1. Hayini hi vula leswaku hinkwaswu swi lumba Yehovha? (Vona xifaniso akusunguleni ka djondzo.)

HINKWASWO swi lumba Yehovha! “Matilo i ya Yehovha Xikwembu xa wena, hambi matilo ya matilo, ni hinkwaswo leswinga ka yona” i swa yena. (Deteronoma 10:14; Nhlavutelo 4:11) Tani hileswi hina vanhu hi tumbuluxiweke hi Yehovha, hinkwerhu hi lumba yena. (Tipisalema 100:3) Kambe, axikarhi ka vanhu hinkwavu lava tshameke vava kona, minkama hinkwayu Yehovha a hlawule ntlawa wokarhi leswaku wu va wa yena hi ndlela yohlawuleka.

2. a) I vamani lava khale va lumbeke Yehovha hi ndlela yohlawuleka? b) I vamani lava namuntlha va lumbaka Yehovha hi ndlela yohlawuleka?

² Hi xikombiso, ka Tipisalema 135 hi kuma leswaku Yehovha a avitana Vayisrayele va khale lava avamu gandzela hi kutshembeka tani hi “ndzhaka ya yena yohlawuleka.” (Tipisalema 135:4) Ka nkama wun’wana, Hosiya a profete leswaku lava avanga li Vayisrayele avata va vanhu va Yehovha. (Hosiya 2:23) Xiprofeto  lexi xi hetisekile loko Yehovha a sungula kulanga vanhu lava avanga li Vayisrayele leswaku vaya fuma na Kreste atilweni. (Mintirho 10:45; Varhoma 9:23-26) Lava totiwaka hi moya lowokwetsima va vitaniwa “rixaka lelihlawulekeke” naswona i “tiko lerihlawuliweke” la Yehovha. (1 Petro 2:9, 10) Kambe kuvuliwa yini hi Vakreste van’wana votshembeka lavanga ni ntshembo wa kuhanya hilaha kungaheliki kola misaveni? Yehovha ava vitana “vanhu va mina” ni “vahlawuliwa va mina”. — Esaya 65:22.

3. a) I vamani lava namuntlha vanga ni wuxaka la kuhlawuleka na Yehovha? b) Hita bula hi yini ka djondzo leyi?

³ Namuntlha, lava “ntlhambinyana”, kunga lavanga ni ntshembo wa kuhanya hilaha kungaheliki atilweni ni lava “tinyempfu tin’wana” vanga ni ntshembo wa kuhanya hilaha kungaheliki kola misaveni, va gandzela Yehovha tani hi “ntlhambi wun’we”. (Luka 12:32; Yohane 10:16) Hikolaho, hi lava kukomba Yehovha leswaku hamu tlangela hi kuva ni wuxaka lohlawuleka na yena. Ka djondzo leyi hita vulavula hi tindlela leti hinga kombisaka ha tona leswaku hili nyika lisima wuxaka leli.

4. Hingaswi kombisa kuyini leswaku hamu tlangela Yehovha hi wuxaka leli hinga na lona na yena? Yesu aswi kombise kuyini leswo?

⁴ Loko hi tinyiketela ka Yehovha hitlhela hi khuvuliwa, hi komba Yehovha leswaku hamu tlangela hi kuva ni wuxaka la kuhlawuleka na yena. Handle ka leswo, hi komba hinkwavu leswaku hina hi va Yehovha naswona hi tiyimisele kumu yingisa. (Vaheveru 12:9) Yesu aswi yendlile leswo. Hambileswi a alumba ntlawa wa vanhu lava se ava ni wuxaka la kuhlawuleka na Yehovha, a tinyiketile ka Yehovha atlhela a khuvuliwa. Aswofana ni loko a vula leswi: “Oho Xikwembu xa mina, nitsakisiwa hi kuyendla kurhandza ka wena”. — Tipisalema 40:7, 8.

5. Yehovha a titwise kuyini loko Yesu a khuvuliwa?

⁵ Xana Yehovha a titwise kuyini loko Yesu a khuvuliwa? Bibele la hlamula: “Kuteloko Yesu akhuvuliwile, ahantlisa ahuma matini; hi nomo-lo matilo mapfuleka, avona Moya wa Xikwembu wuxika kufana ni xituvana, wuxikela henhla ka yena. Kutani kutwakala rito lerihumaka matilweni, riku: ‘Lweyi i N’wananga lweyi nimurhandzaka, lweyi nimutsakelaka.’” (Matewu 3:16, 17) Yesu se a ali ni wuxaka la kuhlawuleka na Yehovha. Hambileswo, Yehovha a tsake swinene hi kumu vona a nyikela wutomi la yena hi kuswi rhandza leswaku amu tirhela. Hilaha kufanaka namuntlha, Yehovha a tsaka swinene loko hi nyikela wutomi la hina leswaku himu tirhela naswona ahi tshembisa leswaku atahi katekisa. — Tipisalema 149:4.

