1. I yini lexihi hambanisaka ni swiharhi?

YEHOVHA a nyike vanhu hinkwavu nyiko ya lisima, leyiva hambinasaka ni swiharhi. Nyiko ya kona i lipfalu. Hiswi tivisa kuyini leswaku Adamu na Eva ava li ni lipfalu? Ndzhaku ka loko va djohile, va tumbelile loko Yehovha a vulavula na vona. Lipfalu la vona ali va kingindza.

2. Xana lipfalu li fana ni bússola hi ndlela yihi? (Vona xifaniso akusunguleni ka djondzo.)

² Lipfalu i wutivi la le ndzeni la leswi lulameke ni leswi hoxeke. Wutivi leli hi lona linga kongomisaka wutomi la hina. Munhu lweyi anga ni lipfalu lelinga djondzisiwangiki kahle anga fanisiwa ni xitimela xa mati lexi kongomisiwaka hi bússola * leli tshovekeke. Magandlati ya mati ni swidzedze swinga kongomisa xitimela xa mati ka ndhawu leyi hoxeke. Kambe loko bússola li tirha kahle, linga kongomisa mufambisi wa xitimela xa mati ka ndhawu leyi a yaka ka yona. Hi ndlela leyi fanaka, loko hi djondzisa lipfalu la hina hi  ndlela leyi faneleke, litahi kongomisa hi ndlela leyi faneleke.

3. Xana kunga yendleka yini loko hingali djondzisi kahle lipfalu la hina?

³ Loko lipfalu la hina linga djondzisiwi kahle, alingatahi basopisa ka swilo leswi hoxeke. (1 Timotiya 4:1, 2) Kutlula kolanu, lingahi yendla hi tiyiseka leswaku “leswobiha i swinene”. (Esaya 5:20) Yesu a byele valandzeli va yena a ku: ‘Kutata nkarhi lowu mani na mani lweyi amidlayaka angatayanakanya lesvaku atirhela Xikwembu.’ (Yohane 16:2) Phela leswo hi leswi aswi pimisiwa hi lava dlayeke mudjondzisiwa Stefano. (Mintirho 6:8, 12; 7:54-60) Kusukela khale, vanhu vanyingi lavati vulaka vakhongeli va yendle swilo swa kubiha swofana ni kudlaya hi vito la Xikwembu. Kambe ntiyiso wa mhaka hileswaku swilo leswi vaswi yendleke swi lwisana ni minawu ya Xikwembu. (Eksoda 20:13) Hikolaho, swiyo dla leswaku lipfalu la vona aliva kongomisa hi ndlela leyi hoxeke!

4. Xana hi fanele hi yendla yini leswaku lipfalu la hina li tirha hi ndlela leyi faneleke?

⁴ Xana hi fanele hi yendla yini leswaku lipfalu la hina li tirha hi ndlela leyi faneleke? Minawu ni matshinya ya minawu ya Bibele ‘swipfuna kujondzisa, ni kulaya, ni kululeka kumbe kululamisa, ni kutolovetisa lesvolulama’. (2 Timotiya 3:16) Minkama hinkwayu hi fanele hi djondza Bibele, hi yanakanya swinene hi leswi liswi djondzisaka ni kuswi tirhisa a wuton’wini la hina. Kuyendla leswo switahi pfuna leswaku hiya hi vona swilo hi ndlela leyi Yehovha aswi vonisaka xiswona. Leswo switahi pfuna kutiyiseka leswaku lipfalu la hina lihi kongomisa hi ndlela leyi faneleke. Ahi buleni hi tindlela leti ha tona hinga tirhisaka minawu ni matshinya ya minawu ya Bibele kuva hi kongomisa lipfalu la hina.

5, 6. Xana minawu ya Xikwembu yihi pfunisa kuyini?

⁵ Loko hi lava leswaku minawu ya Xikwembu yihi pfuna, ahi fanelanga hiyi lerha kumbe kuyitiva ntsena. Hi fanele hiyi rhandza hi tlhela hiyi hlonipha. Bibele li li: “Vengani leswobiha, minamarhela leswinene.” (Varhoma 12:9) Xana hingaswi yendlisa kuyini leswo? Hi fanele hi djondza kuvona swilo hi ndlela leyi Yehovha aswi vonisaka xiswona. Hi xikombiso, ahinge swa kutikela kukuma wurhongo. Loko uya ka dokodela, aku byela leswaku u fanele u dla swakudla leswi nyikaka rihanyu, u tiwolola ni kucinca mahanyelo ya wena. Ahinge waswi landzela swileleto leswi, naswona swaku pfuna. Xana awuta titwisa kuyini hi swona?

