1, 2. a) Akuli wihi ntirho wa lisima awuton’wini la Yesu naswona hayini? b) Hi fanele hi yendla yini leswaku hi humelela tani hi “vatirhikulobye ni Xikwembu”?

YESU KRESTE a ali muvatli, kambe ndzhaku ka sweswo ahetelele ava muchumayeli. (Marka 6:3; Varhoma 15:8) A yendle mitirho leyi yimbirhi hi ndlela leyi hetisekeke. Tani hi muvatli, adjondze tindlela ta kutirhisa switirho swa yena leswaku a yendla swilo swotala hi mapulango. Kambe loko ave muchumayeli a tirhise wutivi leli yenteke la Matsalwa leli a ali na lona leswaku a pfuna vanhu lava avanga djondzekanga kuva va twisisa ntiyiso wa Rito la Xikwembu. (Matewu 7:28; Luka 24:32, 45) Loko Yesu ali ni 30 wa malembe, a tshike kuva muvatli ivi asungula kutirha tani hi muchumayeli hikuva a aswi tiva leswaku ntirho lowu hi wona awuli wa lisima swinene. A vule leswaku kuchumayela mahungu yotsakisa ya Mfumu wa Xikwembu, i xin’wana xa swivangelo leswi yendleke Xikwembu ximu rhumela amisaveni. (Matewu 20:28; Luka 3:23; 4:43) Awuton’wini la yena, Yesu a akhomekile hi kuchumayela mahungu yotsakisa, naswona a alava leswaku van’wana va yendla leswi fanaka.— Matewu 9:35-38.

² Votala va hina ahi tirhi tani hi va vatli, kambe hinkwerhu hiva chumayeli va mahungu yotsakisa. Leswi ntirho lowu wunga wa lisima swinene, Xikwembu xa katseka kawona. Hikolaho ka sweswo hi vitaniwa “vatirhikulobye ni Xikwembu”. (1 Vakorinto 3:9;  2 Vakorinto 6:4) Hi pfumelelana ni marito ya mupisalema loko avule leswi: “Antsutsu wa rito la wena i ntiyiso”. (Tipisalema 119:159, 160) Rito la Yehovha i ntiyiso. Leswi swihi yendla hi lava kutiyisela leswaku hi “djondzisa Rito ra ntiyiso hi ndlela leyinene” ka ntirho wa hina wochumayela. (Lerha 2 Timotiya 2:15.) Kutani hi fanele hi hambeta hi yengesela wutshila la hina la kutirhisa Bibele, kunga xitirhisiwa xa hina xa lisima lexi hixi tirhiselaka kudyondzisa van’wana hi Yehovha, Yesu ni hi Mfumu. Nhlengeletanu ya Yehovha yi hi nyike switirho leswihi pfunaka kuhumelela antirwheni wochumayela, kambe hi fanele hi tiva kuswi tirhisa. Switirho leswi swi kumeka ka Switirho swa hina swo Djondzisa.

3. Xana loko hi li karhi hi chumayela hi fanele hi tiyimisela kuyendla yini, naswona Mintirho 13:48 yingahi pfunisa kuyini?

³ Hayini hiswi vitana Switirho swo djondzisa, kungali Switirho swo chumayela? Hikuva “kuchumayela” swivula kuhuwelela rungula. Kambe “kudjondzisa” swivula kuhlamusela rungula hi ndlela leyi yingata yendla leswaku munhu lweyi ali twaka ali twisisa ivi li mu susumetela leswaku ayendla leswi aswi djondzaka. Ka nkama wutsongo lowu saleke wa mafambiselo lawa ya swilo hi fanele hi tiyimisela swinene kusungula tidjondzo ta Bibele, ni kudjondzisa vanhu ntiyiso leswaku vava vadjondzisiwa va Kreste. Leswi swivula leswaku hi fanele hi hisekela kulavetela vanhu lavanga ni “kutiyimisela lokunene ka wutomi lelinga heliki” kutani hiva pfuna leswaku va sungula kutirhela Yehovha. — Lerha Mintirho 13:44-48.