6. Nyikela xikombiso lexi kombaka ndlela leyi Yehovha a titwaka ha yona loko hiti nyiketela ka yena hambileswi swilo hinkwaswo swinga swa yena.

⁶ Se, tani hileswi swilo hinkwaswo swi lumbaka Yehovha, xana xi kona lexi mun’wana ni mun’wana wa hina angamu nyikaka xona? Ina, xi kona. Hi xikombiso, yanakanya hi papayi wokarhi lweyi anga ni jaradi lelinga ni swiluva. Xana a titwisa kuyini loko xintombhana xa yena xi khaya xiluva xin’we ivi ximu nyika? Hambileswi jaradi linga la yena, papayi lweyi anga ni lirhandzu a tsaka swinene hikusa waswi tiva leswaku kuza n’wana amu yendlela leswi swi kombisa leswaku wamu rhandza. Xiluva lexi a nyikiwaka hi xintombhana xa yena xi ni lisima la likulu swinene ka yena kutlula swiluva hinkwaswo leswinga ka jaradi. Hi ndlela leyi fanaka, Yehovha a tsaka swinene loko hi kuswi rhandza hiti nyiketela ka yena. — Eksoda 34:14.

7. Hikuya hi buku la Malakiya, Yehovha a titwisa kuyini hi lava langaka kumu tirhela hi kuswi rhandza?

 ⁷ Lerha Malakiya 3:16. Hayini swili swa lisima kuti nyiketela ka Yehovha ni kutlhela u khuvuliwa? I ntiyiso leswaku tani hileswi hi tumbuluxiweke hi Yehovha, hi lumba yena kusukela loko hahali kwirhini la mamana. Kambe pimisa hi ndlela leyi Yehovha a tsakaka ha yona loko ahi vona hi tinyiketela ka yena hitlhela himu langa leswaku ava Mufumi wa hina! (Swivuriso 23:15) Yehovha angava rivali lava tinyiketelaka ka yena hi kuswi rhandza naswona a tsala mavito ya vona ka “buku la xitsundzuxo”.

8, 9. Xana Yehovha a langutele yini ka lava mavito ya vona ma tsaliweke ka “buku [la yena] la xitsundzuxo”?

⁸ Loko hi lava leswaku mavito ya hina ma tama ma va kona ka “buku la xitsundzuxo,” hi fanele hi yendla swokarhi. Malakiya a kombise leswaku hi fanele hi hlonipha Yehovha hitlhela hi yanakanyisisa hi vito la yena. Loko homu tshika Yehovha, ivi hi gandzela swilo swin’wana kumbe vanhu van’wana, Yehovha ata tima mavito ya hina ka buku la yena. — Eksoda 32:33; Tipisalema 69:28.

⁹ Hikolaho, aswi yanelanga kutinyiketela ka Yehovha ni kukhuvuliwa. Phela leswo hiswi yendla kan’we ntsena. Kambe kumu gandzela swi fanele swiva swa wutomi la hina hinkwalo. Hi mhaka leyo, siku ni siku, mintirho ya hina yi fanele yi kombisa leswaku hamu yingisa. — 1 Petro 4:1, 2.

10. Hi kwihi kuhambana loku faneleke kuva kona axikarhi ka lava tirhelaka Yehovha ni lavangamu tirheliki?

¹⁰ Ka djondzo leyi hundzeke, hi bule hi Kayini, Solomoni ni Vayisrayele. Hi vone leswaku vona ava vula hi nomo leswaku va gandzela Xikwembu, kambe mintirho ya vona ayi kombisa leswaku avanga tshembeki ka xona. Swikombiso leswi swihi djondzise leswaku aswi yanelanga kuvula hi nomo leswaku hi gandzela Yehovha. Hi fanele hi venga leswi aswi vengaka ni kurhandza leswi aswi rhandzaka. (Varhoma 12:9) Yehovha a lava leswaku kuva ni “kuhambana axikarhi ka lweyi alulameke ni lweyi anga ni swiyendlo swobiha, ni xikarhi ka lweyi atirhelaka Xikwembu ni lweyi akalaka angaxitirheli.” — Malakiya 3:18.

