1, 2. Xana hi vuyeliwa hi yini loko hi ya hi yendla nhluvuku? Nyikela xikombiso.

ANAKANYA hi munhu lweyi a nyikaka xin’wanana xokarhi nyiko. Vapsali va xona vaxi byela va ku: “U ku khanimambu.” Kutani xi yendla tanu hileswi xi byeliweke kuyendla leswo. Kambe loko xi ya xi kula, xi sungula kutwisisa leswaku hayini vapsali va xona vaswi nyika lisima kutlangela van’wana loko vahi yendlela swilo leswinene. Hi kufamba ka nkama, xi susumeteleka kutlangela van’wana na xinga byeliwanga hi munhu hikuva se xi djondze kuva munhu lweyi a tlangelaka.

² Swi tanu ni ka hina. Loko hi sungule kutiva ntiyiso, hi djondze leswaku i swa lisima kuyingisa minawu ya Yehovha. Kambe loko hi ya hi yendla nhluvuku, hi djondza swotala hi miyehleketo ya yena kunga leswi aswi rhandzaka, leswi aswi nyenyaka ni ndlela leyi a vonaka swilo ha yona. Loko hi tshika miyehleketo ya Yehovha yi lawula swiboho ni swiyendlo swa hina hi va hi yendla leswaku miyehleketo ya yena yi va ya hina.

3. Hayini swingaha karhataka kuyehleketa kufana na Yehovha?

³ Hambileswi swi tsakisaka kudjondza kuyehleketa kufana na Yehovha, nkama wun’wana swa karhata kupimisa hi ndlela leyi  yena a pimisaka ha yona hikuva ahi hetisekanga. Hi xikombiso, hali tiva langutelo la Yehovha mayelana ni mahanyelo, kurhandza swilo leswi swi vonekaka, ntirho wochumayela, matirhiselo ya ngati ni swilo swin’wana. Kambe swingahahi karhatela kutwisisa leswaku hayini a vona swilo hi ndlela leyi aswi vonisaka xiswona. Kutani hingaswi kotisa kuyini kuyehleketa kufana na Yehovha? Naswona leswi, switahi pfunisa kuyini kuyendla swilo leswinene namuntlha ni ka nkama lowu taka?

4. Swi vula yini kuva vampsha akupimiseni?

⁴ Lerha Varhoma 12:2. Ka ndzimana leyi, mupostola Pawulo a hlamusele leswingahi pfunaka kuyehleketa kufana na Yehovha. A te ahi fanelanga hi ‘landza mahanyela ya nguva leyi’. Hilaha hiswi voneke ha kona ka djondzo leyi hundzeke, leswi swi vula kupapalata mavonelo ni swiyendlo swa misava leyi. Kambe Pawulo a tlhele a vula leswaku hi fanele hi hundzuka hi va vampsha akupimiseni. Leswo swi vula leswaku hi fanele hi djondza Rito la Xikwembu, hi twisisa miyehleketo ya xona, hi yanakanyisisa hi yona ivi hi tikarhatela kuyehleketa hilaha xi yehleketaka ha kona.

5. Hlamusela kuhambana axikarhi ka kulerha ni kudjondza.

⁵ Kudjondza aswi vuli kulerha hi xihantla rungula lokarhi kumbe kufunga tinhlamulo ta swivutiso swa djondzo. Loko hi djondza, hi yehleketa hi leswi rungula leli hili lerhaka lihi djondzisaka swona hi wumunhu la Yehovha, swilo leswi aswi yendlaka ni ndlela leyi a yehleketaka ha yona. Hi ringeta kutwisisa leswaku hayini Yehovha ahi byela leswaku hi yendla swokarhi ni kupapalata swilo swin’wana. Hi tlhela hi vona leswi hi faneleke hiswi cinca ka miyehleketo ni wutomi la hina. I ntiyiso leswaku nkama wun’wana aswinge koteki kuyanakanyisisa hi tipontu leti hinkwato loko hi li karhi hi djondza. Kambe i swa lisima kuyavanyisa hi xikarhi nkama lowu hiwu tirhiselaka kudjondza leswaku hi yanakanyisisa hi leswi hiswi lerhaka. — Tipisalema 119:97; 1 Timotiya 4:15.