4. Hinga va kumisa kuyini lavangani “kutiyimisela lokunene ka wutomi lelinga heliki?

⁴ Hinga va kumisa kuyini lavangani “kutiyimisela lokunene ka wutomi lelinga heliki”? Aka Vakreste vosungula, ndlela leyi ava kuma vanhu va muxaka lowu hayona akuli kuchumayela. Yesu a byele vadjodzisiwa va yena: “Hinkwaku lomu minghenaka kona, doropeni hambi aswidoropanini, lavani ndjangu lowu wungamiyamukelaka.” (Matewu 10:11) Ninamuntla hi fanele hi yendla hilaha kufanaka. Swile rivaleni leswaku ahi fanelanga hi nyimela leswaku vanhu lavanga tshembekiki, va kutikukumuxa, kumbe vanga liki na mhaka ni Xikwembu va yamukela mahungu yotsakisa. Amatshan’wini ya leswo hi fanele lavisisa vanhu va timbilu letinene, va kutitsongohata, lava hakunene va lavaka kutiva ntiyiso. Hinga fananisa kulavisisa loku ni leswi Yesu a aswi yendla loko a hali muvatli. Hi xikombiso loko a lava kuyendla swilo swotani hi, xipfalu, mpingu kumbe nchumu wun’wana, a asungula hi kulava mapulangu lawa mafaneleke. A gama a teka switirho swa yena, a tirhisa wutshila la yena, leswaku a yendla ntirho lowu. Hilaha kufanaka hi fanele hi lavetela vanhu va timbilu letinene, ndzhaku ka leswo hi tirhisa switirho ni wutshila la hina leswaku hi vapfuna vava djondzisiwa. — Matewu 28:19, 20.

5. I yini leswi hi fanaleke hiswi tiva mayelana ni switirho swa hina swodjondzisa? Nyikela xikombiso. (Vona xifaniso akusunguleni ka djondzo.)

⁵ Xitirho xin’wana ni xin’wana xini ntirho wa xona. Hi xikombiso, yehleketa hi switirho leswi Yesu a aswi tirhisa loko ali muvatli. * (Vona nhlamuselo ya le hansi.) A afanele ava ni switirho swa kufunga, swotsema, swoboxa, swovatla pulangu, swaku ringanisa mapesa ni kuma patsa. Hilaha kufanaka, xitirho xin’wana ni xin’wana xodjondzisa xini xikongomelo  xa xona. Kutani ahi voneni ndlela leyinene yo tirhisa switirho leswi swa lisima.

6, 7. a) Xana uma tirhisisa kuyini ma cartão ya jw? b) Hayini hi tirhisa swirhambu swa minhlanganu?

⁶ Ma cartão ya JW. Xitirho lexi i xitsongo, kambe xini vuyelo lelinene hikuva xiyendla vanhu vahi tiva, xi tlhela xiva kongomisa ka site lahina la jw.org. Ka site leli vanga djondza swotala malungana na hina, va tlhela va kombela kufambiseliwa tidjondzo ta Bibele. Kutafika swoswi, vanhu lava tlulaka 400.000 se va tirhise site ya jw.org leswaku va kombela kufambiseliwa tidjondzo ta Bibele, naswona siku ni siku vanhu lava tlulaka 100 va yendla xikombelo lexi! Nkama hinkwawo famba ni ma cartão mangali mangani. Kutani uma tirhisa loko u tlangana ni vanhu, kumbe u vulavula na vona.

⁷ Swirhambu. Xirhambu xa minhlanganu ya hina xi vula leswi: “Wa rhambiwa leswaku u djondza Bibele ni Timboni ta Yehovha.” Xi tlela xivula leswaku unga yendla leswo “ka minhlanganu ya hina,” “Kumbe ni mboni yokarhi.” Nakambe xirhambu lexi xi yendla vanhu vahi tiva, ni kurhamba “lavakhatalaka hi xilaveko xa vona xa moya” leswaku vata dyondza Bibele na hina. (Matewu 5:3) Hakunene vanhu va yamukeliwa aminhlanganwini ya hina. Kunga khataliseki leswaku vaswi lava kudjondza na hina kumbe avaswi lavi. Loko vata minhlanganwini ya hina vata vona ndlela leyi vanga djondzaka swotala aBibeleni ha yona.