11. Hayini hi fanele hiswi veka rivaleni leswaku hi gandzela Yehovha ntsena?

¹¹ Phela i lunghelo lelikulu kuva Yehovha ahi hlawulile leswaku hi va vanhu va yena! Hikolaho, hi fanele hiswi veka rivaleni ka vanhu hinkwavu leswaku hi seketela Yehovha. (Matewu 5:16; 1 Timotiya 4:15) Tivutise: Xana vanhu van’wana vaswi vona leswaku ni tshembekile ka Yehovha hilaha kuheleleke? Xana na tibuma hi kuva Mboni ya Yehovha? Yehovha wa khunguvanyeka loko hi va ni tingana ta kubyela van’wana leswaku hi va yena. — Tipisalema 119:46; lerha Marka 8:38.

12, 13. I yini leswi vamakwerhu van’wana vaswi yendlaka swi kombisaka leswaku ava hambananga ni vamatiko?

¹² Lexi vavisaka, vamakwerhu van’wana va tekelela “moya wa misava”. Hi mhaka leyo, ava hambananga ni lava kalaka vanga gandzeli Yehovha. (1 Vakorinto 2:12) “Moya wa misava” wu kucetela vanhu kuveka miyanakanyo ya vona ka leswi tsakisaka kunavela ka vona.  (Vaefesa 2:3) Hi xikombiso, hambileswi nhlengeletano yi vulavuleke makhambi manyingi hi mayambalela, van’wana va yambala hi ndlela leyinga liki yinene. Va yambala mpahla leyi kamaka ni leyi vonekelaka. Van’wana va yambalisa xileswi hambiloko vaya ka minhlangano ya Wukreste. Van’wanyana va luka misisi hi ndlela leyi kokaka yingiso ka vona kumbe hi ndlela ya misava. (1 Timotiya 2:9, 10) Hi mhaka leyo, loko vanhu vava vona, va kanakana: “Xana lweyi i mboni ya Yehovha?” — Yakobo 4:4.

¹³ Ku ni swin’wana leswi vamakwerhu vaswi yendlaka leswi kombisaka leswaku va landza moya wa misava. Hi xikombiso, loko vaya swimkhubyanini, vamakwerhu van’wana va cina vatlhela vati khoma hi ndlela leyi hoxeke. Van’wana va peta mafoto ya vona ka marede social vatlhela va tsala swokarhi hi wona. Leswi vaswi tsalaka swi komba leswaku mayanakanyela ya vona i ya misava. Swinga yendleka vangese yendla xidjoho xa xikulu xa kuza xi lava leswaku va tshinyiwa bandleni. Hambiswilitano, matikhomela ya vona ya kubiha mangava ni nkucetelo wobiha ka vamakwerhu lava kululaka va n’watseka leswaku va hambana ni misava leyi. — Lerha 1 Petro 2:11, 12.

14. Hi fanele hi yendla yini leswaku hi sirhelela wuxaka la kuhlawuleka leli hinga na lona na Yehovha?

¹⁴ Hinkwaswo leswinga misaveni swi yendleliwe kupfuxa “kunavela ka nyama, ni kunavela ka mahlo, ni kutikulisa hi sva wutomi lebzi”. (1 Yohane 2:16) Kambe tani hileswi hina hinga va Yehovha, hi fanele hi hambana. Hi fanele ‘hitshika kusandza swa Xikwembu ni [kupapalata] kunavela sva misava’. Hi fanele “hihanya misaveni leyi hi kutikhoma, ni kululama, ni vukhongeli.” (Tito 2:12) Swiyenge hinkwaswu swa wutomi la hina, swofana ni mavulavulela, madlela, mayambalela ni matirhela ya hina swi fanele swiswi veka rivaleni leswaku hina hi va Yehovha. — Lerha 1 Vakorinto 10:31, 32.

15. Hayini hi fanele hi rhandza ni kukhoma vamakwerhu va hina hi ndlela leyinene?

¹⁵ Ndlela yin’wana leyi hinga kombisaka ha yona leswaku hili nyika lisima wuxaka leli hinga na lona na Yehovha i kukhoma vamakwerhu va hina hi ndlela leyinene. Kufana na hina, na vona va lumba Yehovha. Loko hinga rivali mhaka leyo, hitava khoma hi ndlela leyinene hitlhela hiva rhandza minkama hinkwayo. (1 Vatesalonika 5:15) Hayini swili swa lisima kuva khoma hi ndlela leyi? Hi mhaka ya leswi Yesu aswi vuleke: “Hi ndlela leyi hinkwavu vatativa leswaku mivadjondzisiwa va mina — loko mirhandzana.” — Yohane 13:35.