⁶ Hi ndlela leyi fanaka, Mutumbuluxi wa hina ahi nyike minawu leyi yihi sirhelelaka ka mavuyelo ya kubiha ya xidjoho ni kutlhela ma yampsisa wutomi la hina. Hi xikombiso, Bibele li vula leswaku ahi fanelanga hi hemba, hi kanganyisa, hi yiva, hi tikhoma hi ndlela yobiha hi tlhelo la masangu, hiva ni tihanyi kumbe kutipeta ka swilo leswi fambisanaka ni wudimona. (Lerha Swivuriso 6:16-19; Nhlavutelo 21:8) Xana lirhandzu la hina hi Yehovha ni minawu yakwe ali kuli loko hi vona mavuyelo lamanene lawa hi makumaka hi kumuyingisa?

7. Xana marungula manga Bibeleni mangahi pfuna njhani?

⁷ Aku na xilaveko xova ni mavuyelo ya kubiha lama kumiwaka hi kutshova minawu ya Xikwembu leswaku hi djondza leswinga swinene kumbe leswi hoxeke. Bibele li tale hi swikombiso swa swihoxo leswi malandza ya Xikwembu ya khale maswi yendleke. Swikombiso leswi swingahi djondzisa. Swivuriso 1:5 yi li: “Munhu lweyi atlhariheke wayingisa ivi ayamukela  djondzo leyiyengetelekeke”. Djondzo leyi yi ta hi ka Yehovha naswona aku na yin’wana leyinga ya kuyampsa kutlula yona. Hi xikombiso, anakanya hi mavuyelo yobiha lawa Davhida a veke na wona hi mhaka ya leswi akalaka anga yingisanga Yehovha hi kumbuyeta na Bati-Xeba. (2 Samuwele 12:7-14) Loko u lerha rungula leli, tivutisi: ‘Xana Davhida ina a yendle yini leswaku anga weliwi hi makhombo? Loko anova ka xiyimo lexi fanaka, ina ni yendle yini? Xana anita tikhoma hi ndlela leyi hoxeke hi tlhelo la masangu hilaha Davhida a yendleke ha kona kumbe anita tekelela xikombiso lexinene xa Yosefa?’ (Genesa 39:11-15) Loko hi yanakanyisisa kahle hi makhombo lawa hinga welaka ka wona loko hi djoha, hitaya hi “venga [swilo] sva kubiha”.

8, 9. a) Xana lipfalu la hina lihi pfunisa kuyini? b) Hi kwihi kuyelana lokunga kona axikarhi ka lipfalu ni matshinya ya minawu ya Bibele?

⁸ I ntiyiso leswaku hi fambela kule ni swilo leswi Yehovha aswi nyenyaka. Kambe xana hita yendla yini loko hova ka xiyimo lexi kungaliki na nawu lowu kongomeke aBibeleni? Hitaswi tivisa kuyini leswi Yehovha aswi lavaka? Loko hi pfumelela Bibele li djondzisa lipfalu la hina, hita yendla swiboho swa wutlharhi.

⁹ Hi lirhandzu, Yehovha ahi nyike matshinya ya minawu lamanga kongomisaka lipfalu la hina. Vona leswi aswi vulaka: “Mina Yehovha, ni Xikwembu xa wena, lweyi akudjondzisaka leswaku akupfuna, lweyi akufambisaka andleleni leyi ufaneleke ufamba hi yona.”  (Esaya 48:17, 18) Loko hi yanakanyisisa swinene hi matshinya ya minawu ya Bibele naswona hi pfumelela leswaku ma khumba timbilu ta hina, hita lulamisa ni kucinca ndlela leyi lipfalu la hina li tirhaka ha yona. Leswo switahi pfuna kuyendla swiboho swa wutlhari.

10. Xana matshinya ya minawu i yini, naswona Yesu ama tirhisise kuyini loko a djondzisa?

¹⁰ Matshinya ya minawu i mintiyiso ya le Bibeleni leyi kongomisaka miyanakanyo ya hina ni kuhi pfuna kuyendla swiboho leswinene. Loko hi tiva matshinya ya minawu ya Yehovha, hita twisisa ndlela leyi aswi vonisaka xiswona swilo ni swivangelo leswimu yendlaka ahi nyika minawu yokarhi. Yesu a tirhise matshinya ya minawu kudjondzisa vapostola va yena leswaku ndlela leyi va titwaka ni kupimisa ha yona kupatsa ni swiyendlo swa vona swi ni mavuyelo. Hi xikombiso, a djondzise leswaku kukariha swinga yendla munhu ava ni tihanyi, naswona kutshamela kupimisa hi ndlela leyi hoxeke hi timhaka ta masangu swinga yendla munhu a mbuyeta. (Matewu 5:21, 22, 27, 28) Loko hi pfumelela matshinya ya minawu ya Bibele mahi kongomisa, lipfalu la hina lita djondzisiwa kahle, naswona vuyelo la kona, hita yendla swiboho leswi dzunisaka Xikwembu. — 1 Vakorinto 10:31.