8. Hayini swini lisima kuva vanhu va ta ka minhlanganu ya hina hambi kova kan’we ntsena? Nyikela xikombiso.

⁸ I swa lisima kuhambeta hi rhamba vanhu leswaku va ta minhlanganwini hambi loko ova siku lin’we ntsena. Hayini? Hikuva loko va ta, vata vona leswaku kuhambana ni wugandzeli la mavunhwa. Timboni ta Yehovha tidjondzisa ntiyiso wa Bibele naswona ti pfuna vanhu leswaku va tiva Xikwembu. (Esaya 65:13) Hi xikombiso, nuna mun’wana ni nsati wa yena kunga Ray na Linda va le Estados Unidos, va kuvonile kuhambana loku a malembeni lama hundzeke. Ava pfumela ka Xikwembu naswona ava lava kuxi tiva kuyampsa. Hikolaho vati yimisele kuyendzela makereke hinkwawo a doropeni la vona ni kukambisisa swilo swimbirhi na vangese joyina lin’we la wona. Avata sungula hi kudjondza swokarhi akerekeni, vagama va xiya leswaku mayambalela ya swirho swa kereke maswi kombisa leswaku i ya vanhu lavati vulaka vagandzeli va Xikwembu. Leswo swiva tekele malembe yotala hikuva makereke ama li manyingi. Kambe aswiva pfunanga chumu kuyendla leswo, hikuva ava djondzanga nchumu naswona mayambalela ya swirho swa makereke ama li yopfumala xichavu. Ndzhaku ka loko va yendzele kereke ya wugamu kalixta la vona, Linda aye ntirhweni kutani Ray a muke kaya. Loko ali karhi a muka kaya hi movha, a vone Salão do Reino, ivi a ku: ‘Naha nghena nivona leswaku kuyendleka yini’. Lowu wuve ntokoto wa kuyampsa kutlula hinkwayo! Mun’wana ni mun’wana a Salão do Reino a ani timpsalu ni wunghanu naswona a ayambale kahle. Ray a tshame ka banku la le phambheni naswona a aswi tsakela leswi a aswidjondza! Leswi swihi tsundzuxa ndlela leyi mupostola Pawulo ahlamuselaka ya hayona munhu lweyi oho sungulaka ku ta ka minhlanganu ya hina ivi a ku: “Hakunene Xikwembu xi kona la xikarhi ka n’wina.” (1 Vakorinto 14:23-25) Ndzhaku ka leswo, Ray a hambete aya a minhlanganwini Tisonto hinkwatu. Hi wugamu a sungule kuya ni ka minhlanganu hinkwayo ya xikarhi ka vhiki. Linda  na yena a sungule kuya ka minhlanganu, hambi leswi ava ni malembe yotlula 70, va djondze Bibele ivi va khuvuliwa.

9, 10. a) Hayini swi vevuka kutirhisa swiphephana? b) Hlamusela ndlela yotirhisa xiphephana lexinge Xana i Yini Mfumu wa Xikwembu?

⁹ Swiphephana. Hi ni 8 wa swiphephana ka switirho swa hina swodjondzisa. Aswi karhati kuswi tirhisa, naswona swi pfuna swinene kusungula mabulu. Leswi xiphephana xosungula xi humesiweke hi lembe la 2013, se kuhumesiwe kolomo ka 5 wa tibiliyoni ta swona! Swiphephana leswi hinkwaswu swi ni matshamela ya kufana. Hikolaho loko uza u djondza kutirhisa xin’we, ni leswi swin’wana ungaswi tirhisa! Xana ungaxi tirhisisa kuyini xiphephana leswaku u sungula bulu ni munhu?

