Kombisa Ntwelawusiwana ka “Vanhu Hinkwavo
LOKO Yesu a djondzisa vadjondzisiwa va yena ndlela yochumayela mahungu yotsakisa, ava be ndleve leswaku akungata va vanhu hinkwavu lava avatava yingisa. (Luka 10:3, 5, 6) Phela leswo swa yendleka ka ntirho wa hina wa kuchumayela. Vanhu van’wana vangaha hi khoma hi ndlela ya tihanyi kumbe vahi komba mona. Loko vanhu va yangula hi ndlela leyo, swingahahi karhatela kukombisa ntwelawusiwana ni kutlhela hiva chumayela.
Munhu lweyi anga ni ntwelawusiwana a vona swilaveko ni swikarhato swa van’wana, ava tsetselela naswona a susumeteleka kuva pfuna. Xana kunga yendleka yini loko hinga kombisi ntwelawusiwana ka vanhu lava hiva chumayelaka? Kuhiseka ka hina kuta hola, ahingata lava kuva chumayela naswona ahingataswi kota kuva pfuna. Hinga fanisa kuhiseka ka hina ni ndzilo. Leswaku ndzilo wududumela, swilava hi cheletela tihunyi. Hilaha kufanaka, leswaku kuhiseka ka hina kuya kukula, hi fanele hiva ni ntwelawusiwana! — 1 Vatesalonika 5:19.
Xana hingaswi kotisa kuyini kukombisa ntwelawusiwana hambi ka swiyimo swa kukarhata? Ahi buleni hi swikombiso swinharhu leswi hingaswi tekelelaka: Yehovha, Yesu na mupostola Pawulo.
TEKELELA NTWELAWUSIWANA WA YEHOVHA
Se kuhundza magidi ya malembe vanhu vali karhi va vulavula mavunhwa hi Yehovha. Kambe yena a hambeta a kombisa ‘timpsalu ka lavangativiki kukhensa ni ka lavobiha.’ (Luka 6:35) Xana ati kombisa kuyini timpsalu ta yena? Ava lehisela mbilu hikusa a lava leswaku “vanhu hinkwavu” va ponisiwa. (1 Timotiya 2:3, 4) Hambileswi Xikwembu xi vengaka leswobiha, axiva nyenyi vanhu naswona axi lavi leswaku va lovisiwa. — 2 Petro 3:9.
Yehovha waswi tiva leswaku swamu wolovela Sathana kuyendla vanhu va kholwa mavunhwa. (2 Vakorinto 4:3, 4) Vanhu votala vadjondzisiwe mavunhwa mayelana ni Xikwembu kusukela a wutsongwanini. Xisweswo, ndlela leyi va pimisaka ni kutitwa ha yona yingaha yendla leswaku swiva karhatela kuyamukela ntiyiso. Kambe Yehovha aswi navela hintamu kuva pfuna. Hiswi tivisa kuyini?
Hi xikombiso, pimisa hi ndlela leyi Yehovha a titweke ha yona hi vanhu va doropa la le Ninivha. Hambileswi ava li vanhu va tihanyi, Yehovha a byele Yonasi a ku: “Xana anifanelanga nitsetselela Ninivha, munti lowukulu, lowunga ni vanhu lava tlulaka 120.000 kupatsa ni swifuyo swa vona swotala, lavangativiki nikatsongo kuhambana axikarhi ka leswinene ni ka leswobiha?” (Yonasi 4:11) Yehovha ava twele wusiwana vanhu va Ninivha lava avangawu tivi ntiyiso hi yena. Hikolaho, a rhumele Yonasi kuva ava ba ndleve.
Na hina hi titwa hi ndlela leyi Yehovha a titwaka ha yona. Kufana na yena, hi teka vanhu vali va lisima swinene naswona hi lava kuva pfuna leswaku va djondza ntiyiso hi Xikwembu hambiloko switi komba onge avangatawu yamukela ntiyiso.
TEKELELA NTWELAWUSIWANA WA YESU
Kufana ni Tatana wa yena, Yesu axi twele wusiwana xitshungu ‘hikuva axikarhatekile, naswona axihangalakile, kufana ni tinyempfu letingaliki ni murisi.’ (Matewu 9:36) Yesu a aswitiva leswaku hayini vanhu ava li ka xiyimo lexo. Hikuva varhangeli va wukhongeli ava khoma vanhu hi ndlela yobiha vatlhela vava djondzisa mavunhwa. Yesu a ye mahlweni a djondzisa vanhu swilo swotala hambileswi a aswitiva leswaku kutala ka lava ava yingisa tidjondzo ta yena, avangata hundzuka hikolaho ka swivangelo swotala. — Marka 4:1-9.
