1, 2. Diyavulosi a tirhise yini leswaku a hlupha vanhu?

SWILO leswi munhu aswi hambeke swotani hi telefoni, lanterna, movha ni jelera swiyendle leswaku wutomi li yampsa. Swin’wana swotani hi swibhamu, swibulukwa, masigari ni bomba atómica, swi yendle leswaku wutomi liva nghozini. Kambe ku ni swin’wana leswinga swa khale kutlula leswi hinkwaswo, leswi swiva vaviseke ngopfu vanhu. I yini? I mavunwa! Mavunwa i kuvula nchumu lowu hiwu tivaka leswaku ahi ntiyiso akuva hi kanganyisa van’wana. I mani lweyi a vuleke mavunwa yosungula? Hi Diyavulosi! Yesu Kreste amu vitane “tatana wa mavunwa.” (Lerha Yohane 8:44.) Ama vule rini mavunwa yosungula?

² Ama vule ka magidi ya malembe lama hundzeke ajaradi la Edeni. Adamu na Evha avati khorisa hi kuhanya aParadeyisini ya kusaseka leyi Yehovha aava yendlele yona. Xikwembu axiva byelile leswaku loko vodja nsinya wa kutiva leswinene ni leswobiha avata fa. Sathana aaswi tiva leswo, kambe a tirhise nyoka kubyela Evha a ku: “antiyisweni amingetefa.” Lawa kuve mavunwa ya kusungula. Sathana a yengete a ku: “Xikwembu xaswitiva leswaku asikwini leli mingatadla ha lona, mahlo ya n’wina  matapfuleka naswona mitafana ni Xikwembu, mitiva leswinene ni leswobiha.” — Genesa 2:15-17; 3:1-5.

3. a) Hayini mavunwa ya Sathana ama bihe hintamu swinene? b) Hi wahi mavuyelo ya mavunwa lama vuliweke hi Sathana?

³ Mavunwa ya Sathana ama bihe hintamu swinene hikuva a aswi tiva leswaku loko Evha awo pfumela ka yena ivi a dla handzu lowuyani, a ata fa. Kunene hi swoleswo swi humeleleke. Adamu na Evha va tlule nawu wa Yehovha kutani aku heteleleni va file. (Genesa 3:6; 5:5) Kutlula kolaho, “rifu ritlulele vanhu hinkwavu” hi mhaka ya xidjoho xa Adamu. Kunene rifu ‘rifumile . . . , ni lava vokala vangajohanga hi kutlula swileriso swa Xikwembu kukota Adamu.’ (Varhoma 5:12, 14) Hi xivangelo lexi, na hina ahi hetisekanga, naswona ahi hanyi hilaha kunga heliki hilaha Xikwembu axi lava ha kona. Hi hanya ntsena malembe ya “70 kumbe 80 ka lava va tiyeke mirhini” naswona wutomi la hina “litale hi swikarhato ni swilo swo biha.” (Tipisalema 90:10) Hinkwaswo leswi swi yendleke hi mhaka ya mavunwa ya Sathana!

4. a) Hi swihi swivutiso leswi hi faneleke hiswi hlamula? b) Hikuya hi Tipisalema 15:1, 2, i mani ntsena lweyi anga vaka munghanu wa Yehovha?

⁴ Yesu avule leswi hi Sathana: “angatshamanga atiyile ntiyisweni, hikuva akuna ntiyiso ka yena.” Sathana anga cincanga. Ni swoswi aha li “Mukanganyisi wa misava hinkwayu”. (Nhlavutelo 12:9) Kambe leswaku hinga kanganyisiwi hi Sathana, hi fanele hi tiva tinhlamulo ta swivutiso swinharhu: Xana Sathana ava kanganyisisa kuyini vanhu namuntlha? Hayini vanhu va hemba? Naswona hinga vulavulisa kuyini ntiyiso nkama hinkwawo leswaku hinga luzekeliwi hi wunghanu la hina na Yehovha, hilaha Adamu na Eva vali luzeke ha kona? — Lerha Tipisalema 15:1, 2.

5. Xana Sathana ava kanganyisisa kuyini vanhu namuntlha?

⁵ Hinga swi kota kupapalata kukanganyisiwa hi Sathana. Mupostola Pawulo a te: “Ha mativa makungu yakwe.” (2 Vakorinto 2:11) Haswi tiva leswaku Sathana a rhangela misava hinkwayo, kukatsa ni wugandzeli la mavunwa, vafumi lava kanganyisaka, ni vaxavisi va wukanganyisi. (1 Yohane 5:19) Hikolaho aswihi hlamalisi loko Sathana ni madimona ya yena va susumetela vanhu lavanga ni wulawuri leswaku vava “vahembi.” (1 Timotiya 4:1, 2) Hi xikombiso, vaxavisi van’wana va hemba ka swinavetiso swa vona leswaku va xavisa swilo leswinga ni khombo kumbe kukanganyisa vanhu ivi va yiva male ya vona.