¹⁰ Ahinge u lava kutirhisa xiphephana lexinge: Xana i Yini Mfumu wa Xikwembu? Mu kombe xivutiso lexinga ka tluka losungula ivi umu vutisa u ku: “Xana u tshama uti vutisa leswaku i yini Mfumu wa Xikwembu? Awu taku i . . . ” U gama umu vutisa leswaku a ata hlawula yihi ka tinhlamulo leti tinharhu. Unga vuli swaku a hlamule kahle kumbe a hoxile. Wena pfula xiphephana ka xiyenge lexinge: “Leswi Bibele Liswi Vulaka” ivi u djondza matsalwa lawa ma kombisiwaka kona, Daniyele 2:44 na Esaya 9:6. Aku heleni ka bulu yendla xivutiso lexinge: “Xana wutomi litava njhani ahansi ka Mfumu wa Xikwembu?” lexi kumekaka ka tluka la le ndzhaku a hansi ka xinhlokwana lexinge “Pimisa hi Leswi”. Ungaha hlamula xivutiso lexo ka liyendzo leli landzelaka. Loko u tlhela umu yendzela ungaha tirhisa djondzo 7 ya broxura lelinge Mahungu Yotsakisa Lamataka hi ka Xikwembu!, lelinga xin’we xa switirho swa hina swosungula tidjondzo ta Bibele.

11. Xana marevhixta ya hina ma lunghiseleliwe kuyendla yini? Naswona hi fanele hi tiva yini ha wona?

¹¹ Marevhixta. Murindzi ni Xalamuka! i marevhixta lama hundzuluxeliwaka ni kuhumesiwa hi nhlayo leyikulu kutlula marevhixta hinkwawo amisaveni hinkwayo! Leswi ma lerhiwaka hi vanhu va matiko yotala yo hambanahambana, tinhlokomhaka letinga ka xifunengeto ti yendliwe hi ndlela leyi tsakisaka vanhu va tindhawu hinkwato. Hi fanele hi tirhisa marevhixta lawa leswaku hi pfuna vanhu kuhisekela leswinga swa lisima awuton’wini namuntlha. Kambe kusungula, hi fanele hi tiva leswaku revhixta ha lin’we li yendleliwe vanhu va muxaka muni.

12. a) Xana Xalamuka! li yendleliwe vamani naswona hi xihi xikongomelo xa lona? b) Hi yihi mintokoto leyi u veke na yona swoswi nyana loko u nyikela Xalamuka!?

¹² Xalamuka! li yendleliwe vanhu lavanga ni wutivi litsongo kumbe lavanga tiviki nchumu hi Bibele. Swinga yendleka vanga tivi nchumu hi tidjondzo ta Wukreste, vangali tshembi wukhongeli kumbe vanga kholwi leswaku Bibele lingava pfuna kuva va yampsisa wumunhu la vona. Xikongomelo nkulu xa Xalamuka! i kukholwisa vanhu leswaku Xikwembu xi kona. (Varhoma 1: 20; Vaheveru 11:6) Nakambe li zama kupfuna vanhu kuva va pfumela leswaku hakunene Bibele i “Rito la Xikwembu”. (1 Vatesalonika 2: 13) Marevhixta ya Xalamuka! ya 2018 ma ni tinhlokomhaka nkulu letinge: “Ndlela Yo Kuma Ntsako”, “Swilo Swa 12 Leswi Nga Endlaka Leswaku Mindyangu Yi Tsaka”, “Leswinga Pfunaka Lavanga Kuvavisekeni”.

13. a) Xana Murindzi a yendleliwe vamani? b) Hi yihi mintokoto leyi u veke na yona swoswinyana loko u nyikela Murindzi?

¹³ Xikongomelo nkulu xa Murindzi i kuhlamusela tidjondzo ta Bibele ka vanhu lava hloniphaka  Xikwembu ni Bibele. Swinga yendleka va tiva swokarhi hi Bibele kambe vangaswi twisisi hi kuhelela leswaku li djondzisa yini. (Varhoma 10:2; 1 Timotiya 2:3, 4) Marevhixta ya Murindzi ya 2018 ma hlamula swivutiso leswi: “Xana Bibele Ya Ha Pfuna Ninamuntlha?”, “Xana Wumundzuku la Wena Lita Va Njhani?” ni lelinge: “Xana Xikwembu Xi Ni Mhaka na Wena?”