6. Kuyendleka yini loko hi yanakanyisisa hi Rito la Xikwembu?

⁶ Ku ni swilo swohlamalisa leswi yendlekaka loko hi yanakanyisisa hi Rito la Xikwembu siku ni siku. ‘Hi kota kutwisisa’ kumbe kutiyiseka leswaku miyehleketo ya Yehovha yi hetisekile. Hi sungula kutwisisa ndlela leyi yena a vonaka swilo ha yona ivi hi titwananisa ni mavonelo ya yena. Hi kuyendla leswo, hi hundzuka hi va vampsha akupimiseni. Hi katsongotsongo, hi yendla leswaku miyehleketo ya Yehovha yi va ya hina.

7, 8. a) Hi lihi langutelo la Yehovha hi swilo leswi vonekaka? (Vona swifaniso akusunguleni ka djondzo.) b) Loko hi vona swilo leswi vonekaka hilaha Yehovha a swi vonaka ha kona, hi wihi nchumu lowu hingatawu teka wu li wa lisima minkama hinkwayo?

⁷ Miyehleketo ya hina yi khumba swiyendlo swa hina. (Marka 7:21-23; Yakobo 2:17) Ahi kambisiseni swikombiso swokarhi leswi vekaka mhaka leyi alivaleni. Xosungula, rungula leli vulavulaka hi kupsaliwa ka Yesu liyi veka livaleni ndlela leyi Yehovha aswi vonaka ha yona swilo leswi vonekaka. Xikwembu hi xoxe xi lange Yosefa na Mariya leswaku va wundla n’wana wa xona hambileswi avanga na male yotala. (Levhitika 12:8; Luka 2:24) Loko Yesu a psaliwa, Mariya ‘amulate xigovolweni kumbe axidjelweni xa swifuyu, hikuva avapfumalile ndhawu ndlwini ya vayendzi.’ (Luka  2:7) Loko Yehovha awoswi lava, ina a yendle leswaku Yesu a psaliwa ka ndhawu yoyampsa. Kambe leswi aswi li swa lisima ka Yehovha aku li leswaku n’wana wa yena a wundliwa ka ndjangu lowu rhangisaka wugandzeli la yena kusungula.

⁸ Rungula leli la kupsaliwa ka Yesu lihi djondzisa ndlela leyi Yehovha a vonaka swilo leswi swi vonekaka ha yona. Vapsali van’wana va lava leswaku vana va vona va va ni swilo leswinene leswi vonekaka, hambiloko leswo swi yendla leswaku wuxaka la vana va vona na Yehovha li tsemeka. Kambe Yehovha a vona wuxaka la hina na yena kuli nchumu wa lisima swinene. Xana wayi pfumelela ndlela leyi Yehovha a yehleketa ha yona amhakeni leyi yi kongomisa miyehleketo ya wena? Xana swiyendlo swa wena swi kombisa yini? — Lerha Vaheveru 13:5.

9, 10. Hingaswi kombisa kuyini leswaku hi ni langutelo leli fanaka ni la Yehovha loko swi ta mhakeni yokhunguvanyisa van’wana?

⁹ Xikombiso xin’wana i ndlela leyi Yehovha a vonaka ha yona munhu lweyi a yendlaka leswaku van’wana va djoha kumbe va tshika kumu tirhela. Yesu a te: ‘Lweyi akhunguvanyisaka mun’we wa lavatsongo lavapfumelaka ka mina, swingayampsa loko aboheleliwa ribye ra kusilela ka rona nhan’wini, ahoxiwa lwandle.’ (Marka 9:42) Marito lawa ma ni ntikelo! Haswi tiva leswaku Yesu a atekelela Tatana wa yena. Kutani hinga tiyiseka leswaku swamu khunguvanyisa Yehovha loko munhu a yendla leswaku mulandzeli wa Yesu a khunguvanyeka. — Yohane 14:9.

