1, 2. Xana kulanguta Yehovha swi vula yini?

HI HANYA ka “minkama ya kukarhata.” (2 Timotiya 3:1) Loko Yehovha angese lovisa misava leyi yobiha ivi a tisa kurhula ka ntiyiso laha misaveni, xiyimo xa wutomi xitaya xi nyanya. Hi mhaka leyo, hi fanele hi tivutisa: ‘Xana ni lavetela npfun ni kongomiso wa mani?’ Loko hi ku: “Wa Yehovha”, hitava hi hlamula kahle.

² Xana kulanguta Yehovha swi vula yini? Xana hinga yendla yini kukombisa leswaku hi hambeta himu languta hambiloko hi hlangavetana ni swikarhato? Mudjondzi mun’wana wa Bibele wa khale a hlamusele lisima la kulanguta Yehovha loko hi hlangavetana ni swikarhato. (Lerha Tipisalema 123:1-4.) A vule leswaku loko hi languta Yehovha, hi fana ni mutirhi lweyi a nyikelaka yingiso ka mulungu wa yena. Hi ndlela yihi? Mutirhi a nyimela leswaku n’winyi wa yena amu nyika swakudla swin’we ni  kumu sirhelela. Hi hala tlhelo, kuva a kota kutwisisa ni kuyendla leswi n’winyi wa yena aswi lavaka, a fanele a nyikela yingiso hintamu swinene ka yena. Hi ndlela leyi fanaka, kuva hi yendla kurhandza ka Xikwembu, hi fanele hi djondza kahle Bibele siku ni siku leswaku hi twisisa leswi Yehovha aswi languteleke ka hina. Loko hi yendla tano, hinga tiyiseka leswaku Yehovha atahi pfuna loko swilaveka. — Vaefesa 5:17.

3. I yini lexingahi yendlaka hi tshika kulanguta Yehovha?

³ Hambileswi hi tivaka leswaku hi fanele hi languta Yehovha, ku ni swilo leswi minkama yin’wana swinga hi sivelaka kuyendla tano. Phela leswi swi yendlekele Marta munghanu wa Yesu. Yena “aakhomekile ngopfu hi mintirho yolungisela vapfhumba.” (Luka 10:40-42) Leswi munhu wotshembeka wofana na Marta a akhomekile hambileswi Yesu a ali kusuhi, aswi hlamalisi leswaku na hina hinga va ka xiyimo lexi fanaka. I yini leswinga hi sivelaka kulanguta Yehovha? Ka djondzo leyi, hita bula hi swilo leswi loko van’wana vaswi yendla swingahi hambukisaka a kulanguteni ka hina ka Yehovha. Naswona hita djondza leswaku hinga hambeta hi languta Yehovha hi ndlela yihi.

4. Hayini swi hlamalisa kutiva leswaku Moxe a lahlekeliwe hi lunghelo longhena ka Tiko Leli Tshembisiweke?

⁴ Aswi kanakanisi leswaku Moxe a alavetela nkongomiso wa Yehovha. Bibele li li: “atiyiselile ingi hiloko ali karhi avona lweyi angavoniwiki.” (Lerha Vaheveru 11:24-27.) Litlhela liya mahlweni li ku: “akusetshama kuva ni muprofeta aIsrayele lweyi afanaka na Moxe, lweyi Yehovha aamutiva hi nghohe yakwe”. (Deteronoma 34:10) Hambileswi Moxe a ali munghanu wa Yehovha, a lahlekeliwe hi lunghelo longhena ka Tiko Leli Tshembisiweke. (Tinhlayo 20:12) Hi mhaka muni?

5-7. Kuyendleke yini ndzhaku nyana ka loko Vayisrayele va suke Gibita naswona Moxe a yendle yini?

⁵ Na kungese hundza tiwheti timbirhi Vayisrayele va suke Gibita naswona vangese fika ka ntshava ya Sinayi, kuyendleke mhaka yotika swinene. Vanhu va sungule kukhala hikusa avangaha na mati yophuza. Va sungule kungurangurela Moxe vatlhela va kwata swinene la kakuva “Moxe ahuwelela ka Yehovha aku: ‘Nitayendla yini hi vanhu lava? Kungalikhale vatanikhandla hi maribye!’” (Eksoda 17:4) Yehovha a nyike Moxe nkongomiso lowu twisisekaka. Amu byele leswaku a teka nhonga, a yiba ka ribye la ntshava ya Horebe. Bibele li li: “Moxe a yendle tanu mahlweni ka madoda ya Israyele.” Hiloko mati ma sungula ku huma naswona Vayisrayele va phuze mati ya manyingi. Mhaka ya mati se ayi lulamisiwile. — Eksoda 17:5, 6.

