1, 2. a) Hingaha titwisa kuyini loko wutomi li cinca kola na kola? (Vona xifaniso akusunguleni ka djondzo.) b) Hikuya hi Tipisalema 131, i yini lexingahi pfunaka kuva ni kurhula ka miyanakanyo?

NDZHAKU ka loko Lóide na Alexandra va tirhe betele malembe lama tlulaka 25, va nyikiwe xiyavelo xa nyuwani xa kuya tirha nsin’wini. Akusunguleni va khunguvanyekile. Lóide a vula leswi: “Betele ni ntirho lowu aniwu yendla aswi li wutomi la mina. Niswi twisisile swivangelo leswi vangeke kucinca loku, kambe ka mavhiki ni tiwheti letinga landzela ni titwi ingaku no papalatiwa.” Kusunguleni Lóide aku pfumelile kucinca loku kambe swingasi fika kwini se a ani gome.

² Loko haha hanya, wutomi la hina linga cinca hi ndlela leyi ahingayi nyimelanga ivi hi sungula kuvilela ni kutlhanyeka nhloko. (Swivuriso 12:25) Xana hinga yendla yini leswaku hi rhula loko swihi tikela kupfumela kucinca kokarhi kumbe kutitwananisa na  kona? (Lerha Tipisalema 131:1-3.) Ahi kambisiseni swikombiso swa malandza ya Yehovha ya khale ni ya masikwini ya hina lamaswi koteke kuva ni kurhula ka miyakananyo hambiloko wutomi la wona li cinca kola na kola.

3. Xana wutomi la Yosefa li cincise kuyini kola na kola?

³ Pimisa hi xikombiso xa Yosefa. Papayi wa yena Yakobe aamu rhandza hintamu kutlula vana va yena hinkwavo. Hi mhaka leyo, vamakwavu va yena avamu nyenya. Loko a li ni 17 wa malembe, vamu xavisile ka Vaiximayele leswaku aya va xikarawa. (Genesa 37:2-4, 23-28) A xaniseke hintamu aGibita hi mpimo wa kolomuya ka 13 wa malembe. Kusungula a ve xikarawa ivi ndzhaku a va xibochwa. Yosefa aamu rhandza hintamu papayi wa yena. Kambe swoswi angaha li kusuhi na yena. Xiyimo lexi ina ximu yendle a kwata a tlhela a heleliwa hi ntshembo. Xana i yini leximu pfuneke leswaku anga titwi hi ndlela leyo?

4. a) Xana Yosefa a yendle yini loko a li djele? b) Yehovha aswi hlamulise kuyini swikhongelo swa yena?

⁴ Loko a li djele, swinga yendleka a ayanakanyisisa hi ndlela leyi Yehovha aamu pfuna ha yona. (Genesa 39:21; Tipisalema 105:17-19) Swinga yendleka a yanakanye hi milorho leyi a veke na yona loko aha li mupfana leyi ayi kombetela ka swilo leswi aswita yendleka. Kuyanakanyisisa hi leswi swimu tiyisekisile leswaku Yehovha a ali na yena. (Genesa 37:5-11) Kumbexana a khongele hintamu ka Yehovha amu byela hinkwaswo leswi aswi li mbilwini. (Tipisalema 145:18) Yehovha aswi hlamulile swikhongelo swa yena hi kumu tiyisekisa leswaku ‘aata va na yena’ hambi aswo yini. — Mintirho 7:9, 10. * (Vona nhlamuselo ya le hansi.)

5. “Kurhula ka Xikwembu” kungahi pfunisa kuyini leswaku hi hambeta hixi tirhela?

⁵ Hambi xiyimo xotikisa kuyini, hingaswi kota kuva ni “kurhula ka Xikwembu” loku sirhelelaka ‘matimba ya hina ya kuyanakanya’ kutlhela kuhi yendla hi rhula. (Lerha Vafilipiya 4:6, 7.) Loko hi vilela ni kutlhanyeka nhloko hikolaho ka xiyimo lexi hi langutanaka na xona, “kurhula ka Xikwembu” kungahi pfuna leswaku hi hambeta hi tirhela Yehovha hi tlhela hinga karhali. Ahi voneni swikombiso swa malandza ya Yehovha ya masiku ya hina lawa ma titweke hi ndlela leyo.