6, 7. a) Hayini swi bihe swinene loko varhangeli va wukhongeli va hemba? b) Hi wahi mavunwa lawa u tshameke u twa varhangeli va wukhongeli vama vula?

⁶ Swibihe swinene loko varhangeli va wukhongeli va hemba. Hayini? Hikuva loko munhu a kholwa tidjondzo ta vona ta mavunwa ivi a yendla swilo leswi Xikwembu xiswi vengaka, anga luza mukhandlu wa kuhanya hilaha kunga heliki. (Hosiya 4:9) Yesu aaswi tiva leswaku varhangeli va wukhongeli ava kanganyisa vanhu. A tiye ava byela leswi: “Yowee, n’wina Vatsali ni Vafarisi, hikuva mi vakanganyisi! Hikuva mirhendzeleka malwandle ni le misaveni, leswaku mitakuma mujondzisiwa mun’we ntsena; kutani loko mimukumile, mimuyendla lweyi afaneliwaka hi . . . kulovisiwa hilaha kunga heliki.  (Matewu 23:15) Yesu a te varhangeli volavo va mavunwa ava fana ni tatana wa vona Diyavulosi, lweyi anga “mudlayi.” — Yohane 8:44.

⁷ Ni namuntlha ku ni varhangeli votala va wukhongeli. Vangaha vitaniwa varisi, vaprista, vafundhisi, kumbe mavito man’wana. Kufana ni Vafarisi, na vona ava djondzisi ntiyiso lowunga ka Rito la Xikwembu, kambe ‘vatshike ntiyiso wa Xikwembu, valandza mavunwa.’ (Varhoma 1:18, 25) Mavunwa man’wana ya vona hi lamange: “Loko uza u ponisiwa, u poniseliwe makumu”, vanhu va ni moya lowunga fiki, vafi va tlhela va psaliwa tani hi xivumbiwa xin’wana ni leswaku aswi hoxanga kuva vanhu va limbewu leli fanaka va hanya kumbe kuchada xikan’we.

8. Hi wahi mavunwa lawa varhangeli va politika vangatama vula kungali khale naswona hi fanele hi hlamulisa kuyini?

⁸ Varhangeli va politika na vona va tirhisa mavunwa leswaku va kanganyisa vanhu. Mavunwa man’wana lama kulu lawa vangatama vula kungali khale hi lamange: “Kurhulile, aku na xa kukarhata” amisaveni. Kambe “hi wona nkama lowu kuwonheka kumbe kulovisiwa kungatavawela henhla hi xitshuketa.” Hikolaho, ahi fanelanga hiva tshemba varhangeli lava vulaka leswaku swilo swiya swiyampsha. Ntiyiso hi leswaku ‘haswitiva swinene leswaku siku ra Hosi ritafika kufana ni muyivi lweyi ataka nivusiku.’ — 1 Vatesalonika 5:1-4.

9, 10. a) Hayini vanhu va hemba, naswona hi lihi vuyelo la kona? b) Xana hi fanele hi tsundzuka yini hi Yehovha?

⁹ Namuntlha, ahi vanhu lavanga ni wulawuli ntsena va hembaka. Djondzo leyinge: “Hayini hi Hemba?” Leyi yi tsaliweke hi Y. Bhatacharjee, yi li “kuhemba kutiviwa tani hi mukhuva lowu dzimeke timintsu.” Hi marito man’wana, vanhu va pimisa leswaku kuhemba swi tolovelekile naswona aswi bihanga. Vanhu va tala kuhemba leswaku vati sirhelela, kufihla swihoxo kumbe wugevenga leli va li yendleke. Nakambe va hemba leswaku va kuma male kumbe va pfuneka hi tindlela tin’wana. Djondzo leyi yi tlhela yi kombisa leswaku aswiva karhatele vanhu van’wana kuhembela “lavangava tiviki, vatirhikulorhi, vanghanu ni varhandziwa va vona.”