11. Xana lipflalu la Vakreste la fana? Hlamusela.

¹¹ Hambiloko Vakreste vo djondzisa lipfalu la vona hi kutirhisa Bibele, vangaha teka swiboho leswi hambaneke ka timhaka tokarhi, tofana ni kuphuza byala. Bibele laswi pfumelela kuphuza byala, kambe li tsimbisa kuphuza ngopfu kumbe kudakwa. (Swivuriso 20:1; 1 Timotiya 3:8) Kambe xana leswi swi lava kuvula leswaku Mukreste lweyi a phuzaka anga fanelanga a yanakanya hi matshinya man’wana ya Bibele loko a yendla xiboho mhakeni leyi? Nikatsongo. Hambiloko lipfalu la yena limu pfumelela kuphuza, a fanele a yanakanya hi lipfalu la van’wana.

12. Xana buku ya Varhoma 14:21 yinga hi pfunisa kuyini kuhlonipha lipfalu la van’wana?

¹² Mupostola Pawulo a kombise leswaku hi fanele hi hlonipha lipfalu la van’wana loko hi yendla swiboho. A te: “Svisasekile loko ungaji nyama kumbe uganwi vhinyu, ni loko utitsona xilo xihi ni xihi lexingakhunguvanyisaka makwenu.” (Varhoma 14:21) Kutani, hambileswi hingaha titwaka hi chunsekile kuphuza, ahinga ta phuza loko lipfalu la makwerhu wa hina li khunguvanyeka hi swona. Ahinge makwerhu wokarhi a ali xidakwa na angase djondza ntiyiso naswona abohi kungaha tlheli a phuza. Ahingata navela leswaku a khunguvanyeka ivi a tlhelela ka mahanyela ya yena ya khale, aswi tanu ke? (1 Vakorinto 6:9, 10) Loko aho rhamba makwerhu yelweyo leswaku ata hungata na hina kaya, xana ahitamu sindzisa leswaku a phuza kuve angaswi lavi? Ha tiyiseka leswaku ahingataswi yendla leswo nikatsongo!

13. I yini leswi Timotiya aswi yendleke kukombisa leswaku a ahlonipha lipfalu la lava a avachumayela naswona a alava kuva pfuna kutiva ntiyiso?

¹³ Loko Timotiya aha li mumpsha, a pfumele kuyimbisiwa hambileswi aswi vavisa. Hayini?  A aswitiva leswaku kuyimbisiwa aku li ka lisima ka Vayuda lava a atavachumayela. Kufana na Pawulo, Timotiya a angalavi kukhunguvanyisa van’wana. (Mintirho 16:3; 1 Vakorinto 9:19-23) Xana na wena u tiyimisele kutitsona kumbe kuyendla xokarhi leswaku u pfuna van’wana?

14, 15. a) Xana hi fanele hi yendla yini leswaku hiva Vakreste lava wupfeke? b) Xana Vakreste lava wupfeke vava khomisa kuyini van’wana?

¹⁴ Hinkwerhu hi fanele hilwela ‘kutshika kuyima ka tijondzo letosungula ta wukreste’ ivi hi ‘kongoma kuhetisekeni kumbe kuwupfeni’ hi tlhelo la moya. (Vaheveru 6:1) Kuva se hi ni malembe yotala anhlengeletanwini ya Yehovha aswi vuli leswaku hi wupfile hi tlhelo la moya. Leswaku hi wupfa, hi fanele hi yendla minzamu ya yikulu. Hi fanele hi hambeta hi kula hi wutivi ni kutwisisa. Leswaku leswo swi koteka, hi fanele hi djondza Bibele siku ni siku. (Tipisalema 1:1-3) Loko u ya u djondza Bibele, uta ya u twisisa kuyampsa minawu ni matshinya ya minawu ya Yehovha.