⁶ Bibele li hlaya leswaku Moxe a chule ndhawu yoleyo vito la Massa, leli vulaka “Kuringa” ni vito la Meriba, leli vulaka “Kuholovisana.” Hayini? “Hikolaho ka leswi Vayisrayele vangaholovisana ni hikolaho ka leswi vangaringa Yehovha hi kuva va ku: ‘Xana Yehovha a kona xikarhi ka hina kumbe anga kona?’” — Eksoda 17:7.

⁷ Xana Yehovha a titwise kuyini hi leswinga yendleka ka ntshava ya Meriba? A vone leswaku Vayisrayele avanga pfukelanga Moxe ntsena, kambe ava pfukele yena ni wuhosi lakwe. (Lerha Tipisalema 95:8, 9.) Leswi yendliweke hi Vayisrayele aswi hoxile. Kambe Moxe a yendle leswinene. A langute  Yehovha atlhela a landzela nkongomiso wa yena hi wuxiyaxiya.

8. Xana kuyendleke yini loko Vayisrayele va li kusuhi ni kuheta liyendzo la vona a mananga?

⁸ Xana kuyendleke yini ka xiyimo lexi fanaka loko kuhundze 40 wa malembe? Vayisrayele ava li kusuhi ni kuheta liyendzo la vona a mananga. Va fike kusuhi ni Kadexi, ndhawu leyi ayi li kusuhi ni Tiko Leli Tshembisiweke. Ndhawu leyi yitlhele yi vitaniwa Meriba. * (Vona nhlamuselo ya le hansi.) Hayini? Hikusa Vayisrayele vatlhele va holovisa Moxe hi mhaka ya mati. (Tinhlayo 20:1-5) Kambe ka khambi leli, Moxe a yendle xihoxo lexikulu swinene.

9. a) Hi wihi nkongomiso lowu Yehovha awu nyikeke Moxe? b) Xana yena a yendle yini? (Vona xifaniso akusunguleni ka djondzo.)

⁹ Xana Moxe a yendle yini loko a pfukeliwa hi Vayisrayele? A kombele nkongomiso ka Yehovha. Kambe ka khambi leli Yehovha anga byelanga Moxe kuva a ba ribye. A byele Moxe leswaku a teka nhonga ya yena, a yisa vanhu kusuhi ni ribye, ivi ndzhaku a vulavula na lona. (Tinhlayo 20:6-8) Xana Moxe a yendle tano? Nikatsongo. A nyenyetsekile atlhela a kwata la kakuva a bongela Vayisrayele a ku: “Twanani, swoswi, n’wina vaxandzuki! Xana milava leswaku himihumesela mati ka ribye leli?” Hiloko a ba ribye, kungali kan’we ntsena, kambe kambirhi. — Tinhlayo 20:10, 11.

10. Xana Yehovha a yangulise kuyini ka leswi Moxe aswi yendleke?

¹⁰ Yehovha amu kwatele swinene Moxe. (Deteronoma 1:37; 3:26) Hayini? Xin’we xa swivangelo kungaha va hi mhaka ya leswi Moxe a kalaka anga yingisanga nkongomiso lowu Yehovha amu nyikeke wona.

11. Hi kuba ribye, swinga yendleka Moxe a yendle Vayisrayele va pimisa leswaku ahi Yehovha anga yendla singita. Hayini hi vula tano?

¹¹ Kungaha va ni xivangelo xin’wana lexi yendleke Yehovha a kwata. Maribye ya makulu ma kumekaka ka ntshava ya Meriba wosungula mavitaniwa granito. Kungakhataliseki ntamu lowu munhu angawu tirhisaka kuva a ba ribye leli, a mati amange humi hikusa ribye leli li tiye swinene. Kambe maribye manyingi lawa ma kumeka ka ntshava ya wumbirhi ma hambane swinene. Kutala ka wona ma vitaniwa calcário, hikolaho ka leswi ma vevukeke. Maribye lawa ma hlayisa mati ya manyingi hansi ka wona. Hikolaho, vanhu vanga kuma mati lawa hi kuma boxa. Xana kuva Moxe a be ribye matshan’wini yovulavula na lona, aswi yendlanga Vayisrayele va pimisa leswaku mati mayo tihumela hi woxe, naswona ahi Yehovha anga yendla singita? * (Vona nhlamuselo ya le hansi.) Ahiswi tivi.