14. a) Xana mavidiyu ya 4 lawa manga ka switirho swa hina swodyondzisa ma yendleliwe yini? b)  Hi yihi mintokoto leyi u veke na yona swoswi nyana loko utirhisa mavhidiyo lawa?

¹⁴ Mavhidiyo. Aminkameni ya Yesu, va vatli ava tirhisa switirho swa vona hi mavoko. Kambe namuntlha va tirhisa switirho leswi tirhaka hi gezi, leswaku va tsema, va boxa ni kulixara. Hilaha kufana, handle kotirhisa mabuku lawa ma gandlisiweke loko hi chumayela hi ni mavhidiyo ya kusaseka lawa hingama kombaka vanhu. 4 wa wona lama kumekaka ka switirho swa hina swodjondzisa, hi lawa mange: Hayini Ufanele Udjondza Bibele?, Xana Kumaheka Yini a Salão do Reino?, Xana Xifambisiwa Njhani Xidjondzo xa Bibele? ni lelinge Timboni ta Yehova — Xana Hi Vamani? Mavhidiyo lama gomeke ama teki 2 minuto naswona ma tirha kahle ka bulo losungula. Kambe mavhidiyo lawa ma leheke manga tirhiseliwa kuyendla mayendzo yovuyela, loko vanhu va ni nkama. Mavhidiyo lawa, i switirho swohlamalisa hikuva manga khutaza vanhu leswaku va djondza Bibele va tlhela va ya minhlanganwini.

15. Xana mavhidiyo ya hina mava khumbisa kuyini vanhu lavama b’ukelaka hi lirimi la vona? Nyikela xikombiso.

¹⁵ Hi xikombiso, makwerhu mun’wana wa xisati a tlhangane ni wansati wa le Micronésia lweyi a vulavulaka Xiyapese, kunga lirimi la yena la le mbilwini. Makwerhu wa xisati amu kombe vhidiyo lelinge: Hayini Ufanele Udjondza Bibele? hi Xiyapese. Loko vhidiyo li sungula, wansati lwiyani a vule leswi: “Leli i lirimi la mina. Swa hlamalisa leswi niswi vonaka! Wanuna lweyi a vulavulaka Iani i wa tiko la mina. Yena a vulavula lirimi la mina!” Ndzhaku ka leswo, wansati lweyi a vule leswaku ata lerha ni ku b’ukela hinkwaswo ka site la hina la jw.org. (Fananisa ni Mintirho 2:8, 11.) Xikombiso xin’wana i xa makwerhu wa xisati wa Estados Unidos, lweyi sobrinyu wa yena a tshamaka ka tiko lin’wana. Amu rhumele ndlela yonghena ka site ha yona leswaku a kuma vhidiyo leli fanaka hi lirimi la yena. Ndzhaku ka loko sobrinyu wa yena a b’ukele vhidiyo amu tsalelile a ku: “Lani kuvulavuliwaka hi mufumi wo biha wa misava, kuni hlamalise swinene. Niti tsalisile ka site ni kombela kufambiseliwa djondzo ya Bibele.” Mhaka leyi ya tsakisa hikuva sobrinyu wa yena a tshama ka tiko leli ntirho wa hina wu tsimbisiwaka!

16. Hlamusela swikongomelo swa mabruxura lawa: a) Yingisa Xikwembu Leswaku Uhanya Hilaha Kungaheliki. b) Mahungu Yotsakisa Lamataka hi ka Xikwembu! c) I Vamani Lava Endlaka Ku Rhandza Ka Yehovha Namuntlha?