Unga tsemeki nhlana loko munhu anga kuyingisi ka khambi la kusungula
Loko swiyimo swa wutomi swi cinca, vanhu vangahawu yamukela ntiyiso
Loko vanhu vanga yanguli kahle loko hiva chumayela, hi fanele hi zama kutwisisa xivangelo lexiva yendlaka va yangula hi ndlela yoleyo. Kumbexana va ni mavonelo lama hoxeke hi Bibele kumbe hi Vakreste hikolaho ka leswi van’wana lava tivulaka Vakreste vayendlaka swilo swobiha. Swinga yendleka van’wana va twe mavunhwa hi leswi hiswi kholwaka. Van’wanyana kumbexana vochava leswaku maxaka ya vona kumbe vanhu va mugangeni wa vona vatava poyila loko va vulavula na hina.
Swinga yendleka van’wana lava hiva chumayelaka va humeleliwe hi swilo swobiha leswingava khumba ngopfu swinene. Kim, lweyi anga Murhumiwa, a vule leswaku vanhu votala ka teritoriyu la yena i vanhu lavanga huluka ka nyimpi naswona va luzekeliwe hi minchumu hinkwayo leyi ava li na yona. Avanga na ntshembo hi wumundzuku, ava pfilunganyekile naswona avangaha tshembi munhu. Hakanyingi vanhu va teritoriyu leli va yendla minzamu leswaku Timboni tinga chumayeli. Siku lin’wana loko Kim ali karhi a chumayela, vamu pfukelile.
Xana Kim aya mahlweni a kombisa ntwelawusiwana hi ndlela yihi hambiloko vanhu vamu khoma hi ndlela yobiha? Minkama hinkwayo a khumbuka buku la Swivuriso 19:11, lelinge: “Munhu wa vutlhari a hlwela kukariha”. Kupimisa hi leswinga yendlekela vanhu va teritoriyu la yena swimu yendla ava twela wusiwana. Naswona ahi hinkwavu lavamu khomaka hi ndlela yobiha. Kim a ni mayendzo yovuyela ya kutsakela ka teritoriyu lelo.
Hingaha tivutisa: ‘Loko aningawu tivi ntiyiso, xana anita yangulisa kuyini loko Timboni ta Yehovha ti ni chumayela?’ Hi xikombiso, loko a kova leswaku hi twe mavunhwa yotala hi Timboni ahita yangulisa ku yini? Xana ahingatati khoma hi ndlela yobiha? Ahingata langutela leswaku tihi komba ntwelawusiwana? Yesu ate hi fanele hi khoma van’wana hi ndlela leyi hi navelaka kuva vona va hi khoma ha yona. Hikolaho, hi fanele hi zama kutwisisa ndlela leyi van’wana va titwaka ha yona naswona hiva lehisela mbilu hambiloko swikarhata. — Matewu 7:12.
TEKELELA NTWELAWUSIWANA WA PAWULO
Mupostola Pawulo a kombise ntwelawusiwana hambi ka vanhu lava avamu yangula hi tihanyi loko ali karhi a chumayela. Hayini? Hikusa a akhumbuka ndlela leyi na yena a ali xiswona na angese va Mukreste. A te: “Hambilesvi khale nitshamaka nimusandza, ni kumuxanisa, ni kumupfukela. Kambe nitsetseleliwile, hikuva aniyendla hi kupfumala vutivi, ningali na kupfumela.” (1 Timotiya 1:13) Pawulo a aswitiva leswaku Yehovha na Yesu vamu kombise timpsalu. A avatwisisa vanhu lava ava lava kumu tshikisa kuchumayela tani hileswi na yena a tshameke a titwa hi ndlela leyi fanaka.