6, 7. Swikhongelo swa hina swingahi pfunisa kuyini leswaku hi tlhela hiva ni kurhula ka miyanakanyo? Nyikela xikombiso.

⁶ Loko Rayan na Julieta va twa leswaku avata nyima kutirha tani hi maphayona yohlawuleka ya nkamanyana, va hele matimba. Rayan a vula leswi: “Hi kombele Yehovha hi xikhongelo leswaku a lulamisa mhaka leyi. Haswi tiva leswaku kutirha ka xiyavelo lexi aku li mukhandlu wohlawuleka wa leswaku hi kombisa kutshembeka ka hina. Votala bandleni la hina avaha kudjondza ntiyiso, hikolaho hi kombele Yehovha leswaku ahi pfuna kuva hiva vekela xikombiso lexinene xa lipfumelo.”

⁷ Xana Yehovha axi hlamulise kuyini xikhongelo lexi? Rayan wa hlamusela: “A ndzhaku  ka loko hi khongelile, hi titwe kahle naswona ndlela leyi hoxeke leyi ahi titwa hi yona yi nyamalale hi xihantla. Kurhula ka Xikwembu kuhlayise matimba ya hina yoyanakanya. Haswi tiva leswaku hingaswi kota kuhambeta hi tirhisiwa hi Yehovha loko ntsena hi va ni langutelo lelinene.”

8-10. a) Moya lowokwetsima wungahi pfunisa kuyini loko hi vilela? b) Yehovha angahi pfunisa kuyini loko hi tshama hi khomekile antirhweni wa yena?

⁸ Moya lowokwetsima wa Xikwembu wungahi rhulisa mbilu ni kuhi yendla hi khumbuka tindzimana ta Bibele letingatahi pfuna kutwisisa leswinga swa lisima awuton’wini. (Lerha Yohane 14:26, 27.) Vona leswi humeleleke Filipi na Maria, lava tekaneke naswona vanga tshama va tirha Betele kolomuya ka 25 wa malembe. Ndzeni ka 4 wa tiwheti, vamamana va vona ni xaka lin’wana va file naswona va boheke kuya khatalela papayi wa Maria, lweyi a ani mavabyi ya nhloko.

⁹ Filipi a vula leswi: “Ani pimisa leswaku naswi kota kulangutana ni xiyimo lexi. Hambileswo ku ni lexi axi kayivela. Loko ni li karhi ni djondza Murindzi, ni tlhangane ni buku ya Vakolosa 1:11. Yini yendle ni vona leswaku hambileswi ani li karhi ni tiyisela, aku ni lexi axi chota. Ani fanele ‘nitiyisela hi mbilu yoleha na nitsakile’. Ndzimana leyi yini pfune kuvona leswaku hambiloko swiyimo swi karhata, hingaswi kota kutsaka loko hi pfumelela moya lowokwetsima leswaku wu tirha awuton’wini la hina.”

¹⁰ Yehovha a katekise Filipi na Maria hileswi va tshameke va khomekile hi ntirho wa yena. Ndzhaku nyana ka loko va hume Betele, hawumbirhi la vona va ve ni swidjondzo swa Bibele leswi yendleke nhluvuko swi tlhela swi pfumela kudjondza na vona kutlula khambi lin’we hi vhiki. Maria a vula leswi: “Swidjondzo leswi swihi yendle hi kuma ntsako naswona Yehovha a tirhise swona akuva ahi tiyisekisa leswaku swilo aswita famba kahle.”

11, 12. a) I yini leswi Yosefa aswi yendleke leswaku Yehovha amu katekisa? b) Yehovha amu katekise kuyini Yosefa?

¹¹ Loko wutomi li cinca kola na kola, hingaha karhateka hintamu la kakuva hi tshamela kupimisa hi swikarhato swa hina ntsena. Yosefa angaswi yendlanga leswo. A yendle leswi aaswi kota ka xiyimo lexi a ali ka xona. A tirhele Potifaro hi matimba ya yena hinkwawo naswona loko a li djele a lwele kuyendla hinkwaswo leswi mulanguteli wa djele aamu rhuma swona. — Genesa 39:21-23.