¹⁰ Xana hi teka mhaka ya kukhunguvanyisa van’wana hilaha Yehovha na Yesu vayi tekaka ha kona? Xana swiyendlo swa hina swi kombisa yini mhakeni leyi? Hi xikombiso, hingaha rhandza ndlela yokarhi ya mayambalela kumbe yotilunghisa. Kambe xana hita yendla yini loko leswi hiswi hlawulaka swi khunguvanyisa van’wana bandleni kumbe swi yendla leswaku van’wana va va ni miyehleketo leyi hoxeke hi timhaka ta masangu? Xana lirhandzu la hina hi vamakwerhu litahi susumetela kupapalata leswi tsakisaka hina ntsena? — 1 Timotiya 2:9, 10.

11, 12. Kudjondza kunyenya swilo leswi Yehovha aswi nyenyaka ni kutikhoma swihi vuyelisa kuyini?

¹¹ Xikombiso xa wunharhu: Yehovha a nyenya leswinga lulamangiki. (Esaya 61:8) I ntiyiso leswaku Yehovha waswi tiva leswaku nkama wun’wana swahi karhatela kuyendla leswi lulameke hikuva ahi hetisekanga. Kambe a lava leswaku kufana na yena, hi nyenya leswi biheke. (Lerha Tipisalema 97:10.) Kuyanakanyisisa hi leswi yendlaka Yehovha a nyenya swilo swobiha, switahi pfuna leswaku hi yendla miyehleketo ya yena yi va ya hina naswona switahi pfuna kuva hinga yendli swilo leswi aswi nyenyaka.

¹² Loko hi djondza kunyenya swilo swobiha, switahi wolovela kutiva leswi biheke hambiloko Bibele yingaswi vuli hi kukongoma. Hi xikombiso, ku ni macinela lawa ma vitaniwaka dança do colo. Macinela lawa, lamati nyikaka matimba hintamu namuntlha ma pfuxa kunavela kuyendla timhaka ta masangu hi ndlela leyi biheke. Van’wana va vula leswaku macinela lawa ama bihanga hikuva ama fani ni kuyendla timhaka ta masanagu hi  kukongoma. * (Vona nhlamuselo ya le hansi.) Xana Yehovha a titwisa kuyini hi mhaka leyi? Tsundzuka leswaku Yehovha a nyenya swilo hinkwaswo swobiha. Kutani ahi fambeleni kule ni nchumu wun’wana ni wun’wana lowu biheke hi kudjondza kukombisa kutikhoma ni kunyenya leswi Yehovha aswi nyenyaka. — Varhoma 12:9.

13. Xana kuyehleketa hi ndlela leyi Yehovha a vonaka swilo ha yona swoswi, switahi pfunisa kuyini loko swi lava leswaku hi yendla swiboho swa wutlhari mundzuku ka siku?

¹³ Loko hi djondza, hi fanele hi yehleketa hi ndlela leyi Yehovha a vonaka swilo ha yona, hikuva kuyendla leswi swingahi pfuna kuyendla swiboho swa wutlhari. Kutani, loko hi le ka xiyimo lexi lavaka leswaku hi yendla xiboho xa kola na kola, hita va hi lunghekile. (Swivuriso 22:3) Ahi kambisiseni swikombiso swokarhi swa le Bibeleni.