Minkama yin’wana Pawulo a akumana ni vanhu lava ava namarhela swinene ka tidjondzo ta mavunhwa. Xana a titwise kuyini? Ka Mintirho 17:16, hi djondza leswaku loko yena ali ka tiko la Atena, ‘a tlhaveke svinene, loko avona lesvaku doropa leri, ritele hi svifaniso sva svikwembu.’ Hambileswo, Pawulo a tirhise swilo leswi swimu tlhaveke swinene leswaku a djondzisa vanhu. (Mintirho 17:22, 23) Ati twananise ni xiyimo hi kucinca ndlela leyi a achumayela ha yona naswona a vulavule hi tindlela tohambanahambana ka vanhu va mindhavuku ya kuhambana ‘lesvaku hi tindlela hinkwatu atakota kuponisa van’wana.’ — 1 Vakorinto 9:20-23.
Loko hi chumayela vanhu lava yangulaka hi ndlela yobiha kumbe lava kholwaka ka tidjondzo ta mavunhwa, hinga tekelela xikombiso xa Pawulo. Hinga tirhisa leswi hiswi tivaka hi vona leswaku hi va pfuna kudjondza “mahungu yotsakisa ya leswoyampsa”. (Esaya 52:7) Makwerhu Dorothy a te: “Ka teritoriyu la hina, vanhu votala va djondzisiwe leswaku Xikwembu xi ni mona naswona xi tshamela kuyavanyisa vanhu. Nava bumabumela vanhu volavo hi kuva va namarhela ka leswi vaswi kholwaka hi Xikwembu. Ndzhaku, ni gama ni koka yingiso wa vona ka leswi Bibele liswi djondzisaka hi wumunhu la lirhandzu la Yehovha ni switshembiso swa yena hi wumundzuku.”
‘HAMBETA U HLULA LESWOBIHA HI LESWINENE’
Leswi makumu ma yaka ma tshinela, hi rindzela leswaku ndlela leyi vanhu vati khomaka ha yona yi taya ‘mahlweni yiyengeteleka kubiha’. (2 Timotiya 3:1, 13) Kambe ahi fanelanga hi tshika kukombisa ntwelawusiwana kumbe kuheleliwa hi ntsako hikolaho ka ndlela leyi vanhu va yangulaka ha yona loko hiva chumayela. Phela, Yehovha anga hi nyika ntamu lowo lavekaka leswaku hi ‘hambeta hi hlula leswobiha hi leswinene.’ (Varhoma 12:21) Jessica, lweyi anga phayona, a vule leswaku hakanyingi a kumana ni vanhu lava tibyelaka vatlhela va poyila hina swin’we ni tidjondzo ta hina. Atlhele a ku: “Leswo swa nyenyentsana. Loko ni sungula mabulo, ni yendla xikhongelo ka Yehovha ni kombela npfuno wa yena leswaku ni vona vanhu hi ndlela leyi Yehovha ava vonaka ha yona.” Leswo swi pfuna Jessica kuva anga tshameli kupimisa hi ndlela leyi a titwaka ha yona, kambe a pimisa hi tindlela leti anga pfunaka vanhu ha tona.
Hi ya mahlweni hi lavetela vanhu lava vanga ni torha la ntiyiso
Hi kufamba ka nkama, vanhu van’wana vatawu yamukela npfuno wa hina naswona vata djondza ntiyiso
Hi fanele hi khutaza vamakwerhu loko hili karhi hi chumayela na vona. Jessica a vule leswaku loko a chumayela ni vamakwerhu van’wana lavanga tshama va kumana ni xikarhato xa kufana ni xa yena, a yendla minzamu ya kuva anga tshameli kupimisa hi leswingamu yendlekela. A matshan’wini ya leswo, a vulavula hi swilo swa kahle, swofana ni mavuyelo ya kahle lawa hima kumaka hi kuchumayela hambiloko van’wana va yangula hi ndlela yobiha.
Yehovha aswi tiva kahle leswaku minkama yin’wana swahi karhatela kuchumayela. Kambe a tsaka swinene loko hi tekelela ntwelawusiwana wa yena! (Luka 6:36) Hakunene, Yehovha angata kombisa ntwelawusiwana ka vanhu va misava leyi ni kuva lehisela mbilu hilaha kungaheliki. Hinga tiyiseka leswaku yena ali tiva kahle siku leli angata helisa misava leyi. Na kungese fika siku lolelo, ntirho wa hina wochumayela i wa xihantla. (2 Timotiya 4:2) Xisweswo, ahi hambeteni hi chumayela hi kuhiseka hitlhela hi kombisa ntwelawusiwana ka “vanhu hinkwavu”.