¹⁰ Hi lihi vuyelo la mavunwa? Vanhu avaha tshembani naswona wunghanu la tsemeka. Hi xikombiso, yehleketa ndlela leyi wanuna lweyi a tshembekaka ka nsati wa yena anga tshovekaka mbilu loko a gungula leswaku nsati wa yena ave ni mhaka yokarhi agama amu hembela leswaku a fihla leswi aswi yendleke. Kumbe yehleketa ndlela leyi swi vavisaka ha yona loko wanuna a hlupha nsati wa yena ni vana a kaya, kambe loko ali ka vanhu van’wana ati yendla ingi awava rhandza ni kuva hlayisa kahle. Vanhu votanu vanga kanganyisa van’wana kambe hi fanele hi tsundzuka leswaku avangemu kanganyisi Yehovha. Bibele li li “Hinkwaswu swiyo tlandlala, rivaleni” ka yena. — Vaheveru 4:13.

11. Xana xikombiso xobiha xa Ananiya na Safira xihi djondzisa yini? (Vona xifaniso akusunguleni ka djondzo.)

 ¹¹ ABibeleni ku ni xikombiso xa mpatswa wa Vakreste lava Sathana ava susumeteke leswaku va hembela Xikwembu. Ananiya na Safira va ringete kukanganyisa vapostola. Va xavise nsimu ya vona, va pambula male vagama va teka leyi saleke va nyika vapostola. Hikolaho ka leswi Ananiya na Safira ava lava kuvoniwa kahle hi van’wana abandleni, va byele vapostola leswaku va nyikele male hinkwayo. Kambe Yehovha a aswi tiva leswaku avo hemba, kutani ava khatisile. — Mintirho 5:1-10.

12. Xana kuta humelela yini hi vahembi lavangati soliki naswona hayini?

¹² Xana Yehovha ati twisa kuyini hi vahembi? Vanhu hinkwavo lava vulavulaka mavunwa yobiha swinene, loko vangati soli va taya “tiveni ra ndzilo,” kufana na Sathana. Hi marito man’wana, vata lovisiwa hilaha kunga heliki. (Nhlavutelo 20:10; 21:8; Tipisalema 5:6) Hayini? Hikuva Yehovha a languta vahembi hilaha a langutaka ha kona vanhu van’wana “lava vayendlaka leswobiha” amatihlweni ya yena. — Nhlavutelo 22:15.

13. Hi tiva yini hi Yehovha naswona leswo swi fanele swihi susumetela kuyendla yini?

¹³ Haswi tiva leswaku Yehovha “angafani ni munhu leswaku angahemba” ni leswaku a ‘swingeyendleki leswaku Xikwembu xikumeka na xili muhembi.’ (Tinhlayo 23:19; Vaheveru 6:18) “Yehovha a nyenya . . . lirimi la mavunwa.” (Swivuriso 6:16, 17) Loko hi lava kumu tsakisa, hi fanele hi vulavula ntiyiso. Hikolaho ‘Hingahembelaneni.’ — Vakolosa 3:9.

14. a) I yini xi yendlaka leswaku Vakretse va ntiyiso va hambana ni swirho swa wukhongeli la mavunwa? b) Hlamusela tshinya la nawu lelinga ka Luka 6:45.

¹⁴ Xana hi yihi ndlela yin’wana leyi Vakreste va ntiyiso va hambaneke ha yona ni swirho  swa wukhongeli la mavunwa? Hikuva hi ‘vulavula ntiyiso’. (Lerha Zakariya 8:16, 17.) Pawulo a te: “Timhakeni hinkwatu hitikombile na hili malandza ya Xikwembu, . . . na hivulavula ntiyiso.” (2 Vakorinto 6:4, 7) Kutani Yesu a te ‘munhu avula leswi mbilu ya yena yiteleke hi swona.’ (Luka 6:45) Leswi swi hlamusela leswaku munhu wotshembeka a vulavula ntiyiso. Ata vulavula ntiyiso ka lava angava tiviki, vatirhikuloni, vanghanu ni varhandziwa va yena. Ahi voneni swikombiso swokarhi swa ndlela leyi hinga kombisaka ha yona leswaku hi ringeta kutshembeka ka swilo hinkwaswo.

15. a) Hayini swi bihile kuhanya wutomi la wumunhu limbirhi? b) I yini xinga pfunaka vampsha leswaku vanga hluliwi hi ntshikelelo wa vanghanu? (Vona nhlamuselo ya le hansi.)