16. Xana nawu lowu Yehovha a awunyike Valevhi wuhi djondzisa yini?

¹⁶ Nawu lowu Yehovha awu nyikeke Valevhi wungahi pfuna kutwisisa ndlela leyi hi faneleke hiva khoma ha yona vamakwerhu bandleni. Atempeleni ya Yehovha, aku ni swibya leswi aswi tirhiseliwa ntsena ka wugandzeli la Yehovha. Nawu awu hlamusela kahle ndlela leyi Valevhi ava fanele vaswi khoma ha yona swibya leswi. Awutlhela wuvula leswaku loko mulevhi wokarhi angaswi landzi swileleto swa Yehovha a mhakeni leyi, a afanele a dlayiwa. (Tinhlayo 1:50, 51) Se pimisa hi leswi: Loko Yehovha a khatala swinene hi swibya leswi aswi tirhisiwa atempeleni, xana hingaku yini hi vanhu lava va tinyiketeleke ka yena? Ina, Yehovha wa khatala hi ndlela leyi hiva khomaka ha yona vanhu va yena lavamu tirhelaka hi kutshembeka. Aswi veke rivaleni leswo ka marito lamange: “Mun’wana ni mun’wana lweyi amikhumbaka akhumba ndzololo ya tihlo la mina.” — Zakariya 2:8.

17. Xana Yehovha a nyikela yingiso ka yini?

¹⁷ Muprofeta Malakiya a vule leswaku Yehovha ‘ahambeta arhiya ndleve, ayingisa’. Leswi swi vula leswaku yena a nyikela yingiso ka ndlela leyi malandza ya yena ma  khomanaka ha yona. (Malakiya 3:16) Yehovha ‘wavativa lavanga va yena’. (2 Timotiya 2:19) Waswi tiva hinkwaswo leswi hiswi yendlaka naswona waswi xiya loko hingava khomi kahle vamakwerhu va hina. (Vaheveru 4:13) Kambe lexi tsakisaka, hi leswaku waswi xiya nakambe loko hi yendlela vamakwerhu va hina swilo leswinene swofana ni kuhanana, vunene, kurivalela ni kukombisa malwandla. — Vaheveru 13:16; 1 Petro 4:8, 9.

18. Xana hingamu tlangelisa kuyini Yehovha hi kuva ahi hlawulile leswaku hi va vanhu va yena?

¹⁸ Hinkwerhu hi lava kukomba Yehovha leswaku hamu tlangela hi kuva ni wuxaka la kuhlawuleka na yena. Haswi tiva leswaku xiboho lexi hixi yendleke xa kutinyiketela ka yena, kuve xiboho xa wutlharhi lexi hi tshameke hixi yendla awuton’wini la hina. Hikolaho, hambileswi hi hanyaka “xikarhi ka rixaka lerohomboloka, leritiyalisaka”, hingaswi kota ‘kupfumala nandzu [ni kuva] lava baseke’. Handle ka leswo, hinga voninga “kufana ni tinyeleti, laha misaveni.” (Vafilipiya 2:15) Hi mhaka leyo, hi tiyimisele kuyendla ntsena swilo leswi tsakisaka Yehovha. (Yakobo 4:7) Handle ka leswo, hava rhandza hitlhela hi va hlonipha vamakwerhu va hina hikusa na vona i va Yehovha. — Varhoma 12:10.

19. Xana Yehovha ava hakelisa kuyini lavanga va yena?

¹⁹ Bibele lahi tshembisa: “Yehovha angatavafularhela vanhu va yena”. (Tipisalema 94:14) Lexo i xitshembiso lexi tiyeke. Hambi koba lexi dumaka, Yehovha atava na hina. Hambi hofa, angehi rivali. (Varhoma 8:38, 39) “Loko hihanya hihanyela Hosi; loko hifa, hifela Hosi; hikolaho, hambi hihanya hambi hifa, hi va Hosi” ya hina Yehovha. (Varhoma 14:8) Hinkwerhu hiwu langutele hi mahlongati nkama lowu Yehovha angata pfuxa malandza ya yena yotshembeka lama feke. (Matewu 22:32) Lexi tsakisaka, hi leswaku hambi swoswi ha tikhorisa hi swihiwa swotala leswi Tatana wa hina Yehovha ahi nyikaka swona. Hilaha Bibele li vulaka ha kona, “latsaka tiko leli Xikwembu xa lona kunga Yehovha, vanhu lava avalangeke tani hi ndzhaka yakwe.” — Tipisalema 33:12.