¹² Siku lin’wana, Yosefa a vekiwe leswaku a va mulanguteli wa swibochwa swimbirhi leswi  aswi tirha ka yindlo ya Faro. Yosefa aaswi komba musa. Hi mhaka leyo, swibochwa leswi swi titwe swi chunsekile leswaku swimu byela swikarhato ni milorho leyi dludlaka miyanakanyo leyi swi veke na yona. (Genesa 40:5-8) Ka nkama wolowo, Yosefa aangaswi tivi leswaku mabulu lawa amatamu pfulela ndlela leswaku a chunsiwa. Ndzhaku ka 2 wa malembe, a chunsiwile naswona a ve mufumi wa matimba swinene aGibita. Owova hansi ka Faro ntsena. — Genesa 41:1, 14-16, 39-41.

13. I yini leswi hingaswi yendlaka leswaku Yehovha ahi katekisa hambiloko swiyimo swi tika?

¹³ Kufana na Yosefa, hinga kumeka ka swiyimo leswi hingaswi kotiki kuswi cinca kumbe kuswi lulamisa. Kambe loko hi lehisa mbilu hi tlhela hi yendla leswi hingaswi kotaka, Yehovha atahi katekisa. (Tipisalema 37:5) Hambiloko hi karhateka hi tlhela hi pfilunganyeka, ahingete ‘hela mbilu’. (2 Vakorinto 4:8) Yehovha ata va na hina, ngopfungopfu loko hi tshama hi khomekile antirhweni wa kuchumayela.

14-16. Filipi aswi kombise kuyini leswaku a atshama a khomekile antirhweni wa Yehovha hambiloko wutomi la yena li cinca?

¹⁴ Filipi muchumayeli i xikombiso lexi kulu hi kuva a tshame a khomekile antirhweni wa kuchumayela hambiloko swiyimo swi cinca. Ka nkama wun’wana, a nyikiwe xiyavelo ximpsha aYerusalema lexi aaxi tsakela hintamu. (Mintirho 6:1-6) Kambe swilo swi cincile kola na kola. Ndzhaku ka loko Stefani a dlayiwile, vakreste va sungule kuxanisiwa hintamu swinene. Hi mhaka leyo, va balekile Yerusalema. Hikolaho ka leswi Filipi a alava kutshama a khomekile antirhweni wa Yehovha, a ye Samaria laha aaswi tiva leswaku vanhu vanyingi avangasima twa mahungu lamanene. — Matewu 10:5; Mintirho 8:1, 5.

¹⁵ Filipi a atiyimisele kuya kun’wana ni kun’wana laha moya lowokwetsima awumu kongomisa kona. Hi mhaka leyo, Yehovha amu tirhisile leswaku a ya chumayela ka tindhawu leti atingasi chumayeliwa. Vayuda vanyingi avava vonela hansi Vasamariya naswona avava khoma hi ndlela ya kubiha. Kambe Filipi aangava khomi hi ndlela leyo. Aaswi navela hintamu kuyavelana na vona mahungu yotsakisa. Loko a li karhi a yendla leswo, Vasamariya avamu yingisa hi “mbilu yin’we”. — Mintirho 8:6-8, Bibele.

¹⁶ Ndzhaku, moya lowokwetsima wa Xikwembu wu kongomise Filipi leswaku a ya chumayela ka madoropa ya Azoto ni Khezariya, lawa ama tale hi Vamatiko. (Mintirho 8:39, 40) Wutomi la yena li tlhele li cinca. A sungule kutshama kurhuleni a tlhela a va ni ndjangu. Hambileswi wutomi la Filipi li  cincacinceke hintamu, minkama hinkwayo a tshame a khomekile antirhweni wa kuchumayela. Hi mhaka leyo, Yehovha amu katekisile yena ni ndjangu wa yena. — Mintirho 21:8, 9.

17, 18. Loko wutomi la hina li tshuka li cinca, kutshama hi khomekile antirhweni wa Yehovha switahi pfunisa kuyini?

¹⁷ Vanyingi lavanga ka ntirho wa nkama hinkwawo va vula leswaku kutshama va khomekile antirhweni wa kuchumayela swiva pfuna kutshama va tsakile va tlhela va va ni langutelo leninene hambiloko wutomi li cinca. Hi xikombiso, loko Osborne na Politi, mpatswa lowu tshamaka Djoni wu hume Betele, va pimise leswaku aswitava vevukela kukuma ndhawu ya kutshama ni ntirho wa kutirha hafu ya siku kumbe masiku nyana hi vhiki. Kambe Osborne a vula leswi: “Lexi twisaka kuvava, ahi hantlanga hiwu kuma ntirho hilaha ahi pimisa ha kona.” Politi a li: “Hi hete tiwheti tinharhu nahaha lava ntirho naswona male leyi ahiyi poparile se ayi helile. Swihi karhetele hintamu.”