¹⁵ Xana hi wihi nawu wa wukulu ka hinkwayu lowu Vakreste va faneleke vawu yingisa? I nawu wa lirhandzu. Yesu a byele valandzeli va yena a ku: “Hinkwavu vatativa lesvaku mi vajondzisiwa va mina,loko mirhandzana.” (Yohane 13:35) Ka Bibele, lirhandzu li vitaniwa “nawu lowunga wukulu” ni ‘rihetisisi la nawu.’ (Yakobo 2:8; Varhoma 13:10) Bibele li vula leswaku “Xikwembu i rirhandzu”. Hikolaho, aswihi hlamalisi leswi lirhandzu linga la lisima. (1 Yohane 4:8) Xikwembu axo va lirhandzu ntsena, kambe xili kombisa hi swiyendlo. Yohane a te: “Xilesvo, rirhandzu ra Xikwembu ritikomba ka hina hi ndlela leyi: Hi lesvaku Xikwembu xirhume N’wana wa xona lweyi angapsaliwa ali yexe kuta laha misaveni, lesvaku hitakota kuhanya hikolaho ka yena.” (1 Yohane 4:9) Loko hi rhandza Yehovha, Yesu, vamakwerhu ni vanhu van’wana,  hi kombisa leswaku hi Vakreste lava wupfeke. — Matewu 22:37-39.

16. Hayini loko hi ya hi wupfa hi tlhelo la moya, hi ya hima rhandza matshinya ya minawu ya Bibele?

¹⁶ Loko hi ya hi wupfa hi tlhelo la moya, hita ya hima rhandza swinene matshinya ya minawu ya Yehovha. Minawu yi tirha ka swiyimu swokarhi, kasi matshinya ya minawu ma tirha ka swiyimo swinyingi swa kuhambanahambana. Hi xikombiso, n’wana wa mutsongo angali tivi khombo la kuhamba xinghanu ni vanhu vobiha. Hikolaho, vapsali va fanele va veka minawu leswaku yimu kongomisa. (1 Vakorinto 15:33) Kambe loko aya a kula, a djondza kuyanakanya hi matshinya ya minawu ya Bibele. Matshinya lawa mamu pfuna kulanga vanghana lavanene. (Lerha 1 Vakorinto 13:11; 14:20.) Loko hi ya hi yanakanya hi matshinya ya minawu ya Bibele, lipfalu la hina lita hambeta lihi nyika nkongomiso lowu tshembekaka. Hitaku twisisa kurhandza ka Xikwembu ka swiyimo hinkwaswu.

17. Hayini hinga vulaka leswaku hi ni hinkwaswu leswi hiswi lavaka leswaku hi yendla swiboho swa wutlharhi?

¹⁷ Hi ni hinkwaswu leswi hiswi lavaka leswaku hi yendla swiboho leswingata tsakisa Yehovha. Ka Bibele, hi kuma minawu ni matshinya ya minawu mahi pfunaka kuva ‘lavahetisekeke, lava tilulamiseleke kuyendla ntirho wini na wini lowunene.’ (2 Timotiya 3:16, 17) Matshinya ya minawu lamanga Bibeleni mahi pfuna kutwisisa ndlela leyi Yehovha a pimisaka ha yona. Kambe leswaku hima kuma, swi lava minzamu leyikulu. (Vaefesa 5:17) Switirho swofana ni Nkongomiso Wo Endla Ndzavisiso, Watchtower Library, BIBLYOTEKA KA INTERNETI la Watchtower ni Programa ya JW Library swingahi pfuna. Loko hi tirhisa switirho leswi ka djondzo ya munhu ali yexe ni djondzo ya ndjangu, hita vuyeliwa swinene.

18. Hi wahi mavuyelo hima kumaku loko hi tirhisa minawu ni matshinya ya minawu ya Yehovha a wuton’wini la hina?

¹⁸ Phela loko hi tirhisa Minawu ni matshinya ya minawu ya Bibele, wutomi la hina lita yampsa! Tipisalema 119:97-100 yi li: “Niwurhandza swinene nawu wa wena! Niyanakanya hi wona siku hinkwalu. Xileriso xa wena xiniyendla nitlhariha kutlula valala va mina, hikuva xi na mina hilaha kungaheliki. Ni ni kutwisisa lokuyengetelekeke kutlula vadjondzisi va mina hinkwavo, hikuva niyehleketa hi switsundzuxu swa wena. Nikombisa kutwisisa kutlula vanhu lavakuleke, hikuva nihlayisa minawu ya wena.” Loko hi xava nkama wa kuyanakanyisisa swinene hi minawu ni matshinya ya minawu ya Xikwembu, swiboho swa hina swita kombisa wutlhari ni kutwisisa. Naswona loko hi tirhisa minawu ni matshinya ya minawu ya xona leswaku hi kongomisa lipfalu la hina, hita ‘kula hifika ka xiyimu lexihetisekeke xa Kriste.’ — Vaefesa 4:13.