) Hayini hi fanele hi va ni wuxiyaxiya ka mavonelo ya misava lawa manga taka hi tindlela leti tumbeleke? b) Hi swihi swivutiso leswi hi faneleke hi tivutisa swona naswona hayini?
18 Hi fanele hi tiva mavonelo kumbe miyehleketo ya misava hambiloko yi ta hi ndlela leyi tumbeleke ivi hiyi papalata. Hi xikombiso, mahungu man’wana mangaha nyimelela mavonelo ya ntlawa wokarhi wa politika. Kasi man’wana ma khutaza swikongomelo ni swiyendlo leswi misava yiswi vonaka swi li swa lisima. Mafilmi ni mabuku ma khutaza moya woyehleketa hi ndlela leyi: “Mina kusungula” ni “ndjangu kusungula”. Ma yendla miyehleketo leyo yi tikomba onge ayi hoxanga, yi tlhela yi naveleka. Kambe mavonelo lawa ma hambanile ni leswi Bibele li vulaka swona, hikuva lona li vula leswaku hina ni ndjangu wa hina hita va ni ntsako wa ntiyiso loko hi rhandza Yehovha kutlula swilo hinkwaswo. (Matewu 22:36-39) Switoriya swin’wana leswi swi tsaleliweke vatsongwana, swibonekana ni mintlango yin’wana leyi kombiwaka ka televhizorhi leswingaha tikombaka swi yamukeleka, swinga yendla leswaku vana va yamukela mahanyela yobiha hi ndlela leyi tumbeleke.
19 Leswi aswi vuli swona leswaku swi hoxile kutihungata. Kambe hi fanele hi tivutisa: ‘Xana naswi kota kuvona mavonelo ya misava hambiloko ma ta hi ndlela leyi tumbeleke? Xana na tisirhelela swin’we ni vana va mina ka maprograma ya televhizori, mabuku lawa ma kombisaka swilo leswi hoxeke? Xana ni pfuna vana va mina akuva va vona swilo hilaha Yehovha aswi vonaka leswaku vanga kuceteliwi hi miyehleketo ya misava?’ Loko hi tiva kuhambana a xikarhi ka miyehleketo ya Yehovha ni ya misava, ahingata ‘landzela mahanyela ya nguva leyi.’
HI MANI LWEYI AKU LAWULAKA SWOSWI?
20. I yini leswingata kombisa leswihi lawulaka?
20 Hi fanele hi tsundzuka leswaku ku ni swihlovo swimbirhi swa rungula. Xin’wana i Yehovha kasi xin’wana i Sathana ni misava ya yena. Hi mani lweyi aku lawulaka? Nhlamulo ya xivutiso lexi yita tiseketela hi lomu uma lavaka kona marungula. Loko hi yamukela mavonelo ya misava, mata lawula miyanakanyo ya hina ivi hi pimisa ni kuyendla swilo leswi swi tsakisaka mbilu ya hina ntsena. Kutani i swa lisima swinene kuva hi hlawula kahle leswi hiswi hlalelaka, leswi hiswi lerhaka, leswi hiswi yingiselaka ni leswi hiswi pimisaka.
21. Hita bula hi yini ka djondzo leyi landzelaka?
21 Ka djondzo leyi, hi vone leswaku akuva hi vona swilo hi ndlela leyi Yehovha aswi vonaka ha yona, hi fanele hi papalata ndlela leyi misava yi pimisaka ha yona. Kambe leswaku hi ya hi yehleketa kufana ni Xikwembu, hi fanele hi tlhela hi yanakanyisisa hi miyehleketo ya xona. Ka djondzo leyi landzelaka hita vona leswaku hingaswi yendlisa kuyini leswo.
^ ndz. 5 Ntiyiso wa mhaka hi leswaku hambi munhu lweyi a yehleketaka leswaku oti fuma, wa kuceteliwa hi leswi van’wana vaswi yendlaka. Hi xikombiso, leswi hiswi kholwaka hi kutumbuluxiwa ka wutomi kumbe ka ndlela leyi hi yambalaka ha yona swingaha kuceteliwa hi van’wana. Hambiswilitano, hinga hlawula leswaku hi mani lweyi angatahi lawula.