12. Hi xihi xivangelo xin’wana lexingavaka xi yendle Yehovha a kwatela Moxe na Aroni?

¹² Kungaha va ni xivangelo xin’wanyana lexi yendleke Yehovha a kwatela Moxe na Aroni. Moxe a byele Vayisrayele a ku: “Xana milava leswaku himihumesela mati ka ribye leli?” Hi kuva Moxe a te “hina”, swinga yendleka a akombetela ka yena na Aroni. Moxe a kombise kukala xichavu ka Yehovha hi kukala anga yisanga kudzuneka ka Yehovha hi singita leli ali yendleke. Tipisalema 106:32, 33 yi li: “Vamupfukelile amatini ya Meriba; Naswona hikolaho ka vona, Moxe aswimufambelanga kahle. Vahlundzukise moya wa yena kutani avulavula swa hava.” * (Vona nhlamuselo ya le hansi.) (Tinhlayo 27:14) Moxe anga yisanga kudzuneka ka Yehovha. Hikolaho, Yehovha a byele yena na Aroni a ku: “N’wina amiyingisanga xilerhiso xa mina”. (Tinhlayo 20:24) Lexo kuve xidjoho lexikulu swinene!

13. Hayini ndlela leyi Yehovha a khatiseke ha yona Moxe ayi lulamile?

¹³ Yehovha a alangutele swotala ka Moxe na Aroni hikolaho ka leswi ava rhangela vanhu va Yena. (Luka 12:48) Ka nkama lowu hundzeke, Yehovha anga pfumelelanga leswaku xintukulwana hinkwaxu xi nghena ka Tiko Leli Tshembiseweke hikolaho ka leswi xingamu pfukela. (Tinhlayo 14:26-30, 34) Hikolaho, aswi lulamile kuva na yena Moxe a khatisiwa hi ndlela leyi fanaka. Kufana ni vanhu van’wana lava pfukeleke Yehovha, Moxe anga pfumeleliwanga kunghena ka Tiko Leli Tshembisiweke.

14, 15. Hayini Moxe anga yingisanga Yehovha?

¹⁴ Hayini Moxe anga yingisanga Yehovha? Tipisalema 106:32, 33 yi li: “Vamupfukelile amatini ya Meriba; Naswona hikolaho ka vona Moxe aswimufambelanga kahle. Vahlundzukise moya wa yena, kutani avulavula swa hava.” Hambilewi aku li Vayisrayele lavanga pfukela Yehovha, kuve Moxe lweyi anga kwata. Yena anga tikhomanga. A pfule nomo na anga rhanganga hi kupimisa hi mavuyelo ya kona.

¹⁵ Hi kupfumelela swiyendlo swa van’wana swimu hambukisa, Moxe a tshike kulanguta Yehovha. Ka khambi losungula leli vanhu vanga khala hi mati, Moxe a yendle leswi aswili swinene. (Eksoda 7:6) Kumbexana agame a karhala ni kunyenyentseka hikolaho ka leswi se aku hundza malembe yotala na Vayisrayele va pfukela Yehovha. Swinga yendleka Moxe a apimisa hi ndlela leyi a titwa ha yona matshan’wini yopimisa hi ndlela leyi a atadzunisa Yehovha ha yona.

16. Hayini swili swa lisima kuyanakanyisisa hi leswi Moxe aswi yendleke?

¹⁶ Moxe, lweyi a ali muprofeta wotshembeka a tshike swiyendlo swa van’wana swimu hambukisa ivi a djoha. Na hina hingaha kumeka ka xiyimo lexi fanaka. Phela aku sale kutsongo leswaku Moxe a nghena ka Tiko Leli Tshembisiweke; na hina se kusali kutsongo leswaku hi nghena ka misava leyimpsha. (2 Petro 3:13) Kunene ahiswi  lavi kulahlekeliwa hi lunghelo leli lohlawuleka. Akuva hi nghena ka misava leyimpsha, hi fanele hi hambeta hi languta Yehovha hitlhela himu yingisa minkama hinkwayu. (1 Yohane 2:17) Hi djondza yini ka xidjoho xa Moxe?