¹⁵ Loko uli mumpsha, ungaha navela kutsakeliwa hi vanghanu va wena. Kunavela koloko kuyendla leswaku vampsha van’wana va hanya wutomi la wumunhu limbirhi. Loko va li mindjangwini ya vona ni le bandleni, vati yendla ingi va ni mahanyela lamanene. Kambe loko va li ka tindhawu ta kubula ka tona ka interneti kumbe ni vanhu lavanga gandzeliki Yehovha, vati khoma hi ndlela yin’wana. Vangaha tirhisa mavulavulelo yobiha, va yambala hi ndlela leyinga faneliki, va yingisela wuyimbeleli leli chakeke, va dakwa, va tirhisa mbangi, va namorara xihundleni kumbe va yendla swilo swin’wana. Va hembela vapsali va vona, vamakwerhu na Yehovha. (Tipisalema 26:4, 5) Kambe Yehovha waswi tiva loko va vula leswaku vamu dzunisa kuve va yendla swilo leswimu nyenyentsaka. (Marka 7:6) Swi yampsa swinene kuyendla leswi vuliwaka hi xivuriso lexinge: “Mbilu ya wena yi nga tshuki yi vondzoka vadyohi, kambe chava Yehovha siku hinkwalo.” — Swivuriso 23:17. * (Vona nhlamuselo ya le hansi.)

16. Xana hinga hlamulisa kuyini swivutiso loko hi tsala xikombelo xa ntirho wa nkama hinkwawo?

¹⁶ Loko u lava kuva phayona la nkama hinkwawo kumbe kusungula ntirho wohlawuleka wa nkama hinkwawo, wotanihi kuya tirha Betele, u fanele u tsala xikombelo. I swinene kunyikela tinhamulo ta ntiyiso malunghana ni lihanyo la wena, ndlela leyi u tihungataka ha yona ni mikhuva ya wena ya mahanyelo. (Vaheveru 13:18) Kambe u fanele u yendla yini loko u tshame u yendla swilo leswi nyenyentsaka Yehovha kumbe swilo swokarhi leswi karhataka lipfalo la wena kambe ungesi bula ha swona ni madoda? Va kombeli leswaku vaku pfuna akuva uta tirhela Yehovha hi lipfalo leli baseke. — Varhoma 9:1; Vagalatiya 6:1.

17. Xana hinga yendla yini loko vakaneti vahi vutisa hi vamakwerhu va hina?

¹⁷ Xana unga yendla yini loko ntirho wa hina wu tsimbisiwa tikweni la wena kutani  u khomiwa hi vafumi ivi vaku vutisa hi vamakwenu va le bandleni? Xana u fanele uva byela hinkwaswo leswi uswi tivaka hi vona? Xana Yesu a yendle yini loko mufumi wa Roma amu yendla swivutiso? Yesu a tirhise tshinya la Bibele lelinge: “Ku ni nkama wa kumiyela ni nkama wa kuvulavula”. Minkama yin’wana anga hlamulanga nchumu! (Eklesiasta 3:1, 7; Matewu 27:11-14) Loko hi li ka xiyimo xofana ni lexo, hi fanele hi tlhariha ivi hi tivonela leswaku hinga veki vamakwerhu anghozini. — Swivuriso 10:19; 11:12.

18. Xana hi lihi wutihlamuleri leli hinga na lona loko madoda mahi vutisa hi makwerhu wokarhi?

¹⁸ Xana utaku yini loko u tiva leswaku munhu wokarhi a bandleni a yendle xidjoho lexikulu? Tani hi leswi Madoda manga ni wutihlamuleri la kuhlayisa bandla leswaku li tshama li basile a mahanyelweni, mangahaku vutisa hi leswi uswi tivaka hi munhu yelweyo. U tama byela yini, ngopfungopfu loko munhu wa kona a li munghanu wa wena kumbe xaka? Bibele li li: “Mboni yotshembeka yitavula ntiyiso.” (Swivuriso 12:17; 21:28) Hikolaho u ni wutihlamuleri lova byela ntiyiso hinkwawo, unga fihli nchumu. Madoda ma ni mfanelo ya kutiva hinkwaswo akuva ma kuma ndlela yoyampsa ya kupfuna munhu kululamisa wuxaka la yena na Yehovha. — Yakobo 5:14, 15.

19. Xana hita bula hi yini ka djondzo leyi landzelaka?

¹⁹ Davhida a khongelile ka Yehovha a ku: “Utsakela munhu lweyi angani ntiyiso ambilwini.” (Tipisalema 51:6) Davhida aaswi tiva leswaku leswinga swa lisima hi leswi hinga swona hi le ndzeni. Nkama hinkwawo, Vakreste va ntiyiso va ‘vulavula ntiyiso mun’wana ka mun’wana.’ Ndlela yin’wana ya kukombisa leswaku hi hambanile ni swirho swa wukhongeli la mavunwa i kudjondzisa ntiyiso wa Bibele. Ka djondzo leyi landzelaka, hita bula hi ndlela leyi hingaswi yendlaka ha yona leswo ka ntirho wa hina wochumayela.