¹⁸ I yini lexi pfuneke Osborne na Politi ka xiyimo lexi xa kutika? Osborne a vula leswi: “Kuchumayela ni bandla swihi pfunile kutshama hi khomekile hi ntirho wa Yehovha hi tlhela hi va ni langutelo lelinene.” Matshan’wini ya kutshama kaya va rila, va bohe kutshama va khomekile hi ntirho wa kuchumayela. Kuyendla leswo swiva yendle va tsaka. Osborne wa yengesela: “Hi lave ntirho ka tindhawu hinkwato, kambe hingaswi nyimelanga hize hiwu kuma.”

19-21. a) I yini lexingatahi pfuna kuva ni kurhula ka miyanakanyo? b) Hi wahi mavuyelo lawa hima kumaka loko hi titwananisa ni kucinca loku hi kumanaka na kona?

¹⁹ Hilaha hi voneke ha kona, loko hi tirhisa swiyimo leswi hi langutanaka na swona tani hi mukhandlu wodjondza kumbe kuhlakulela wumunhu la Wukreste ni kutlhela hi tshemba Yehovha hi mbilu ya hina hinkwayo, hitaswi kota kuva ni kurhula ka miyakanyo hambi swiyimo swotikisa kuyini. (Lerha Mikiya 7:7.) Hi kufamba ka nkama, hita vona leswaku kuva hi titwananisa ni xiyimo swi yendla leswaku wuxaka la hina na Yehovha li tiya. Politi a hlamusela leswaku kuva a nyikiwe xiyavelo  xa kutirha handle ka Betele swimu djondzise leswi kutshemba Yehovha swi vulaka swona hi kakunene hambiloko swiyimo swi tikomba swi karhata. A vula leswi: “Wuxaka la mina na Yehovha li ye li tiya.”

²⁰ Maria, lweyi hi buleke hi yena kusunguleni, waha ya mahlweni a khatalela papayi wa yena lweyi se agugeke. Hambileswo, i phayona. A vula leswi: “Ni djondze leswaku loko ni karhateka, ni fanele ni nyima, ni khongela ni gama ni tshika swilo amandleni ya yena. Kutshika swilo amandleni ya Yehovha kuve djondzo ya lisima leyi ni veke na yona, leyingata laveka hintamu ka nkama lowu taka.”

²¹ Lóide na Alexandra va hlamusela leswaku kucinca loku va veke na kona awuton’wini la vona kuringe lipfumelo la vona hi tindlela leti avanga tinyimelanga. Kambe swoswi se vayi vona ndlela leyi va pfunekeke ha yona. Va vula leswaku lipfumelo la vona li tiye swinene la kakuva hambiloko va kumana ni swikarahto swa kuyendlisa kuyini vaswi kota ku rhula. Handle ka leswo, va hlamusela leswaku wumunhu la vona na lona li yampsiwile.

22. Loko hi yendla hinkwaswo leswinga matimbeni ya hina, hinga tiyiseka hi yini?

²² Ka misava leyi hi hanyaka ka yona, wutomi la hina linga cinca kola na kola. Hingaha yamukela xiyavelo lexi ahingaxi nyimelanga ka nhlengelatano ya Yehovha, hingaha vabya kumbe hi boheka kukhatalela ndjangu wa hina hi ndlela yin’wani. Kambe kunga khataliseki lexiku humelelaka, tiyiseka leswaku Yehovha wa khatala hi wena naswona ataku pfuna hi nkama lowu faneleke. (Vaheveru 4:16; 1 Petro 5:6, 7) Loko xiyimo xokarhi xi cinca, xi tirhisi leswaku u djondza kumbe kuyampsisa wumunhu la wena. Khongela ka B’ava wa wena Yehovha naswona mu tshembe hi mbilu ya wena hinkwayo. Loko u yendla leswo, hambiloko wutomi la wena li cinca, awungata tshuka u lahlekeliwa hi kurhula ka miyanakanyo loku humaka hi ka Yehovha.