17. Hi fanele hi yendla yini leswaku hi tikhoma loko hi khunguvanyisiwa?

¹⁷ Tikhome hambiloko u khunguvanyisiwile. Minkama yin’wana hi kumana ni swikarhato leswi fanaka hi kuphindaphinda. Kambe Bibele li li: “Loko hili karhi hiyendla lesvinene hingakarhaleni, hikuva hitatshovela hi nkama wakona, loko hingaheli mbilu.” (Vagalatiya 6:9; 2 Vatesalonika 3:13) Loko nchumu xokarhi kumbe munhu wokarhi ahi khunguvanyisa, xana hi sungula hi kupimisa na hingese vulavula? Xana haswi kota kutikhoma? (Swivuriso 10:19; 17:27; Matewu 5:22) Loko va’wana vahi khunguvanyisa, hi fanele hi ‘khendlukela vukarhi’. Hi fanele hi tshika Yehovha a rihisela. (Lerha Varhoma 12:17-21, Vuhundzuluxeri bya Misava Leyintshwa.) Xana leswo swi vula yini? Hi kulehisa mbilu hi fanele hi tshika Yehovha a lulamisa xikarhato xa hina ka nkama lowu angataswi lava matshan’wini yokwata. Loko hi zama kurihisa matshan’wini yoswi tshikela Yehovha, hita va hi kombisa kukala xichavu ka Yena.

18. Hi fanele hi endla yini loko hi yamukela nkongomiso wa nyuwana?

 ¹⁸ Landzelela nkongomiso wun’wana ni wun’wana lowumpsha lowu u nyikiwaka wona. Xana hi landzelela nkongomiso wun’wana ni wun’wana lowumpsha lowu Yehovha ahi nyikaka wona? Ahi fanelanga hi hambeta hi yendla swilo hi ndlela leyi ahiswi yendla ha yona khale ntsena hi mhaka ya leswi se hi toloveleke kuswi yendla hi ndlela leyo. Matshan’wini ya leswo, hi fanele hi hantlisa kulandzelela nkongomiso wun’wana ni wun’wana lowumpsha lowu Yehovha ahi nyikaka wona hi kutirhisa nhlengeletano ya yena. (Vaheveru 13:17) Naswona hi fanele hi tivonela leswaku ‘hingatluli lesvitsaliweke.’ (1 Vakorinto 4:6) Loko hi landzelela kahle nkongomiso wa Yehovha, hita kombisa leswaku hi ya mahlweni hi languta Yehovha.

19. Hinga yendla yini kuva hinga pfumeleli swihoxo swa van’wana swi honha wuxaka la hina na Yehovha?

¹⁹ Unga pfumeleli leswaku swihoxo swa van’wana swi honha wuxaka la wena na Yehovha. Loko hi ya mahlweni hi languta Yehovha, ahingata honha wuxaka la hina na Yena kumbe kukwata hi leswi van’wana vahi yendlaka swona. Phela leswo i swa lisima swinene, ngopfungopfu loko kufana na Moxe hi ni wutihlamuleli ka nhlengeletano ya Yehovha. Hakunene, mun’wana ni mun’wana wa hina a fanele a tirha hi matimba kuva a tiyisa wuxaka la yena na Yehovha atlhela amu yingisa leswaku ata ponisiwa. (Vafilipiya 2:12) Hi fanele hi khumbuka leswaku loko Yehovha ahi nyika wutihlamuleli leli yengetelekeke, ata langutela swotala ka hina. (Luka 12:48) Kambe loko hi rhandza Yehovha hi mbilu ya hina hinkwayu, aku na nchumu ni xin’we lexingatahi nkhunguvanyisa kumbe kuhonha wuxaka la hina na Yehovha. — Tipisalema 119:165; Varhoma 8:37-39.

20. Hi fanele hi tiyimisela kuyendla yini?

²⁰ Hi hanya ka minkama ya kutika. Hikolaho, i swa lisima swinene kuva hi ya mahlweni hi languta Yehovha, lweyi “atshamaka amatilweni,” leswaku hi twisisa leswi yena alavaka kuva hiswi yendla. Hinga tshuki hi pfumelela swiyendlo swa van’wana swi honha wuxaka la hina na Yehovha. Phela leswinga yendlekela Moxe swi ni djondzo ya lisima swinene ka hina. Matshan’wini yokwata hintamu loko van’wana vahi hoxela, hi fanele hi tiyimisela kuveka ‘mahlo ya hina ka Yehovha Xikwembu xa hina, anze ahikomba timpsalo.’ — Tipisalema 123:1, 2.