14. Hi djondza yini ka nhlamulo leyi Yosefa ayi nyikeke nsati wa Potifaro?

¹⁴ Loko nsati wa Potifaro a ringete kuyetlela na Yosefa, hi xihantla Yosefa a yalile kuyendla tanu. Swi le livaleni leswaku Yosefa se a ayehleketisisile hi ndlela leyi Yehovha a avona wukati ha yona. (Lerha Genesa 39:8, 9.) Yosefa a byele nsati wa Potifaro a ku: “Kutani ni ngaliyendlisa kuyini wubihi leli lelikulu ni djohela Xikwembu hakunene?” Leswi swi kombisa leswaku Yosefa a yendle miyehleketo ya Yehovha yi va ya yena. Ku vuliwa yini hi hina? Xana u yendla yini loko mutirhikuloni a tlanga hi kuku gangisa? Kumbe loko munhu wokarhi aku rhumela marungula kumbe mafoto lawa ma kombisaka kutikhoma ko biha hi timhaka ta masangu ka telefoni la wena? * (Vona nhlamuselo ya le hansi.) Swita vevuka swinene kutshama hi tshembekile ka Yehovha loko hi djondza ni kupfumelelana ni ndlela leyi Yehovha a vonaka timhaka teto ha yona tingesehi yendlekela, ivi hi boha leswaku hita yendla yini ka swiyimo leswo.

15. Hingaswi kotisa kuyini kutshama hi tshembekile ka Yehovha hilaha Vaheberu vanharhu va yendleke ha kona?

¹⁵ Vona xikombiso xa Vaheberu vanharhu lava tiviwaka tani hi Xadraka, Mixaka na Abedinigo. Loko Hosi Nabukadnetsara ava lerhise leswaku va gandzela xifaniso xa golidi lexi aaxi yendlile, va yalile hi kuhelela. Nhlamulo ya vona leyi kongomeke yi kombise leswaku se ava yehleketile hi leswi aswita yendleka loko va tshama va tshembekile ka Yehovha. (Eksoda 20:4, 5; Daniyele 3:4-6, 12, 16-18) Xana kuvuliwa yini hi hina namuntlha? Xana awuta yendla yini loko xefe wa wena aku kombela kuva u humesa male leswaku u seketela nkhuvu lowu fambisanaka ni wukhongeli la mavunwa? Matshan’wini yonyimela leswaku swilo swofana ni leswi swi yendleka, i swinene leswaku swoswi hi yanakanyisisa hi langutelo la Yehovha atimhakeni leto. Kutani loko hi tikuma hi li ka swiyimo leswo, switahi vevukela leswaku  hi vula ni kuyendla swilo leswi lulameke hilaha Vaheberu vanharhu va yendleke ha kona.

16. Xana kutwisisa miyehleketo ya Yehovha swihi pfunisa kuyini leswaku hi tshama hi lunghile kuva hi langutana ni wudahi la kola na kola?

¹⁶ Kuyanakanyisisa hi miyehleketo ya Yehovha swi tlhela swihi pfuna kutshama hi tshembekile ka yena hambiloko hi fanele hi kuma wudahi swa kola na kola. Swi le livaleni leswaku hi tiyimisele kupapalata kucheliwa ngati ni swiphemu swa yona swa mune. (Mintirho 15:28, 29) Kambe ku ni wudahi li katsaka kutirhisiwa ka ngati leli Mukreste mun’wana ni mun’wana a faneleke a tiyendlela xiboho hi kutirhisa matshinya ya minawu. Xana hi wihi nkama lowunene woyendla xiboho lexo? Xana hi loko se u li xibedlela, kumbexana na u twa kuvava hi hala tlhelo na u sindzisiwa kuyendla xiboho? Nikatsongo. Swoswi i nkama woyendla nkambisiso, u tsala cartão la ngati leli hlamuselaka leswaku hi lihi wudahi leli uli lavaka ni kutlhela u vulavula ni dokodela wa wena. * (Vona nhlamuselo ya le hansi.)

17-19. Hayini swi li swa lisima kudjondza na kaha li swoswi hi langutelo la Yehovha atimhakeni tokarhi? Nyikela xikombiso.

¹⁷ Xohetelela, yanakanya hi ndlela leyi Yesu a hlamuleke Petro ha yona loko amu nyike ndzayo leyinga liki yinene: “Titsetselele, Hosi.” Swi le livaleni leswaku Yesu a ayanakanyisise swinene hi leswi Xikwembu axi lava leswaku aswi yendla ni hi swiprofeto leswi yelanaka ni wutomi ni lifu la yena. Wutivi leli limu nyike matimba leswaku a tshama a tshembekile ka Yehovha ni kunyikela hi wutomi la yena liva xitlhavelo ka hina hinkwerhu. — Lerha Matewu 16:21-23.