¹⁶ Mabroxura. Hingamu djondzisisa kuyini ntiyiso munhu lweyi angaswi kotiki kulerha kumbe anga liki ni mabuku lawa ma sekekiweke aBibele hi lirimi la yena? Amhakeni leyi, hinga tirhisa broxura lelinge: Yingisa Xikwembu Leswaku Uhanya Hilaha Kungaheliki. * (Vona nhlamuselo ya le hansi.) Xitirhisiwa xin’wana xa lisima lexihi pfunaka kusungula tidjondzo ta Bibele i broxura lelinge: Mahungu  Yotsakisa Lamataka hi ka Xikwembu! Unga komba munhu 14 wa tinhlokomhaka letinga ka pajina la wugamu ka bruxura leli ivi umu vutisa leyi yingamu tsakisa. Mungaha sungula kudjondza ka nhlokomhaka leyi ayi langeke. Xana u tshama u ringeta kuyendla leswi ka liyendzo lovuyela? Broxura lin’wana lelinga ka switirho swa hina swodjondzisa hi lelinge: I Vamani Lava Endlaka Ku Rhandza Ka Yehovha Namuntlha? li yendleliwe kupfuna swidjondzo swa Bibele leswaku swi tiva nhlengeletanu ya hina. Leswaku u djondza ndlela leyi unga tirhisaka broxura leli ha yona, vona Xiyimiso xa minhlangano xa Mahanyelo Ni Ntirho Wa Hina Wo Chumayela xa Março 2017.

17. a) Hi xihi xikomgomelo xa buku lin’wana ni lin’wana lodjondzisa? b) I yini leswi lava khuvuliwaka va faneleke vaswi yendla, naswona hayini?

¹⁷ Mabuku. Ndzhaku ka loko u sungule kudjondza ni munhu hi kutirhisa broxura, loko uswi lava unga cinca broxura hi buku leyinge: I Yini leswi Hi Nga Swi Dyondzaka eBibeleni? hi nkama lowu uwu lavaka. Buku leli li yendleliwe kupfuna vanhu leswaku va djondza tidjondzo ta xisekelo ta Bibele. Loko xidjondzo xi yendla nhluvuku naswona xi heta buku leli, unga hambeta u djondza na xona hi buku leyinge: Tihlayiseni eRirhandzwini Ra Xikwembu. Xitirhisiwa lexi xita pfuna xidjondzo kuvona ndlela leyi xinga tirhisaka ha yona matshinya ya minawu ya bibele awuton’wini la xona. Tsundzuka leswaku hambiloko se xi khuvuliwile, u fanele u djondza na xona buku leli kufikela loko muyi heta. Hi kuyendla leswi, xita kota kuva ni lipfumelo leli tiyeke hi Yehovha xi tlhela xi tshembeka hi kuhelela ka yena. — Lerha Vakolosa 2:6, 7.

18. a) Xana 1 Timotiya 4:16 yihi khutaza kuyendla yini tani hi vadjondzisi va ntiyiso, naswona hi lihi vuyelo la kona? b) Hi xihi xikongomelo xa hina loko hi tirhisa Switirho swa hina Swodjondzisa?

¹⁸ Tani hi Timboni ta Yehovha hi ni wutihlamuleli lodjondzisa vanhu ‘rito ra ntiyiso, kunga Evhangeli’ ya kutsakisa leswaku vata kuma wutomi lelinga heliki. (Vakolosa 1:5; lerha 1 Timotiya 4:16.) Leswaku hi kota kuyendla leswi, hi ni switirho leswi hiswi lavaka ka Switirho swa hina Swodjondzisa. (Vona kwadru lelinge “ Switirho Swodjondzisa.”) Onge hinkwerhu hingaswi tirhisa hilaha hinga kotaka hakona hi ndlela leyinene switirho leswi. Mun’wana ni mun’wana wa hina anga hlawula xitirho xodjondzisa ni nkama lowu a lavaka kuxi tirhisa ha wona. Kambe tsundzuka leswaku xikongomelo xa hina ahi kuphakela mabuku kumbe kuma nyika vanhu lavangali tsakeliki rungula la hina. Matshan’wini ya leswo, xikongomelo xa hina i kuyendla leswaku vanhu lavanga ni timbilu letinene, lava vati tsongohataka, lava hakunene va lavaka kutiva Xikwembu kumbe lavanga ni “kutiyimisela lokunene ka wutomi lelinga heliki” va va vadjondzisiwa. — Mintirho 13:48; Matewu 28:19, 20.