¹⁸ Namuntlha, Xikwembu xi lava leswaku hi va vanghanu va xona ni kuyendla leswi hingaswi kotaka akuchumayeleni ka mahungu yotsakisa. (Matewu 6:33; 28:19, 20; Yakobo 4:8) Kambe vanhu van’wana vangahi heta matimba hilaha Petro a yendleke ha kona ka Yesu. Hi xikombiso, xefe wa wena angahaku tshembisa kuku yengesela muholo, kambe waswi tiva leswaku kupfumela leswo switaku yendla u tirha nkama lowu yengetelekeke naswona switaku tsona nkama wo ya minhlanganwini ni kuchumayela ni bandla. Kumbe loko waha ya xikolweni, ahinge vaprisori va wena vaku  nyika mukhandlu wa kuyengesela tidjondzo ta wena ka doropa lin’wana. Xana uta nyimela swilo leswi swi yendleka ivi hi kona se ungata khongela, u yendla nkambisiso, u vulavula ni ndjangu wa wena kumbe madoda ungase yendla xiboho? I swinene leswaku swoswi u djondza ndlela leyi Yehovha a vonaka timhaka leto ha yona kutani u yendla miyehleketo ya yena yi va ya wena. Kutani, loko swilo leswo swotshuka swiku humelela utaswi kota kuswi hlula. Utaswi tiva leswaku u fanele u yendla yini ka swiyimo leswo hikuva se uta va na u tiyimiselile kutirhela Yehovha ntsena.

¹⁹ Ungaha yanakanya hi swiyimo swin’wana leswingaha humelelaka kola na kola leswingaha ringaka kutshembeka ka wena ka Yehovha. I ntiyiso leswaku ahingeswi koti kuti lungiselela kulangutana ni swiyimo hinkwaswo. Kambe loko hi tirhisa nkama wa djondzo ya munhu ali yexe leswaku hi yanakanyisisa hi miyehleketo ya Yehovha, switahi vevukela kutsundzuka leswi hiswi djondzeke ni kutiva ndlela leyi hingaswi tirhisaka ha yona ka xiyimo xin’wana ni xin’wana. Kutani loko hi li karhi hi djondza, hi fanele hi twisisa leswaku hi lihi langutelo la Yehovha atimhakeni tokarhi, hi yendla miyehleketo ya yena yi va ya hina, hi tlhela hi yanakanyisisa hi ndlela leyi swilo leswi hiswi djondzaka swingahi pfunaka kuyendla swiboho swa wutlhari swoswi ni mundzuku ka siku.

20, 21. a) Hayini hinga vulaka leswaku hitati khorisa hi ntshunxeko amisaveni leyimpsha? b) Hi fanele hi yendla yini leswaku hi tikhorisa hi wutomi kahali swoswi?

²⁰ Hinkwerhu ka hina ahiwu voni nkama wova ka misava leyimpsha. Votala va hina hi ni tshembo wohanya hilaha kunga heliki aParadeyisini laha misaveni. Hansi ka Mfumu wa Xikwembu, hita kuma ntshunxeko ka swivavu ni ka kuhlupheka loku hi langutanaka na kona ka misava leyi. Naswona swi le livaleni leswaku hita va ni ntshunxeko woyendla swiboho hi kuyelana ni leswi hiswi rhandzaka ni kunavela ka hina.

²¹ Kambe leswo aswi vuli swona leswaku ntshunxeko wa hina awungata va ni swipimelo. Lavorhula vata yendla swiboho leswi sekeliweke ka minawu ya Yehovha ni miyehleketo ya yena. Kuyendla leswo swita tisa ntsako lowukulu ni kurhula lokukulu. (Tipisalema 37:11) Nahaha rindzela leswaku nkama lowo wufika, hingaswi kota kuva ni ntsako awuton’wini kahali swoswi loko hi yendla leswaku miyehleketo ya Yehovha yi va ya hina.